Dioso jiwi aneconijibia tane, pesiwanajamatabëcuenecopabijawata Jesucristojawabelia
3
Tajamonae, imatami pacatoyaquinatsi baja. ¡Panasiwajamatabëcuenebarëyamëre wajatuxanenë Cristo papijajiwixaemë! Xanë apopacasiwacueranaetsi icatsia patacatoyaquinaejawa, copiaya patacatoyaquinaeliwaisimi, tsipaji xanepana patacajamatabëcueneyawenonaejawa bajarapaliwaisita, itsamonae papecayamaxë-itojorobiyaniwa.
2 ¡Panayajiwitaema be-awiri pianaepanaewiwecua, tsipaji raja apopiacuene-urawi pexanaejawa yabara! ¡Panayajiwitaema pamonae bijiaya Dioso pijacuene petonacuenebawanapaewi! ¡Panayajiwitaemanua pamonae itorobabiaba Jesús pijajiwijawabelia penabo-upiperabëcaucubinexa judíowicuenia, pepacuene Dioso petaenexatsi pijajiwicuenia!
3 Itsiata, waxaitsi pepopijajiwitsi Dioso, aponabo-upiperabëcaucubi-atatsi, tsipaji yaiyataeya Espíritu Santo wajanacajamatabëcuenematacaponaecuenia tonacuenebawanapatsi Dioso. Natoyapëtanetsinua ëCristo Jesús pejamatabëcueneta Dioso wajanacacapanepaejawa, itsajawa pematatsënëa exanaenejewatsi Dioso aneconijibia wajanacataenexa. Bajaraxuata, jamatabëcuenebarëyatsi Cristo Jesús pijajiwixaetsi, exanaenejewatsi wajaperabëtota naniapijicuene.
4 Bajarapamonae itsa naitaxutuajamatejema Dioso pecapanepaejawanexatsi penabo-upiperabëcaucubijawata ayaicuenia petonacuenebixaenua Dioso pijacuene, xanë biji matatoxenetsia bajarapamonaewecua xainajë ta-exanaecuenejawanë, xua yabara Dioso necapanepaejitsipa.
5 Xanë picani mata-itsinëje. Itsa baja xainajë ocho pamatacabibeje tanaexanaecujinae, judíowicuenia nebo-upiperabëcaucuta. Xanë raja Israel-pijinë pemomoxiyajuwënënënë, tsipaji tajasalinainëmi Benjamín-pijinë, Israel-pijinë pexi pebijiwiyajuwënënë. Taxa, taenabeje, judíojiwibeje. Nexata, xanë pepohebreonënë. Orijibia, xanë fariseocowënënë. Nexata, pacuenia fariseowi bitso casaë pejumecowënëtsijawa Dioso penajumecopatsiliwaisi Moisés-pijinëta, bajarapijinia pacuenia xanë-ata ta-itsinëmi tsaponaponae.
6 Bitso ta-asiwajamatabëcuene xainajë Dioso penajumecopatsiliwaisi Moisés-pijinëta, bejiobia-exanabiabajë Jesús pijajiwi, tsipaji picani, netsita saicayaliwaisi jumexaniatane, Dioso aneconijibia petaenexatsi. Bajarapaliwaisi, bitso xaniawaetsia jumecowënëtaponaponajë, xanetsinejewanë caepitorobiliwaisiyo, Dioso aneconijibia tanetaenexa.
7 Daxita bajarapaliwaisi netsita namatamota picani, xua yabara xanë siwabarëyanë, Dioso tanecapanepaenexa. Itsiata, aeconoxae bajaraxuanë netsita natsiquejemajawanë, tsipaji baja siwanajamatabëcuenecopatajë Cristojawabelia, tanewecua-ajibia-exanaenexa tajaneconi.
8 Cristo pejamatabëcueneta, aeconoxae baja yapëtaniji daxita bajarapaliwaisi piamatamobiliwaisicuene. Daxita bajarapaliwaisiwecua netonamatamota tayapëtaenexa xaniawaetsia tajatuxanenë Cristo Jesús. Cristo taneyajawaponaponaexae, tajumecowënëtsiliwaisimi netonaexana piamatamobijawa. Bajaraxuata, copatajë baja, tsipaji netsita penaxuabiliwaisi.
9 Bitso jitsipajë caejamatabëcuene taxainaejawa Cristojawabelia. Itsiata, apocaxitajarabinë bajarapajamatabëcuene taxainaenexa tajumecowënëtsijawata Dioso penajumecopatsiliwaisi Moisés-pijinëta. Biji rajane, tasiwanajamatabëcuenecopatsijawata Jesucristojawabelia, Dioso newecua-ajibia-exana tajaneconi. Matapania jane baja, caxitajarabajë caejamatabëcuene taxainaejawa Cristojawabelia.
