Jesús peliwaisi pejumexaniataewi caetuata ofrenda, peyawenonaenexa Jesús pijajiwi, Jerusalén tomarata pejinawanapaewi
9
Aponamatawenonaenë picani patacatoyaquinaejawa ofrenda yabara, xua pacaetuaponame paneyawenonaenexa bepejiobiwi, Jesús peliwaisi pejumexaniataewi, Jerusalén tomarata pejinawanapaewi.
2 Xanë yapëtaniji baja cajena pacuenia bitso jamatabëpayawenoname bajarapamonae. Bajaraxua yabara, jumaitsinë Macedonia nacuapijiwijawabelia: «Acaya nacuapijiwi, Corinto tomarata penacaetuatabiabiwi, imata baja cajena pawaimi najamatabëcuenewereta perajutsinexa ofrenda Jesús pijajiwijawabelia, Jerusalén tomarapijiwinexa», janë paxamë yabara, patacasiwajamatabëcuenebarëyaxae. Nexata, Macedonia nacuapijiwi itsa pacawënëliwaisitane paneyawenonaejawanexa Jerusalén tomarapijiwi, bajarapamonae-ata, ayaibitsaëto caeliwaisi xaina, petocaetuatsijawa peyawenonaenexa ofrenda.
3 Nexata, tanajumecowë-auranëyaniwa Macedonia nacuapijiwijawabelia, tapatsiwajënaeya pacato-itorobatsi Titobana papecayawenonaeyacaetuatsinexa bajarapa-ofrenda, panerajutsijawanexa Jerusalén tomarapijiwi.
4 Itsamonae Macedonia nacuapijiwi belia itsa naponaejitsipa tapëta paxamëjawabelia, itsa taejitsipa bajarapa-ofrenda apopanecaetuatsiweretsijawa, nexata bitso pacayapijiwi-auratsi tsipae. Paxamë-ata pa-auramë tsipae, patajumaitsixae paxamë yabara: «Corinto tomarapijiwi rabaja jamatabëweretapona ofrenda pecaetuatsijawa», patajaixae paxamë yabara.
5 Bajaraxuata, xanë tajamatabëcuene-itsixae, copiaya itorobajë bajarapamonae. Nexata, Titobana pacacueneyawenonaena ofrenda panecaetuatsiweretsinexa baja, pacuenia najumecapanepaeya panetocaëjëtame. Nexata baja, tawajënaelia bajarapa-ofrenda itsa paxaniawaetabuatsianame, panajamatabëcuene-itajëtsianame Jerusalén tomarapijiwijawabelia pane-asiwajawa. Tapatsijawata matapania itsa pacaetuatsipame, panajamatabëcuene-itajëtsipame ëpataca-itorobicuenia pane-exanaejawa.
6 Bajarapa-ofrendacuene yabara jitsipajë panecanaëjëtsijawa mapacueniaje. Pajiwi tsiquirijawayo uba, tsiquirijawayo pijinia batopitsapatsi. Pajiwi pijinia ayaijawa uba, ayaijawa batopitsapatsi. Nexata, ayaijawa itsa parajutsianame itsamonaejawabelia, Dioso juya pacarajutsiana ayaijawa.a
7 Nexata, caejiwi canacujitsia berajuta pacuenia najamatabëcuenecaëjëta perajutsinexa. ¡Pëtsa parajutame pane-asiwajamatabëcueneta, papeca-itorobicuenia-ata,b tsipaji Dioso asiwac pajiwi rajuta jamatabëcuenebarëyaya itsajiwijawabelia!
8 Dioso baja cajena caëjëpatsi papecarajutaponaenexa matatoxenetsia panenamatawenonaecuene, bajarapacuenia panexainaponaenexa, panerajutsijawanexa bepejiobiwijawabelia.
9 Dioso pejumeliwaisibaxutota jumaitsi pamonae jamatabëcuenebarëyaya perajutabiabiwi yabara mapacueniaje:
«Pajiwi rajutabiaba bepejiobiwijawabelia penamatawenonaecuene, pexaniacuene exanabiaba Dioso pitabarata. Nexata, bajarapapexaniacuene peto-exanaejawa cuenetsitecaenad daxitamatacabijawabelianexa»,e jai Dioso pejumeliwaisibaxutota.
10 Xaniajai rabaja. Dioso raja rajuta jiwi pe-ubixunexa. Bajarapaxu pejuwicujinae, pexaejawa pexainaenexa. Bajarapijinia pacuenia, Dioso pacarajutsiana ayaijawa panexainaejawanexa, bajaraxuayajuwënëjawa panerajutsinexa bepejiobiwijawabelia.
11 Bajarapacuenia Dioso pacarajutsiana panexainaenexa ayaijawa panecobecowëjawanë. Nexata, pacacuenecaëjëpaena bajaraxuayajuwënëjawa, juya panerajutsinexa bepejiobiwijawabelia. Nexata, pa-ofrenda panerajutsianame patatocaponaenexa Jesús peliwaisi pejumexaniataewi, Jerusalén tomarapijiwijawabelia, itsa parajutsianajë bajarapamonae, pexaniajamatabëcuene rajutsiana Diosojawabelia, bajarapacuenia paneyawenonaexae.
12 Bajarapacuenia Jesús peliwaisi pejumexaniataewi, bepejiobiwi, itsa parajutame penamatawenonaejawata, bitso payawenoname. Bajarapamonae paneyawenonaejawa itsa taena, pematatsënëa bitso pexaniajamatabëcuene rajutsiana Diosojawabelia.
13 Bajarapacuenia Jesús pijajiwi, Jerusalén tomarata pejinawanapaewijawabelia, itsa parajutsianame ofrenda jamatabëcuenebarëyaya, paneyawenonaenexa, patsitanajamatabëcuene-itajëtsianame pepacuene panejumexaniataejawa pexanialiwaisi, Cristo peliwaisi. Nexata, papecacuenetaejawata, pexaniacuenia paneyawenonaejawa Jesús pijajiwi Jerusalén tomarata, itsamonaejawabelia-ata, bajaraxua yabara pexaniajamatabëcuene rajutsiana Diosojawabelia.
14 Orijibia, bajarapamonae bitso asiwaya pacajamatabënajinaeya pacatowajëtabiabiana Diosojawabelia, tsipaji pacacuenetane panejamatabëcuenewënëcaejawa Dioso piasiwajamatabëcuene panexainaejawa Jesús pijajiwijawabelia.
15 Bitso pexaniajamatabëcuene rajutabiabianatsi Diosojawabelia daxita wajanacarajutsijawanë yabara. Daxita Dioso wajanacarajutsijawanëwecua, bitso pexaniajawa wajanacarajutsijawa amoneya Pexënato wajanacasiwatëpaenexa.f Bajaraxua yabara nacato-ayapëbeje wajawënëxaniatsijawata Dioso xaniawaetsia wajacuene-itajëtsinexa bitso wajanaca-asiwajamatabëcuene.