Lázaro petëpaejawa yabara
11
Pamatacabi Lázaro,a Betania tomarapijinë, bitso awitane tsanucae, Jesús abaxë ponapona Jordán mene itsapanatalia. Bajaraponë Jesús peyapëtaenëtsi. Bajarapatomarata, ponaponabeje pematapijiwabeje, María, Martabeje.
2 BajarapaMaría itsamatacabi, Jesús tsitaxu-epanaena petuxujuwirata. Taxutsewiapaenanua, pematana̱ta.
3 Nexata, pamatacabi Lázaro bitso awitane tsanucae, pematapijiwabeje tonajume-itorobaliabeje Jesús-jawabelia. Jumaitsibeje:
—Tajatuxanenë, niasiwanë raja Lázaro bitso awitane —jaibeje.
4 Bajarapaliwaisi pejumetaecujinae, Jesús jumaitsi pijajiwijawabelia:
—Lázaro xua bitso awitane tsanucae, bajarapawitaneta raja pepocuene apotëpae tsane. Biji rajane, bajarapawitanejawata Dioso nacuene-itajëtsiana pinijisaë pexainaenëcuene, xanë Pexënatonë-ata tanecuenecaëjëpaenëcuene, pinijicuene patacatsita-exanaejawanexabeje. Bajaraxua pejamatabëcueneta jiwi pexaniacuenia patanewënëxaniatsinexabeje —jai Jesús pijajiwijawabelia.
5 Jesús bitso asiwaya tane Marta, María, Lázaro-ata.
6 Itsiata, Jesús wënëliwaisitae-ata Lázaro bitso piawitanejawa, bepijiayo apoponae Betania tomarabelia. Anijamatacabibeje abaxë ponapona Jordán mene itsapanatalia.
7 Bajaraxuacujinae, Jesús jumaitsi pijajiwijawabelia:
—Ponaliatsi icatsia Judea nacuayabelia —jai.
8 Nexata Jesús pijajiwi jumaitsitsi:
—Necujarubinë, caniwita saya judíowi bajarajotalia jamatabëcatsecona picani ibotonëta. ¿Itsiata tsabaja, icatsia ponaeliatsi bajarabelia? —jai.
9 Nexata Jesús jumaitsi pijajiwijawabelia:
—Matacabi raja xaina doce pahorabeje. Nexata, pajiwi matacabita ponapona, apofirapecae, tsipaji icotiata napebetab xaniawaetsia.
10 Itsiata, pajiwi merawi ponapona, firapeca, tsipaji merawi aponapebetsi xaniawaetsia —jai.
11 Bajaraxuacujinae, peponaewajënaeya Jesús jumaitsi pijajiwijawabelia:
—Wajayapëtaenë rabaja Lázaro majitanuca. Nexata, ponajë, taya-itawabinexa —jai Jesús.
12 Nexata pijajiwi jumaitsi:
—Patajatuxanenë, itsa Lázaro saya majitanuca, itsiata meta jamatejema tsane —jai Jesús-jawabelia.
13 Jesús bajarapacuenia jumaitsi Lázaro petëpaejawa yabara. Itsiata, Jesús pijajiwi apojumeyapëtaetsi. Bajarapamonae jamatabëjumaitsi: «Lázaro meta saya majitanuca, pacuenia majitanucabiaba merawi», jamatabëjai.
14 Bajaraxuata, Jesús jumenapebetsiaya jumaitsi pijajiwijawabelia:
—Lázaro rabaja tëpa.
15 Paxamë yabara jamatabëcuenebarëyanë, apotananucaexae bajarajotalia, paepatota Lázaro tëpa, tsipaji bajarapacuenejawata matapania xaniawaetsia panejumexaniataename Cristonëcuenenë. Baja nexata ponatsi Lázaro wajataenexa —jai pijajiwijawabelia.
16 Bajarapacuenia Jesús pejumaitsicujinae, Tomás, Jesús pijajiwiyajuwënënë, ponë wënërubatsi Sapalanë,c jumaitsi penajuaponaewijawabelia:
—Naponatsi Jesús pepëta. Ibotonëta itsa tseconaenatsi, wajayajawatëpaenexa bajaraponë —jai Tomás.
Jesús pejamatabëcueneta, petëpaewimi-ata icatsia asaëjitsia
17 Pepuaxainae baja cuatro pamatacabibeje, Lázaropijinë pemëthëtsicujinaetsi, Jesús matapania patajopa Betania tomarata.
18 Bajarapatomarayo eca imoxoyo Jerusalén tomarawecua. Bejamatabëcuene anijakilómetrobeje epatua nawecua-ecabeje.
19 Jesús pepatsiwajënaeya Betania tomarata, ayaibitsaëtoxaneto judíowi pata Marta, Maríabejejawaberena, pejamatabëcueneyanabinexatsibeje pematanueyabijawata pejuyapijinë, Lázaropijinë.
