Pacuenia bejamatabëcueneyawenonatsi pamonae pibisiacuene exana Jesús pijajiwituatuajëta, yabara peliwaisi
6
¡Tajamonae, itsa payapëtaneme Jesús peliwaisi pejumexaniataejiwi pejopaejawa, pibisiacuene pexanaexae, ayaijamatabëcuenejiwi nataeya pëtsa pabijataneme! Biji rajane, paxamë panejinawanapaewi ¡Espíritu Santo papecajamatabëcuene-itorobicuenia, pajamatabëcueneyawenonare bajarapajiwi penacuenexanetsinexa! ¡Pato-exanare beweliajamatabëcuenejiwicuenia! Panayajiwitaema paxamë-ata panejopaeyaniwa, dowathi itsa pacajamatabëcuene-ëjëta bajarapitsipibisiacuene pane-exanaeyaniwa.
2 ¡Paxamëtuatuajëta itsa tocopiapatatsi itsajiwi piayapëbejeliwaisi, namata-enetsia panayawenonabiabare! Bajarapacuenia itsa pa-exanawanapaename, pajumecowënëtawanapaenamenua pacuenia Cristo paca-itorobaa namata-enetsia panena-asiwatsawanapaenexa.
3 Pajiwi natane be-ayaijamatabëcuenejiwi pejopaejiwiwecua, bajarapajiwi najamatabëcueneyamaxë-itojoroba piajamatabëcuenesaëjawa yabara, tsipaji bajarapajiwi-ata dowathi itsa jamatabëcuene-ëjëtatsi pibisiacuene pexanaenexa, apo-ajamatabëcuenesaë tsipae pibisiacuene pexanaeyaniwa.
4 Bajaraxuata, caejiwi canacujitsia benacuenecanaëjëta peyapëtaenexa pacuenia ponapona Dioso pitabarata. Nexata, pajiwi Dioso pejitsipaecuenia exanaponapona, benasiwajamatabëcuenebarëya tsaponaponae Dioso pitabarata. Itsiata, apobenatae becaejiwi pexaniacuene pexanaponaponaejawa itsamonaewecua, peyaiyataenexatsi,
5 tsipaji caejiwi canacujitsia tsicarucatsi penajamatabëcuene-ewetsijawa, pexanaponaponaenexa Dioso pitorobicueniatsi.
6 Pamonae jumetane Dioso pejumeliwaisi petsipaebixaetsi, nexata petsipaebinëtsijawabelia berajutab pexainaeyajuwënëjawa, Dioso pejumeliwaisi petsipaebixaetsi.
7 ¡Tajamonae, pëtsa jamatabëcuenenawëxaniabiaya saicayacuenia pa-exaname Dioso papeca-itorobijawawecua, bepexaniacuene itajara pane-exanaecuenia, tsipaji itsajiwi-ata peyamaxë-itojorobicuenia apowecuapanepae tsane Dioso penaneconitsia-exanaejawanexatsi! Yapëtanetsi baja xua jiwi ba-uba pabita, pamatacabi baja nawereta, bajaraxua icatsia banota. Bajarapijinia itsi tsane Dioso-ata waja-exanaecuene yabara.
8 Nexata, pajiwi pibisiacuene exanaponapona, pijacuata penatojitsipaecuenia, bajarapajiwi tocopiapatsianatsi naxuabiaya Diosowecua petëpaejawa, daxitamatacabijawabelianexa. Pajiwi pijinia pexaniacuene exanaponapona, Espíritu Santo pejamatabëcuene-itorobicueniatsi, bajarapajiwi tocopiapatsianatsi pexainaenexa matacabi apopewerewerecaejawa daxitamatacabijawabelianexa.
9 Bajaraxuata, apobeyabaracueranaetsi pexaniacuene waja-exanawanapaejawa, Espíritu Santo wajanacajamatabëcuene-itorobicuenia. Itsa apoyabaracueranaetsi tsane, Dioso pecaëjëtsimatacabita nacatocopiapatsiana papexaniacuenejawanë Dioso nacarajutsiapaeba.
10 Nexata, pacuenia nacacuenecaëjëpa pexaniacuene wajato-exanawanapaejawa itsamonaejawabelia, bajarapacuenia beto-exanabiabatsi. Matatoxenetsia xanepana pexaniacuene wajato-exanawanapaejawa pamonae Jesucristojawabelia siwanajamatabëcuenecopaba.
