Pacuenia Pablo caponatsi Roma tomarabelia pepatsinexa, yabara peliwaisi
27
Pacujinae, gobernadornë Festo, pijajiwi yajawa, najamatabëcuenewereta pitorobinexa Pablo Italia nacuayabelia, Romano nacua pepopewetsinë, Augustojawabelia, Festo tocopata Pablo, itsamonae penaneconitsiwi yajawa, capitán Juliojawabelia. Julio raja penamatacaitorobinë cién ponëbeje wajabitsaëwi, pabitsaëto jiwi wënëruba pepopewetsinë Augusto pijajiwibitsaëto.
2 Paxanë Julio panecapona pewëpajawabelia. Bajarajota, pacaxitajarabajë barco, Adramitio tomarawerena pepatsimo. Bajarapamo ponaejitsia Asia nacuayabelia. Nexata, bajarapamo-ënëabereca panarunarecajë. Bajarapamo yaëtanajetarucaejitsia manuamenemuxubërëa pe-enaetomaranëjawa, Asia nacuata. Aristarco,a paneyanababeje. Bajaraponë Tesalónica tomarapijinë, Macedonia nacuata pe-ecaetomara.
3 Merawia pitsijawata, epatua panapatajë Sidón tomarata. Bajarajota, capitán Julio pitaxutobejiobiataexae Pablo, tocopata Sidón tomarata penonotajunaenexa. Nexata, nasiwaxaina peyapëtaewitsijawabelia. Bajarapamonae rajutatsinua xua namatawenona.
4 Patapitsapaecujinae Sidón tomarawecua, patawajënaewerena jowibo najetaruca. Nexata, pacujibaliajë Chipretunaeto, tsipaji bajarapamuxubërëwelia jowibo beyajetayo.
5 Bajaraxuacujinae, panicabaliajë Cilicia, Panfilia nacuabeje, canacujitsialia. Nexata, payaëtajë Mira tomarata, Licia nacuata pe-ecaetomara.
6 Nexata, Mira tomarata capitán Julio caxitajaraba itsabarco, pepatsimo Alejandríab tomarawerena, peponaemonexa Italia nacuayabelia. Nexata, capitán Julio bajarapabarco-ënëabereca, panerunaeya-exana, icatsia pataponaenexa.
7 Nawitsiamatacabianë be-axayocuenia pananajetarubenajë, tsipaji jowibo abaxë tsiteca patawajënaewerena. Bajarapajowibo pinijicuenia patanecuenecaranatsicujinae, itsiata papatajë Gnido tomara canacujitsialia. Bajaraxuata panicabajë Cretatunaetojawabelia, patamatawaquebinexa payenepanawelia eca Salmón tomara, tsipaji bajarapa-itapawelia jowibo beyajetayo.
8 Piayapëbejecuenia panajetarubenajë manuamenemuxubërëa. Belia, papatajë Buenos Puertos-jawata, Lasea tomara imoxoyojawata.
9 Bitso baja nawitsiamatacabianë patanajetarubenaexae, panewecuapanepapona pexanepanaematacabianë menia patanajetarubenaenexa. Emarapae baja pecopiajopaexae, bitso panetsi-ayai menia pataponaenexa. Nexata, bitso jowibo ayai tsabiabi. Bajaraxuata, Pablo picani muxujioba barcota patanajuaponaewijawabelia.
10 Jumaitsi mapacueniaje:
—Xanë raja yapëtaniji wajanacatsi-ayaijawanexa bitso, menia wajaponaejawa wajawajënaeyabelia. Belia raeta naxuabijitsipa mapamoje, xuanë-ata canajetarubena bajarapamotaje. Bajaraxuanë caejawa aponaxuabi tsipae, waxaitsi-ata cajena aponacatsiayai tsipae wajanaxuabinexa, itsa abaxë majotaje ewetawanapaenatsi emarapae ëpepanepaejawabelia —jai picani Pablo.
11 Itsiata, capitán Julio jume-aeba Pablo pejumaitsijawa. Caranata, jumexaniatane pacuenia jumaitsibeje barco pexainaenë, pecaponaenë-ata, tsipaji tsitaliwaisinamatamotatsi bajaraponëbeje.
12 Buenos Puertos-wëpajawata, apopexaniataxunae bajayajebi barco perucaenexa emarapaematacabianë. Nexata, Barco pexainaenë, pecaponaenë-ata, apojitsipaebeje bajarajota pata-ewetawanapaenexa emarapae pepanepaejawa. Bajaraxuata, daxita pamonae najetarubena bajarapamota, caeliwaisi xaina icatsia patawajënaeyabelia pataponaenexa, itsa cuenecaëjëpatsi, patapatsinexa picani Fenice tomarata. Bajarajota, picani jamatabëyaëta pata-ewetawanapaenexa emarapae pepanepaejawa. Fenice tomara eca Cretatunaetototsotota, itsajota xanepana barco perubenaenexa, tsipaji bitso jowibo apojoneyabiabi. apotsitapexaniataxunaetsibeje
Pinijijowiboxaneto barco caponatsi Cretatunaetowecua
13 Itsa pajinawanapajë Buenos Puertos-jawata, jemata patacowëwerena be-axayo jowibo najetaruca sur-jawawerena. Nexata, barco pexainaenë, itsamonae-ata tsitaxanepanatsi bepijia peponaenexa pewajënaeyabelia. Bajarapamonae jane baja, pejitsipaecuenia panaropobajë. Nexata, panajetarubenajë Cretatunaetomuxubërëa.
