Dioso penajumecopatsiliwaisi Moisés-pijinëta wajajumecowënëtsijawawecua, Cristo nacacapanepa Dioso aneconijibia wajanacataenexa
5
Tajamonae, Dioso penajumecopatsiliwaisi Moisés-pijinëta, Cristo baja wajanacasiwatëpaejawata, nacawecua-ajibia-exana wajanacajumecowënëtsijawami, Dioso aneconijibia wajanacataenexa. Maparucaeje Dioso aneconijibia nacatane Cristo pejamatabëcueneta. ¡Nexata, ajamatabëcuenesaëya tsiteca baja pajumexaniataewanapare xua Cristo pacato-exana, papecacapanepaenexa! ¡Pëtsa baja icatsia caewëalia panacaewetame papecawecua-ajibia-exanaeliwaisimi, papecajamatabëcuene-itorobabiabinexa bepanijatuxanenëcuenia!
2 ¡Xanë Pablonë, panenamuxuna-ewere paliwaisi pacatsipaebijitsiatsi! ¡Jamatabëcuenenawëxaniabiaya pëtsa pajamatabëjumaitsimë: «Xanë rabaja tanebo-upiperabëcaucutsixae, Dioso necapanepaena tajaneconiwecua», pajamatabëjamë pëtsa! Bajarapacuenia itsa panajamatabëxainaejitsipame, nexata Cristo papecasiwatëpaejawa panijaneconiwecua papecacapanepaejawanexa, apopacatonamatamotsi tsipae.a
3 Icatsia pacamuxujiobatsi. Ponë nabo-upiperabëcaucutsia-exana, Dioso aneconijibia petaenexatsi, bejumecowënëtaponaponab daxita pacuenia itorobatsi Dioso penajumecopatsiliwaisi Moisés-pijinëta.
4 Nexata, paxamë panejitsipaewi Dioso aneconijibia papecataejawanexa panejumecowënëtsijawata Dioso penajumecopatsiliwaisi Moisés-pijinëta, panawecua-itoyamë Cristo papecasiwatëpaejawa panijaneconijamatabëcuene. Panawecua-itoyamënua Dioso aneconijibia papecataejawami papeca-itaxutotsoniataejamatabëcuene.
5 Bajarapacuenia pacajumaitsitsi, tsipaji daxitatsi Espíritu Santo pejamatabëcueneta copia-ewetawanapatsi Dioso aneconijibia wajanacataejawanexa Jesucristojawabelia wajasiwanajamatabëcuenecopabixae.
6 Bajarapacuenia copia-ewetawanapatsi, tsipaji Cristo Jesús-jawabelia wajasiwanajamatabëcuenecopatsixae, nacabo-upiperabëcaucutsi-ata, aponacabo-upiperabëcaucutsi-ata, itsiata bajarapacuene amatamobi Dioso pitabarata. Biji rajane, namatamota wajasiwanajamatabëcuenecopatsijawa Jesucristojawabelia, tsipaji bajarapajamatabëcuene nacatocapitsapa asiwaya wajataenexac Diosojawabelia, asiwaya wajayawenonaponaejawanexa itsamonae-ata.
7 Paxamë baja picani copiaya xaniawaetsia pajumexaniataneme pexaniajailiwaisi, Jesús peliwaisi. Itsiata, maparucaeje icatsia pajumecowënëtawanapame Dioso penajumecopatsiliwaisi Moisés-pijinëta, Dioso aneconijibia papecataenexa. ¿Jipatsa nexata pacajamatabëcueneyamaxë-itojoroba Jesús peliwaisi panejumexaniataejawawecua?
8 Bajarapayamaxë-itojorobiliwaisi raja apopitsapae Diosojawawerena, Ponë pacajunata Jesucristojawabelia panesiwanajamatabëcuenecopabinexa.
9 ¡Xania baja tsane! Pacuenia levadura tsiquirijawayo-ata, pematajërëabicujinae cuenecaëjëpatsi ayaimatabë-ata pematajërëabijawata, bepijia pefufunaeya-exanaenexa, bajarapijinia itsi bajarapanajumetsënëtsiliwaisi. Pacatsitatsiquiriliwaisiyo-ata,d cuenecaëjëpatsi daxita papecajamatabëcuenebijanaejawa Cristo peliwaisiwecua.
10 Wajanajuasiwanajamatabëcuenecopabixae wajatuxanenë Jesucristojawabelia, yapëtaniji Dioso papecajamatabëcueneyawenonaejawa bajarapanajumetsënëtsiliwaisi panejumexaniataeyaniwa. Yapëtanijinua itsamatacabijawabelia Dioso penaneconitsia-exanaejawanexatsi, ayaijamatabëcuenejiwi-ata, pajiwi pacajamatabëcuenebijiana Jesucristo peliwaisiwecua.
