6
Bajarapacuenia Dioso pebarajamatabëcuenexanepanaexae mapanacuapijiwije, paxanë yawenonaeya Dioso patatonacuenebaponaewi, asaëyata pacamuxujiobaponatsi, beweliacuenia panetaeyaniwa Dioso pinijicuenia papeca-itaxutotsoniataejawa.
2 Bajaraxua yabara tajëwelia Dioso pejumeliwaisibaxutota jumaitsi mapacueniaje:
«Paepatota panamatawenoname, pacajume-itaxutotsoniatanetsi patanewajëcaejawatamë. Paepatota pijinia panamatawenoname patacapanepaejawa, pacayawenonatsi»,a jai Dioso pejumeliwaisibaxutota.
¡Panejumetaema! Copiapata rajane baja aeconoxae Dioso wajanaca-itaxutotsoniataematacabi, wajanacacapanepaenexa.
Pacuenia Pablobana tsiteca tsipaebapona Jesús peliwaisi itsamonae bejiobia-exanae-atatsi, yabara peliwaisi
3 Patatonacuenebijawata Dioso, paxanë apopacatsita-exanaetsi itsacuenejawa, xua yabara jiwi beweliacuenia taejitsipa Dioso pitaxutotsoniataejawatsi.
4 Biji rajane, daxita xua pa-exanawanapajë, xaniawaetsia jiwi patsita-exanawanapajë, pataneyapëtaenexa Dioso papijajiwinëcuene. Nexata, Dioso papijajiwixaenë, pajamatabëcuenesaënë tsawanapae Dioso pejumeliwaisi jiwi patatsipaebawanapaejawa, itsamonae panebejiobia-exanabiabi-ata, itsajawata itsacuenejawaxi bitso panamatawenonabiabi-atanë, itsajawata bitso panetsi-ayai tsabiabi-ata itsamonae patanebeyejebinexa.
5 Bajarapacuenianua panejumatitibabeyabiabi-ata. Itsajawata, penaneconitsiwi pejebabiabibota panejebabiabi-ata. Itsamonae anaeya panebarajinabiabi-ata, patanebeyejebinexa picani Cristo peliwaisi patatsipaebijawata. Bitso panacuenebabiabi-atanë patacueranaejawabelia, apopamajitabiabi-atanë merawi, Dioso pejitsipaecuenia pata-exanaenexa. Itsajawatanua, bitso patajani tsabiabi-ata, itsiata bajayajebi pajamatabëcuenesaënë tsawanapae Dioso pejumeliwaisi jiwi patatsipaebawanapaejawa. Daxita bajaraxuanë panetocopiapataponae-ata, xaniawaetsia jiwi patsitajinawanapajë, peyapëtaenexa Dioso papijajiwinëcuene.
6 Orijibia, jiwi yapëtane Dioso papijajiwinëcuene, tsipaji apopanajamatabëcuenebijianaenë patajinawanapaejawata, pexanialiwaisi patayapëtaewi. Apopacuenecanawiatabiabinë, bajayajebi itsamonae pibisiacuene pane-exanabiabi-ata. Pexaniacuene pato-exanabiabajë itsamonaejawabelia. Espíritu Santo panejamatabëcuenematacaponabiaba daxita pata-exanaecuenejawanë. Itsamonae-ata pa-asiwanë tsawanapae patajamatabë-ëthëtojawawetsina.
7 Orijibia, jiwi pexaniajailiwaisi patsipaebabiabajë. Patsitanacuene-itajëtawanapajë, Dioso pesaëta pataneyawenonabiabijawa, daxita xua pa-exanawanapajë. Bajarapapexaniajailiwaisi patacujarubaponaejawata Dioso pejitsipaecuenia, pacanawajabitsaëtabiabajë, patanayajiwicaranatsinexab dowathi pijacuenejawalia. Bajarapacuenia patatsitajinawanapaexae, jiwi paneyapëtane Dioso papijajiwinëcuene.
8 Bajarapacuenia patsitajinawanapae-atanë, jiwi najëpaeya apopanetaeyabiabi. Itsamonae paneyaiyataeyabiaba. Itsamonae pijinia apopaneyaiyataeyabiabi. Itsamonae pexaniacuenia panebaracuaicuaijai tsabiabi. Itsamonae pijinia pibisiacuenia panebaracuaicuaijai tsabiabi. Itsamonae panetaeyabiaba pexaniajailiwaisi patatsipaebiwicuene. Itsamonae pijinia panetaeyabiaba bepatanajumetsënëtsiwi.
