Pablo pexanaecuene, penajumetsënëtsiliwaisi pepaebaponaewi pexanaecuene-ata, yabara peliwaisi
11
Pexaniacuene pacawajëtatsi, patanenamuxuna-ewetsinexamë ajamatabëcuenesaëya, patacanawajunupaebijawanexa, pacatsitanatsiquejemaliwaisi-ata tsane. Be-ayaijamatabëcuene penataewia paxamëtuatuajëta najumetsënëtsiaya tanebaracuaicuaijaixae, jitsipajë patacayapëtaeya-exanaenexa patacasiwacanaëjëtsicuene.
2 Xanë raja bitso pacacuene-asiwatsi pacuenia Dioso pacacuene-asiwa, panejumexaniataeyaniwa itsaliwaisib Cristo peliwaisiwecua. Petiriwa ponë jitsipa pamonanexac jamatabëcuene- ewetsiaponapona caenë, jaitsinejewa itsanë pijajaranëwecua, bajarapacuenia pacatojitsipatsi caenë Cristo panejamatabëcuene-ewetsinexa, papecacopiapitsinexa pibisiacuene pawecua-exanaenejewamë.
3 Itsiata, pacacacujunawatsi dowathi papecayamaxë-itojorobiyaniwa, bajarapamonae penajumetsënëtsiliwaisi pepaebijawata, pacuenia exana bajayata Evapijiwamijawabelia. Nexata, bajarapamonae pepaebiliwaisita, caejamatabëcuene apopaxainaemë tsipae Cristojawabelia, bajarapamonae pepaebiliwaisita.
4 Paxamë picani caejamatabëcuene paxainame Cristojawabelia. Itsiata, itsamonae itsa pata papecatsipaebinexa, itaxutejema panamuxuna-ewetabiabame, paliwaisi canaëjëtsinejewamë pexaniajaijawa. Aeconoxae Jesús-wecua saicayanëjawabelia pasiwanajamatabëcuenecopabame. Espíritu Santowecua saicaya espíritujawabelia panajamatabëcuenecaewetame, papecajamatabëcuenecaëjëpaeya-exanaenexa pejitsipaecuenia. Panejumexaniataeliwaisiwecua, Jesús peliwaisi, saicaeyaliwaisijawabelia papënaponame panenamuxuna-ewetsinexa. Itsaliwaisijawabelia pajumexaniataneme, beJesús peliwaisi panetaexae. Patacacujarubiliwaisiwecua, pajumexaniataneme papenajumetsënëtsiliwaisi pacatsipaeba pamonae be-ayaijamatabëcuene penataewi xanëwecua.
5 Xanë itsiata, beweliajamatabëcuenenënë aponataenë bajarapamonae pitabarata, xanëwecua natae-ata pepo-apóstolewicuenia.
6 Jiwijawabelia xaniawaetsia liwaisi tatsipaebinexa aponecujani-ata, itsiata, xaniawaetsia yapëtaniji xua yabara tsipaebajë. Xaniawaetsia Jesús peliwaisi tayapëtaejawa paxamë paneyapëtaenexa, pacatsitanajamatabëcuene-itajëtabiabatsi paxamëjawata itsa pacatsipaebaponaponatsi Jesús peliwaisi.
7 Paxamëjawata, itsa pacatsipaebaponaponatsi pexanialiwaisi, papecacapanepaeliwaisinexa Diosojawabelia, itsacuenejawayo-ata apopacamatamoyanijobitsi. Bajarapacuenia ta-exanaexae, ¿pacatsitapibisiacuene meta xanë tacobeta asaëyata nacuenebabiabajë, tana-ewetsinexa, tanajamatabëcuene-itajëtsinexa beweliajamatabëcuene tanataejawa paxamëwecua.
8 Orijibia, bajarapacuenia patacayawenonaenexa, itsamonae Jesús peliwaisi pejumexaniataewi, itsamonae neto-itoroba palata, amoneya patacatsipaebinexa Jesús peliwaisi. Itsiata, bajarapapalata itsa pitajë, netsita betayacajërëtsijawa bajarapamonae, juya patacayawenonaenexa.
