Pacuenia Jesús pijajiwi ofrenda rajutabiaba, peyawenonaenexa itsamonaejawabelia, yabara peliwaisi
8
Tajamonae, aeconoxae jitsipajë patacayapëtaeya-exanaejawa pacuenia Dioso jamatabëcueneyawenona Jesús pijajiwi, Macedonia nacuata pejinawanapaewi.
2 Bajarapamonae peto-ayapëbejecuenetsi tocopiapataponae-atatsi, ayaicuenia pejamatabëcuene-ëjëtsinexatsi, bitso bepejiobiwi-ata, itsiata jamatabëcuenewënëca peyawenonaenexa itsamonae penamatawenonaewi. Nexata, ofrenda itsa exana peto-itorobinexa bepejiobiwi, Jerusalén tomarapijiwijawabelia, ayaijawa jebabiaba.
3 Xaniajanë pacuene xanë pacayapëtaeya-exanatsi. Bajarapamonae bepejiobiwi-ata, pijacuata, itsajiwi-ata itorobinejewatsi, pecuenecaëjëpaecueniatsi ayaijawa jebabiaba ofrenda itsa exanabiaba. Itsamonae pijinia pejitsipaexae, jebabiaba pematatsënëa pecuenecaëjëpaejawatsiwecua.
4 Macedonia nacuapijiwi pewënëliwaisitaexae pacuenia itsanacuanëpijiwi ofrenda jebapona, peyawenonaenexa Jesús pijajiwi, Jerusalén tomarata pejinawanapaewi, bajarapamonae-ata bitso jitsipa peyawenonaenexa. Nexata, ayaicuenia panewajëca peyawenonaenexa ofrenda Jerusalén tomarapijiwijawabelia, bajarapa-ofrenda paxanë juya patatocaponaenexa.
5 Bajarapamonae, bepejiobiwi-ata, ayaijawa jeba ofrenda, patacanaëjëtsijawawecua pejebijawanexa. Bajarapa-ofrenda pejebiwajënaeya, copiaya najamatabëcuenerajuta Diosojawabelia, pitorobicueniatsi pexanawanapaenexa. Bajaraxuacujinae, panejamatabëcuene-eweta, patayapëtaeya-exanaenexa pacuenia exanaejitsia bajarapa-ofrenda. Bajarapacuenia exana Dioso petojitsipaecueniatsi.
6 Patayapëtaexae panejitsipaejawanua paneyawenonaenexa Jesús pijajiwi Jerusalén tomarapijiwijawabelia, xua Tito, pacabarëtaxuxuaba panecaetuatsijawa, bajaraponë icatsia pa-itorobajë panecaetuatsijawanë papecabarëweretsinexa. Payapëtaniji paxamë bitso pexania-ofrenda panenacaetuatsijawanexa, Dioso pane-asiwaxae.
7 Bajarapacuenia pa-exaname, tsipaji itsamonaewecua, xaniawaetsia Dioso patojinawanapame. Xaniawaetsia pa-itaxutuajamatejemamë Dioso. Pemuxujitsipaejumenëta, pacujarubabiabame Dioso pejumeliwaisi. Paxamë bitso paneyapëtaewi. Bitso panecuenejitsipaewi paneyawenonaejawa itsamonae. Namata-enetsia pana-asiwamënua, xua panacuenecujarubame paxanëjawata. Daxita bajarapacuenia matatoxenetsia itsamonaewecua pexaniacuenia pane-exanabiabixae, pacatojitsipatsi ayaijawa ofrenda panejebinexa itsamonaewecua.
8 Bajarapacuenia patacajumaitsixae, apopaca-itorobitsi ayaijawa panejebinexa. Biji rajane, saya pacatsipaebatsi paneyapëtaenexa pacuenia Macedonia nacuapijiwi bitso jamatabëcuenebarëyaya to-exana ofrenda, bepejiobiwi peyawenonaenexa. Bajarapijinia pacuenia, paxamë-ata bepa-exaname, itsa payawenonaejitsiamë penamatawenonaewijawabelia, itsamonae panetsitanajamatabëcuene-itajëtsinexa panexaniajaicuene Dioso pane-asiwajawa.
9 Bajarapacuenia paxamë-ata ofrenda parajutsianame, tsipaji payapëtaneme pacuenia wajatuxanenë Jesucristo nacayawenona, wajanaca-asiwaxae. Ayaicuenia papeca-itaxutotsoniataexae, bajaraPonë pueneta daxita pexainaecuenejawanë athëbëtatsia, penaexanaenexa jiwitonëcuenia, peponaponaenexanua bepejiobinëcuenia. Bajarapacuenia nabejiobia-exana, ayaicuenia juya papecajamatabëcueneyawenonaenexa. Nexata, Jesucristo ayaijawa apoxainae-ata mapanacuapijijawanë, nawitsia pacajamatabëcueneyawenona, bitso panexainawanapaenexa Dioso pijacuenejawanë.
10 Paxamë patacajamatabëcueneyawenonaenexa, jitsipajë patacatsipaebijawa, xua panetsitaxanepana pane-exanaenexa bajarapa-ofrenda yabara. Paxamë picani imata pawaimi, itsamonae pewajënaeya copiaya bitso jamatabëpayawenoname Jesús pijajiwi, Jerusalén tomarapijiwi. Nexata, paxamë, bajarapamatacabi, daxitajiwiwajënaeya, jamatabëcuenebarëyaya patojebaponame ofrenda.
