Dioso pexitsi bejinawanapatsi pejitsipaecuenia
5
¡Dioso papeximë, papeca-asiwawinua, pacuenia Dioso jamatabëcuene-itsi, bajarapacuenia pajamatabëcuene-itsimëre tsawanapae.
2 ¡Pacuenia Cristo naca-asiwa, bajarapijinia pacuenia paxamë-ata pana-asiwamëre tsawanapae! Nacopatanua Cristo pijacuata pebeyaxuabinexatsi wajaneconijamatabëcuene, penajamatabëcuene-itajëtsinexa wajanaca-asiwajawa. Pacuenia altar-jumata petajuitsidajubinë jiwi pijaneconijamatabëcuene capitsapa Dioso pexaniatuxusia Diosonexa, bajarapacuenia Dioso tsitabepexaniatuxusitsi Cristo wajanacasiwatëpaejawata wajaneconijamatabëcuene. Nexata, bitso siwajamatabëcuenebarëya.
3 ¡Dioso papeximë, pëtsa payabaracuaicuaijamë pane-exanaejawa pibisiacuene panewitota,b pia-uracuenejawanë-ata! ¡Pëtsa pajitsipame ayaijawa panexainaenexa, panenamatawenonaejawawecua! Bajarapitsipibisiacuenejawanë Dioso pexi apobe-exanae.
4 ¡Pëtsa pacuaicuaijamë pibisiajumenë, natsiquejemajumenë-ata! ¡Pëtsa panenajume-itacanitsijawata pacuaicuaijamë pia-uracuene yabara! Bajarapitsipibisiajumenë Dioso papeximë apobepacuaicuaijaimë. ¡Biji rajane, Diosojawabelia pexaniajamatabëcuene parajutabiabare, panewënëxaniatabiabijawata!
5 Payapëtaneme rabaja pexaniajaicuene pibisiacuene pewitota pexanaponaponaejiwi,c daxita pibisiacuene pia-uracuenejawanë pexanaejiwi, ayaijawa pexainaenexa pejitsipaejiwi-ata penamatawenonaejawawecua, apojone tsane Dioso, Cristobeje, pijanacuayabetsia. (Bajarapajiwi jamatabëcuenejëpa bepewajëcaejiwi jumapecataeya pexanaenëanëjawabelia, mapanacuapijicuenejawanëje asiwaya petaexae Diosowecua.)
6 ¡Pëtsa itsajiwi-ata pacayamaxë-itojoroba natsiquejemaliwaisianë papecatsipaebijawata, tsipaji Dioso ayaicuenia naneconitsia-exanaena bajarapitsipibisiacuenejawanë pexanawanapaewi, pamonae apojumecowënëtsitsi!
7 ¡Pëtsa pana-exaname xua bajarapamonae exanawanapa!
8 Paxamë picani bajayata pajamatabëcuene-aitaquirimë tsawanapae. Itsiata baja, aeconoxae paxainame penaitayotsijamatabëcuene Cristo pejamatabëcueneta. ¡Bajaraxuata, pajinawanapare Dioso papeximë papecajamatabëcuene-itayotsiwicuenia!
9 ¡Nexata, pitayotsijamatabëcuene panexainaexae, jiwi asiwaya payawenonare! ¡Perowialiwaisi paxainare! ¡Xaniajaiya daxitacuene pa-exanawanapare!
10 ¡Panacuenecanaëjëre Dioso itsa pacasiwajamatabëcuenebarëya pane-exanaejawa yabara!
11 ¡Nexata, pëtsa pa-exaname papibisiacuene exana piajamatabëcuene-itaquiriwi, tsipaji bajarapacuene Dioso tsitapiamatamobicuenetsi! Nexata, apopacajamatabëcueneyawenonae tsipae caejawayo-ata. Biji rajane, Dioso peliwaisita payapëtaeya-exanaename, bajarapamonae peyapëtaenexa xua piabejecuene. Pa-itawetsianamenua bajarapapibisiacuene pexanaeyaniwa.
12 Piajamatabëcuene-itaquiriwi pibisiacuene muetsia exanawanapa, bitso waja-ajume-uracuene wajapaebijawa itsamonaejawabelia.
13 Itsiata baitsi jane, pacuenia pitayotsicotia napebetsia-exana daxitacuene, bajarapijinia pacuenia bajarapamonae nacueneyapëtaena bitso pibisiacuene pexanaejawa, pane-itawetsijawata Dioso pejumeliwaisita.
14 Bajaraxua yabara, itsamonae Dioso pijajiwi jumaitsi mapacueniaje:
«¡Panajamatabëcuene-itawabare panetëpaejamatabëcuenewecua, pibisiacuene pane-exanawanapaejamatabëcuene! Nexata, Cristo pacajamatabëcuene-itayotsiana pexaniajailiwaisita»,d jai itsamonae Dioso pijajiwi.
15 ¡Nexata, xania baja tsane! ¡Nayajiwitaeya pajinawanapare! ¡Pëtsa pajinawanapame Dioso apopeyapëtaewicuenia! ¡Biji rajane, pajinawanapare Dioso paneyapëtaewicuenia!
16 ¡Nexata, caematacabi canacujitsia, xua pacatocopiapatapona pane-exanaenexa, bajarapaepatota xaniawaetsia pa-exanawanapare Dioso papecatocaëjëtsicuenia, tsipaji raja jinawanapatsi piabejematacabita!
