5
Waxaitsi yapëtanetsi baja mapacueneje. Mapanacuata jiwi pexanaebobërëto bepijia ba-abeje, bajarapijinia itsi tsane wajayajawajinawanapaeperabëto. Bepijia werewerecaena. Itsiata baitsi jane, wajatëpaecujinae, itsamatacabi Dioso athëbëtatsia nacarajutsiana apopewerewerecaeperabëtonexa.
2 Bajaraxuata, itsa abaxë jinawanapatsi mapanacuataje, bitso picani jitsipabiabatsi wajaxainaenexa athëbëpijiperabëto, apopewerewerecaeperabëtonexa.
3 Nexata, mapanacuapijiperabëto werewerecae-ata tsane, aperabëjibia apojinawanapaetsi tsane Dioso pijanacuatatsia. Biji rajane, pejanaperabëto yajawajinawanapaenatsi.
4 Itsa abaxë yajawajinawanapatsi mapanacuapijiperabëto, bëjaiya jinawanapatsi, tsipaji yapëtanetsi wajatëpaejawanexa. Bajaraxuata, bitso picani jitsipabiabatsi, wajanacaperabë-itothianaenexa. Apojitsipaetsi picani wajatëpaejawa. Bajaraxuata, jitsipatsi pejanaperabëto,a apopewerewerecaeperabëto, wajanacarutsinexa jane baja. Nexata, wajayajawajinawanapaeperabëtomi daxita wajanacabëjaiya-exanaejawanëmi, ajibi baja tsane.
5 Bajarapacuenia Dioso pijacuajaya nacajamatabëcuenewereta, wajanacaperabë-itothianaejawanexa. Nexata, wajanacayapëtaeya-exanaenexa pexaniajaijawa bajarapacuenia wajabacato-exanaenexa, Espíritu Santonaca tsijamatabë-ecaeya-exana.
6 Bajaraxuata, wajawajënaeyabelia copia-ewetawanapatsi itaxutuajamatejemaya, Dioso najumecapanepaeya pejumaitsicuenia wajanacarajutsinexa pejanaperabëto, tsipaji yapëtanetsi, itsa abaxë mapanacuapijiperabëto yajawajinawanapatsi, wajatuxanenë tajë wecuajinawanapatsi.
7 Bajarapapejanaperabëto apoxainae-atatsi abaxë, apojume-aebitsi wajanacarajutsijawanexa, tsipaji taenejewatsi itaxutuajamatejemaya jinawanapatsi Dioso.
8 Bajarapacuenia waja-itaxutuajamatejemaxae, bitso jitsipatsi wajanacawecua-ajibia-exanaejawa wajayajawajinawanapaeperabëto, juya wajatuxanenë pijanacuatatsia wajayajawajinawanapaenexa.
9 Bajaraxuata, mapanacuataje wajajinawanapae-epato, itsa jume, pijanacuatatsia wajajinawanapaecujinae, bitso bejitsipawanapatsi waja-exanawanapaenexa daxita xua wajatuxanenë nacasiwajamatabëcuenebarëyajitsia.
10 Wajatuxanenë pejitsipaecuenia bejinawanapatsi mapanacuataje wajajinawanapae-epatoje, tsipaji yapëtanetsi pacuenia caejiwitsi canacujitsia Cristo pitabarata wajanaitajëtaponaenexa. Nexata, bajarapamatacabi caejiwitsi canacujitsia nacarajutaponaena, xua nacatoxaina wajanacarajutsinexa, daxita pijajiwitsi wajatonacuenebijawa yabara. Pamonae xaniawaetsia wajatuxanenë tonacuenebawanapa, rajutsianatsib xua toxaina perajutsinexatsi. Pamonae pijinia xaniawaetsia apotonacuenebawanapae, nacueratsiana.
Dioso siwajamatabëcuenecaewa jiwi pijaneconimi Cristo pesiwatëpaejawata
11 Patayapëtaexae itsamatacabi cujunawiaya patanubenaejawanexa, wajatuxanenë Jesucristo pitabarata, itsajamatabëcuene paxainaenejewanë, asaëyata patsipaebabiabajë Jesucristo jiwi pesiwatëpaejawa yabara, bajarapamonae-ata pesiwanajamatabëcuenecopabinexa bajaraponëjawabelia, bajarapaliwaisi pejumexaniataejawata. Dioso baja cajena, panejamatabëcueneyapëtane, pacuenia pajamatabëcuene-itsinë. Pajitsipajë paxamë-ata patanejamatabëcueneyapëtaenexamë.