9 Itsamonae pataneyapëtaewi-ata, itsiata apobepataneyapëtaewi panetaeyabiaba. Itsamonae itsajawata, jamatabëpanebeyejebabiaba picani. Itsiata, tsiteca pa-asaënë tsawanapae. Itsamonae ayaicuenia panebejiobia-exanabiabi-ata, itsiata apopanebeyejebi.
10 Panajamatabëxainabiabi-atanë itsamonae pejume-aebixae patatsipaebiliwaisi, itsiata bëpënëa pepacuene pajamatabëcuenebarëyanë tsawanapae, daxitamatacabijawabelianexa Dioso pataneyawenonabiabixae. Itsamonae panetae-ata patabejiobiwi, itsiata, jiwi, ayaibitsaëtoxanetonë, bitso pexainaewi pa-exanaponajë Dioso pejumeliwaisita, patatsipaebijamatabëcueneta. Apopaxainaenë picani ayaijawa mapanacuapijicuene. Itsiata baitsi jane, Diosojawabelia daxitacuene paxainajë, apopewerewerecaejawanënexa jane baja.
11 Tajamonae, Corinto tomarata panejinawanapaewi paxamë xaniajaiya baja cajena pacatsipaebabiabatsi, itsaliwaisi pacawecua matayatsinejewatsi.
12 Asiwaya pacatae-atatsi, paxamë itsiata bajarapacuenia asiwaya apopanetaemë.
13 ¡Pacuenia xanë paca-asiwatsi, bajarapijinia pacuenia, paxamë-ata pane-asiwamëre, bepataximëcuenia patacataewi!
Pacuenia Dioso nacatane bepijatemplobotsi, yabara peliwaisi
14 Dioso papijajiwixaemë, apopacatojitsipaetsi paneyajawajinawanapaejawa bajayajebi Jesús peliwaisi pejume-aebiwi, bajarapamonae xua exanawanapac panejamatabëcuenejëpaeyaniwa. Bajaraxuata, apopacatojitsipaetsi panenacojiobijawa Jesús peliwaisi apopejumexaniataewijawabelia, tsipaji aponajamatabëcuenejëpaebeje pexaniacuene pexanawanapaewi, pibisiacuene pexanawanapaewibeje. Bajarapacuenia-ata, Dioso pejamatabëcuene-itayotsiwitsi, mapanacuata pitaquirijamatabëcuene pexainaewibeje, aponajamatabëcuenejëpaebeje.
15 Cristo, dowathibeje,d aponajamatabëcuenejëpaebeje. Bajarapijinia pacuenia, Jesús peliwaisi pejumexaniataejiwi, pejume-aebijiwibeje, aponajamatabëcuenejëpaebeje. Nexata, acuenebi bajayajebi penajuanacuenebaponaponaenexabeje.
16 Bajarapijinia pacuenia, pamonae peponaewi Dioso pijatemplobojawabelia, caejamatabëcueneliwaisi apoxainae pamonae pona jumapecataeya pexanaenëanë pijatemplobojawabelia. Bajarapabitsaëtobeje saicaya nawecua-itothia ponëjawabelia siwanajamatabëcuenecopaba. Waxaitsi baja cajena, Espíritu Santo pejamatabëcueneta, Dioso, piasaëtsaponaponaenë, pijatemplobotsi tsawanapae, tsipaji bajaraPonë nacatsijamatabë-eca. Nexata, ëbajaraPonëjawabeliae siwanajamatabëcuenecopabatsi daxitacuene yabara. Bajarapajamatabëcuene yabara, bajayata Dioso pejumeliwaisibaxutota tajëwelia jumaitsi mapacueniaje:
«Tsijamatabë-ecaenajë bajarapamonae, tayajawaponaponaenexa. Bajarapamonae pijaDiosonë tsane. Bajarapijinia pamonae tajajiwi tsane»,f jai Dioso bajayata tajëwelia waxaitsi yabara.
17 Dioso wajanacayajawaponaponaexae, naca-itoroba wajapitsapaejawanexa, Jesús peliwaisi pejume-aebiwiwecua. Bajaraxua yabara wajatuxanenë Dioso tajëwelia jumaitsi pejumeliwaisibaxutota mapacueniaje:
«Pamonaetuatuajëta pajinawanapame, pawecuapitsapaename, saicayacuenia panejinawanapaenexa. ¡Paxamë pëtsa pibisiacuene pa-exaname bajarapamonae xua exanawanapa, papecajamatabëcuenebijianaeyaniwa! Nexata, xanë pacataenatsi patajajiwimëcuenia.
18 Xanë, pane-axanë tsane. Paxamë pijinia pataximë tsane»,g jai bajayata wajatuxanenë Dioso tajëwelia waxaitsi yabara, Ponë ayaijamatabëcuenenë daxitawecua.