4
¡Bajarapacuenia Cristo wajanacato-exanaexae, tajamonae, bitso pataca-asiwawi, pajamatabëcuenesaëmëre tsawanapae, pacopatsinejewamë, panejumexaniataejawa Jesús peliwaisi! Bitso cajena paca-itaxanatsi. Jamatabëpacatanetsi. Pacasiwajamatabëcuenebarëyatsinua, tsipaji xaniawaetsia pacatsitecawanapame panejumexaniataejawa Jesús peliwaisi patacatsipaebicuenia.
Pablo pemuxujiobiliwaisianë
2 Papetiriwamëbeje, Evodia, Síntiquebeje, pacatoyaquinatsibeje patacacuene-itawetsinexabeje. ¡Pëtsa baja icatsia pematatsënëa namata-enetsia panajume-anaenotamebeje! ¡Panasiwajamatabëcuenexanepanarebeje, Jesús peliwaisi panenajuajumexaniataewaxaebeje!
3 Xamë, Timoteo, xaniawaetsia taneyawenonaenëmë Dioso pijacuene tanacuenebijawa, cawajëtatsi neyawenonaejawanexa bajarapowabeje namata-enetsia penasiwajamatabëcuenexanepanaenexabeje, penajume-anaenotsiyaniwabeje. Imatami, bajarapowabeje bitso neyawenonabeje tatsipaebijawa itsamonaejawabelia pexaniajailiwaisi, pecapanepaeliwaisinexatsi Diosojawabelia. Bajarapamatacabijawa Clemente, itsamonae-ata patanajuanacuenebiwi, neyawenonawanapa. Daxita baja bajarapamonae wënërubena Dioso pijabaxutota, pabaxutojawata wënëyaquinarubatsi pamonae pexainaewinexa matacabi apopewerewerecaejawa.
4 ¡Pajamatabëcuenebarëyamëre tsawanapae caematacabi canacujitsia, Dioso papecato-exanaejawa yabara wajatuxanenë Cristo pejamatabëcueneta! Icatsia, pematatsënëa pacajumaitsitsi. ¡Pajamatabëcuenebarëyamëre tsawanapae!
5 Jamatabëcuenexanepanaeya xaniawaetsia pajinawanapaename, daxitajiwi papecacueneyapëtaenexa panejamatabëcuenexanepanaejawa, tsipaji rabaja wajatuxanenë imoxoyo pewajënae pepatsinexatsica.
6 ¡Pëtsa itsacuenejawayo-ata yabara pajamatabëcuenebëjamë! ¡Biji rajane, bajarapajamatabëcuenebëjaijawanë yabara pawajëre Diosojawabelia! ¡Pexaniajamatabëcuenenuaa parajutabiabare Diosojawabelia papecayawenonaejawanë yabara!
7 Nexata, Dioso pacajamatabëcuenewënëtsiana pijapebaraxanepanaejamatabëcuene panecanaëjëtsijawawecua Cristo Jesús pejamatabëcueneta, panewajënaeyabelia panejamatabëcuenebëjaiyaniwa.
8 Tajamonae, pecopiarutsiliwaisita pacatoyaquinatsi mapacueniaje. ¡Panajamatabëxainabiabare ëpexaniajailiwaisi, daxita penayaiyataecuene, daxita pexanepanaecuene, daxita pia-urataecuene, daxita piasiwacuene, daxita pesiwabarëyacuene, daxita pepopexanepanaecuenejawanë-ata! Daxita bajaraxuanë pane-exanaejawa yabara jiwi pexaniacuenia pacawënëxaniatsiana. ¡Bajara-ëxuanë panajamatabëxainabiabare pane-exanawanapaenexa!
9 ¡Daxita pacuenia pacatsipaebatsi, pacatsitaponaponatsinua, bajarapacuenia pajinawanapare! Nexata, Dioso ponë xaina pebarajamatabëxanepanaecuene pacajamatabëcuenewënëtsiana paneyajawajinawanapaenexa, panejamatabëcuenebëjaiyaniwa.
