Pablo nawajunupaeba bemajitsinaebota wajatuxanenë pacuenia tsitanaitajëtabiabatsi
12
Xanë aponetsitaxanepanae picani ajume-urajibia patacanawajunupaebijawa, tsipaji bajarapaliwaisi apojamatabëcueneyawenonae tsipae itsamonae-ata. Itsiata baitsi jane, pamonae peyamaxë-itojorobi-apóstolewi, bajarapacuenia papecanacuene wajunupaebabiabixae, xanë-ata bajarapacuenia exanaenajë. Nexata, aeconoxae pacatsipaebianatsi xuanë bemajitsinaebota wajatuxanenë Jesucristo tanetsitanaitajëtabiabijawa. BajaraPonë neyapëtaeya-exananua pajamatabëcueneliwaisi xaina xuanë netsitajëta.
2-3 Catorce baja pawaibeje xainajë tanecaponaecujinae athëbëabetsia, Dioso pijanacuayabetsia. Aponayapëtaenë athëbëabetsia tanecaponaejawa taperabëto yajawa. Itsa jume, ëtajamatabëcuene meta saya capona. Caenë Dioso yapëtane pacuenia necapona athëbëabetsia.
4 Itsiata, yapëtaniji tanecaponaejawa paraísojawabetsia, Dioso pijanacuayabetsia. Bajarajotatsia, jumetaniji Dioso muetsia pexainabuatsiliwaisi. Bajarapaliwaisi Dioso aponetocopatsi tatsipaebinexa itsajiwi-ata.
5 Bajaraxuabeje yabara necaëjëpa picani tanawajunupaebijawa, jiwi taneyaiyataenexa. Itsiata baitsi jane, aponawajunupaebinë tsane bajarapacuenia. Biji saya, nawajunupaebianajë tasaëjibicuenejawanë yabara.
6 Nawajunupaebaponae-atanë pacuenia taniji athëbëtatsia, aponawajunupaebaponaenë tsipae betanematajemabinëcuenia, tsipaji ëpexaniajailiwaisi nawajunupaebaponaejitsipajë. Itsiata baitsi jane, aponawajunupaebaponaenë tsane bajaraxua yabara, tsipaji apojitsipaenë bajarapaliwaisita jiwi taneyaiyataenexa. Biji rajane, jitsipajë jiwi taneyaiyataenexa, ta-exanaponaejawa yabara, liwaisi tatsipaebaponaejawa-ata yabara.
7 Be-ayaijamatabëcuene tanataeyaniwa, daxita jiwi matatoxenetsia, Dioso tanetsitajëtsijawanë yabara, bajaraPonë netocopata necuenecaranatsiaya nawixaetaeya taponaponaenexa. Nexata, dowathi pijajiwitonë pejamatabëcueneta nawixaetaeyaa neponaponaeya-exanabiaba daxitamatacabi.
8 Cristojawabelia picani wajëtajë acueyabi xuabeje tanewecua-ajibia-exanaenexa bajarapawixae.
9 Itsiata baitsi jane, bajarapacuenia aponeto-exanae. Caranata, wajatuxanenë nejumaitsi mapacueniaje: «Jume. Apocawecua-ajibia-exanaetsi tsane. ¡Biji rajane, itaxutuajamatejemamëre taca-asiwajawa yabara, tsipaji xamë niajamatabëcuenesaëjibijawata, daxita jiwi yapëtaena, xanë, Cristonë, tasaëta tanetonacuenebijawamë!», nejai wajatuxanenë. Bajaraxuata, wajatuxanenë pijacuene tatonacuenebinexa, xanë tasaëta apotanejamatabëcuenecaëjëpaejawa yabara, nasiwajamatabëcuenebarëyanë, tsipaji Cristo pesaëta neyawenonabiaba daxitacuene.
