Wajasiwanajamatabëcuenecopatsijawata Jesucristojawabelia, nacawecua-ajibia-exana wajanacajumecowënëtsia-exanaejawami Dioso penajumecopatsiliwaisi Moisés-pijinëta, aneconijibia Dioso wajanacataenexa
Wajasiwanajamatabëcuenecopatsijawata Jesucristojawabelia, Espíritu Santo nacatsijamatabë-eca
3
Paxamë paGalacianacuapijiwimë, bitso cajena pane-ajamatabëcuenecowëbiwi paneyapëtaeyaniwa. Paxanë picani baja xaniawaetsia jumenapebetsiaya pacatsipaebatsi Jesucristo cruzajawabelia pecobematabiabarutsijawatsi yabara, wajanacaneconimatamotsinexa. Nexata, bepanetaewi panijacujaya Jesucristo pecobematabiabarutsijawatsi. ¿ Jipatsa nexata pacajamatabëcuenecowëbia- exana, bajarapaliwaisiwecua pane-ajamatabëcuenecowëbiwinexa? Paxamë pajumexaniataneme picani Dioso papecawecua-ajibia-exanaejawa panijaneconimi Jesucristo pejamatabëcueneta.
2 Nexata, caejumeyo pacayanijobatsi. ¿Detsa xua yabara pacatsijamatabëjunua Espíritu Santo? ¿Panejumecowënëtsixae tsaja Dioso penajumecopatsiliwaisi Moisés-pijinëta? ¡Jume raja! Biji rajane, Espíritu Santo pacatsijamatabëjunua, panejumexaniataexae Jesús peliwaisi.
3 Paxamë saya bitso pane-ajamatabëcuenecowëbiwi. Bepijiayo saya pajumexaniataneme piamatamobiliwaisi. Pamatacabi pasiwanajamatabëcuenecopabame Jesucristojawabelia, bajarapamatacabi Espíritu Santo pacatsijamatabëjunua, papecajamatabëcueneyawenonabiabinexa, Dioso pejitsipaecuenia panejinawanapaenexa. Bajarapacuenia Espíritu Santo pacato-exanae-ata, ¿detsa xuajitsia aeconoxae panajamatabëxainame pane-ajibia-exanaejawa Dioso pijacuene Espíritu Santo papecajamatabëcueneyawenonaejawami, pane-exanaejawata pexaniacuene panesaëta?
4 Itsamonae baja cajena pacabejiobia-exanapona panejumexaniataexae Jesús peliwaisi. Nexata, itsa pacopabijitsipame Jesús peliwaisi, panejumexaniataenexa itsaliwaisi, bitso panacuerotsipame. Itsiata, xanë yapëtaniji apopanenacuerotsijawanexa, tsipaji caenë Jesús pejamatabëcueneta Dioso pacawecua-ajibia-exana panijaneconimi.
5 Icatsia pacayanijobatsi. Ponë pacarajuta Espíritu Santo papecatsijamatabë-ecaenexa, Ponë-ata pacatsita-exana pinijicuenejawanëa paxamëtuatuajëta, ¿bajaraxuanë tsaja Dioso pacato-exana panejumecowënëtabiabixae Dioso penajumecopatsiliwaisi Moisés-pijinëta? Itsa jume, ¿pacato-exanabiaba tsaja panejumexaniataexae paliwaisi pacatsipaebatsi, Jesucristo peliwaisi? Panejumexaniataexae raja Jesucristo peliwaisi, bajarapacuenia pacato-exana.
Abraham-pijinë-ata Dioso aneconijibia tanetsi, pejumexaniataexae Dioso pejumaitsijawa najumecapanepaeya
6 Pacuenia Dioso aneconijibia pacatane panejumexaniataexae Jesús peliwaisi, bajarapijinia pacuenia Abraham-pijinë Dioso aneconijibia tanetsi, pejumexaniataejamatabëcuene najumecapanepaeya pejumaitsijawatsi.b
7 Bajaraxuata, paxamë bepayapëtaneme mapacueneje: Pamonae apopemomoxi-ata picani, naexana Abraham-pijinë bepemomoxi, najëpaeya pejumexaniataexae Dioso najumecapanepaeya pejumaitsijawa.
8 Dioso peyapëtaexae, itsamatacabijawabelia apojudíowi-ata aneconijibia petaejawanexa pejumexaniataejamatabëcuene yabara, pejumeliwaisibaxutota tajëwelia jumaitsi mapacueniaje: «Tacatsipaebiliwaisi xamë nejumexaniataexae, daxitanacuanëpijiwi-ata natoyapëtaena pexaniacueniac tayawenonaejawanexa, xamë tanejumexaniataejamatabëcuenemë», jai Dioso pejumeliwaisibaxutota.