Pablo pexaniajamatabëcuene rajuta Filipos tomarapijiwijawabelia ofrenda petojebabiabixaetsi
10 Wajatuxanenë bitso nejamatabëcuenebarëyaya-exana, tsipaji baja paxamë icatsia panesiwanajamatabëxainame, pataneyawenonaenexamë. Bayajebicujinae, ofrenda apopaneto-itorobi-atamë, yapëtaniji apopatanenacofënëtsijawamë. Pacuenenajematame saya apopanecaxitajarabixae pacuenia paneto-itorobijitsiamë.
11 Bajarapacuenia apopacatoyaquinaetsi ofrenda pataneto-itorobiwajënaeyamë, bitso tanamatawenonaexae itsacuenejawayo. Dioso tanecujarubixae tajamatabëcuenebëjaiyaniwa daxitacuene yabara, siwajamatabëcuenebarëyanë saya xuayowajëto xainajë.
12 Yapëtaniji jamatabëcuenebarëyaya taponaponaejawa, tsiquirijawayo xainae-atanë, ayaijawa taxainaematacabi-ata. Yapëtanijinua pacuenia jamatabëcuenebarëyanëjitsia daxitamatacabijawabelianexa. Nexata, itsa xainajë daxita tanamatawenonaejawaxi, barëyanë. Apoxainae-atanë itsacuenejawayo, itsiata barëyanë tsabiabi.
13 Daxita xua netocopiapatapona, Cristo pesaëta nejamatabëcuenecaëjëpa tanajamatabëcuenesaëtsinexa.
14 Itsiata baitsi jane, paxamë pexaniacuene paneto-exaname, itsa paneto-itorobaremena bajarapa-ofrenda, bitso tanamatawenonaejawata.
15 Payapëtaneme rabaja mapacueneje. Pamatacabi taxuxuabajë tatsipaebanajetarucaejawa jiwi pecapanepaeliwaisinexatsi Macedonia nacuajawa, itsa ponaejitsianë panijanacuawecua, paxamë Filipos tomarata panejinawanapaewi, panerajutame ofrenda tajanamutonexa, itsamonae Jesús pijajiwiwecua.
16 Orijibia, pamatacabianë ponaponajë Tesalónica tomarata, anijatonë paneto-itorobabiabame ofrenda, tanamatawenonabiabijawata.
17 Siwabarëyanë tsabiabi itsa paneto-itorobabiabame bajarapacuenia. Itsiata, apopacatoyaquinaetsi pematatsënëa patanerajutsinexamë. ¡Jume baja cajena! Biji rajane, pacatojitsipatsi pataneyawenonaejamatabëcuenemë Dioso papecarajutsinexa pexaniacuenejawa.
18 Nexata, pitajë daxita pataneto-itorobijawamë Epafroditota. Xainajë baja nexata bitso ayaijawa, tanamatawenonaejawa matatoxenetsia. Pa-ofrenda paneto-itorobame, Dioso bitso siwajamatabëcuenebarëya, tsipaji tsitapexaniatuxujuwijawatsi.
19 TajaDioso, ponë itaxutuajamatejemanë tsaponaponae tane-ewetsinexa, bajaraPonë bitso pexainaenëxae, paxamë-ata pacarajutsiana daxita panenamatawenonaecuenejawanë, Cristo Jesús pejamatabëcueneta.
20 ¡Waxa Dioso ayaijamatabëcuenenë daxitamatacabijawabelianexa! Bajara-itsi tsane.
Pablo penapëjiobiliwaisi
21 Nebajacobiana paxamëjawata daxita Jesús peliwaisi pejumexaniataewi, pamonae Dioso pitapetsiwi pijajiwinexa. Pamonae xanëjawata jinawanapa, Jesús pijajiwi pacabajacobalia.
22 Daxita Dioso pitapetsiwi pijajiwinexa, Cristo Jesús pejamatabëcueneta, mapatomarataje pejinawanapaewi, pacabajacobalia. Romano nacua pepopewetsinë pijabota penacuenebiwi-ata bitso pacabajacobalia.
23 Pacatojitsipatsi, wajatuxanenë Jesucristo pepeca-itaxutotsoniataejamatabëcuene papecatsijamatabëcuenewënëcaenexa. Bajara-itsi tsane.