11 Tajamonae, Jesucristo peliwaisi tatsipaebabiabijawata apojudíowijawabelia, itsa tsiteca itorobijitsipajë apojudíowi penabo-upiperabëcaucubia-exanaenexa, Jesucristojawabelia pesiwanajamatabëcuenecopabicujinae, nexata peneta judíowi aponebejiobia-exanabiabi tsipae, pacuenia baja neto-exanawanapa. Nexata, Jesucristo cruzata petëpaeliwaisi tsipaebi-atanë, judíowi aponitoya tsipae.
12 Tayapëtaexae piamatamobicuene jiwi penabo-upiperabëcaucubijawa Dioso aneconijibia petaenexatsi, nexata pamonae paca-itorobapona bajarapaliwaisi panecatsitecaenexa, tojitsipajë picani pijacuata daxita penayajawa-ëthëcaucubijawa.
Pacuenia jinawanapaejitsiatsi Cristo wajanacacapanepaecujinae
Namata-enetsia bena-asiwa tsawanapaetsi
13 Tajamonae, Dioso pacajunata aneconijibia panejinawanapaenexa bajaraPonë pitabarata, apopaca-itorobinejewa Dioso penajumecopatsiliwaisi Moisés-pijinëta, pematatsënëa judíowi penaewetsiliwaisianë-ata. ¡Itsiata, bajarapaliwaisianë apopaca-itorobi-ata, pëtsa itaxutejema pibisiacuene pa-exaname paneperabëto pejitsipaecuenia! ¡Biji rajane, bajarapaliwaisi panenawecuacopabixae panejumecowënëtsijawami, juya namata-enetsia panayawenonabiabare, panena-asiwaxae nacaemonaecuenia!
14 Bajarapacuenia namata-enetsia itsa pana-asiwamë tsane, pajumecowënëtsicapanepaename daxita paliwaisi Dioso najumecopata Moisés-pijinëta. Bajaraxua yabara jumaitsi Dioso pejumeliwaisibaxutota: «¡Asiwamëre itsamonae-ata pacuenia nijacuata nasiwamë!»,e jai.
15 Itsiata baitsi jane, itsa pana-itoyamë tsawanapae, itsa panabaracuaicuaijamë tsabiabinua pibisiacuenia panejumecowënëtsiliwaisianë yabara, nexata xaniawaetsia panayajiwitaema panenacuene-itawetsinexa, tsipaji itsa panacuenecopatsipame namata-enetsia Dioso peliwaisiwecua panajamatabëcuenefaefaenaeya-exanaejitsipame. Pacopabijitsipamenua baja Dioso pejumeliwaisi yabara panenacaetuatabiabijawa-ata.
Pacuenia jamatabëcuene-ewetsiaya bejinawanapatsi Espíritu Santo wajanacayawenonaenexa daxitacuenejawalia
16 ¡Nexata, bajarapapiabejecuenejawanë pane-exanaeyaniwa, juya pajinawanapare jamatabëcuene-ewetsiaya Espíritu Santo papecajamatabëcuene-itorobicuenia, caematacabi canacujitsia pejitsipaecuenia pane-exanabiabinexa! ¡Pëtsa panacopatame pejitsipaecuenia panijaperujujamatabëcuenejawabelia, papecajamatabëcuene-itorobinexa, pibisiacuene pane-exanabiabinexa!
17 Bepayapëtaneme baja pacuenia panijaperujujamatabëcuenebeje, Espíritu Santobeje pejitsipaecuene nawecua-acuene-itothiabeje. Nexata, xua panijaperujujamatabëcuene pacatojitsipa pane-exanaenexa, Espíritu Santo juya apopacatojitsipae. Xua pijinia Espíritu Santo pacatojitsipa pane-exanaenexa, panijaperujujamatabëcuene juya apopacatojitsipae. Bajarapajamatabëcuenebeje panejamatabë-ëthëtota najamatabëcuenesaë-ëjëbabeje.f Nexata, anijajamatabëcuenesaëbeje panexainaexae, apopa-exanabiabimë papexaniacuenejawanë jamatabëpa-exaname.