9 Nexata baja, waxaitsi xaniawaetsia yapëtanetsi mapacueneje: Bajayata, Abraham-pijinë Dioso pexaniacuenia yawenonatsi, aneconijibianua tanetsi pejumexaniataejamatabëcuene.d Bajarapijinia pacuenia maparucaeje, pamonae jumexaniatane Jesucristo peliwaisi, judíowi, apojudíowi-ata, Dioso pexaniacuenia yawenonaenatsi, aneconijibianua taenatsi.
10 Itsiata baitsi jane, pajiwi natocanaëjëta Dioso aneconijibia petaenexatsi pejumecowënëtsixae Dioso penajumecopatsiliwaisi Moisés-pijinëta, bajarapajiwi jamatabëcuenenacuerotsiana, tsipaji Dioso tocaëjëta penaneconitsia-exanaejawanexatsi. Bajaraxua yabara Dioso pejumeliwaisibaxutota jumaitsi mapacueniaje: «Pamonae apojumecowënëtsicapanepae tsane daxita pacuenia itorobatsi Dioso penajumecopatsiliwaisi Moisés-pijinëta, bajarapamonae cajena Dioso naneconitsia-exanaenatsie», jai Dioso pejumeliwaisibaxutota.
11 Bajaraxua yapëtanetsi jumenapebetsiaya pejumaitsijawa Dioso aneconijibia apopetaejawanexa itsajiwi-ata, bajarapaliwaisi pejumecowënëtsijamatabëcuene. Biji rajane, Dioso pejumeliwaisibaxutota pejumaitsijawa mapacueniaje: «Pajiwi siwanajamatabëcuenecopatsiana Diosojawabelia peto-exanaejawanexatsi najumecapanepaeya pejumaitsicuenia, bajarapajiwi aneconijibia Dioso taenatsi. Xainaenanua matacabi apopewerewerecaejawa»,f pejaijawa Dioso pejumeliwaisibaxutota.
12 Dioso penajumecopatsiliwaisi Moisés-pijinëta aponacayapëtaeya-exanae wajasiwanajamatabëcuenecopatsijamatabëcueneta Diosojawabelia wajawecuapanepaejawanexa, bajaraPonë wajanacananeconitsia-exanaeyaniwa. Biji rajane, bajaraxua yabara Dioso pejumeliwaisibaxutota jumaitsi mapacueniaje: «Pajiwi matapania jumecowënëtsicapanepaena daxita pacuenia itorobatsi Dioso penajumecopatsiliwaisi Moisés-pijinëta, bajarapajiwi capanepaenatsi Diosojawabelia. Aponaxuabi tsane Diosowecuag», jai Dioso pejumeliwaisibaxutota.
13 Itsiata baitsi jane, Cristo nacacapanepa baja Dioso penajumecopatsiliwaisi Moisés-pijinëta wajanacananeconitsia-exanaejawaminexawecua. Bajarapacuenia Cristo nacato-exana itsa nacopata bitso pibisianeconi bepexainaenëcuenia waxaitsi wajaneconijamatabëcuene, perutsinexatsi cruzata, pecobematabiabarutsijawatatsi. Bajarapacuene yabara Dioso pejumeliwaisibaxutota pejumaitsijawa mapacueniaje: «Pajiwi petëpaenexa rutatsi pijaneconijamatabëcuene athëbëyo naejawata, bajarapajiwi bitso naneconita Dioso pitabarata»,h pejaijawa Dioso pejumeliwaisibaxutota.
14 Nexata, Cristo nacopata bitso pibisianeconi bepexainaenëcuenia peneconitsinexatsi, juya bajarapacuenia apojudíowi-ata penatotaenexa papexaniacuenei Dioso rajuta Abraham-pijinëjawabelia. Bajaraxuata, daxitatsi wajasiwanajamatabëcuenecopabiwi Jesucristojawabelia, judíowi, apojudíowi-ata, Dioso aneconijibia nacatane. Nacarajutanua Espíritu Santo najumecapanepaeya pejumaitsicuenia.
Dioso penajumecopatsiliwaisi Moisés-pijinëta apowecua-ajibia-exanae najumecapanepaeya Dioso pejumaitsijawa Abraham-pijinëjawabelia
15 Tajamonae, xaniawaetsia paneyapëtaenexa xua pacatsipaebatsi Dioso najumecapanepaeya penajumeliwaisicajonejawa yabara Abraham-pijinëjawabelia pexaniacuenia peyawenonaenexatsi, canaëjëtsianatsi mapaliwaisitaje: Mapanacuataje jiwitonë, pecobecowë pexainaenë, petëpaewajënae bayaquinabuata pecobecowë yabara, peyapëtaeya-exanaenexa pexi, xaniawaetsia pewënamuto pecobecowë penatsicobetsanaenexa. Nexata, pecobecowë pexainaenë peyaquinaeliwaisi peweretsicujinae, penawënëyaquinarutsicujinae,j matapania jumenamatamota. Nexata, acuenebi itsajiwi-ata peyaquinaeliwaisimi piamatamobia-exanaenexa, peliwaisimataropotsinexa-ata.
