Pacuenia Pablo tsipaeba Jesucristo jiwi pesiwatëpaejawa, yabara peliwaisi
2
Patajamonaemë Cristo pejamatabëcueneta, pamatacabi ponajë paxamëjawabelia, pacatsipaebabiabatsi beweliajamatabëcuene taxainaenëcuenia, Dioso taneyapëtaeya-exanaeliwaisi, jiwi aneconijibia petaejawanexa yabara. Bajarapaliwaisi mapanacuapijiwije caeto-ata apoyapëtae. Pamonae bitso peyapëtaewi mapanacuapijiliwaisije canacuenebabiaba bëpënëajumënë pepaebijawata, itsamonae peyaiyataenexatsi. Bajarapajumenë xanë apocanacuenebinë, Jesús peliwaisi patacatsipaebijawata. Biji rajane, jumenapebetsiaya pacatsipaebatsi, xaniawaetsia panejumeyapëtaenexa patacatsipaebiliwaisi.
2 Bajarapacuenia xanë najamatabëcueneweretajë patacatsipaebinexa ëJesucristo peliwaisi,a pacatsipaebinejewatsi itsacueneliwaisi pematatsënëa. Nexata, bitso pacatsipaebabiabatsi Jesucristo wajanacasiwatëpaejawa cruzata, wajanacaneconimatamotsijawa yabara.
3 Pacujinae paxamëjawata pacatsipaebaponaponatsi Jesucristo peliwaisi, beweliajamatabëcuenenë nataeya pacatsipaebatsi. Bitso natsijunawajë, bijiaya patacatsipaebiyaniwa. Natsijamatabëcuenebëjanë, jamatabëcueneneconeconajënua Dioso pitabarata bajarapaliwaisi patacatsipaebijawata.
4 Xanë, pamatacabi Jesús peliwaisi pacatsipaebabiabatsi, jumenapebetsiaya pacatsipaebaponatsi, peyapëxanepanaeliwaisinëcuenia. Apopacatsipaebitsi bëpënëajumenëta pataneyaiyataenexamë, penamatamotsiliwaisinëcuenia-ata panetaenexa. ¡Jume baja cajena! Biji rajanë, Espíritu Santo, Dioso pesaëta tanejamatabëcuenecaëjëpaeya-exanaecuenia paebaponajë. Nexata, Espíritu Santo pacajumexaniataeya-exanab patacatsipaebiliwaisi, panesiwanajamatabëcuenecopabinexa Jesucristojawabelia.
5 Bajarapacuenia pacatsipaebatsi, pane-itaxutuajamatejemayaniwa mapanacuapijiwi pepaebiliwaisi pecanaëjëtsicuenejawaliaje, papecatsitaxanepanaexae bajarapaliwaisi. Biji rajane, pacatojitsipatsi pane-itaxutuajamatejemajawa Dioso pesaëta patacatsipaebaponaejawa Jesús peliwaisi.
Espíritu Santo pejamatabëcueneta, Dioso yapëtaeya-exana paliwaisi bajayajawawerena muetsia xaina, Jesús pijajiwijawabelia
6 Itsiata baitsi jane, itsa patsipaebaponajë pejamatabëcuenenaweretawanapaewijawabelia Dioso pijacuene, bajarapamonaejawabelia patsipaebaponajë pabëpënëaliwaisi Dioso paneyapëtaeya-exana. Bajarapacuenia patsipaebi-atanë, itsiata apopapaebinë mapanacuapijiwi pecanaëjëtsicuenia, mapanacuapijiwi pewetsiwi-ata peyapëtaecuenia, tsipaji mapanacuapijiwi penamatacaitorobisaë bepijia werewerecaena.
7 Pabëpënëaliwaisi patsipaebawanapajë, bajarapaliwaisi Dioso cajena bajayata tajëwelia muetsia xainabuata.c Matapania baja aeconoxae mapamatacabitaje Dioso nacayapëtaeya-exana bitso papexaniacuenejawad nacato-exanaejitsia, wajajumexaniataexae Jesús peliwaisi. Bajarapacuenia nacua pexanaewajënaeya Dioso siwanajamatabëcuenewereta wajanacato-exanaenexa, mapanacuapijiwi wajanacayaiyataenexa,e wajatuxanenë Jesucristo yajawa.
8 Paliwaisi Dioso muetsia xainabuata bajayajawawerena Cristo yabara, itsanë-ata mapanacuanë pewetsiwiyajuwënënëf apojumeyapëtaecapanepae. Bajarapamonae peneta itsa jumeyapëtaejitsipa bajarapaliwaisi, nexata Cristo apobeyaxuabi tsipaetsi cruzata, ponë pepopetuxanenë, yajawa peyaiyataenëtsi Dioso.
