Jesús pijajiwi wecuacopiarucatsi amoneya petonacuenebiwicuene, juya penaexanaenexa Dioso pexi
4
Mara pacuenia jitsipajë patacajumaitsinexaje: Pejewaxinëyo paxa itsa wecuatëpatsi, riconëmi-ata, abaxë aporajutsitsi pecobecowëjawanëmi pepitsinexa pijajawanexa, tsipaji abaxë pejewaxinëyo. Biji rajane, bajarapapejewaxinëyo cuenejëpa pamonae amoneya petonacuenebiwi, tsipaji jumecowënëtsiaponapona pijamonaejiwi pitorobabicueniatsi, daxitacuene pexainaenënexa-ata paxapijinëmi pecobecowë.
2 Bajarapapejewaxinë ewetabiabatsi pewetsijiwitsi penaweretsijawabelia. Nexata, xuanë-ata pijajawanënexa, to-ewetatsi abaxë. Matapania paxapijinëmi petocaëjëtsimatacabitsijawabelia, tocopatatsi jane baja pewetsinexa pijacuata. Pewetsijawatsinua baja copatatsi.
3 Bajarapijinia pacuenia, waxaitsi-ata nacato-exana. Itsa abaxë apopatsi Cristo, apoyapëtaetsi pexaniajailiwaisi, Jesucristo peliwaisi. Bajaraxuata, waxaitsi jinawanapatsi bepejewaxicuenia. Jamatabëcuene-ewetsiaya jinawanapatsi mapanacuapijiliwaisianëa penaewetsicuenia. Pacuenia petuxanewi itorobabiaba amoneya petonacuenebiwitsi, bajarapacuenia nacajamatabëcuene-itorobabiaba.
4 Itsiata baitsi jane, itsa copiapata baja Dioso pecaëjëtsimatacabi, itorobica pexënato mapanacuayabetsicaje, penaexanaenexa judíowiwiriawata. BajaraPonë naexana paepato Dioso penajumecopatsiliwaisi Moisés-pijinëta, itorobaponapona,
5 bajarapacuenia wajanacacapanepaenexa bajarapapitorobiliwaisiwecua, bitso wajanacajamatabëcuenebarëyaya-exanaenexa, wajanaca-exanaexae Dioso pexicueniatsi.b
6 Nexata, Dioso pexitsi wajanaca-exanaexae, Pexënato pija-Espíritu Santoc nacato-itorobica jane baja, wajanacatsijamatabë-ecaenexa. Nexata, Espíritu Santo pejamatabëcueneta: «¡Axa!», nacajaiya-exana Diosojawabelia.
7 Nexata, Dioso pexixaetsi, aeconoxae baja apojinawanapaetsi wajanacajamatabëcuene-itorobicuene mapanacuapijiliwaisita.d Biji rajane, Dioso pexi wajanaca-exanaexae, pexicuenia jinawanapatsi. Nexata, itsamatacabijawabelia xua Dioso rajutsiana Cristo waxaitsi-ata nacarajutsiana wajanaxainaenexa.
Pablo siwabëjai Jesús peliwaisi pejumexaniataewi, caewëalia pejumecowënëtsixae pijacuenemi
8 Paxamë, apopajudíowimë, pamatacabi abaxë paxamë Dioso apopayapëtaemë, pa-exanawanapame papeca-itorobicueniae bediosowif panetaewijawabelia. Bajarapamonae cajena apodiosowi, saya peyamaxë-itojorobiwi. Nexata, panacuenecueratabiabame.
9 Itsiata baitsi jane, aeconoxae baja paneyapëtaecujinae pepoDioso, ¿detsa nexata xuajitsia icatsia caewëarena pajumecowënëtame piamatamobiliwaisi? ¿Detsa xuajitsia, Dioso papexi-atamë, panacopatame icatsia panejumecowënëtsinexa mapanacuapijiliwaisi bepanijatuxanenëcuenia?