10 Nexata, aponejamatabëcuenecaëjëpae-ata, tasaëta tatonacuenebinexa wajatuxanenë pijacuene, itsiata nasiwajamatabëcuenebarëyanë. Bajarapijinia pacuenia, wajatuxanenë itsa tonacuenebajë, namatawenonabiabi-atanë itsacuenejawaxi, itsamonae apotamuxujitsipaejumenë nejumaitsitsabiabi-ata, nebejiobia-exanabiabi-ata Cristo pijajiwitonëxaenë, netsi-ayapëbeje tsabiabi-atanua tatonacuenebinexa Cristo pijacuene, nasiwajamatabëcuenebarëyanë. Daxita bajaraxuanë yabara nasiwanajamatabëcuenebarëyanë, tsipaji paepatota, aponejamatabëcuenecaëjëpae, wajatuxanenë bitso nejamatabëcueneyawenonabiaba, tane-asiwajamatabëcuene.
Pacuenia Pablo bitso siwanajamatabëxaina Jesús pijajiwi, Corinto tomarapijiwi, yabara peliwaisi
11 Xanë bajarapacuenia apojitsipaenë itsa pacanawajunupaebaponaejitsipatsi, jemaliwaisi saya tacuaicuaijainë tsipae. Itsiata, paxamë pane-itorobame patacanacuenewajunupaebinexa. Biji rajane, picani paxamë bepanecuenewajunupaebame xua exanaponaponajë paxamëjawa, pacuenia peyamaxë-itojorobi-apóstolewi pacuenewajunupaebame. Xanë picani apoxainaenë itsacuenejawa xua yabara itsamonae be-ayaijamatabëcuenenënë netaejitsia. Itsiata, pamonae peyamaxë-itojorobi-apóstolewiwecua, beweliajamatabëcuenenënë aponataenë.
12 Pacanaëjëre: Paxamëjawata itsa ponaponajë, netsi-ayapëbeje-ata, bajayajebi pacatsita-exanaponaponatsi pacuenia Dioso nitoroba. Pacatsipaebaponaponatsi Jesús peliwaisi. Pacatsita-exanabiabatsinua pinijicuene ta-exanaejawa Dioso pesaëta. Daxita bajarapacuenia ta-exanaejawata, payapëtaneme xaniajai Dioso tane-itorobijawa paxamëjawabelia, pija-apóstol-nëxaenë.
13 Caejawa saya pacatosajina pataneto-exanaenexamë, pacuenia neto-exana itsamonae, Jesús pijajiwi, itsatomaranëjawa pejinawanapaewi. Paxamë apopacawajëtsitsi. Biji rajane, wajëcabiabajë itsamonaejawabelia, Jesús pijajiwijawabelia, tanamatawenonaejawata, taneyawenonaenexa. Bajarapacuenia apopacawajëtsitsi paxamëjawabelia, patacajamatabë-itonotsiyaniwa. Bajaraxua yabara itsa pacatsita-abeje, pexaniacuenia pacawajëtatsi patanesiwajamatabëcuenecaewinexamë.
14 Mabaja panamutotaje, acueyabinamuto, taponaenexa paxamëjawabelia, naxaniawaetaponaponajë baja. Itsiata, apopacamatamoyanijobi tsanetsi Dioso pejumeliwaisi patacatsipaebimatamo, pacuenia pacawajëcabiaba peyamaxë-itojorobi-apóstolewi. Apojamatabëcuenebëjanë patanerajutsinexamë panijapalata. Biji rajane, bitso pacasiwajamatabëcuenebëjaitsi, asiwaya patanecopiapitsinexamë. Pacuenia pexi pexainaewi aposiwabëjai pexi pijapalatata, pena-ewetsinexa. Biji rajane, pexi caranata basiwabëjai, penamatawenonaecuene perajutsinexa. Bajarapijinia pacuenia, xanë-ata pacasiwabëjaitsi, bepataximë patacataexae, panenamatawenonaecuene patacarajutsinexa. Jitsipajë rajane xaniawaetsia patacajamatabëcueneyawenonaenexa, panewajënaeyabelia panejamatabëcuenenaweretaponaenexa Dioso pijacuenejawabelia.