9 Bajarapaliwaisi, Dioso muetsia pexainabuatsiliwaisi yabara, bajayata profetanë, Isaías-pijinë, tajëwelia yaquina bajaraxua pecopiapatsijawanexa. Dioso pejumeliwaisibaxutota jumaitsi mapacueniaje:
«Xua abaxë itsajiwi-ata apotae, apojumetae, aposiwanajamatabëxainaenua, bajaraxua Dioso baja cajena tajëwelia tsiwajënaexaniawaeta perajutsinexa pamonae Dioso piasiwawi»,g jai tajëwelia Dioso pejumeliwaisibaxutota, jiwi peyawenonaejawanexa yabara, Jesucristo pejamatabëcueneta.
10 Itsiata baitsi jane, waxaitsi,h Dioso nacayapëtaeya-exana Espíritu Santo pejamatabëcueneta, daxita xua Dioso nacatsiwajënaenajamatabëxaina wajanacato-exanaenexa, Cristo wajanacasiwatëpaejawa yabara. Orijibia, Espíritu Santo, pejamatabëcueneyapëtaenëxae Dioso daxita xua bëpënëa siwanajamatabëxaina muetsia pexanaejawanexa, bajaraxua nacayapëtaeya-exana.
11 Espíritu Santo nacayapëtaeya-exanaenejewa, apoyapëtaetsi tsipae Dioso pesiwanajamatabëxainaejawa. Yapëtanetsi pacuenia itsajiwi-ata apocuenecaëjëpaetsi peyapëtaenexa pacuenia itsajiwi bëpënëa siwanajamatabëxaina. Itsiata, bajarapajiwi pijacuata najamatabëcueneyapëtane. Bajarapijinia pacuenia, ëDioso pija-Espíritu Santo, yapëtane pacuenia Dioso bëpënëa siwanajamatabëxaina pexanaejawanexa.
12 Waxaitsi baja cajena Dioso aponacatocopatsi wajamatabëcueneyapëtaenexa mapanacuapijiwi pecanaëjëtsicuenia. Biji rajane, nacatsijamatabëcuene-ecaeya-exana Espíritu Santo, peponaenë Diosojawawerena wajanacayawenonaenexa, xaniawaetsia wajayapëtaenexa bitso papexaniacuenejawanë Dioso nacato-exana, Jesucristo pejamatabëcueneta.
13 Bajaraxuata, bajarapaliwaisi patacatsipaebijawata, apopacatsipaebaponaetsi mapanacuapijicuene peyapëtaewije pecanaëjëtsicuenia. Biji rajane, pacatsipaebaponatsi pacuenia Espíritu Santo paneyapëtaeya-exanapona, paxamë-ata Espíritu Santo papecajamatabëcuenematacaponaewi, paneyapëtaenexa bajarapaliwaisianë.
14 Biji rajane, pajiwi apojamatabëcuenematacaponaetsi Espíritu Santo, bajarapajiwi apocopiapitsi paliwaisi picani Espíritu Santo yapëtaeya-exanaejitsiatsi, tsipaji saya betsitanatsiquejemaliwaisitsi. Apojumeyapëtaenua bajarapaliwaisianë, tsipaji apoxainae Espíritu Santo pejamatabëcuenematacaponaenexatsi, pejumeyapëtaeya-exanaenexatsi pajamatabëcuenexaina.
15 Itsiata, waxaitsi, Espíritu Santo wajanacatsijamatabëcuene-enaewi, bajaraPonë pejamatabëcueneta nacacuenecaëjëpa wajacanaëjëtsinexa, xaniawaetsia wajayapëtaenexa pajamatabëcuene xaina daxita Espíritu Santo wajanacayapëtaeya-exanaejawanë. Nexata, Espíritu Santo apopetsijamatabëcuene-enaewitsi, Jesús peliwaisi pejume-aebiwi, apocuenecaëjëpaetsi xaniawaetsia wajanacatocanaëjëtsinexa Espíritu Santo pejamatabëcueneta, xua yabara nacayapëtaeya-exana.
16 Bajarapamonae apopecuenecaëjëpaejawatsi yabara, Dioso pejumeliwaisibaxutota, bajayata profetanëmi, Isaías-pijinë yaquina mapacueniaje:
«¿Detsa pajiwi cuenecaëjëpatsi pejamatabëcueneyapëtaejawa xua pepoPetuxanenë Dioso najamatabëxaina? ¡Ajibi cajena! ¿Jipatsa cuenecaëjëpatsi pemuxujiobijawa Dioso? ¡Ajibi cajena!»,i jai Dioso pejumeliwaisibaxutota.
Itsiata, waxaitsi pacuenia Cristo jamatabëcuene-itsi,j bajarajamatabëcuene-itsitsi, tsipaji Espíritu Santo nacatsijamatabëcuene-eca, wajanacayapëtaeya-exanaenexa pacuenia Cristo najamatabëxaina.