10 Paxamë, tsitecaeya payaiyataneme Dioso papecato-itapetsimatacabianë, papecato-itapetsijuametonë, papecato-itapetsiwainë-ata. Bajarapacuenia pa-exanabiabame pafiestajawanëg Dioso paca-itoroba panexanaenexa penajamatabëcuene-itajëtsinexa Dioso papijawimëcuene.
11 Bajarapaliwaisi yabara, bitso pacasiwanajamatabëxainatsi, tsipaji paxamë yabara jamatabëjumaitsinë: «Ayaicuenia Jesucristo peliwaisi tatsipaebabiabijawa bajarapamonaejawabelia, saya meta nacueratajë», jamatabëjanë belia paxamë yabara, bajarapacuenia panecasaëtsawanapaexaeh pane-exanabiabijawa.
12 Tajamonae, paca-itorobatsi panejinawanapaenexa pacuenia xanë ponaponajë, siwabëjanënejewa tajumecowënëtsijawa judíowi pijaperujuliwaisi. Pamatacabi copiaya pacatsipaebatsi Jesús peliwaisi, ponaponajë apojudíonëcuenia paxamëtuatuajëta. Bajarapacuenia ponaponae-atanë, apopane-itsacueniabimë bajaraxua yabara.
13 Paxamë baja cajena xaniawaetsia payapëtaneme patanecopiapitsijawamë. Pacujinae paxamëjawata ta-awitanenë patajopajë, bajarapamatacabi copiaya pacatsipaebatsi pexanialiwaisi, Jesucristo peliwaisi, papecacapanepaeliwaisinexa Diosojawabelia, paliwaisi picani abaxë apopayapëtaemë.
14 Pawitane yajawapatajopajë paxamëjawata, bajarapawitane yabara picani bepanenawecuacapitsapame. Itsiata baitsi jane, bijiata apopanetaemë. Apopanenawecua-itorobimënua patacawecuaponaenexa itsajawabelia. Biji rajane, xaniawaetsia panecopiapitame be-ángelnë Dioso papecato-itorobinëcuenia, itsa jume, beCristo Jesús panecopiapitsicuenia.
15 Pacayanijobatsi. ¿Detsa baja aeconoxae pa-itsimë panejamatabëcuenebarëyajawami xanëjawaberena, pexaniacuenia patanecopiapitsijawamë? Bajarapamatacabi itsa pacawajëtsipatsi pane-itaxuto patane-asiwaxaemë, panebarëyajamatabëcuene patanerajutsinexamë,i pana-itaxutojutsipame, juya patanerajutsinexamë.
16 Bajarapacuenia pane-asiwa-atamë, aeconoxae meta bepanijawajabitsaënënë panetaneme patacatsipaebixae pexaniajailiwaisi, Jesucristo peliwaisi, pacuenia baja copiaya pacatsipaebatsi.j
17 Pamonae saicayaliwaisi Jesucristo peliwaisiwecua pacatsipaebapona, najamatabëxainabiaba pexanaenexa xua yabara pasiwabarëyamëjitsia bajarapamonae. Itsiata baitsi jane, bajarapamonae aponajamatabëxainae papecatsipaebinexa pexaniajailiwaisi papecacapanepaeliwaisinexa Diosojawabelia. Bajarapamonae jitsipa paxanë patanewecuanasaicayabinexamë, bajarapamonae juya panejamatabëcuenejëpaenexa.
18 Xanepana rabaja picani itsamonae panesiwanajamatabëxainaejawa paneyawenonaejawanexa yaiyataeya pane-asiwajamatabëcuene, bajarapamonae itsa pexaniacuenia jamatabëpacayawenona, bepacayawenona itsajamatabëcuene xainaenejewa panepëya. Bajarapacuenia xanëjawaberena apopaneto-exanaemë. Pacuenia ajena matacabita asiwa panecopiapitame, bajarapacuenia tsiteca bepane-asiwamë tsabiabi ajibinë tsarucae-ata.