Pablo pecopiarutsimuxujiobiliwaisi
11 Pepacuene xanë, Pablonë, pacatoyaquinatsi mapaliwaisije patacato-itorobinexa. Pataema mapa-ayai-itanetonëje patacatoyaquinaejawa tacobeta mapapecopiarutsiliwaisije.
12 Nexata, mapacuenia pacamuxujiobatsije: Pamonae judíowi ajumesaëya paca-itorobabiaba panenabo-upiperabëcaucubia-exanaenexa, bajarapacuenia apo-exanae ayaicuenia peyaiyataexae Dioso penajumecopatsiliwaisi Moisés-pijinëta. ¡Jume raja! Biji rajane, bajarapacuenia paca-itoroba, pewënajudíowi pesiwajamatabëcuenebarëyanexatsi. Bajarapamonae apojitsipae pebejiobia-exanaejawatsi papecatsipaebixae ëCristo cruzata papecasiwatëpaexae, Dioso pacacapanepaejitsia itsacuenejawa pematatsënëa pa-exanaenejewamë.
13 Pajudíowi bajarapacuenia pacajumaitsi tsabiabi, pijacuata naperabëcaucubia-exanae-ata, itsiata, apo-exanawanapae daxita pacuenia itorobatsi Dioso penajumecopatsiliwaisi Moisés-pijinëta. Caranata, bajarapamonae pacatojitsipa panenaperabëcaucubia-exanaenexa, saya papecawajunupaebinexac pewënajudíowijawabelia: «Paxanë patajamatabëcueneta Galacia nacuapijiwi naperabëcaucubia-exana», pejainexa paxamë yabara, tsipaji bajarapajudíowi jitsipa pesiwajamatabëcuenebarëyajawatsi pewënajudíowi.
14 Xanënexa neto-amatamobi bajaraxuanë. Nexata, xanë apojitsipaenë tanawënëxaniatsijawa itsajawa ta-exanaecuene yabara. Biji rajane, bitso jitsipajë caeliwaisiyo jamatabëcuenebarëyaya jiwi tatsipaebinexa, Jesucristo tanesiwatëpaejawa cruzata, tsipaji bajara-ëpaliwaisi namatamota. Cruzata tanesiwatëpaexae, newejamatabëcuenecaewa baja tajitsipaejawami mapanacuapijicueneje. Nexata mapanacuapijicuene tanejitsipaeya-exanaejamatabëcuenemi-ata ajibi baja. Bajaraxua yabara, apocopatsinë tsane tawajunupaebijawa xua Dioso neto-exana Jesucristo pejamatabëcueneta.
15 Waxaitsinexa, Jesús peliwaisi wajajumexaniataewi, nacato-amatamobi wajanacabo-upiperabëcaucutsijawa, aponacabo-upiperabëcaucutsi-ata, tsipaji saya bajarapacuenebeje najëpabeje. Biji rajane, wajajinawanapaejawa pejanajamatabëcuenetad bajaraxua nacatonamatamota Dioso pitabarata.
16 Nexata, pamonae pënapona bajarapapejanajamatabëcuene Jesús peliwaisi pejumexaniataexae, bajarapamonae jamatabëcuenexanepanaeya jinawanapaena. Natoyapëtaenanua Dioso pitaxutotsoniataecuenetsi. Bajarapacuenia pacatojitsipatsi paxamë pajudíowimë, apopajudíowimë-ata, Dioso papeca-itapetsiwi papijajiwinexamë.
17 Tawajënaeyabelia baja apojitsipaenë tanejamatabë-itonotaponaenexa pamonae nejume-aeba Jesucristo tane-itorobinëcuene, tanejume-aebijawanua pepopexaniajaicuenia tatsipaebanajetarucaejawa Jesús peliwaisi, tsipaji bajarapaliwaisi yabara tanejumaconibabeyabiabijawata, nejumatitibabeyabiaba. Nexata, bajarapawajënëcowëanëe tanetsijumarubenaexae, daxitajiwi neyapëtane pepacuene Jesucristo pijajiwitonëcuenenë.
18 Tajamonae, pacatojitsipatsi pacaejiwimë canacujitsia wajatuxanenë Jesucristo asiwaya papecajamatabëcueneyawenonabiabinexa. Bajara-itsi tsane.