7
Tajamonae, bitso pataca-asiwawi, Dioso najumecapanepaeya pejumaitsixae pexicueniatsi wajanacataenexa, nexata na-ewetsia bejinawanapatsi pibisiacuene exanaenejewatsi wajaperabëtota, wajanajamatabëxainaejawatanua. Jinawanapaenatsi aneconijibia, bajaraPonë wajanacatojitsipaecuenia, Dioso wajayaiyataexae.
Pablo siwajamatabëcuenebarëya Jesús pijajiwi, Corinto tomarapijiwi, penajamatabëcuenepënëyorotsixae pibisiacuene pexanaejawawecua
2 ¡Bepataximëcuenia patacataexae, nexata paxamë juya panajamatabëcuenecaeware, patane-asiwanexamë pacuenia paca-asiwatsi! Caejiwi-ata, paxamëyajuwënëjiwi, apopacayajuwënë-itsacueniabitsi. Apopacajamatabëcuenebijianaetsi. Apopacayamaxë-itojorobitsinua, panijapalata patacawecuapitsinexa.
3 Bajarapacuenia apopacajumaitsitsi, taliwaisita panena-urabinexa panijacuata. ¡Jume baja cajena! Biji rajane, pacanajamatabënapitsia-exanatsi pacuenia copiaya pacajumaitsitsi, patacajamatabënaponaponaejawata pataca-asiwaxae, wajanajua-asaë tsawanapaenexa, itsa jume, wajanajuatëpaenexa.
4 Paxamë patane-itajuanixaemë, pexaniajaicuenia pacatsitanacuene-itajëtatsi, itsaliwaisi pacawecuamatayatsinejewatsi. Bajarapijinia pacuenia, yapëtaniji patanejumecowënëtsinexamë pacuenia pacamuxujiobatsi. Bajaraxuata, bitso pacasiwajamatabëcuenebarëyatsi, itsa pacawënëliwaisitanetsi xaniawaetsia panenatocopiapitsijawa patacamuxujiobiliwaisi. Jamatabëcuenecaewajënua ayaicuenia patacasiwabëjaijawami. Nexata, nabejiobitsiaponaponae-atanë, jamatabëcuenebarëyanë tsaponaponae paxamë yabara.
5 Paxanë patapatsicujinae Macedonia nacuata, caeto-ata cajena xaniawaetsia apopanacuera-ewetsinë, tsipaji daxitajawa, itsaxuayo panajetarubenajë, liwaisi panetsi-exanabiaba. Nexata, patanetsi-ayaijawata, bëpënëa payajunawiajinawanapabiabajë.
6 Bajarapacuenia patajinawanapaejawata, Dioso jiwi pejamatabëcuene-asaëya-exanaenëxae, Tito itsa patajopa paxanëjawata, panejamatabëcuene-asaëya-exana, paxamëjawawerena peponaenë.
7 Apopanejamatabëcuene-asaëya-exanae ëpepatsijawa yabara. Biji rajane, panejamatabëcuene-asaëya-exana, Tito itsa pacawajunupaeba paxanëjawaberena pacuenia paxamë pajamatabëcuene-asaëya-exaname, papecasiwaxainaejawata pane-ajamatabëcuenesaëya-exana. Bajarapaliwaisi pamuxunanajamatabëcuenesaëtajë. Orijibia, pacawajunupaeba pacuenia bitso picani jamatabëpanetaneme, pacuenianua bitso payanajamatabëxainame pibisiacuene pane-exanaeneconi. Panetsipaebanua bitso patanesiwanajamatabëxainaejawamë xanë, itsa panewënëliwaisitaneme bitso patacasiwanajamatabëxainaejawa. Bajarapacuenia Tito itsa pacawajunupaeba paxanëjawaberena, bitso pamuxunajamatabëcuenebarëyanë.
8 Pabaxutomi copiaya pacatoyaquinatsi, itsa palebame, bitso pacanajamatabëxainaeya-exanae-ata picani, papecatsi-atanexae patacamuxujiobiliwaisi, itsiata maparucaeje aponajumecowënajamatabëxainaenë, tsipaji saya cae-epatoyonexa. Bajarapabaxutomi patacato-itorobicujinae bitso najamatabëxainaeya ponaponajë, tayapëtaexae papecanajamatabëxainaeya-exanaejawa. Patacasiwabëjaijawata jamatabëjumaitsinë: «Apobetoyaquinaenë picani bajarapacuenia», jamatabëjanë.
9 Itsiata baitsi jane, aeconoxae baja siwabarëyanë patacato-itorobixae bajarapabaxutomi. Itsiata, aposiwabarëyanë xua pacanajamatabëxainaeya-exanatsi panijaneconi yabara. Biji rajane, siwabarëyanë, tsipaji patacanajamatabëxainaeya-exanaejawata bajarapabaxutomita, pacopabame baja pibisiacuene pane-exanabiabijawa, panenajamatabëcuenepënëyorotsinexa Diosojawabelia. Dioso pejitsipaecuenia pacanajamatabëxainaeya-exanae-atatsi, apopaca-itsacueniabitsi patacatoyaquinaeliwaisita. Biji rajane, bajarapabaxutomi pejamatabëcueneta, pacajamatabëcueneyawenonatsi.