14 Nexata, jemata cae-epatoyocujinae pinijijowiboxaneto najetaruca Cretatunaeto epatajërëtsiarena barcojawaberena, pajowibo jiwi wënëruba Norestejowibo.c
15 Bajarapajowibo barco torotaponatsi Cretatunaetowecua, tajëjawabelia. Apopanecaëjëpae barco patamuxufetsinexa jowibo pewajënaewelia. Nexata baja, pacopatajë pataneyacaponaenexa jowibo.
16 Panajetarubenajë tsiquiritunaetoyo, Claudatunaetoyo, pepënënenia. Bajaraxuayo bitso jowibo apo-ayai. Nexata, itsajota jowibo beyajetayo, pajerayo natsicaponabiaba jiwi pepanepaenexa, piayapëbejecuenia pajutabuatsinajë barco-ënëabetsina.
17 Bajaraxuacujinae, bajarapamonae barco epacëbaponaya pinijibumacaxanetonëta, bajarapamo pesarasaraëcaeyaniwa malatacata. Junawanua patayayaëyaëcaeyaniwa Sirtewënë iratsaubonëjumata. Bajaraxuata isica barcopijivelapananë. Nexata, bajarapamonae copata barco itsabelia jowibo pona, pataneyacaponaenexa.
18 Merawia abaxë pitsijawata tsiteca pinijijowibo piayaixae, bajarapamonae barco-ënëta pecaponaejawanë barcojawata, menia yajuwënëpenereca, barco pefafanaenexa.
19 Bajaraxuacujinae, icatsia merawia pitsijawata, acueyabimatacabita jowibo pataneyacaponaecujinae, bajarapamonae icatsia menia penereca barco-ënëta pecanacuenebijawanë.
20 Bajayajebi baja cajena apopataenë matacabipijijuameto, tulupu-ata, tsipaji pinijijowibo, ema yajawa, tsitecanuca. Belia, panatotaniji apopatapanepaejamatabëcuenenexa.
21 Pamatacabibejejawa bajarapa-ayaicuene patataewanapaejawata, apopaxaenë pataxaejawa. Nexata, Pablo nonotapuna bajarapamonaetuatuajëta. Jumaitsi:
—Bitso cajena xanepanaejitsipa itsa panejumexaniataejitsipame pacuenia pacajumaitsitsi. Nexata, itsa apowecuaponaetsinua tsipae Cretatunaetowecua, nabejiobitsiaya apojinawanapaetsi tsipae, pijinia wajacaponaejawanë-ata aponapenetsi tsipae.
22 ¡Itsiata baitsi jane, aeconoxae pëtsa panatsinajamatabëxainame! Itsajiwi-ata raja paxamëyajuwënëjiwi apotëpae tsane. Itsiata rajane, ëbarco naxuabiana.
23 Ajena baja cajena, pamerawi, netsitanaitajëta ángelnë, Dioso pitorobinëtsica. BajarapaDioso xanë pijajiwitonënë. Tonacuenebaponaponajënua.
24 Nexata, ángelnë nejumaitsi: «¡Pablo, pëtsa junawame! Itsiata raja, apotëpaemë tsane, tsipaji raja naitajëtsijitsiamë Romano nacua pepopewetsinë pitabarata. Xamë raja nejamatabëcueneta Dioso capanepaenatsi petëpaeyaniwa daxita pamonae yajawanajetarucame mapabarcotaje», nejai ángelnë.
25 ¡Nexata, daxita paxamë panajamatabëcuenesaëre, panejamatabëcuenebëjaijawawecua! Itaxutuajamatejemanë Diosojawabelia wajanacacapanepaenexa, tsipaji yapëtaniji wajanacacapanepaejawanexa pacuenia baja ángelnë netsipaeba.
26 Itsiata baitsi jane, jowibo nacayacapatsiana itsatunaetojawabelia —jai Pablo.
27 Catorce baja pamatacabibeje patapuaxainae patanaropobicujinae, toquebiaya merawi jowibo paneyacapona Adriático manuamenejawa. Nexata, merawituatuajëta barcota penacuenebiwi tsitatsi ira pata-imoxoyotsijawa.
28 Nexata, bajarapamonae peyapëtaenexa xuawajëto mene awajubua pemaëtota caëjëtapona. Copiaya pecaëjëtsijawata piawajubuajawa xaina treinta y seis pametrobeje, mene piawajubuajawa irabereca. Bajaraxuacujinae, cae-epatoyocujinae, icatsia cotocaewi pecaëjëtsijawata, mene piawajubuajawa xaina veintisiete pametrobeje.