16 Bajayatami, copiaya Dioso najumecapanepaeya jumaitsi Abraham-pijinëjawabelia daxitanacuanëpijiwi pexaniacuenia peyawenonaenexa,k pemomo pejamatabëcueneta. Baitsi, apoyawenonaeyapaebi daxita pemomoxi pejamatabëcueneta. Pemomo itsa jai, tajëwelia caenë Cristo yabara jumaitsi.
17 Paliwaisi pacatsipaebatsi, ma-itsije: Bajayatami, copiaya Dioso tajëwelia najumecapanepaeya jumaitsi Abraham-pijinëjawabelia peyawenonaejawanexa daxitanacuanëpijiwi pemomo pejamatabëcueneta. Nexata, papexaniacuenejawanë Dioso yawenonaeyapaeba Abraham-pijinëjawabelia, peto-exanaponaejawata pejumaitsijawa namatamotsia-exana.l Bexëajawabelia, icatsia cotocaewi cuatrocientos treinta pawaibejecujinae, Dioso najumecopata Moisés-pijinëta paliwaisi jiwi jumecowënëtawanapaejitsia, Dioso peyawenonaenexatsi. Itsiata, bajarapacotocaewiliwaisi apo-ajibia-exanae payawenonaeyapaebicuene xua Dioso copiaya najumecapanepaeya pejumaitsijawa Abraham-pijinëjawabelia. Itsa cotocaewiliwaisita najume-amatamobia-exanaejitsipa copiayapijiliwaisimi, nexata Dioso penajumetsënëtsinë tsipae.
18 Dioso jiwi itsa aneconijibia taejitsipa, pejumecowënëtsixae penajumecopatsiliwaisi Moisés-pijinëta, nexata ajumematamobi tsipae paliwaisi Dioso tajëwelia najumecapanepaeya jumaitsi Abraham-pijinëjawabelia, peyawenonaenexa daxitanacuanëpijiwi pemomo pejamatabëcueneta. Itsiata, Dioso aneconijibia tane Abraham-pijinë, pejumexaniataexae najumecapanepaeya pejumaitsicueniatsi. Nexata, yapëtanetsi Dioso aneconijibia jiwi petaejawa, pejumexaniataexae Jesús peliwaisi, apojumecowënëtsi-ata Dioso penajumecopatsiliwaisi Moisés-pijinëta.
Pajamatabëcuene yabara Dioso peliwaisi najumecopata Moisés-pijinëta
19 Nexata, itsa matatoxenetsia jumenamatamota baja, paliwaisi Dioso tajëwelia najumecapanepaeya jumaitsi Abraham-pijinëjawabelia, wajanacacapanepaenexa wajaneconiwecua, ¿detsa xuanexa nacatoxanepana Dioso penajumecopatsiliwaisi Moisés-pijinëta? Dioso mataropotsia nacatonajumecopata bajarapaliwaisi, wajanacueneyapëtaenexa pibisiacuene waja-exanawanapaejawa Dioso pitabarata. Nacatonajumecopatanua wajajumecowënëtawanapaenexa matapania Abraham-pijinë pemomo, Cristo, pepatsimatacabitsicajawabelianexa, ponë yabara tajëwelia Dioso najumecapanepaeya jumaitsi Abraham-pijinëjawabelia, peyawenonaenexa daxitanacuanëpijiwi. Nexata, yapëtanetsi Dioso penajumecopatsiliwaisi Moisés-pijinëta beweliacuenia jumenamatamota, Dioso najumecapanepaeya pejumaitsijawawecua Abraham-jawabelia, tsipaji pijacuata Dioso apojumaitsi Moisés-pijinëjawabelia. Itoroba saya ángelewi Moisés-pijinë petsipaebinexatsi. Nexata juya, Moisés-pijinë tsipaeba jiwijawabelia. Moisés-pijinë-ata jiwi petocuaicuaijainë Diosojawabelia.
20 Itsiata, pamatacabi Dioso najumecapanepaeya jumaitsi Abraham-pijinëjawabelia pepacuene peyawenonaejawanexa daxitanacuanëpijiwi pemomo pejamatabëcueneta, apo-itorobi ángelewi petsipaebinexatsi. Biji rajane, Dioso pijacujaya jumaitsi Abraham-pijinëjawabelia.