10 Yapëtanetsi pacuenia Dioso itsa nacanajamatabëxainaeya-exana wajaneconi yabara, nacajamatabëcuene-itoroba wajanajamatabëcuenepënëyorotsinexa pibisiacuene waja-exanaejawamiwecua, bajaraPonë wajanacacapanepaenexa. Bajarapacuenia Dioso wajanacato-exanaejawa yabara, caejiwiyotsi-ata aponacatsita-abeje. Itsiata baitsi jane, pamonae, pibisiacuene pexanaeneconi ya-aura-ata, mapanacuapijiwi pexanaecuenia, bajarapa-auracuene itsiata aponajamatabëcuenepënëyorotsia-exanaetsi Diosojawabelia, pibisiacuene pexanaejawawecua. Nexata, bajarapamonae Diosowecua naxuabiana daxitamatacabijawabelianexa.
11 Paxamë panenatolebijawata patacatoyaquinaeliwaismi, Dioso pacanajamatabëxainaeya-exana panijaneconi yabara. Bajarapacuenia Dioso papecanajamatabëxainaeya-exanaexae, pacajamatabëcuene-itoroba panecopabinexa panenajamatabëcuenepënëyorotsinexa pibisiacuene pane-exanaejawamiwecua. Bajarapajamatabëcuene pacajamatabëcuene-itorobanua panenawecua-itoyanexa pane-exanaecuenemi. Pacacujunawia-exana, Dioso paneyaiyataexae. Orijibia bajarapajamatabëcuene yabara, patsitanajamatabëcuene-itajëtame caejamatabëcuene panexainaejawa xanëjawaberena, Diosojawabelia-ata, panenaneconitsia-exanaejawata pibisiacuene pexanaponaponaenëa paxamëtuatuajëta. Patsitanajamatabëcuene-itajëtamenua xanëjawaberena pijinia ayaicuenia patane-asiwajawamë panija-apóstol-nëxaenë.
12 Bajaraxua yabara pacatoyaquinatsi copiaya pabaxutomi, tsipaji jitsipajë panijacuata panenajamatabëcueneyapëtaenexa juya patane-asiwajawamë. Baitsi, Dioso panetsitajamatabëcuene-itajëtsinexa patane-asiwajawamë, panejumecowënëtsijawata patacamuxujiobicuenia. Apopacatoyaquinaetsi padaxitamë patacamuxujiobinexa, itsa jume, tamuxujiobinexa ponë pibisiacuene exanaponapona, itsa jume, pajiwijawabelia tsi-atanetsi bajaraponë pijaneconi yabara. Biji rajane, pacatoyaquinatsi patanetsitanajamatabëcuene-itajëtsinexamë asiwaya patanetaejawamë panija-apóstol-nëxaenë.
13 Nexata, bajarapacuenia pane-exanaexae, bitso pacasiwajamatabëcuenebarëyatsi. Panejamatabëcaewia-exanamenua patacasiwabëjaicuenemi.
Patajamatabëcuenecaewijawawecua patacasiwabëjaicuenemi, matatoxenetsia pacasiwajamatabëcuenebarëyatsi ayaicuenia pane-ajamatabëcuenesaëya-exanaexae Tito. Bajaraponë bitso pacasiwanajamatabëxaina picani panejinawanapaecuene yabara. Itsiata baja, paxamë pexaniacuenia pacopiapitame bajaraponë. Pajamatabëcuenecaewia-exanamenua papecasiwabëjaijawami, tsipaji aeconoxae daxita paxamë Dioso pitabarata xaniawaetsia pajinawanapame. Bajarapacuenia pane-ajamatabëcuenesaëya-exanaexae Tito, paxanë-ata bitso pacasiwajamatabëcuenebarëyatsi.
14 Xanë yapëtaniji bajarapacuenia pane-exanaejawanexa. Bajaraxuata, Tito peponaewajënaeya paxamëjawabelia, jumaitsinë bajaraponëjawabelia: «Jesús pijajiwi Corinto tomarajawata, xaniawaetsia copiapitsiana pamuxujiobiliwaisi toyaquinajë mapabaxutotaje», janë paxamë yabara Titojawabelia. Bajarapacuenia jane baja, pa-exaname. Daxita pacuenia jumaitsinë bajaraponëjawabelia paxamë yabara, xaniajanë baja. Bajaraxuata, paxanë bitso pacasiwajamatabëcuenebarëyatsi.
15 Tito bitso paca-itaxanapona pewajënaeyabelia, penajamatabënapitsijawata pacuenia paxamë bitso yaiyataeya pacopiapitame, pajumecowënëtabiabianamenua pacuenia paca-itoroba.
16 Pacasiwajamatabëcuenebarëyatsi, tsipaji xaniawaetsia yapëtaniji pane-exanawanapaejawa pacuenia Dioso pacatojitsipa.