20 Itsa Marta wënëliwaisitane Jesús pepatanajetarucaejawa, pitsapa pijabowecua pemata-enenaenexa. María itsiata, bota nacopateca.
21 Nexata, Marta itsa mata-enenatsi, jumaitsi Jesús-jawabelia:
—Tajatuxanenë, itsa majotaje ponaponaejitsipame, apotëpae tsipae tajuyapijinë.
22 Itsiata, yapëtaniji, aeconoxae-ata pecato-exanaejawanexa daxita pacuene wajëtame Diosojawabelia —jai.
23 Nexata Jesús jumaitsi bajarapowajawabelia:
—Nejuyapijinë raja itsiata, icatsia asaë tsaponaponae tsane —jai.
24 Nexata, Marta xaniawaetsia apopejumeyapëtaexae xua yabara Jesús jumaitsi, nexata bajarapowa jumaitsi Jesús-jawabelia mapacueniaje:
—¡Xaniajamë! Yapëtaniji bajaraponëmi icatsia Dioso piasaëya-exanaejawanexatsi, pamatacabita icatsia asaëya-exanaenatsi daxita petëpaewimi —jai.
25 Nexata Jesús jumaitsi Martajawabelia:
—Xanë rabaja, piasaëjamatabëcuene taxainaenë. Nexata, pajiwi xanëjawaberena nesiwanajamatabëcopatsiana, bajarapajiwi tëpae-ata, icatsia asaë tsaponaponae tsane.
26 Pajiwi abaxë asaë tsaponaponae mapanacuataje, itsa xanëjawaberena nesiwanajamatabëcopatsiana, bajarapajiwi apotëpae tsaned daxita matacabijawabelia. ¿Xamë tsabaja jumexaniataneme bajarapaliwaisi? —jai Jesús.
27 Nexata Marta jumaitsi:
—Tajatuxanenë, jumexaniataniji rabaja. Xamë rabaja cajena Cristomë, Dioso pexënatomë, ponë pacopia-ewetawanapajë athëbëwetsica pepatsijawanexatsica mapanacuayabetsicaje, jiwi pecapanepaenexa —jai Marta.
Pacuenia Jesús wënua Lázaro pemëthëjawata, yabara peliwaisi
28 Itsa baja Marta najumeliwaisiwereta bajarapaliwaisi, nawiata pijaboyabelia, pejunatsinexa pejuyapijiwa María. Muetsia jumaitsi Maríajawabelia:
—Wajanacacujarubinë rabaja pata. Cajunalia raja —jai Marta.
29 Caejumetae Jesús pejunatsijawatsilia, María nonotabapuna. Pona petaenexa Jesús-jawabelia, itsajotalia ecajopa.
30 Jesús abaxë apopatsi Betania tomaraberena. Ecojopa abaxë, itsajotalia Marta mata-enenatsi.
31 Pajudíowi bajarapowabeje pijabota pata peyanabinexatsibeje Lázaro petëpaexae, bajarapamonae tane María penonotabapunaejawa, bepijia pepitsatabijawalia bowecua. Nexata, bajarapamonae María pënaponatsi, tsipaji jamatabëjumaitsi: «María raeta pejuyapijinëmi pemëthëjawabelia pona, pematanueyabinexa», jamatabëjai.
32 Itsa María palia, itsajotalia Jesús ecojopa, pematabacabëta nucajunua Jesús pitabarata. Jumaitsi:
—Tajatuxanenë, itsa majotaje ponaponaejitsipame, apotëpae tsipae tajuyapijinë Lázaro —jai Jesús-jawabelia.
33 Jesús itsa tane María penueyaxuabijawa, judíowi-ata penanuejawa, pamonae yajawapata María, bajaraponë nexata bitso itaxutuanajamatabëxainaxuaba.e
34 Nexata, Jesús jumaitsi bajarapamonaejawabelia:
—¿Detsa jota Lázaropijinë pamëthëtame? —jai.
Nexata, bajarapamonae jumaitsi Jesús-jawabelia:
—¡Naxatsia! Taename pa-ibowajujawata bajaraponëmi pamëthëtabuatajë —jai.
35 Nexata, Jesús bajarapaepatota nua.
36 Petaejawata Jesús penuejawa, bajarajota penubenaeyajuwënëwi najumaitsi:
—¡Pataema! Jesús picani bitso asiwa petëpaenëmi —najai.
37 Itsamonae pijinia najumaitsi Jesús yabara:
—Mara ponëje itaxutoxaniawaeta bitso pitaxutotsëcënaenëmi-ataje xaniawaetsia petaenexa. ¿Apocaëjëpaetsi tsaeta tsipae itsacuenejawa pexanaejawa Lázaropijinë petëpaeyaniwa? —najai.
