Pablo nayapijiwicuaicuaijai Cristo pitorobijawatsi, Dioso pejumeliwaisi daxitanacuanëjawa jiwi petsipaebanajetarucaejawa yabara
10
Pacuenia Cristo asiwaya pacamuxujiobijitsipa, bajarapacuenia xanë-ata asiwaya, ajumesaëya, pacato-exanatsi,a tsipaji Jesús peliwaisiwecua itsamonae itsacuenia pacajamatabëcuenematacapona patacatsipaebiliwaisiwecua. Bajarapacuenia pacatoyaquinae-atatsi, itsamonae, paxamëyajuwënëwi, xanë yabara jumaitsi tsabiabi: «Itsa abaxë Pablo tajë nacawecuaponapona, ajumeliwaisisaëya nacatoyaquinabiabarena. Itsiata baitsi jane, majotaje, waxaitsijawata, itsa patajopaena, pitejepabinëcuenia patajopaena. Ajumejibia ponaponaena piajume-uraxae», jai tsabiabi. Itsiata, bajarapacuenia pejumaitsijawa apoxaniajai, tsipaji Cristo tane-itorobinëcuene aponeyapëtae.
2 Nexata, pexaniacuene pacawajëtatsi, bajarapamonae panenamuxuna-ewetsiyaniwa penajumetsënëtsiliwaisi. Apojitsipaenë patacayajawabijataejawa pacujinae patsialiajë paxamëjawabelia. Patanecuene-aebiwi bajarapamatacabi ayaijumeta bijataeya muxujiobianajë, tsipaji panecuenecanaëjëta Cristo patane-itorobicuenia apopatanacuenebijawa. Biji rajane, saya panetaneb mapanacuapijiwije patatsitacuenejëpaejawa patanacuenebijawata, patajacuata patanatojitsipaecuenia,c Dioso pijacuene.
3 Xaniajai rabaja. Paxanë pajiwinë. Itsiata baitsi jane, apopabarënacuene-ëjëbinë pacuenia mapanacuapijiwije exanabiaba pecuenecaranabiwitsijawabelia.
4 Bajaraxuata, paxanë apopacanacuenebinë mapanacuapijiwi pecanaëjëbicuenia, pata-ajibia-exanaenexa patanebaracuaicuaijaicuene. Biji rajane, pacanawajabitsaëtajë Dioso patanerajutsijawanëta.d Dioso pesaëta pacanacuenebajë bajaraxuanë, pata-ajibia-exanaenexa mapanacuapijiwi pecanaëjëtsijamatabëcuenemi, itsamonae-ata najumetsënëtsiaya patanebaracuaicuaijaitsabiabijawa.
5 Orijibia, ayaijamatabëcuene penataewi, jamatabëpanecuene caranatabiaba, itsamonae Cristo peliwaisi pejumexaniataeyaniwa patatsipaebijawa. Itsiata, pa-ajibia-exanaponajë Dioso pesaëta bajarapacuene caranatsiliwaisi. Nexata, daxita jiwi penajamatabëxainaecuene pajamatabëcuene-amoneyabaponajë Dioso peliwaisita. Bajarapacuenia pajamatabëcuenejëpaeya-exanaponajë Cristo patanejumetaewi bajarapapexanialiwaisi.
6 Nexata, paxamë Cristo panejamatabëcuenejëpaecujinae, papeca-itorobicuenia pane-exanawanapaenexa, pacuene-itawetsianamee najumetsënëtsiaya patanebaracuaicuaijaiwi. Bajarapamonae paxanë-ata baja pasiwanajamatabëcueneweretajë patacuenexanetsinexa.
7 Bajarapamonae saya naniapijicuene panecuenecanaëjëta, Jesús papijajiwinëcuene yabara. Pajiwi nayabarajumaitsi: «Xanë raja Cristo pijajiwitonënë», itsa nayabarajai, bajarapajiwi bepaneyapëtane paxanë-ata Cristo papijajiwinëcuene.
8 Xanë raja Cristo pijajiwitonënë. Dioso tane-itapetsixae, Cristo baja pija-apóstol-nënë yabara. Xanë baja napëna pacanawajunupaebabiabatsi. Bajarapanamatacaitorobisaë Cristo aponerajutsi, patacajamatabëcuenefaefaenaeya-exanaenexa patacawecua-ajibia-exanaejawabelia panejumexaniataejawa Cristo peliwaisi. Biji rajane, nerajuta, patacajamatabëcuene-asaëya-exanaenexa Panejamatabëcuene naweretsijawabelia Dioso pijacuene. Bajaraxuata, apo-auranë tacanacuenebijawa bajarapanamatacaitorobisaë paxamëtuatuajëta.
9 Bajaraxua yabara, apojitsipaenë patacajamatabëcuenenabenajacaeya-exanabiabijawa patacatoyaquinaeliwaisianëta, patanecujunawinexamë.