10 Tawajënaeyabelia bitso jitsipajë daxitacuenewecua tayapëtaejawa pacuenia Cristo jamatabëcuene-itsi. Jitsipajënua tayajawaponaponaejawa pasaëtaa Cristo petëpaejawawecua Dioso matacotatsi. Cristo pijajiwitonëxaenë, xanë-ata nacaewetsianajë tanebejiobia-exanaejawa, pacuenia bajaraPonë bejiobia-exanatsi. Nacaewetsianajënua tanebeyaxuabinexa, pacuenia bajaraPonë nacaeweta pebeyaxuabinexatsi.
11 Bajaraxua jitsipajë, tsipaji xanë-ata copia-ewetaponaponajë Dioso, tanematacotsinexa tatëpaejawawecua.
Pablo muxujioba Jesús pijajiwi penajamatabëcuenesaëtsinexa, xaniawaetsia pejinawanapaenexa Dioso pejitsipaecuenia
12 Xanë yapëtaniji baja apotajamatabëcuenejëpaejawa abaxë pacuenia Cristo Jesús jamatabëcuene-itsi, apotajumecowënëtsicapanepaejawanua daxita pacuenia Dioso netocopata ta-exanaenexa. Itsiata, tawajënaeyabelia tanejamatabëcuenecaëjëpaponaenexa, ca-asaënë tsaponaponae ta-exanaejawa pacuenia Dioso netojitsipa. Jamatabëcuenecopia-ewetaponaponajë tacaxinaenexa Cristo pajamatabëcuenenaweretsijawa copiaya xaina. Bajaraxua taxainaenexa Cristo nesiwatëpa baja cajena.
13 Xaniajanë. Apocaxinaenë abaxë tajamatabëcuenejëpaejawa Cristo pacuenia jamatabëcuene-itsi. Itsiata, copiayapijicuenemi nacofënëtajë baja tajumecowënëtsijawami, Cristo pejamatabëcueneta. Juya, siwanajamatabëcuenesaëtajë tawajënaeyabelia tacaxinaenexa xaniawaetsia tatoponaponaejawa Dioso, itsajamatabëcuenexainaenejewanë.
14 Pacuenia pecujinaejinaenë nasisaëta penacanabinexa, perajutsinexatsi premiowënëjawa, bajarapijinia pacuenia xanë-ata najamatabëcuenesaëtajë, xaniawaetsia tatoponaponaejawa Dioso, tanerajutsinexa pexaniacuenejawa athëbëtatsia. Dioso athëbëwetsica nejunatsiana bajaraxua tanerajutsinexa, Cristo pejamatabëcueneta.
15 Bajarapacuenia daxitatsi, wajajamatabëcueneliwaisinaweretsiwi, Dioso pijacuenejawata, benajamatabëcuenesaëtawanapatsi xaniawaetsia wajatojinawanapaenexa Dioso. Itsa abaxë paxamë saicaya itsajamatabëcuene paxainame, nexata bajaraxua yabara Dioso xaniawaetsia pacayapëtaeya-exanaena.
16 Itsiata baitsi jane, waxaitsi wajawajënaeyabelia bejinawanapatsi Dioso wajanacatonajumecopatsicuenia.
17 ¡Tajamonae, pacuenia baja pacatsitaponaponatsi, bajarapijinia pacuenia paxamë-ata pajinawanapare! Panaitaxutocaewetsianamenua paxamëyajuwënëwi, xaniawaetsia pejinawanapaewi tatsitaponaponaecuenia, bajarapacuenia paxamë-ata panejinawanapaenexa.
18 Ayaibitsaëtoxaneto paxamëyajuwënëwi nawënërubi-ata Cristo pijajiwicuene, bajarapamonae itsiata pexanaecuenejawata nacuene-itajëta pitoyajawa Jesucristo cruzata pesiwatëpaejawatatsi, pecapanepaenexatsi. Bajarapamonae yabara pacatsipaebatsi baja anijatonë. Itsiata, icatsia aeconoxae ya-itaxutonueya pacatsipaebatsi.
19 Bajarapamonae Dioso werebiabianatsi, mapanacua pecopiarucaematacabitaje, tsipaji bitso jitsipa pijacuata penatojitsipaecuenia pexanawanapaenexa. Pia-uracuene pexanabiabijawata najamatabëcuenebarëyaya-exanabiaba. Ëmapanacuapijicuene saya siwanajamatabëxainabiaba.
20 Waxaitsi raja Dioso pijanacuapijiwitsi. Bajaraxuata, copia-ewetawanapatsi wajatuxanenë Jesucristo pepatsijawatsica, wajanacacapanepaenexa Dioso pijanacuayabetsia.
21 BajaraPonë itsa patsianica, nacaperabë-itothianaena, wajaperabëjëpaenexa pacuenia bajaraPonë perabë-itsi athëbëtatsia. Nexata, pasaëta Jesús caëjëpatsi pitorobinexa daxitacuene, bajarapasaëta nacaperabë-itothianaena, apowajatëpaeperabëto wajaxainaenexa.