Pacuenia icatsia Pablo itaweta Corinto tomarapijiwi Diosojawabelia penaneconitsiyaniwa, yabara peliwaisi
13
Aeconoxae baja icatsia ponaejitsianë paxamëjawabelia acueyabinamutonexa. Nexata, paxamëjawabelia itsa patsianajë, tocanaëjëtsianajë pijaneconi pibisiacuene pexanaewi, pecuenewajunupaebicujinaetsi pijaneconi yabara, anijajiwibeje, acueyabi pajiwibeje-ata, pecuenetaewitsi, pacuenia Dioso naca-itoroba pejumeliwaisibaxutota.
2 Cotocaewi namutojawata, patacasiwaxainaejawata, bajarapamatacabijawa pacayapëtaya-exanatsi tananeconitsia-exanaejawanexa pibisiacuene pane-exanawanapaewi, pamonae-ata pibisiacuene-exanawanapa tanawiatsicujinaerena. Bajarapijinia pacuenia, ta-exanaejawanexanua pamonae tanawiatsicujinae pibisiacuene exanawanapa. Aeconoxae tajë pacawecuaponaponae-atatsi, pacatoyaquinatsi icatsia pataca-itawetsinexa pibisiacuene pane-exanaeyaniwa. Icatsia, paxamëjawabelia itsa patsianajë, pacananeconitsia-exanaenatsi, daxita pibisiacuene pane-exanawanapaewi. Caejiwi-ata apobejiobiataenë tsane, pibisiacuene pexanaeneconi yabara.
3 Bajarapacuenia exanaenajë paneyapëtaenexa, tsipaji paxamë pajitsipabiabame patacatsita-exanaejawa tayajawacuaicuaijaitsabiabijawa Cristo. Cristo raja apo-acuenesaëjibi, papecananeconitsia-exanaenexa pibisiacuene pane-exanaejawa yabara. Biji rajane, pacuenesaë xainaponapona, pacatsitanajamatabëcuene-itajëtsiana itsa pacananeconitsia-exanaena. Bajarapijinia pacuenia, xanë-ata Cristo pesaëta pibisiacuene pexanaewi naneconitsia-exanaenajë.
4 Pacujinae Cristo pijawajabitsaëwi cobematabiabarutatsi cruzajawabelia, piacuenesaëjibinëcuenia tëpa, pacuenia jiwitsi batëpatsi. Itsiata, aeconoxae Dioso pesaëta, asaë tsaponaponae pewajënaeyabelia. Paxanë-ata baja cajena Cristo pacuenejëpawanapajë. Pacuenia bajaraPonë acuenesaëjibi, bajarapacuenia paxanë-ata pa-acuenesaëjibinë. Pacuenianua Dioso pesaëta Cristo asaë tsaponaponae, bajarapijinia pacuenia, paxanë-ata Dioso pesaëta panacuenebaponajë, paxamë patacajamatabëcueneyawenonaenexa.
5 ¡Paxamë rajane, panajamatabëcueneliwaisicanaëjëre, panenacueneyapëtaenexa itsa xaniajai pepacuene Cristojawabelia pasiwanajamatabëcuenecopabame! Pacaenëmë canacujitsia bepanacuenecanaëjëtame panenayapëtaenexa itsa pepacuene Cristo papijajiwitonëmë. Nexata, panayapëtaenamenua Cristo papecatsijamatabë-ecaejawa.a Itsa pijinia, Cristo papecatsijamatabë-ecaejawa apopanayapëtaemë, nexata Cristo apopapijajiwitonëmë.
6 Cristo papecatsijamatabë-ecaexae, panacueneyapëtaneme Cristo papijajiwimëcuene. Bajarapacuenia panenayapëtaexae, xaniawaetsia paneyapëtaneme paxanë-ata Cristo papijajiwinëcuene.