15 Bajarapacuenia xanë patacayawenonaenexa, daxita taxainaejawami, tajamatabëcuenesaë-ata yajawa weretsipajë jamatabëcuenebarëyaya, patacayawenonabiabinexa, xaniawaetsia Diosojawabelia pane-itaxutuajamatejematsaponaenexa. Tawajënaeyabelia bitso paca-asiwa tsaponae-atatsi, itsiata cowë, paxamë juya bewelia saya pane-asiwamë tsaponae.
16 Xaniawaetsia paxamë payapëtaneme baja palata apopatacawajëcabiabijawa. Itsiata, itsamonae paxamëyajuwënëwi xanë yabara jumaitsi tsabiabi, bajarapacuenia patacayamaxë-itojorobicuene. Canaëjëta muetsiacuenia, patacamatamoyanijobinexa itsamatacabijawabelia.
17 Xanë apo-itorobinë paxamëjawabelia itsanë, tabarënacuenebiwiyajuwënënë, yamaxë-itojorobiaya palata papecawajëcaenexa.
18 Pacujinae itorobaliajë Tito, itsanë yajawa, peponaenexabeje paxamëjawabelia, ¿bajaraponëbeje tsaja pacawajëtabeje palata? Jume. Apopacawajëtsibeje cajena, tsipaji panajamatabëcuenejëpajë patanacuenebijawata, amoneya patatsipaebinexa Dioso peliwaisi, pamatamoyanijobinejewanë.
19 Bajarapacuenia apopacajumaitsitsi, tanayapijiwicuaicuaijainexa, neconi tanatsi-exanaexae paxamëjawabelia, pacuenia panesiwanajamatabëxainame paxamë, paxanë yabara. Ajibi cajena. Biji rajane, Dioso pitabarata xaniajaiya pacanawajunupaebatsi, Cristo papijajiwixaenë. Bajaraxuata, daxita paliwaisi pacatsipaebatsi, bajarapacuenia pa-exanajë patacajamatabëcueneyawenonaponaenexa, bitso pataca-asiwaxae. Nexata, bitso pajitsipajë bajarapaliwaisi panewajënaeyabelia papecatsijamatabëwitsabaponaejawa Dioso pijacuenejawalia.
20 Bajaraxuata, bitso pacasiwajamatabëcuenebëjaitsi, tsipaji pacacacujunawatsi patacacaxitajarabiyaniwa tapatsimatacabi paxamëjawabelia apopatacacuenecajitsipaecuene. Belia paxamëyajuwënëwi meta itsamonae Dioso apopejitsipaecuenia jinawanapaejitsipa. Bajarapacuenia pejinawanapaexae xanë juya cuenexanetsianajë, apotsitaxanepanae-atatsi. Apojitsipaenë picani tataejawa bajarapajamatabëcuene. Itsiata, itsa patsianajë paxamëjawata, pacataenatsi meta panenajume-anaenotabiabijawa, panenacaëbabiabijawa, panenabara-anaepanabiabijawa-ata. Pacataenatsi meta apopaneyawenonaejawa itsajiwiyo-ata, itsamonae pepëya pibisiacuenia najumetsënëtsiaya panebaracuaicuaijaitsabiabijawa-ata. Pacataenatsi meta itsamonaewecua ayaijamatabëcuenewi panenataejawa, nawecuanatsanaeya panejinawanapaejawa-ata, apopanenajamatabëcuenejëpaexae. Daxita bajaraxuanë yabara apopajitsipaenë patacacuenetaejawa.
21 Orijibia, paxamëjawata tapatsicujinae, Dioso meta pitabarata pacayapijiwi-aura tsanetsi, pibisiacuene pane-exanawanapaejawa yabara. Nexata, siwajamatabënuenajë ayaibitsaëto paxamëyajuwënëwi, bajayajawawerenacujinae pibisiacuene pexanawanapaexae tapatsiwajënaeya. Apojamatabënacuenecopatsi pibisiacuene pexanaejawa. Tsiteca, pewajënaeyabelia pibisiacuene pewitota exanabiaba, itsacuenejawanënua, xua yabara be-aura Dioso pitabarata.