11 Nexata, pacamuxujiobatsi aeconoxae paneweretsinexa jane baja, palata panecaetuatsijawa bajarapa-ofrendanexa. Bajarapacuenia itsa pa-exanaename, copiaya paweretsianame panecaetuatsijawa itsamonaewecua, pacuenia copiaya pataxuxuabame panecaetuatsijawa bajarapa-ofrenda. Pacaenëmë canacujitsia parajutaponaename papecacuenecaëjëpaecuenia.
12 Dioso apo-itorobi jiwi perajutsinexa xua apoxainae. Nexata, itsa pepacuene parajutsianame pacuenia pacacuenecaëjëpa, Dioso pacasiwajamatabëcuenebarëya tsane.
13 Bajarapacuenia apopaca-itorobitsi paxamë papecatsisajinaenexa panenamatawenonaejawanë, bajarapa-ofrenda panetojebijamatabëcuene. Bajarapacuenia paca-itorobatsi, paxamë, ofrenda panetojebiwi-ata, saya najëpaeya panexainaenexa panenamatawenonaejawanë.
14 Aeconoxae baja, paxainame panenamatawenonaejawanëwecua. Nexata, pacacuenecaëjëpa paneyawenonaejawa Jesús pijajiwi, bepejiobiwi, Jerusalén tomarapijiwi. Itsamatacabijawabelia, pamatacabi paxamë panamatawenonaename, cuenecaëjëpaenatsi juya bajarapamonae papecayawenonaenexa. Bajarapacuenia daxita paxamë najëpaeya namata-enetsia panayawenonaename.
15 Bajarapajamatabëcueneliwaisi yabara Dioso pejumeliwaisibaxutota jumaitsi mapacueniaje: «Pajiwi ayaijawa notsi-ata, apotoyajuwënënacopatsitsi. Pajiwi pijinia tsiquirijawayo pita, apotosajinaetsi penamatawenonaejawa»,a jai Dioso pejumeliwaisibaxutota. Bajaraxuata, paxamë-ata panexainaeyajuwënëjawa, beparajutame penamatawenonaewijawabelia.
Pacuenia Pablo itoroba Tito, anijanëbeje yajawa, Corinto tomarabelia, yabara peliwaisi
16 Bitso pexaniajamatabëcuene rajutajë Diosojawabelia, tsipaji Espíritu Santo pejamatabëcueneta, caejamatabëcuene panerajutabeje, Titobeje, patacayawenonaenexa.
17 Nexata, Tito itorobajë papecataenexalia, papecayawenonaenexanua bajarapa-ofrenda itsa baja paweretame panecaetuatsijawa tawajënaelia. Bajaraponë pijacuata pejitsipaexae, barëyaya ponaena paxamëjawabelia, papecayawenonaenexa.
18 Tito pepëta pa-itorobajë itsanë, Jesucristojawabelia pesiwanajamatabëcuenecopatsinë. Bajaraponë Macedonia nacuata, daxita Jesús pijajiwi bitso peyapëtaenëtsi, peyaiyataenëtsinua, tsipaji xaniawaetsia tsipaebabiaba Jesús peliwaisi, jiwi pecapanepaeliwaisinexatsi.
19 Bajaraponë Jesús pijajiwi Macedonia nacuata itapetatsi patayajawaponaenexa Jerusalén tomarajawabelia, bajarapa-ofrenda pejebijawa patacaponaenexa Jesús pijajiwi patarajutsinexa Jerusalén tomarata. Bajarapa-ofrenda pacaponaejitsianë bajarapamonaejawabelia, patatsitanajamatabëcuene-itajëtsinexa patayaiyataejawa wajatuxanenë Jesucristo, patajitsipaejawanua bitso patayawenonaejawa Jesús pijajiwi, bepejiobiwi.
20 Bajarapacuenia Macedonia nacuapijinë payajawaponaenajë, patanebaracuaicuaijaiyaniwa itsajiwi-ata pata-ewetsijawa yabara bajarapapalataxaneto.
21 Bajarapacuenia pajitsipajë pata-exanaejawa, patatsitanajamatabëcuene-itajëtsinexa xaniawaetsia patatonacuenebijawa Dioso yaiyataeya, jiwijawabelia-ata.
22 Titobeje, icatsia itsanë patsicueya-itorobajë, Jesucristojawabelia pesiwanajamatabëcuenecopatsinë, peyajawaponaenexabeje paxamëjawabelia. Bajaraponë patacuenetaejawata anijatonë, pajamatabëcueneyapëtaniji bitso pejitsipaejawa xaniawaetsia petonacuenebijawa Dioso. Nexata, aeconoxae, paxamë bitso jamatabëpacayawenona, tsipaji pacawënëliwaisitane paneyawenonaejawanexa Jerusalén tomarapijiwi.
23 Payapëtaneme rabaja Tito tayajawanacuenebaponaponaejawa, Dioso pijacuene paxamëtuatuajëta. Ponëbeje pijinia yajawapona paxamëjawabelia, bajaraponëbeje Jesús pijajiwi to-itapetatsi peyanabinexatsibeje, tsipaji bajaraponëbeje xaniawaetsia Cristo toponaponabeje.
24 Nexata, bajaraponëbeje itsa patsianabeje paxamëjawata, patsitanajamatabëcuene-itajëtsianame pane-asiwajawa bajaraponëbeje. Nexata, Jesús pijajiwi, pamonae itorobatsibeje bajaraponëbeje, pacawënëliwaisitaena pane-asiwajawa, pataxaniajaijawanua paxamë daxitajiwi pane-asiwajawa yabara.