19 Xanë juya bajarapacuenia apopacato-exanaetsi. Biji rajane, paxamë pacatanetsi bepataximë. Nexata, pacuenia petiriwa, itsa wixaenotatsi penacueto, pewixaecobexae bayanajamatabëxaina, bajarapacuenia xanë-ata bitso pacasiwanajamatabëxainatsi panejamatabëcuenejëpaejawabelia pacuenia Cristo jamatabëcuene-itsi.
20 Bajaraxuata, bitso picani jitsipajë aeconoxae panitabarata asiwaya patacajumaitsinexa. Itsiata, tajë paxamëwecua taponaponaexae, bitso patacasiwanajamatabëxainaexaenua beta-anaepanaenëcuenia pacajumaitsitsi. Itsiata, apoyapëtaenë paliwaisicuenia patacajumaitsinexa.
Pablo cuenecataeya canacueneba Agar-pijiwa, Sarapijiwabeje peliwaisicuenia, petsitajëtsinexa paliwaisi apobejumecowënëtsi Cristo peliwaisi pecajinawanapaewi
21 Xanë pacayanijobatsi, paxamë panejitsipaewi panejumecowënëtsijawa Dioso penajumecopatsiliwaisi Moisés-pijinëta, Dioso aneconijibia papecataenexa. ¿Payapëtaneme xua pepacuene Dioso jumaitsi Moisés-pijinë peyaquinaebaxutonëjawata?k
22 Bajarapaliwaisijawata jumaitsi pacuenia bajayata Abraham-pijinë xaina anijanëbeje pexënatobeje. Caenë xaina Agar-pijiwata, powa natocomuata amoneya petonacuenebaponaponaewanexatsi pijabota. Bajaraxuacujinae, icatsia Abraham-pijinë itsanë xaina Sarapijiwata, pepopijawajawata jane baja. Bajarapowa aponatocomuatsi, amoneya petonacuenebaponaponaewanexatsi.
23 Panacuetonëyo Agar-pijiwa,l nacoxita Abraham-pijinë pejamatabëcueneta, bajaraponëyo naexana pebi, pijawabeje, pijacuata penatojitsipaejamatabëcueneta. Itsiata baitsi jane, panacuetonëyo Sarapijiwa,m nacoxita, bajaraponëyo naexana Dioso najumecapanepaeya pejumaitsicueniatsin pecopiapatsinexa.
24 Bajarapowabeje peliwaisijawata nacatocuenecatane anijaliwaisibejecuenia, Dioso anijatobeje penajumeliwaisicajonejawa jiwijawabelia. Nexata, Agar-pijiwa nacatocuenecatane Sinaíwënëtsuto, itsajota Dioso najumeliwaisicajunua jiwijawabelia, pacujinae najumeliwaisicopata Moisés-pijinëta. Pacuenia naexana Agar pexënato amoneya picani petonacuenebaponaponaenënexa pitorobicueniatsi pijatuxanenë, pena pacuenia amoneya tonacuenebaponapona, bajarapijinia pacuenia Dioso penajumecopatsiliwaisi Moisés-pijinëta, pamonaejawabelia najumeliwaisicajunua, tonaexanatsi bepijatuxanenëcuenia.
25 Nexata, yapëtanetsi pacuenia Agar-pijiwa nacatocuenecatane Sinaítsuto, Arabia nacuata pebocaetsuto. Bajarapatsuto pijinia nacatocuenecatane Jerusalén tomara, mapanacuaje pe-ecaetomaraje. Bajarapatomara pijinia nacatocuenetane daxita pamonae jinawanapa bajarapatomarata. Bajarapatomarapijiwi jumecowënëtsiaya jinawanapa Dioso penajumecopatsiliwaisi Moisés-pijinëta pitorobicueniatsi pexanabiabinexa.