Cristo copiarucaeya-exana wajajumecowënëtsijawami Dioso penajumecopatsiliwaisi Moisés-pijinëta, Dioso aneconijibia wajanacataenexa
21 Pacayanijobatsi mapacueneje: ¿Dioso paliwaisi cotocaewi najumecopata Moisés-pijinëta, yacaranata meta papexaniacuene yawenonaejitsia Abraham-pijinëjawabelia xua copiaya najumecapanepaeya jumaitsi? ¡Jume baja cajena! Jiwi itsa cuenecaëjëpaejitsipatsi pejumecowënëtsicapanepaejawa Dioso penajumecopatsiliwaisi Moisés-pijinëta, Dioso caëjëtsipa bajarapacuenia jiwi aneconijibia petaenexa. Itsiata, jiwi apopecuenecaëjëpaexaetsi pejumecowënëtsicapanepaenexa bajarapaliwaisi. Nexata, Dioso jiwi apotae aneconijibia.
22 Biji rajane, paliwaisi Dioso najumecopata Moisés-pijinëjawabelia daxita mapanacuapijiwije tonaexanatsi penaneconitsia-exanaeliwaisinexatsi Diosojawabelia. Bajaraxuata, jinawanapa bepenaneconitsiwi. Itsiata, pamonae siwanajamatabëcuenecopabiana Jesucristojawabelia,m Dioso capanepaenatsi baja pacuenia tajëwelia najumecapanepaeya jumaitsi Abraham-pijinëjawabelia.
23 Itsiata, Dioso wajanacayapëtaeya-exanaewajënaeya wajanacacapanepaejawanexa Cristojawabelia wajasiwanajamatabëcuenecopatsijawata, bajarapamatacabi Dioso penajumecopatsiliwaisi Moisés-pijinëta nacaxaina bewajananeconitsiwi, pejitsipaecuenia wajanaca-itorobabiabinexa Cristo pepatsimatacabitsicajawabelia, matapania nacayapëtaeya-exanaena pacuenia jane baja Dioso aneconijibia nacataejitsia.
24 Nexata, Dioso penajumecopatsiliwaisi Moisés-pijinëta nacatonaexana wajanacamatacaponaeliwaisi, Cristo penaexanaematacabijawabelia. Bajarapaliwaisi nacajamatabëcuene-eweta, pacuenia pejewaxi pewetsijiwi ba-eweta pibisiacuene pexanaeyaniwa. Bajarapijinia pacuenia, bajarapaliwaisi wajanacacuene-itawetsijawata, nacajamatabëcuenematacapona wajasiwanajamatabëcuenecopatsinexa Cristojawabelia. Nexata, Cristojawabelia wajasiwanajamatabëcuenecopatsicujinae, Dioso aneconijibia nacatane.
25 Aeconoxae baja Cristo pepatsixaetsica, nacawecuacopiaruca paliwaisi nacatonaexana bewajanaca-itorobinë wajanacacujarubinexa, Dioso penajumecopatsiliwaisi Moisés-pijinëta.
26 Nexata, Cristo pepatsixaetsica, aeconoxae baja padaxitamë, judíowi, apojudíowi-ata, panaexaname Dioso papeximë, panesiwanajamatabëcuenecopabixae Cristo Jesús-jawabelia.
27-28 Nexata baja, daxita paxamë Espíritu Santo pacajia Jesucristojawabelia bepapecabautizabiwicuenia, becaenë panenaexanaenexa bajaraPonëjawabelia. Nexata, pacajamatabëcuenexatata Cristo pejamatabëcuene, pejanajamatabëcueneta panejinawanapaenexa Cristo cuenejëpaeya. ¡Bajaraxuata, becaejiwi panataeyabiabare daxita paxamë panesiwanajamatabëcuenecopabiwi Jesucristojawabelia! Xaniajai, paxamëjawata itsamonae jinawanapa judíowi, apojudíowi, itsamonae amoneya petonacuenebiwi, itsamonae pijinia amoneya apopetonacuenebiwi itsajiwi-ata, itsamonae petiriawi, pebijiwi-ata. ¡Bajarapacuenia panawecua-acuene-itothia-atamë, pëtsa panawecuanatsaname bajaraxuanë yabara, bijiaya panetaeyaniwa itsajiwi-ata pijacuene yabara! ¡Biji rajane, asiwaya panataema, tsipaji raja padaxitamë becaenë panaexaname Cristo Jesús pejamatabëcueneta!
29 Bajarapacuenia Cristo papijajiwixaemë, nexata Abraham-pijinë pepocuene bepapemomoximën Dioso pacatane. Nexata, xua Dioso tajëwelia najumecapanepaeya Abraham-pijinëjawabelia yawenonaeyapaeba pemomo pejamatabëcueneta, bajaraxua-ata baja paxamë pajudíowimë, apopajudíowimë-ata, Cristo pejamatabëcueneta pacanacopatame.