Jerusalén tomarata pejinawanapae-apóstolewi caejamatabëcuene xaina Pablo pepaebiliwaisi yabara
2
Catorce pawaibejecujinaea jiwi tatsipaebanajetarucaejawa Jesucristo peliwaisi Sirianacuajawa, Cilicianacuajawa-ata, matapania icatsia patajë tacowëyaberena, Jerusalén tomarata. Yajawapatajopajë Bernabé, Titobeje.
2 Apopatajopaenë Jerusalén tomarata tanejunatsixae. Biji rajane, patajopajë Dioso tane-itorobixae,b tayapëtaeya-exanaenexa bajarapamonaejawabelia tatsipaebanajetarucaeliwaisi yabara apojudíowijawa. Nexata, taponaponae-epato bajarajota, yajawanacaetuatajë Jesús pijajiwi, ëpenamatacaitorobiwi. Bajarapamonaejawabelia nawajunupaebajë pacuenia Jesucristo peliwaisi tsipaebanajetarucajë apojudíowijawa, jiwi pecapanepaeliwaisinexatsi Diosojawabelia. Bajarapacuenia nawajunupaebajë pamonaejawabelia itsamonaenexa tsita-ayaijamatabëcuenewitsi, tsipaji apojitsipaenë tatsipaebanajetarucaeliwaisi apojudíowijawa taneto-amatamobijawac bajarapamonae pitabarata. Nexata, Jesús pijajiwi penamatacaitorobiwi, tsitaxanepanatsi tanawajunupaebiliwaisi.
3 Orijibia, Tito, taneyanabinë, apojudíonë-ata, bajarapamonae apo-itorobitsi penabo-upiperabëcaucutsia-exanaenexatsi, pecopiapitsinexatsi Jesús pijajiwitonëcuenia.
4 Bajaraxua yabara napata patanacaetuatsijawata itsamonae judíowi, Jesucristo peliwaisi bepejumexaniataewi itajara, pataneya-enebinexa Tito pebo-upiperabëcaucutsijawanexatsi yabara. Jesús pijajiwi penamatacaitorobiwi aposiwajamatabëcuenebëjai picani bajaraxua yabara. Itsiata, pamonae napata, jitsipa icatsia caewëarena patajumecowënëtawanapaenexa Dioso penajumecopatsiliwaisi Moisés-pijinëta, bepapijajiwinëcuenia patajumecowënëtawanapaenexa daxita pacuenia bajarapaliwaisi pane-itoroba. Itsiata, payapëtaniji pacuenia Dioso aneconijibia panetaejitsia Jesucristo pejamatabëcueneta. Bajaraxuata baja, pacopabajë bajarapaliwaisi patajumecowënëtsijawami.
5 Nexata, bajarapacuenia jitsipae-ata pebijianaenexa Jesús peliwaisi, paxanë tsiquirijawayo-ata apopa-exanaenë pacuenia bajarapamonae pane-itoroba. Bitso pajitsipajë paxamënexa panecanacopatsijawa Jesús peliwaisi, pexaniajailiwaisicuenia, pamatajërëatsinejewamë judíowi pejumecowënëtsicuene Dioso penajumecopatsiliwaisi Moisés-pijinëta.
6 Jerusalén tomarata Jesús pijajiwi penamatacaitorobiwijawabelia itsa nawajunupaebajë Jesucristo peliwaisi tatsipaebaponaejawa yabara apojudíowijawa, bajarapamonae pejanaliwaisiyo-ata aponetsipaebi Jesucristo peliwaisi tayajawatsipaebaponaenexa. Bajarapamonae ayaijamatabëcuenewi tae-atatsi itsamonae,d xanë itsiata aponajamatabëxainaenë be-ayaijamatabëcuenewi tataenexa,e tatsipaebiliwaisi ta-itothianaenexa. Baitsi, Dioso ayaijamatabëcuenewi apotae caejiwi-ata, jiwi petsitaliwaisinamatamotsiwitsi-ata. Biji rajane, daxita waxaitsi, Jesucristojawabelia wajasiwanajamatabëcuenecopabiwi, Dioso najëpaeya nacatane.