10 Xaniajai. Itsamonae paxamëyajuwënëwi, xanë yabara jumaitsi tsabiabi: «Pablo ajumeliwaisisaëya nacatoyaquinabiabarena. Itsiata, bajaraponë itsa patajopa majotaje, waxaitsijawata, apo-ajumesaë tsabiabi. Saya ajumeliwaisixaebi tsabiabi», jai tsabiabi itsamonae xanë yabara.
11 Itsiata baitsi jane, pamonae bajarapacuenia paxanë yabara panejumaitsi tsabiabi, panecueneyapëtaena pacuenia patacatoyaquinaeliwaisita ajumesaëya pacajumaitsitsi, bajarapijinia pacuenia, patapatsijawatalia, ajumesaëya jumaitsinë tsane bajarapamonaejawabelia, tacuenexanetsinexa.
12 Xaniajai. Paxanë apopanecuenecaëjëpae patajamatabëcueneliwaisijëpaejawa, patacuenejëpaejawanua, pacuenia bajarapamonae nacuenecanaëjëta pexanaejawanë yabara, pijacuata namata-enetsia penasiwajamatabëcuenebarëyatsabiabinexa. Bajarapacuenia pexanaexae, bajarapamonae jemacuenia saya nacuenecanaëjëta penacuenejëpaejawa pexanaecuene yabara. Bajaraxuata, bitso ayaijamatabëcuenewi nataeyabiaba, bepexaniajamatabëcuenewi penataexae itsamonaewecua.
13 Bajarapamonae, be-ayaijamatabëcuenewi penataexae, apotocopatsi-atatsi, pejitsipaecuenia pacanamatacaitorobapona. Itsiata baitsi jane, paxanë Dioso patanerajutsijamatabëcuenesaë, apopacanacuenebinë patanetocaëjëtsijawawecua.f Biji rajane, panacuanëpijiwijawa Dioso pane-itoroba patatsipaebanajetarubenaenexa Jesús peliwaisi, ëbajarapamonaejawa panetoxanepana patanamatacaitorobaponaenexa. Nexata, paxamë, paCorintotomarapijiwimë-ata, copiaya patacatsipaebixae Jesús peliwaisi, panetsicaruca patacanamatacaitorobinexa.
14 Nexata baja, paxanë pacatsipaebatsi bajarapaliwaisi bajarapamonaewecua, copiaya patapatsixae paxamëjawabelia. Nexata, Dioso panetocaëjëta patacanamatacaitorobinexa. Itsa copiaya apopapatsinë tsipae paxamëjawata, pacatsipaebinexa Cristo peliwaisi, nexata Dioso peneta apopanetocaëjëtsi tsipae bajarapacuenia pata-exanaejawa. Bajarapacuenia itsa paexanaejitsipajë, pajumematatoxenetsipajë Dioso patanetocaëjëtsijawawecua, itsa bajarapacuenia pacanamatacaitorobijitsipatsi.
15 Pamonae baja jumexaniatane Jesús peliwaisi, itsamonae petsipaebixaetsi, bajaraxua yabara tajacuata aponasiwajamatabëcuenebarëyanë, pacuenia exana bajarapamonae be-ayaijamatabëcuenewi penataewi. Biji rajane, bitso pajitsipajë pematatsënëa patacacujarubinexa paxamëjawabelia, panejamatabëcuenewitsabaponaenexa Dioso pane-itaxutuajamatejemajawa. Bajarapacuenia itsa pajamatabëcuenewitsabaponame, nexata payapëtaename Dioso patanetocaëjëtsijawa bajarapacuenia pata-exanaenexa. Bajara-ëxua pajitsipajë pata-exanaenexa paxamëtuatuajëta.
16 Dioso patane-itorobixae, patatsipaebanajetarubenaenexa Cristo peliwaisi itsanacuanëpijiwijawa, tajë paxamëwecua pe-enaetomaranëjawa, bajarapacuenia pa-exanaenajë. Itsiata, apopapaebinë tsane itsajota baja itsamonae copiaya pata, petsipaebinexa Cristo peliwaisi. Apopajitsipaenënua itsamonae penacuenebijawa patanaxainaeyabijawa, bepaxanë pata-exanaejawa patanasiwajamatabëcuenebarëyanexa.
17 Jiwi penasiwajamatabëcuenebarëyajawa yabara, jumaitsi Dioso pejumeliwaisibaxutota mapacueniaje:
«Pajiwi jitsipa nasiwajamatabëcuenebarëyaya penawajunupaebijawa itsamonaejawabelia pexanaejawa yabara, nexata benawajunupaeba Dioso peyawenonaejawatsi, bajarapacuenia pejumetaewitsi peyaiyataenexa Dioso», jai Dioso pejumeliwaisibaxutota.g
18 Pajiwi pijacuata nasiwajamatabëcuenebarëyaya nawajunupaebabiaba pexanaejawa yabara, bajarapajiwi aliwaisimatamobi penacuenewajunupaebijawa. Itsiata baitsi jane, pajiwi wajatuxanenë Jesús wënëxaniata pesiwajamatabëcuenebarëyaxae pexanaecuene yabara, bajarapajiwi cuenenamatamota penacuenebijawa, Dioso pitabarata.