7 Cristo papijajiwixaemë, pacatowajëtaponatsi Diosojawabelia, ëpexaniacuene pane-exanawanapaejawa, pibisiacuene pane-exanaponaeyaniwa. Bajarapacuenia apopacatowajëtaponaetsi, itsamonae paxanë pataneyaiyataenexa pa-apóstolewinë yabara. Pacatowajëtatsi rajane xaniawaetsia paxamë panejinawanapaenexa Dioso pitabarata. Biji rajane, Cristo papijajiwixaenë, Diosojawabelia pacatowajëcaponatsi papecajamatabëcueneyawenonaenexa, ëpexaniacuene pane-exanawanapaejawanexa, itsamonae apopaneyaiyatae-ata apóstolewicuenia.
8 Nexata, Cristo papijajiwixaenë, pamonae pexaniacuene exanawanapa, acuenebi patananeconitsia-exanaejawa, tsipaji baja jumexaniatane pexanialiwaisi, Jesús peliwaisi. Apoxanepanaenua pata-ajibia-exanaenexa bajarapapexanialiwaisi, jiwi anaeya patabijataejawata. Bajaraxuata, itsa papatsianajë paxamëjawata, pananeconitsia-exanaenajë ëpijaneconi pexainaewi.
9 Nexata, itsa pajinawanapaename ajamatabëcuenesaëya Dioso pejitsipaecuenia, pacasiwajamatabëcuenebarëyatsi tsanetsi, tsipaji apopaxainaemë tsane paneconi yabara pacananeconitsia-exanaejitsiatsi, itsamonae panetae-ata pata-ajamatabëcuenesaëjibiwicuenia. Bajaraxuata, pacatowajëtaponatsi Diosojawabelia, panewajënaeyabelia panejamatabëcueneliwaisi naweretaponaenexa Dioso pijacuenejawalia, ëpexaniacuene pane-exanawanapaenexa.
10 Pacatoyaquinaliatsi mapabaxutoje taponaewajënaeya paxamëjawabelia, tawajënaelia pibisiacuene pane-exanaejawa panenajamatabëcuenexanebinexa. Nexata, itsa patajopaeliajë paxamëjawabelia, aponamatawenonaenë tsane patacabijataejawa, patacananeconitsia-exanaejawanua. Panamatacaitorobisaë Dioso nerajuta, apojitsipaenë patacananeconitsia-exanaejawa. Biji rajane, jitsipajë bajarapasaëta patacajamatabëcuene-asaëya-exanaejawa, panewajënaeyabelia pajamatabëcueneliwaisi naweretaponaenexa Dioso pijacuenejawata.
Pablo penapëjiobiliwaisi
11 Bajarasaya paliwaisiyo pacatoyaquinaliatsi. Tajamonae, pacatojitsipatsi panejamatabëcuenebarëyatsawanapaejawa. ¡Panewajënaeyabelia pajamatabëcueneliwaisi naweretaponare Dioso pijacuenejawata, ëpexaniacuene pane-exanawanapaenexa! ¡Pa-ajamatabëcuenesaëmëre najamatabëcuenejëpaeya panejinawanapaenexa jamatabëcuenexanepanaeya! Bajarapacuenia itsa pajinawanapaename, Dioso pacayajawaponaponaena, tsipaji bajaraPonë wajanaca-asiwanë, jamatabëcuenexanepanaeya wajanacajinawanapaeya-exanaenë-ata.
12 ¡Jesús peliwaisi panejumexaniataexae, xaniawaetsia namata-enetsia bitso nasiwaya panabajacobabiabare!
13 Daxita pamonae Cristo pijajiwi, majotaje pejinawanapaewije, pacabajacobalia.
14 Bitso pacatojitsipatsi wajatuxanenë Jesucristo pexaniacuenia papecayawenonabiabijawa, Dioso penajamatabëcuene-itajëtsinexa paxamëjawabelia bitso papeca-asiwajawa, Espíritu Santo papecajamatabëcueneyawenonaejawanua, panejinawanapae-epato mapanacuataje. Bajara-itsi tsane.