Pablo ponapona Maltawënëtunaetojawata peyaponaebarco pebubunaecujinae manuameneta
28
Itsa baja, daxita paxanë xaniawaetsia papanepajë matatsënëabelia, nexata matapania pawënëtaniji Maltatunaetocuene.
2 Bajarapatunaetopijiwi bitso pexaniacuenia paneyawenona. Piniji-isotoxaneto itajuruteta, patanonopaenexa, tsipaji bitso ema tsanucae. Cainejebanua.
3 Bajarajota, Pablo nota petsewi-iso, pitamata-etsinexa. Nexata, Pablo petsimatajebinë iso, jomo bitso piatanenë, bebula, pitsatabijirawa isotojawawerena piatajujawawecua. Nexata, Pablo cobesinetsi. Pecobesinijawatatsi, tsiteca yajumaruca.
4 Maltatunaetojawata pejinawanapaewi itsa tane Pablo jomo pecobesinerucaejawatsi, nexata najumaitsi bajarapamonae:
—Maraeta ponë jiwibenëje, tsipaji manuamene wecuapanepae-ata, itsiata padiosowaa pijaneconi pexainaewi penaneconitsia-exanaediosowa, tocopatatsi jomo pesininexatsi, pijaneconijamatabëcuene peyatëpaenexa —najai Pablo yabara.
5 Nexata, Pablo jomo pecobesinijawatatsi, xuaba isotualia penacobenënëbiaxuabijawata. Bajaraponë itsiata apo-itsacuene.
6 Daxita bajarapamonae bajaya-epato ewetawanapa Pablo peyacobeyajinaejawa jomo pecobesinijawatsi, itsa jume, jemata caecuenia petëpaenë pejopaejawanexa. Itsiata baitsi jane, apo-itsacuene. Nexata, icatsia bajarapamonae itsacuenia najamatabëxaina Pablo yabara. Najumaitsi:
—Maraeta papebi, diosonëje —najai.
7 Nexata, itsajota panubenajë, imoxoyo bobena Publio, Maltatunaeto pewetsinë, pija-iranë. Nexata, bajaraponë panecopiapita pexaniacuenia, patanajinawanapaenexa pijabota acueyabi pamatacabibeje.
8 Bajarapamatacabijawa, Publio paxa awitane tsanucae camata. Romaebanucatsi. Bitso suliabatsinua. Nexata, Pablo taeyojopalia. Towajëta Diosojawabelia. Piawitanenë pematabocotojumawereca Pablo penacobebuatsijawata, bajaraponë jamatejema baja.
9 Bajarapacuene Pablo pexanaejawa itsa tane, Maltatunaetopijiwi, daxita piawitanewi, pata Pablojawaberena, pejamatejemaya-exanaponaenexa.
10 Pablo pejamatejemaya-exanaexae, daxita bajarapamonae najamatabëcuene-itajëtabiaba pinijicuenia pataneyaiyataejawa. Bexëajawabelia icatsia itsa panaponaejitsianë itsabarcota, nexata panerajuta daxita patanamatawenonaejawaxi, patajanamutonexa.
Pablo pata jane baja Roma tomarata
11 Acueyabi pajuametobeje, patanajinawanapaecujinae Maltatunaetota, icatsia baja panaponajë itsabarcota. Pamo ruca patawajënae Maltatunaetota, Alejandría tomarawerena pepatsimo. Bajarapamo baja cajena ruca daxita emarapae Maltatunaetototsotota. Ewetaruca pepanepaejawa emarapaejuametonë. Bajarapabarco-upimuxuneneta jumaperutabeje, Cástor, Pólux diosonëbeje.b
12 Bajarapamota patanaponaecujinae, panapatajë Siracusawëpajawata, Siliciatunaetota pe-ecaetomara. Bajarajota abaxë panajinawanapajë acueyabi pamatacabibeje.
13 Bajarajotacujinae, icatsia panaropobajë. Panajetarubenajë manuamenemuxubërëa. Papata-othopajë Regio tomarata. Merawia pitsijawata, patacowëwerena najetaruca pexaniajowibo sur-jawawerena. Bajarapajowibo paneyacapona patawajënaeyabelia. Nexata, anijamatacabibejecujinae, papata-othopajë Puteoli tomarata.