7 Itsiata, bajarapamonae bijiaya aponetae. Caranata, neyaiyatane. Beweliacuenianua apotae tatsipaebiliwaisi apojudíowijawa. Biji rajane, neyapëtane Dioso tane-itorobinëcuene tatsipaebanajetarucaenexa Jesús peliwaisi apojudíowijawa, pacuenia copiaya Pedro Dioso itorobatsi Jesús peliwaisi petsipaebaponaenexa judíowijawa.
8 Ponë Pedro, itorobatsi apóstol-nënexa, pepaebanajetarucaenexa Jesús peliwaisi judíowijawa, bajaraPonë xanë-ata nitoroba apóstol-nënexanë, tatsipaebaponaenexa Jesús peliwaisi apojudíowijawa.
9 Bajarapamatacabijawa Jerusalén tomarata, Jesús pijajiwi namatacaitorobawanapa Santiago,f Pedro, Juan-bana. Bajarapamonae peliwaisinamatamotsiwi tsawanapae itsamonaewecua. Nexata, bajarapamonae itsa neyapëtane Dioso tane-itorobinëcuene tatsipaebaponaenexa Jesús peliwaisi apojudíowijawa, bajarapamonae panetanebeje paxanëbeje, Bernabébeje, patatonajuanacuenebinëbeje Dioso pijacuene. Bajaraxuata, panejamatabëcuene-asaëya-exanabeje patawajënaeyabeliabeje patatsipaebaponaenexabeje Jesús peliwaisi apojudíowijawa. Bajarapamonae pijinia Santiago, Pedro, Juan-bana, bajarapamonae pijinia tsipaebanajetarubenaejitsia judíowijawa.
10 Bajarapamonae caeliwaisiyo muxujiobiaya panejumaitsibeje, patanajamatabënapitsinexabeje pamonae bitso bepejiobiwi, patayawenonaenexabeje, Jerusalén tomarata pejinawanapaewi,g Jesús pijajiwiyajuwënëwi. Bajaraxua yabara xanë jamatabëcuenenaxanetajë bajarapamonaenexa. Nexata, ofrenda to-exanaeya-exanaponajë itsaxuayo tsipaebaponajë Jesús peliwaisi.
Pablo muxujioba Pedro Antioquía tomarata, bijiaya petaexae apojudíowi
11 Pamatacabi Pedro patajopa Antíoquia tomarata, xanë asaëyata muxujiobajë, tsipaji Dioso apopejitsipaecuenia exana.
12 Pedro copiaya jamatejema naponapona apojudíowijawata. Yajawanabaneponapona. Itsiata, itsa pata Antíoquia tomarata itsamonae judíowi Santiagojawawerenah peponaewi, pijaperujuliwaisimii pecatsitecawanapaewi, bajarapaepatota Pedro wecuanasaicayaba apojudíowi, tsipaji cujunawa bajarapamonae petaeyaniwatsi apojudíowijawata penaxaejawa.
13 Pedro yapëtae-ata pacuenia picani apobewecuanasaicayabi apojudíowi Dioso nacaemonaecuenia petaexae, itsiata wecuanasaicayaba. Nexata, pecuenetaejawatatsi, daxita judíowi, pesiwanajamatabëcuenecopabiwi Jesucristojawabelia, cuenejëpatsi Pedro xua exana. Belia, Bernabé-ata cuenejëpa bajarapajudíowi.
14 Bajarapacuenia pexanaejawata, bajarapamonae liwaisi-itothianaj pacuenia jumaitsi pexanialiwaisi jiwi pecapanepaeliwaisinexatsi Diosojawabelia. Pedro wecuanasaicayaba apojudíowi bepenaxuirabiwicuenia petaexae, nacaemonaecuenia Dioso tae-atatsi. Bajaraxuata, itsa taniji Pedro pewecuanasaicayabijawa apojudíowi, asaëyata muxujiobajë. Daxita Jesús peliwaisi pejumexaniataewi pitabarata jumaitsinë Pedrojawabelia: «Xamë, judíonë-atamë, itsa naponaponame apojudíowijawata, pacuenia bajarapamonae jinawanapa naponaponabiabame, tsipaji yapëtaneme picani apopecanaxuirabia-exanaenexa Dioso pitabarata. ¿Detsa nexata xuajitsia caranata apojudíowi aeconoxae jamatabëjinawanapaeya-exaname judíowicuenia?», janë Pedrojawabelia pewecuanasaicayabixae apojudíowi.