18 Itsiata baitsi jane, jamatabëcuene-ewetsiaya itsa pa-exanawanapaename Espíritu Santo papecatojitsipaecuenia, nexata apopacasaëmë tsawanapae tsane papeca-itorobicuenia Dioso penajumecopatsiliwaisi Moisés-pijinëta, pane-exanawanapaenexa. Apopa-exanaemënua tsane panijaperujujamatabëcuene papeca-itorobicuenia,
19 tsipaji xua jiwi exanawanapa pijaperujujamatabëcuene pitorobicueniatsi capitsapabiaba mapitsicuenejawanë: Capitsapa penapitsijiwibeje penawecuanamatayajitsijamatabëcuene. Capitsapa daxitacuenewiria pibisiacuene pewitota pexanaejamatabëcuene. Capitsapa daxitacuenewiria pia-uracuenejawanë jiwi pitabarata petsita-exanaejamatabëcuene. Capitsapa pibisiacuene pexanabiabinexa pijacuata penato-itapetsijamatabëcuene.
20 Capitsapa jiwi pesiwanajamatabëcuenecopabijawata itsacuenejawanëjawabelia,g Diosonejewa penaewetsijamatabëcuene. Capitsapa jiwi penajorobijamatabëcuene. Capitsapa jiwi namata-enetsia pecatsitecaenexa pena-itoyajamatabëcuene. Capitsapa pejume-anaenotabiabijamatabëcuene. Capitsapa penacueneca-ëbabiabijamatabëcuene. Capitsapa bepijia pianaepanaejamatabëcuene. Capitsapa daxitacuene ëpamonaenexa penato-exanabiabijamatabëcuene. Capitsapa Jesús pijajiwiwecua penawecuanasaicayabijamatabëcuene. Capitsapa penawecuatsanaejamatabëcuene.
21 Capitsapa itsamonae pecobeca-ëbabiabijamatabëcuene. Capitsapa jiwi pebeyaxuabijamatabëcuene. Capitsapa piaitajibitsabiabijamatabëcuene. Capitsapa pibisiacuene fiestajawa pexanabiabijamatabëcuene. Capitsapabiaba orijibia itsacuenejamatabëcuenejawanë, bajarabepitsipibisiacuene pexanabiabinexa, pijaperujujamatabëcuene pitorobicueniatsi. Ajena, icatsia pacamuxujiobatsi bajarapitsicuene pane-exanaeyaniwa copiaya pacuenia pacamuxujiobatsi. Bajaraxuata, pamonae bajarapitsipibisiacuene exanawanapa, aponajone tsane Dioso peyanacua-ewetsinacuata.h
22 Biji rajane, pamonae jamatabëcuene-ewetsiaya jinawanapa Espíritu Santo pitorobicueniatsi pexanawanapaenexa, bajarapamonae pejamatabë-ëthëtojawawetsina capitsapabiaba mapajamatabëcuenejawanëje: Capitsapa itsamonae-ata piasiwajamatabëcuene.i Capitsapa bëpënëajawawerena pebarëyajamatabëcuene. Capitsapa Diosojawabelia, jiwijawabelia-ata, caejamatabëcuene pexainaejamatabëcuene. Capitsapa itsamonae itsacueniabi-atatsi pewajënaeyabelia piajamatabësaëjamatabëcuene. Capitsapa pexaniacuene peto-exanaejamatabëcuene. Capitsapa itsamonae penamatawenonaejawa peyawenonaejamatabëcuene. Capitsapa Diosojawabelia, jiwijawabelia-ata, pexainaejawa caejamatabëcuene.j
23 Capitsapa pia-itejepaebijamatabëcuene. Capitsapa pibisiacuene pexanaeyaniwa penajamatabëcataitsijamatabëcuene-ata. Espíritu Santo daxita jiwi pejamatabë-ëthëtowetsina pecapitsapaejamatabëcuene bitso xanepana. Itsaliwaisi-ata cajena apo-itawetsi daxita bajarapacuenejawanë yabara.
24 Bajarapajamatabëcuenejawanë xainawanapa pamonae Cristo pijajiwi, tsipaji baja natotane Jesucristo cruzajawabelia bepeyajawacobematabiabarutsitsi, pijaperujujamatabëcuenemi pewecuatëpaenexa. Nexata, wecua-ajibia-exanatsi pajamatabëcuene itorobabiabatsi pibisiacuene pexanaenexa.
25 Espíritu Santo wajanacajamatabëcuene-aitawaya-exanaexae Diosojawabelia, nexata benajamatabëcuenecaewetatsi waja-exanawanapaenexa pejitsipaecuenia.
26 ¡Bajarapacuenia panejinawanapaexae,k pëtsa ayaijamatabëcuenewi panataewanapame! ¡Pëtsa panato-exanabiabame daxitacuene ëpaxamënexa! ¡Pëtsa namata-enetsia panacobeca-ëbabiabamenua!