17 ¡Pëtsa pajinawanapame piajamatabëcuenecowëbiwicuenia!e ¡Biji rajane, paneyapëtaewicuenia pa-exanawanapare Dioso papecatojitsipaecuenia!
18 ¡Pëtsa paitajibimë tsabiabi, tsipaji raja apopanacuenecataitsimë tsipae pibisiacuene pane-exanaeyaniwa! ¡Biji rajane, Espíritu Santo patonacopare papecatsijamatabëwënëcaenexa, pepecajamatabëcuenematacaponaenexa Dioso pejitsipaecuenia pane-exanabiabinexa!
19 ¡Nexata, Espíritu Santo panejamatabëcuenewënëcaexae, daxita panejamatabë-ëthëtowetsina namata-enetsia panatsipaebabiabare wajatuxanenë ayaijamatabëcuene pexainaejawa yabara! ¡Panaxëanabiabare pawajianë rubena Salmos-baxutota, himnobaxutotanua, pawajianë-ata Espíritu Santo jemata pacanaxëanaeya-exanaena!
20 Bajarapacuenia pacopatsinejewamë, pexaniajamatabëcuene parajutabiabianame Diosojawabelia daxitacuene yabara, wajatuxanenë Jesucristo pewënëta.
Pablo muxujioba penacojiobiwi peliwaisicuenia
21 ¡Jesús papijajiwimë, Cristo asiwaya paneyaiyataexae, padaxitamë namata-enetsia panajamatabëcuene-ewere, beweliajamatabëcuene nataeya panenajamatabëcueneyawenonaenexa!
22 ¡Paxamë papetiriawimë, pane-amonajiwi panexainaewi, pacuenia wajatuxanenë Cristof yaiyataeya pajamatabëcuene-ewetawanapameg pejitsipaecuenia pane-exanawanapaenexa, bajarapijinia pacuenia yaiyataeya pane-amonajiwi pajamatabëcuene-ewetawanapare!
23 Pacuenia Dioso copata Cristo bepematabocoto daxita pijajiwinexa, pamonae bepeperabëto penaexanaewi penamatacaitorobinexa, bajarapijinia pacuenia pacatocopata pane-amonajiwi bepanematabocotonexa, asiwaya papecanamatacaitorobinexa. Cristo penamatacaitorobinë-ata, pijajiwi piasiwaxae, nacaeweta pebeyaxuabinexatsi pecapanepaenexah pijaneconiwecua.
24 Nexata, pacuenia daxitatsi wajatuxanenë Cristo pijajiwitsi yaiyataeya jamatabëcuene-ewetawanapatsi, pejitsipaecuenia waja-exanawanapaenexa, bajarapijinia pacuenia petiriawi, pamonajiwi pexainaewi, bejamatabëcuene-ewetawanapa daxitacuene yabara.
25 ¡Paxamë pijinia papebijiwimë, panexainaewi panijawajiwi, pa-asiwamëre pacuenia Cristo asiwa pijajiwi! Piasiwaxae bajarapamonae yabara, nacaeweta pebeyaxuabinexatsi, pecapanepaenexa pijaneconiwecua.
26 Nexata, pijajiwi petsatsinexa saicaya mapanacuapijiwiwecua, ajamatabëcuenexuirajibia-exana peliwaisita, merata bepejamatabëcuenequiatsiwi.i
27 Cristo bajarapacuenia exana, itsamatacabi pijajiwi, pejamatabëcuenenaitabëtsiwicueniaj penaitajëbinexa Dioso pitabarata. Cristo pewecua-ajibia-exanaexae pijaneconimi, bajarapamonae apoxainae itsacujiruneconi, xua yabara bijiaya copiapitsijitsiatsi. Biji rajane, pepopianeconijibiwixae, apopexainaexaenua caejawayo-ata bepenaxuirabicuene, jamatabëcuenenaitabëtanubenaena Dioso pitabarata.
28 Pacuenia Cristo asiwa pijajiwi, pamonae bepeperabëto pexanaewitsi, bajarapijinia pacuenia pebijiwi biasiwa pijawajiwi, pacuenia pijacuata naperabë-asiwa. Ponë asiwa pijawa, pepacuene pijacuata na-asiwa.
29 Itsajiwi-ata pijacuata aponaperabë-itoya. Biji rajane, xaniawaetsia naperabë-eweta. Pexaejawanua xaeyabiaba pewëna-asaënexa.
30 Nexata, bajaraPonë pijajiwitsi bepeperabëtotsi,k bepeyajuwënëwitotsi, bepeyajuwënësitotsinua. Nexata Cristo xaniawaetsia naca-eweta.
31 Bajaraxua yabara Dioso pejumeliwaisibaxutota jumaitsi mapacueniaje: «Pebi itsa pita petiriwa pijawanexa, bawecuanatsata paxa, pena-ata, saicaya pebarëponaponaenexa pijawa. Nexata, anijajiwimibeje naexana becaejiwi, peperabëto»,l jai.
32 Mapaliwaisije Dioso bajayawerena muetsia xainabuata. Itsiata, maparucaeje, matapania neyapëtaeya-exana, pacuenia Cristo pijajiwitsi bepeperabëtotsim wajanaca-exanaejawa, paxanë pajudíowinë, paxamë apopajudíowimë-ata.
33 Bajaraxuata, icatsia pacatsipaebatsi. ¡Paxamë papebijiwimë, pacaenëmë canacujitsia, pa-asiwamëre panijawajiwi, pacuenia panijacuata panaperabë-asiwamë! ¡Paxamë pijinia papetiriawimë pane-amonajiwi payaiyataema!