Judíowi, apojudíowi-ata, najëpaeya siwanajamatabëcuenecopaba Cristojawabelia, aneconijibia Dioso petaenexatsi
15 Orijibia, jumaitsinë Pedrojawabelia bajarapamonae pitabarata: «Waxaitsi baja cajena judíowitsi wajanaexanaejawaweliacujinae nacayajawawitsata, wajajumecowënëtsinexa pexaniajailiwaisi, Dioso pejumeliwaisi. Nexata, waxaitsi apocuenejëpaetsi apojudíowi, pamonae apopeyapëtaewi Dioso pejumeliwaisi.
16 Nexata, waxaitsi baja cajena yapëtanetsi mapacueneje: Itsajiwi-ata apocuenecaëjëpaetsi pejumecowënëtsicapanepaejawa Dioso penajumecopatsiliwaisi Moisés-pijinëta, Dioso juya aneconijibia petaenexatsi. Waxaitsi judíowitsi-ata matapania itsa siwanajamatabëcuenecopatsianatsi Cristojawabelia , Dioso aneconijibia nacataena. Dioso aneconijibia aponacatae wajajumecowënëtsijamatabëcuene Dioso penajumecopatsiliwaisi Moisés-pijinëta.
17 »Waxaitsi baja yapëtanetsi Dioso aneconijibia wajanacataejawa, wajasiwanajamatabëcuenecopatsixae Jesucristojawabelia, jumecowënëtsinejewatsi Dioso penajumecopatsiliwaisi Moisés-pijinëta. Nexata, bajarapacuenia itsa jaitsipatsi Dioso aneconijibia wajanacataenexa, jumecowënëtsinejewatsi bajarapaliwaisi, ¿naneconitsipatsi meta Diosojawabelia itsa apo-exanaetsi wajanaca-itorobicueniak Dioso penajumecopatsiliwaisi Moisés-pijinëta? ¿Bewajanaca-itorobijawa meta Cristo pibisiacuene waja-exanaejawanexa? ¡matapania itsa siwanajamatabëcuenecopatsianatsi Cristojawabelia!
18 Diosojawabelia rajane naneconitsipajë tacopatsicujinae, tajumecowënëtsijawa Dioso penajumecopatsiliwaisi Moisés-pijinëta itsa caewëalia icatsia siwanajamatabëcuenecopatsipajë tajumecowënëtsinexa bajarapaliwaisi, Dioso aneconijibia tanetaenexa.
19 Bajarapacuenia natoyapëtaniji, tsipaji pamatacabi abaxë ajamatabëcuenesaëya jaitajë Dioso aneconijibia tanetaenexa tajumecowënëtaponaponaejawata Dioso penajumecopatsiliwaisi Moisés-pijinëta, bajarapamatacabi Dioso aneconijibia aponetae. Biji rajane, saya caranata bajarapaliwaisi nenaneconitsia-exana tatëpaejawabelia tajaneconijamatabëcuene. Bajaraxuata, maparucaeje nawecuacopatajë baja tajumecowënëtsijawami bajarapaliwaisi, Dioso aneconijibia tanetaenexa. Juya, exanaponaponajë Dioso pejitsipaecuenia Cristo pejamatabëcueneta.
20 Bajarapacuenia exanaponaponajë, tsipaji Cristo cruzajawabelia itsa cobematabiabarutatsi, tajaneconijamatabëcuene betaneyajawacobematabiabarutsi. Bajaraxuata, apoponaponaenë tajaperujujamatabëcueneta. Biji rajane, ponaponajë pejanajamatabëcueneta, papejanajamatabëcuene Dioso nerajuta, tasiwanajamatabëcuenecopatsixae Pexënato Cristojawabelia, Ponë tane-asiwaxae nacaeweta pijacuata tanesiwatëpaenexa.
21 Bajaraxuata, aponamuxujematsinë Dioso asiwaya wajanaca-itaxutotsoniataejawa, tsipaji Dioso aneconijibia jiwi itsa taejitsipa, pejumecowënëtsijamatabëcuene Dioso penajumecopatsiliwaisi Moisés-pijinëta, nexata Cristo jiwi aposiwatëpae tsipae pijaneconi yabara. Nexata, Cristo saya jema tëpaejitsipa», janë Pedrojawabelia daxita bajarapamonae pitabarata, tamuxujiobijawata.