9 Nexata, pamatacabi paxamëjawata ponaponajë, itsacuene namatawenonae-atanë, apopacawajëtsitsi panexainaeyajuwënëjawa, patanerajutsinexamë. Itsiata, Jesús pijajiwi, Macedonia nacuawerena pepatsiwi, netocapata tanerajutsinexa daxita tanamatawenonaejawa. Paxamëjawata itsa ponaponajë nacuene-ewetajë. Nexata, itsacuenejawayo-ata pacawajëtsinejewatsi, patacajamatabë-itonotsiyaniwa. Bajarapacuenia cuenetsitecaenajë. Aponajamatabëxainaenë bexëajawabelia-ata patacawajëtsinexa.
10 Xanë, pepacuene xaniajaiya natoyapëtaniji Cristo peliwaisi pexaniajailiwaisicuene. Bajarapacuenia xaniajanë cajena, daxita Acaya nacuajawa Cristo peliwaisi amoneya asaëyata tsipaebaponajë. Bajaraxuata, itsajiwi-ata aponejumecaranatsi tsane, bajaraxua yabara tanacuenewajunupaebijawa nasiwajamatabëcuenebarëyaya.
11 ¿Detsa xuajitsia bajarapacuenia pacajumaitsitsi? ¿Pataca-itoyaxae meta apopacawecuapitsitsi pataneyawenonaejawamë, pacuenia itsamonae neyabarajumaitsi? ¡Jume cajena! Dioso raja yapëtane bitso pataca-asiwajawa.
12 Nacuenecopatsinejewanë, tawajënaeyabelia Dioso pejumeliwaisi pacatsipaebaponaenatsi, pacawajëtsinejewatsi itsacuenejawayo-ata. Bajarapacuenia exanajë, taliwaisicaranatsinexa pamonae, penajumetsënëtsiliwaisi papecatsipaebiwi, pewajënaeyabelia nawënëxaniatsiaya papecajumaitsitsaponaeyaniwa: «Paxanë-ata patonacuenebawanapajë Dioso, pacuenia Pablo tonacuenebaponapona Dioso», papecajaiyaniwa, papecatsipaebijamatabëcuene papecamatamoyanijobiyaniwa.
13 Bajarapamonae apopepo-apóstolewi picani. Itsiata, bajarapacuenia nawënërubabiaba, papecayamaxë-itojorobinexa. Bajarapamonae saya cuenecataewanapa apóstolewi.
14 Paxamë apobepasiwajamatabëcuenenabenajacaemë bajarapamonae. Saya exanawanapa papecayamaxë-itojorobinexa. Cuenejëpa Satanás, tsipaji bajaraponë-ata naitajëta ángel-nëcuenia pecotia yajawa, jiwi petaenexatsi bepexaniajailiwaisi itajara petsipaebinë.
15 Bajarapijinia pacuenia, dowathi pijajiwi-ata,d pexaniacuene itajara exanawanapa, jiwi peyamaxë-itojorobinexa. Itsiata, apobesiwajamatabëcuenenabenajacaetsi bajarapamonae pexanaecuene yabara, tsipaji itsamatacabi Dioso naneconitsia-exanaena bajarapamonae paneconiwajëtota tocaëjëtatsi.
Pacuenia Pablo apóstol-nëxae nabejiobitsiaponapona, yabara peliwaisi
16 Icatsia, pexaniacuene pacawajëtatsi, patanenamuxuna-ewetsinexamë. ¡Xua aeconoxae pacajumaitsi tsanetsi, bajaraxua yabara pëtsa panetaneme betanematajemabinë! ¡Panetae-atamë betanematajemabinë, itsiata panenamuxuna-ewere paliwaisi pacatsipaebijitsiatsi! Pacuenia peyamaxë-itojorobi-apóstolewi ajume-urajibia pacanawajunupaebabiaba, paneyaiyataenexa, bajarapijinia pacuenia, xanë-ata ajume-urajibia pacanawajunupaebijitsiatsi, pataneyaiyataenexamë.