14 Bajarapatomarata pacaxitajarabajë itsamonae, Jesús peliwaisi pejumexaniataewi. Bajarapamonae pane-asiwa caesemana patanajinawanapaenexa bajarapamonaejawata. Bajaraxuacujinae jane baja, paponajë matatsënëa, patapatsinexa Roma tomarabelia.
15 Roma tomarapijiwi, Jesús peliwaisi pejumexaniataewi, patawajënaelia panewënëliwaisitane patanajetarubenaejawa. Nexata, bajarapamonae panecopiajairena. Copiaya penamataxainaebitsaëto panemata-enena Foro de Apiojawata. Bajaraxuacujinae, icatsia cotocaewibitsaëto panemata-enena Tres Tabernas-jawatalia. Nexata, Pablo itsa tane bajarapamonae, pexaniajamatabëcuene rajuta Diosojawabelia. Ajamatabëcuenesaërecanua bajarapamonae petaejawata.
16 Nexata jane baja, itsa papatajë Roma tomarata, capitán Julio rajuta baja pamonae penaneconitsiwi canajetaruca Cesarea tomarawerena, rajuta baja wajabitsaëwi pepopenamatacaitorobinëjawabelia. Itsiata, Pablo saicayabota capatatsi peponaponaenexa. Caenë wajabitsaënë ya-ewetaponaponatsic penajetabijirawiyaniwa.
Pablo tsipaeba Jesús peliwaisi Roma tomarapijiwijawabelia
17 Pablo baja itsa xaina acueyabi pamatacabibeje pepatsicujinae Roma tomarata, tonajumexuaba judíowi penamatacaitorobiwi pepatsinexa bajaraponëjawaberena. Itsa baja nacaetuata, nexata Pablo jumaitsi bajarapamonaejawabelia:
—Tajamonae, itsacuene apo-exanae-atanë wajawënajudíowijawabelia, wajasalinaiwi pecujarubicuene jumecowënëtsiaponaponae-atanë, itsiata bajarapamonae newaetaba Jerusalén tomaratalia. Nexata, itsaneconi apoxainae-atanë, necopata Romano nacuapijiwi pecobeyabelia, tanenaneconitsia-exanaenexa.
18 Nexata, Romano nacuapijiwi, jiwi penaneconitsicuene pewetsiwi, neyanijoba xua yabara neneconita. Picani necopatsijitsia, apocaxitajarabixae paneconi yabara nebeyaxuabia-exanaejitsia.
19 Itsiata baitsi jane, wajawënajudíowi, pamonae taneliwaisi-itoyawi, apojitsipae Romano nacuapijiwi tanecopatsinexa. Jitsipa picani tanebeyaxuabinexa. Bajarapacuenia taneneconitaponaexae, xanë wajëtajë tane-itorobinexa maberenaje, Romano nacua pepopewetsinë pijacuata taneneconicanaëjëtsinexa pibisiacuene itsa exanajë. Bajarapacuenia exanae-atanë, xanë apojitsipaenë wajawënajudíowi liwaisi penatsixainaejawa.
20 Bajaraxuata, pacajunatatsi patacataenexa, patacayapëtaeya-exanaenexanua xua yabara naneconitsiaponaponajë. Xanë naneconitsiaponaponajë tajumexaniataexae, pepatsijawa baja, Ponë daxita Israel nacuapijiwi copia-ewetawanapa athëbëwetsica pepatsijawanexa. Bajaraxuata, necobecëtsiaya yamaëya ponaponajë mapacadenamaëtoje —jai Pablo Roma tomarata judíowi penamatacaitorobiwijawabelia.
21 Nexata, bajarapamonae jumaitsi Pablojawabelia:
—Itsaliwaisi-ata baja cajena xamë yabara apopanetonajume-itorobi Judea nacuawerena. Wajawënajudíowi patsi-ata bajarawerena, itsiata apopanetsipaebi pibisiacuene xamë nexanaejawa yabara.
22 Itsiata baitsi jane, pajitsipajë patanetsipaebijawamë pacuenia najamatabëxainame Jesús peliwaisi yabara, tsipaji daxitanacuanëpijiwi baja cajena baracuaicuaijai tsabiabi bajarapapejanapitsapaeliwaisi. Paliwaisi xamë jumexaniataneme, bajarapamonae tsitapenajumetsënëtsiliwaisitsi —jai judíowi penamatacaitorobiwi Pablojawabelia.
