3
Bajayajebi baja cajena apopatacataexae, belia baja apopanajamatabëcuenesaëtaponaejitsipaenë matawëjëa pata-ewetaponaejawa bitso pajitsipajë patayapëtaenexa xaniawaetsia panejinawanapaecuene. Nexata baja, caeliwaisi panajuaxainajë, ëTimoteo pata-itorobinexa paxamëjawabelia papecataenexa. Paxanëbeje, pijinia Silvanobeje, panacopatsianajëbeje Atenas tomarata.
2 Nexata baja, pacato-itorobatsibeje wajabananë Timoteo, papecayawenonaenexa, papecajamatabëcuene-asaëya-exanaenexanua pane-itaxutuajamatejemajawa Jesús-jawabelia. Bajaraponë baja cajena Dioso pijacuene patatonajuanacuenebinëbeje, jiwi patatsipaebaponaenexabeje pexanialiwaisi, Cristo peliwaisi.
3 Timoteo pacato-itorobaliatsibeje, tsipaji apopajitsipaenëbeje itsajiwi-ata, paxamëyajuwënëjiwi, papecajamatabëcuenenawitsia-exanaejawa Jesús peliwaisiwecua, papecabejiobia-exanaejawata bajarapaliwaisi yabara. Paxamë baja cajena payapëtaneme Dioso wajanacatocopatsijawa itsamonae wajanacabejiobia-exanaponaenexa, Jesucristojawabelia wajasiwanajamatabëcuenecopabixae.
4 Pamatacabi abaxë pacayajawajinawanapatsi, tajëwelia baja cajena pacatsipaebabiabatsi wajanacatocopiapatsijawanexa itsamonae wajanacabejiobia-exanaponaejawa Jesús pijajiwixaetsi. Nexata jane baja, bajarapacuene aeconoxae pacatocopiapata, xua pewajënaeya payapëtaneme.
5 Bajaraxua yabara baja, aponajamatabëcuenesaëtaponaejitsipaenë matawëjëa ta-ewetaponaejawa tayapëtaenexa panejinawanapaecuene yabara. Nexata, itorobajë Timoteo papecataenexa pane-ajamatabëcuenesaëtsawanapaejawa, pane-itaxutuajamatejematsawanapaejawanua Diosojawabelia. Xanë bitso pacacacujunawatsi picani paxamë yabara, jiwi pejamatabëcuene-ëjëbinë papecajamatabëcuenefaefaenaya-exanaeyaniwa papecajamatabëcuene-ëjëbijawata. Belia, bajarapacuenia pacacopabia-exanaejitsipa Dioso pane-itaxutuajamatejemajawawecua. Bajarapacuenia Satanás itsa paca-exanaejitsipa, nexata paxanëbeje panacueratsipajëbeje pexanialiwaisi patacatsipaebijawabeje.
6 Itsiata, Timoteo aeconoxae penawiatsinërena paxamëjawawerena, itsa parena Tesalónica tomarawerena, panetsipaebabeje pexanialiwaisi paxamë yabara. Paneyapëtaeya-exanabeje xaniawaetsia Dioso pane-itaxutuajamatejematsawanapaejawa pane-asiwatsawanapaejawa itsamonae-ata. Panetsipaebabejenua panejitsipaejawanua bitso patanetaejawamë, pacuenia paxanë-ata jamatabëpacatanetsi picani.
7 Itsamonae panebejiobia-exanaponae-atabeje majotaje, patacawënëliwaisitaejawata Dioso asaëya pane-itaxutuajamatejematsawanapaejawa, bajarapaliwaisi panejamatabëcuenebarëyaya-exanabeje cajena.
8 Xaniajaiya patayapëtaexae paxamë yabara, nexata panajamatabëcuenesaëtajëbeje.
9 Ayaicuenia patanejamatabëcuenebarëyaya-exanaexaemë, bitso pexaniajamatabëcuene parajutajë Diosojawabelia paxamë yabara.
10 Nexata, daxita patajamatabë-ëthëtowetsina pawajëtaponajë Diosojawabelia paxamë yabara, matacabita, merawi-ata, patanetocopatsinexa icatsia pataponaenexa paxamëjawabelia, patacataenexa. Pajitsipajënua patacayapëtaeya-exanaejawa paliwaisi abaxë pacatosaica, pane-itaxutuajamatejemanexa matatoxenetsia Diosojawabelia.
11 Bitso cajena pajitsipajë waxa Dioso, wajatuxanenë Jesucristobeje, pataneyawenonaejawa pataponaenexa paxamëjawabelia.
12 Pacatowajëtatsi Diosojawabelia panejamatabëcuenewitsabaponaenexa panewajënaeyabelia, namata-enetsia panena-asiwatsawanapaenexa, pacuenia paxanë-ata paca-asiwatsi tsawanapae.
13 Pacatowajëtatsinua Dioso papecajamatabëcuene-asaëya-exanaenexa, xaniawaetsia pane-itaxutuajamatejemajawa Diosojawabelia, papecajamatabëcuenecaëjëpaeya-exanaenexanua Dioso pejitsipaecuenia panejinawanapaenexa. Nexata, pamatacabi icatsia patsianica wajatuxanenë Jesús, pijajiwi yajawa, aneconijibia panubenaename waxa Dioso pitabarata.