17 Wajatuxanenë picani aponitorobi patacanawajunupaebinexa. Itsiata, pacuenia pematajemabinëtsi ajume-urajibia banawajunupaeba xua exana, bajarapacuenia xanë-ata aeconoxae ajume-urajibia pacanawajunupaebatsi, pataneyaiyataenexamë.
18 Pamonae peyamaxë-itojorobi-apóstolewi, ayaijamatabëcuenewi nataeyabiaba. Nexata, ajume-urajibia pacanajamatabëcuenewajunupaebabiaba bajarapamonae. Nexata, xanë-ata bajarapacuenia ajume-urajibia pacanajamatabëcuenewajunupaebijitsiatsi.
19 Paxamë bitso ayailiwaisi bepaneyapëtaewi itajara, tsipaji jamatabëcuenebarëyaya panamuxuna-ewetabiabame paliwaisi pacatsipaebabiaba peyamaxë-itojorobi-apóstolewi, itsa pacanacuenewajunupaeba ajume-urajibia bepematajemabiwitsicuenia.
20 Bajarapamonae xaniawaetsia panamuxuna-ewetabiabame, bepapijajiwimëcuenia paca-itorobabiabi-ata, panexainaejawaxi pacawecuaweretaponae-ata, bijiaya pacanaëcotabiabi-ata, paca-itabara pacababeyabiabi-ata. Daxita bajarapacuenia pacato-exanae-ata, itsiata xaniawaetsia panamuxuna-ewetabiabame.
21 Paxanë bajarapacuenia apopaca-exanaetsi, pamatacabi pajinawanapajë paxamëjawata.
Itsiata, bajarapamonae ajume-urajibia itsa pacanacuenewajunupaebabiaba, xanë-ata necaëjëpa bajarapitsicuene yabara ajume-urajibia patacanacuenewajunupaebinexa, pataneyaiyataenexamë.
22 Bajarapamonae ayaijamatabëcuenewi nataeya itsa pacanacuenewajunupaebabiaba, pijajudíocuene yabara, xanë-ata rabaja judíonënë. Itsiata, bajarapacuenia apopacajumaitsitsi, pataneyaiyataenexamë. Bajarapamonae itsa pacanacuenewajunupaeba Israel-pijinë pemomoxicuene, xanë-ata rabaja Israel-pijinë pemomonë. Bajarapamonae itsa pacanacuenewajunupaebabiaba Abraham-pijinë pemomoxicuene yabara, xanë-ata rabaja Abraham-pijinë pemomonë. Daxita bajarapacuenejawanë panacuenejëpae-atanë, itsiata bajarapacuenia apopacajumaitsitsi.
23 Bajarapamonae itsa pacanacuenewajunupaebabiaba pacuenia tonacuenebawanapa Cristo pijajiwicuenia, xanë-ata rabaja Cristo xaniawaetsia tonacuenebaponaponajë, bajarapamonae matatoxenetsia. Xanë picani apojitsipaenë bajarapacuenia patacanawajunupaebijawa, tsipaji betanematajemabinëcuenia nataniji, itsa ajume-urajibia pacanacuenewajunupaebatsi. Itsiata, mapacuenia pacanawajunupaebijitsiatsije. Xanë bitso Cristo tonacuenebaponaponajë bajarapamonae matatoxenetsia, tsipaji xanë bitso nejumaconitabiaba penaneconitsiwi pejumaconibabeyabiabimacata bajarapamonaewecua. Matatoxenetsia nenaneconitsia-exanabiaba penaneconitsiwi pejebabiabibota tane-etsinexa. Matatoxenetsianua anijatonë imoxoyo tanebeyaxuababiabi.
24 Orijibia, cinco xuabeje judíowi newaetaba, tanenaneconitsia-exanaenexa. Caenewaetabi canacujitsia nejumaconitabiaba treinta y nueve xuabeje,e penaneconitsiwi pejumaconibabeyabiabimacata.