23 Nexata, judíowi penamatacaitorobiwi caëjëta pamatacabi icatsia nacaetuatsijitsia, pabota Pablo ponapona, pebarëcuaicuaijainexa bajarapaliwaisi yabara. Nexata jane baja, itsa nacaetuata, bajarapamonae yajawapata ayaibitsaëtoxaneto. Nexata, Pablo bajayacunuajawaweliacujinae caniwiyojawabelia liwaisi tsipaeba. Yapëtaeya-exana bajarapamonaejawabelia Dioso pijajiwi pewetsijawa mapanacuataje Jesucristo pejamatabëcuene. Bajarapamonae pejumexaniataenexa, Pablo tsitajëtapona pacuenia Dioso peliwaisi jumaitsi Jesús yabara, Dioso penajumecopatsiliwaisi Moisés-pijinëta, profetawi, bajayata peyaquinaeliwaisita-ata.
24 Pablo petsipaebijawata, itsamonae jumexaniatane baja. Itsamonae pijinia jume-aeba bajarapaliwaisi.
25-26 Nexata, daxita bajarapamonae apopenajamatabëcuenejëpaexae bajarapaliwaisi yabara, itsamonae pitsapapona. Penawiabiwajënae Pablo icatsia jumaitsi bajarapamonaejawabelia mapacueniaje:
—Espíritu Santo baja cajena bajayata yapëtaeya-exana profeta Isaías-pijinëjawabelia, pejumaitsinexa panijasalinaiwimijawabelia paxamë yabara. Jumaitsi:
«Ponaename bajarapanacuapijiwijawabelia netsipaebinexa mapacueniaje: ‘Napëna jumetaeyabiabi-ata tsane petsipaebiliwaisitsi, itsiata apojumeyapëtae tsane pajamatabëcuene xaina. Napëna taeyabiabi-ata tsane petsita-exanaecuenetsi, itsiata apoyapëtae tsane pajamatabëcuene yabara tsita-exanatsi,’ jamë tsane.
27 »’Orijibia, Dioso jumaitsi: Bajarapamonae apojumeyapëtae tsane, tsipaji ajamatabëcuenetaja tsawanapae. Apojumetae tsane, tsipaji namuxu-acabiaya bepejinawanapaewi tsane, pejumetaeyaniwa. Apotae tsane, tsipaji naitaxutotsaquebiaya bepejinawanapaewi tsane, petaeyaniwa. Bajarapacuenia exanawanapaena, pejamatabë-ëthëtojawawetsina pejumeyapëtaeyaniwa petsipaebiliwaisitsi, penajamatabëcuenepënëyorotsiyaniwa Diosojawabelia perujujamatabëcuenewecua, tajamatabëcuenexanepaneya-exanaeyaniwanua pibisiacuenewecua’»,d jai baja cajena Espíritu Santo Isaías-pijinëjawabelia paxamë yabara.
28 »Paxamë baja bepayapëtaneme, Dioso pejitsipaejawa pecapanepaenexa apojudíowi. Bajaraxuata, bajarapamonae namuxuna-ewetsiana petsipaebiliwaisitsi, pejumexaniataenexa Jesús peliwaisi —jai Pablo judíowijawabelia.
29 Itsa baja Pablo najumewereta bajarapacuenia petsipaebijawa, nexata jane baja, daxita judíowi nawiaba. Nexata, bajarapaliwaisi yabara, namutua ayaicuenia nabarëcuaicuaijai tsanajetarubenae.
30 Pablo, anijawaibeje ponapona penacowaetsibota, pematamotaponaecuenia. Bajarapabota xaniawaetsia copiapitabiaba daxita pamonae siwaxainabiabatsi.
31 Pesiwaxainabiabiwitsijawabelia tsipaebabiaba Dioso pijajiwi pewetsijawa mapanacuataje. Ajumejunawijibia tsipaebabiabanua pepopetuxanenë Jesucristo peliwaisi. Itsajiwi-ata cajena apojume-itawetsitsi, petsipaebiyaniwa.