12 Bajarapacuenia paxanë apopacanawajunupaebitsi saya pataneyaiyataenexamë. Pacanawajunupaebatsi rajane, patanesiwajamatabëcuenebarëyanexamë wajatuxanenë papijajiwinëcuene. Nexata, pacujinae itsamonae pibisiacuenia panebaracuaicuaijai, liwaisi panetsi-exanabiabanua, paxamë-ata papecajamatabëcuenecaëjëpaenexa panejumecanawiatsijawa bajarapamonaejawabelia. Bajarapamonae be-ayaijamatabëcuenewi nataeyabiabi-ata, itsiata baitsi jane, apoxaniajai tsabiabi. Saya jitsipa jiwi peyaiyataenexatsi, beDioso pitorobiwitsicuenia.
13 Bajarapacuenia asaëyata patatsipaebabiabixae Jesús peliwaisi, belia itsamonae paxanë yabara jumaitsi tsipae: «Pematajemabiwitsi raja saya», jai tsipae.c Itsiata, bajarapaliwaisi itsa pacatsipaebabiabatsi, bajarapacuenia pacato-exanatsi, paxamë-ata Dioso papecacapanepaenexa. Nexata, paxamë apopanetaemë bepatanematajemabiwi.
14 Jesús piasiwajamatabëcuene mapanacuapijiwije, nacaeweta pebeyaxuabinexatsi jiwi peneconimatamotsinexa, bajarapa-asiwajamatabëcuene panejamatabëcuene namatacaitorobapona, patatsipaebinexa Jesús peliwaisi daxitanacuanëpijiwijawa. Patsipaebaponajë bajarapaliwaisi, tsipaji payapëtaniji pexaniajaicuene caenë, Cristo, pesiwatëpaejawa daxitanacuanëpijiwi. Pajumexaniatanijinua, daxitatsi wajasiwanajamatabëcuenecopabiwi Cristojawabelia, bewajawecuatëpaewi wajaperujujamatabëcuene.
15 Nexata, wajajumexaniataexae Cristo wajanacasiwatëpaejawa, apobejinawanapaetsi wajacuata wajanatojitsipaecuenia. Biji rajane, bejinawanapatsi wajanacatojitsipaecuenia Cristo, Ponë petëpaejawawecua, namatacota, wajanacarajutsinexa pitawajamatabëcuene.
16 Bajaraxuata, ajena mapamatacabitaje, wajawajënaeyabelia apobenajamatabëxainaetsid itsamonae yabara, pacuenia mapanacuapijiwije banajamatabëxaina, peyaiyataenexa, itsa jume, apopeyaiyataejawanexa. Xanë-ata rabaja picani, Jesucristojawabelia tasiwanajamatabëcuenecopatsiwajënaeya, bijiaya Jesucristo yabara najamatabëxainajë, mapanacuapijiwi penajamatabëxainaecuenia. Itsiata baitsi jane, aeconoxae baja bajarapacuenia aponajamatabëxainaenë Cristo yabara, tsipaji baja yapëtaniji Cristo pexaniajainëcuene.
17 Pajiwi siwanajamatabëcuenecopata Jesucristojawabelia, jamatabëcuene-itothianatsi. Nexata, pejanajamatabëcuene xaina. Pijaperujujamatabëcuenemi baja wecua-ajibia-exanatsi. Nexata, bajarapajiwi pejanacuenia siwanajamatabëxainabiaba pejanacuenejawanë daxitacuene yabara.
18 Bajarapacuenia daxita Dioso nacato-exana, wajanacabarajamatabëcuenexanepanaenexa Cristo pejamatabëcueneta. BajaraPonë juya, panetocopata patatsipaebanajetarubenaenexa daxitajiwijawa, pacuenia Dioso barajamatabëcuenexanepanaejitsiae Cristo pejamatabëcueneta.
19 Xanë xua jitsipajë patacajumaitsijawa, Cristo pejamatabëcueneta Dioso baja cajena, jitsipa mapanacuapijiwije pebarajamatabëcuenexanepanaponaejawa, najamatabënapitsinejewa bajarapamonae pijaneconi itsa jumexaniatane Cristo pesiwatëpaejawatsi. Bajarapaliwaisi panetocopata patatsipaebaponaenexa daxitajiwijawabelia.
20 Nexata, bajarapacuenia Dioso patane-itorobixae, pawajunupaebanajetarubenajë Cristo pejamatabëcueneta Dioso pebarajamatabëcuenexanepanaejawanexa mapanacuapijiwi. Pacuenia Dioso pijacujaya pacatsipaebijitsipa, bajarapacuenia paxanë pa-itsinë.
21 Cristo pibisiacuene apo-exanae,f tsiquirijawayo-ata. Itsiata baitsi jane, Dioso tsijumaxuaba Cristo daxitatsi pibisiacuene waja-exanaeneconimi. Nexata, bepibisiacuene pexanaenëcuenia,g cruzata beyaxuabatsi. Bajarapacuenia Cristo cruzata wajanacasiwatëpaexae, Dioso juya, aneconijibiah nacatane, wajasiwanajamatabëcuenecopatsijawata Cristojawabelia.