26 Bajarapacuenia yapëtanetsinua, Sarapijiwami, Abraham-pijinë pepopijawami, nacatocuenecatane pejanaJerusalén tomara, athëbëtatsia pe-ecaetomara yabara. Bajarapatomara pijinia nacatocuenecatane waxaitsi, wajasiwanajamatabëcuenecopabiwi Jesucristojawabelia, wajajinawanapaenexa bajarapatomaratatsia. Bajaraxuata, Sarapijiwami nacatocuenecatanenua waenacuenia. Pacuenia bajarapowami apoxainae pitorobijiwitsi pejumecowënëtabiabinexa, bajarapacuenia waxaitsi-ata apoxainaetsi Dioso penajumecopatsiliwaisi Moisés-pijinëta wajajumecowënëtawanapaenexa.
27 Sarapijiwa yabara Dioso pejumeliwaisibaxutota profeta Isaías-pijinë, tajëwelia jumaitsi mapacueniaje:
«¡Jamatabëcuenebarëyamëre mawecowamë, nexi aponexainaewa-ata! Caeto-ata aponenawixaetaewa, itsiata jamatabëcuenebarëyaya wawajamë tsaxuabi tsane, nawixaetae-atamë, tsipaji nemomoxi ayaibitsaëto xainaename, nijajiwitowa pemomoxi matatoxenetsia»,o jai tajëwelia Dioso pejumeliwaisibaxutota waxaitsi ayaibitsaëtotsi yabara, wajasiwanajamatabëcuenecopabiwinexa Jesucristojawabelia.
28 Tajamonae, paxamë rabaja panesiwanajamatabëcuenecopabiwi Jesucristojawabelia, pacuenejëpame penaexanaejawa Isaac. Nexata, bajaraponëyo naexana Dioso tajëwelia najumecapanepaeya pejumaitsicuenia. Paxamë-ata rabaja panaexaname Dioso papeximë, Dioso tajëwelia najumecapanepaeya pejumaitsicuenia.
29 Itsiata, Ismael, ponë copiaya Abraham-pijinë barëxaina Agara-pijiwata, pebi, pijawabeje, pijacuata penatojitsipaejamatabëcueneta, bajaraponëyo nacatocuenecatane pamonae jumecowënëtsiajinawanapa Dioso penajumecopatsiliwaisi Moisés-pijinëta. Nexata, Ismael jamatabë-itonotabiaba pejuyapijinë Isaac, ponë naexana Sarapijiwata, Espíritu Santo peyawenonaexaetsi. Bajarapacuenia paxamë maparucaeje pacajamatabë-itonotapona pamonae casaë Dioso penajumecopatsiliwaisi Moisés-pijinëta, paxamë panenaexanaewi Dioso papeximë Espíritu Santo pejamatabëcueneta.p
30 Wajayapëtaenexa Dioso apopetaejawa Ismael Abraham-pijinë pepopexënatocuenia, Dioso pejumeliwaisibaxutota jumaitsi mapacueniaje: «Ponë nexënato xainame necomuatsiwata, apocanacopatsi tsane nexainaeyajuwënëjawaq newënamuto pepitsinexa. Biji rajane, daxita canacopatsiana ponë xainame peponijawajawata. Bajaraxuata, nijabowecua pitsapaeya-exanaename necomuatsiwa, nexënato yajawa», jai Dioso pejumeliwaisibaxutota Abraham-pijinëjawabelia, Dioso pejumaitsijawa.
31 Tajamonae, Dioso aponacatae Abraham-pijinë penatocomuatsiwa amoneya petonacuenebaponaponaewanexatsi bepemomoxitsi, Dioso penajumecopatsiliwaisi Moisés-pijinëta wajajumecowënëtawanapaenexa bewajatuxanenëcuenia. Biji rajane, wajajumexaniataexae Dioso wajanacacapanepaejawanexa Jesús pejamatabëcueneta, najumecapanepaeya pejumaitsicuenia, Dioso nacatane Abraham-pijinë pepopijawa bepemomoxitsi, powa apopenatocomuatsiwa.