25 Acueyabi icatsia xuabeje apojudíowi newaetaba, tanenaneconitsia-exanaenexa. Bajaraxuanë saicaya naebota nejumaconibabia. Icatsia, itsamatacabijawabelia caeto judíowi ibotonëta netsecona. Acueyabi pijinia panamutobeje, menia barcota tanaponaejawata, acueyabi xuabeje nayabubunajë manuameneta. Caejawa pataya-othopaejawata, caemerawi, caematacabi yajawa, manuameneta juenajetarucajë.
26 Xanë ayaicuenia tajinarutabiabixae, Cristo peliwaisi jiwi tatsipaebaponaenexa, netsi-ayai tsabiabi mapitsicuenejawanëje. Netsi-ayai tsabiabi menia taponaejawata. Netsi-ayai tsabiabi namutua taponaejawata. Netsi-ayai tsabiabi penacobetoxotsiwi tanewecuanacobetoxotsiyaniwa tacobecowëjawaxi. Itsajawata, netsi-ayai tsabiabi tajanacuapijiwi tane-itsacueniabinexa, itsajawata pijinia saicayanacuapijiwi tane-itsacueniabiyaniwanua. Netsi-ayai tsabiabi tomaranëjawa, petusatonacuanëjawa-ata, manuamenejawa-ata. Bajarapacuenia netsi-ayai tsabiabi pamonae Jesús peliwaisi bepejumexaniataewi.
27 Itsajawata, bitso nacuenebabiabajë. Cueranabiabajënua. Itsajawata, apomajitabiabinë. Itsajawata, bitso tajani tsabiabi. Meranua jitsipabiabajë. Itsajawata, taxaejawa xaenejewanë, ponaponabiabajë. Itsajawata, bitso aquenë tsabiabi, apotaxainaexae tanaxatatsijawa. Bajarapacuenia nabejiobitsiaya najetarucae-atanë, Cristo peliwaisi tapaebanajetarucaejawa, apocopatsinë baja tatonacuenebijawa wajatuxanenë pijajiwitonëxaenë.
28 Bajarapacuenia netocopiapatabiabi-ata, pematatsënëa xainajë itsajawa bitso tasiwanajamatabëxainabiabijawa, caematacabi canacujitsia, Jesús pijajiwi pamonae jinawanapa caetomaranë canacujitsia.
29 Nexata, bajarapamonaeyajuwënëjiwi, itsa jamatabëfaefaenapona Dioso pijacuenejawalia, xanë-ata betaneyajawajamatabëcuenefaefaenae. Pajiwi itsajiwi pejamatabëcueneta pibisiacuene exanaeya-exanatsi, pejopaenexa Dioso pejumeliwaisiwecua, bajarapajiwi yapijiwi-auranë tsabiabi Diosojawabelia. Bara-anaepanabiabajënua pajiwi pejamatabëcueneta jopaeya-exanatsi.
30 Itsajiwi itsa nitoroba tanawajunupaebinexa, ayaijamatabëcuenenënë yabara, itsiata, xanë nawajunupaebianajë xua nejamatabëcuenefaefaenaeya-exana Diosowecua.
31 Xaniajanë rabaja. Dioso, wajatuxanenë Jesucristo paxa, Ponë tsicarucatsi daxitajiwi pewënëxaniatsinexatsi daxitamatacabijawabelia. BajaraPonë yapëtane apotanajumetsënëtsijawa.
32 Pamatacabijawa ponaponajë Damasco tomarata, pepo-ira-ewetsinë, Aretas-wënënë, eweta bajarapa-ira. Nexata, bajaraponë itoroba pijajiwi wajabitsaë penubenaenexa Damasco tomara matatoyorotsia peyacaranatsi-ibopanaxanetopijibaupajawata, bajarajota tanewaetabinexa, tanecaponaenexa picani penaneconitsiwi pejebabiabiboyabelia.
33 Itsiata baitsi jane, itsamonae, Jesús pijajiwi, bemapirecuenia pexanaejawaxaneto-ënëta ne-ecaeya-exana. Nexata, tomara matatoyorotsia peyacaranatsi-ibopanaxanetojumabelia neyamaëyacopareca, athëbëyo perucaeventanawojotualia. Bajarapacuenia wecuapanepajë Damasco tomara pewetsinë pijajiwi.