29 Nexata, barcota penacuenebiwi junawa peyayaëyaëcaejawa ibotojawabelia. Nexata, bajarapamonae barco petabufewetsina, cuatro xuabeje piarewejawanë, anclajawanë, yamaëya copabareca, menejawabereca bëpënëa irabelia itsa waetaba, barco perucojopaenexa. Bajarapamonae picani bitso jitsipa bepijia peyamatacabibijawatsi, penatsiwajënaetaenajetarubenaenexa.
30 Nexata, bajarapaepatota bajara-ëpamonae picani bitso jitsipa barcowecua penonobajunecaenexa, pepanepaenexa. Nexata, bajarapamonae penajuaponaewijawabelia yamaxë-itojorobiaya jumaitsi:
—Icatsia raja, pacopabijitsianëreca itsa-anclajawanë barco-upitatsia —jai yamaxë-itojorobiaya. Nexata, bajarapamonae taxuxuaba jera pexuabijawareca, pamo pajutabuatsinajë, peyaponaenexa picani pitapayabelia.
31 Nexata, Pablo itsa tane bajarapamonae jera pexuabijawareca, jumaitsi wajabitsaë pijacapitán-jawabelia, pijajiwi wajabitsaëjawabelia-ata:
—Mapamonaeje barcota penacuenebiwi, itsa ponaena mapajerataje, paxamë-ata pawajabitsaëmë panapenetsianame meneta —jai Pablo.
32 Nexata, barcota penacuenebiwi peponaeyaniwa jerata, wajabitsaë caucutaxuaba jera pecëtarutsimaëto. Nexata baja, jera pona barcowecua.
33 A̱jena̱ baja matacabi tsina, Pablo itoroba daxita barcota peponaewi pexaejawa pexaenexa. Jumaitsi bajarapamonaejawabelia:
—Catorce baja cajena pamatacabibeje xaniawaetsia apopamajitsimë. Panexaejawa-ata apopaxaemë, panenasiwajamatabëcuenebëjaixae xua pacatocopiapatsijitsia.
34 Bajaraxuata, paca-itorobatsi panexaejawa panexaenexa, panesaë panexainaenexa panepanepaenexa. Itsiata raja, daxita apopa-itsacuenemë tsane —jai Pablo bajarapamonaejawabelia.
35 Bajarapacuenia Pablo pejumaitsijawata, daxita bajarapamonae pitabarata panbë pita. Nexata, Diosojawabelia pexaniajamatabëcuene rajuta panbë yabara. Pe-epatsënëcaecujinae panbë, rajuta bajarapamonaejawabelia. Nexata, xane baja.
36 Daxita bajarapamonae pecuenetaejawatatsi Pablo, ajamatabëcuenesaëreca. Nexata, bajarapamonae-ata naxane pexaejawa.
37 Doscientos setenta y seis papajiwinëbeje daxitata paponajë bajarapabarcota.
38 Nexata, daxita xaniawaetsia pataxaecujinae, barcota penacuenebiwi menia penereca trigoxu doruanë, pefafanaenexa barco.
Pablo peyaponaebarco bubuna manuameneta
39 Itsa baja matacabi tsarucaponae, barcota penacuenebiwi apoyapëtae itsajota panajetarubenajë. Itsiata, taeyeta tsiquiri-irayo, yapëtaenejewa pa-irayocuene. Tanenua menetotsoto, itsajota boca tajetabo. Nexata, picani bajarapamonae najamatabëxaina peyaëtsinexa barco bajarapatajetabojawabelia.
40 Nexata, pa-anclajawanë, yamaëya copabareca, bajaraxuanëmi yamaëcaucuba. Sarasaranaeya-exananua barco petabufecajëbanajetarubenaepabeje. Barco-upitatsia penucaenaeta velapana upicëtarutsia, bajarapapanata jowibo petorotsinexa ira-itapayabelia. Nexata, barco jane baja, imoxoyotanajetaruca tajetabo.
41 Itsajota anijamenebeje pesaë namata-enetsia patabeje, itacarajeta bajarajota barco payajumanayaëtajarabajë iratsaubojumata. Nexata, barco-upi mëthëmëthëcajunua iratsaubojawabelia. Bajaraxuata, barco ataja tsanucae. Nexata, malataca pesaëta barco petabufejawawetsina tabufesarabajarabatsi.
42 Nexata, picani wajabitsaë bajarajota beyejebijitsiatsi daxita penaneconitsiwi, pewecuapanepaeyaniwatsi pejuejawata.
43 Itsiata, wajabitsaë pijacapitán apotocopatsi, tsipaji apojitsipae Pablo yajawa pebeyaxuabijawatsi. Nexata, capitán itoroba daxita pamonae yapëtane pejuejawa, copiaya itoroba pejuenexa, pepatsinexa matatsënëabelia.
44 Bajaraxuacujinae, pamonae apoyapëtae pejuejawa, cotocaewi itoroba tablapanëjumata, barcopijitablapanëmijumatanua, pejuenexa. Bajarapacuenia daxita panepa itsacuenenejewa matatsënëabelia.