Jesús, icatsia asaëya-exana Lázaro petëpaenëmi
38 Bajarapacuenia pejumaitsixaetsi Lazaropijinë yabara, Jesús icatsia bitso muxunajamatabëxainaxuaba. Nexata, pa-ibowajujawabelia Lázaropijinë buatatsi. Bajarapa-ibowaju yamëthëwëpa-acatabuatatsi ibopanaxanetota.
39 Jesús nexata jumaitsi bajarajota penapatsiwijawabelia:
—¡Patixire mapa-ibopanaxanetoje! —jai.
Petëpaenëmi pematapijiwa, Marta, jumaitsi:
—Tajatuxanenë, bitso raeta tuxutsaeba, tsipaji rabaja petëpaecujinae, ajena xaina baja cuatro pamatacabibeje —jai.
40 Jesús nexata jumaitsi Martajawabelia:
—¿Apocajumaitsitsi tsaja, itsa xanëjawaberena nesiwanajamatabëcuenecopatsianame, netaejawanexa Dioso pesaëta pinijicuene pexanaejawanexa? —jai Jesús.
41 Nexata, bajarapamonae Lázaropijinë pemëthëtsi-ibowajuwëpawecua tixilia ibopanaxaneto. Bajarapaepatota, Jesús athëbëa benaëcotsiajumaitsi:
—Taxa, pexaniajamatabëcuene carajutatsi, tsipaji xamë nejumetaneme.
42 Yapëtaniji cajena tanejumetaeyabiabijawamë. Bajarapacuenia icatsia cawajëtatsi mapamonaeje, ayaibitsaëtoxaneto, pitabarata, bajarapamonae pecajumexaniataenexa tane-itorobinëmëcuenetsica —jai Jesús Diosojawabelia.
43 Jesús pewajëtsicujinae, ayaijumeta jumaitsi Lázaro pebuatsi-ibowajutsijawabelia:
—¡Lázaro, pitsaparemena bajarapamëthëwecua! —jai Jesús.
44 Nexata, Lázaro, petëpaenëmi, pitsaparena jane baja mëthëwecua. Daxitanëreca piapiasábanata mataquionaeya pematacacëbicujinaetsireca abaxë, yajawapitsaparena. Pitabara-acatsipapaëbërëpanatsi abaxë tsiteca yajawapitsaparena.
Jesús nexata jumaitsi bajarapamonaejawabelia:
—¡Pawecua isinare bajarapapanë! ¡Pacopare peponaenexa pijaboyabelia! —jai.
Jesús pijawajabitsaë najumejaita pebeyaxuabinexatsi
45 Petaexae pajudíowi María yanabatsi, Jesús piasaëya-exanaejawa Lázaro petëpaenëmi, ayaibitsaëto jumexaniatane Jesús, Cristonëcuene, Dioso pitorobinëtsitsica.
46 Itsiata, itsamonae, pona fariseowijawabelia, petsipaebinexa pacuenia Jesús asaëya-exana Lázaro, petëpaenëmi.
47 Nexata, fariseowi, sacerdotewi penamatacaitorobiwi-ata, junatsia-exana Conciliomonae,f pebarënacaetuatsinexa. Penacaetuatsicujinae, bajarapamonae najumaitsi:
—¿Detsa meta itsi tsanetsi waxaitsi? Maponëje Dioso pesaëta pinijicuenejawanë tsita-exanapona jiwijawabelia.
48 Itsa waxaitsi cuenecopatsipatsi bajarapacuene pexanaponaejawa, daxitajiwi jumexaniataeponaejitsipatsi bajaraponë Cristonëcuene, wajanacayanacua-ewetsinënexa. Nexata bajaraxua yabara, Romano nacua pewetsiwi nacabara-anaepanaejitsipa. Itorobijitsiparena pijajiwi, wajabitsaë, wajatemplobo wajanacatobijianaenexa, wajanacawerebiabinexa-ata —najai bajarapamonae.
49 Bajarapabitsaëtoyajuwënënë, Caifás, ponë sacerdotewi pepopenamatacaitorobinë tsaponaponae bajarapamatacabianëjawa, jumaitsi penajuanacaetuatsiwijawabelia:
—Paxamë cajena liwaisi bijiaya panetsiwajënaecanaëjëbiwi.
50 Xaniawaetsia apopanatsiwajënaecanaëjëtsimë panepanepaejawanexa. Matatoxenetsia nacatoxanepana caenë wajanacasiwatëpaejawa daxitatsi yabara, judíowitsi wajanacawerebiabiyaniwa —jai Caifás, Jesús yabara.
51 Itsiata baitsi jane, Caifás apojumaitsi bajarapacuenia pijacuata penajamatabëxainaecuenia. Biji rajane, bajarapamatacabi Caifás sacerdotewi pepopenamatacaitorobinëxae, Dioso bajarapacuenia tajëwelia wajunupaebia-exanatsi pacuenia Jesús siwatëpaejitsia daxita judíowi.
52 Itsiata, Jesús, ëjudíowi yabara aposiwatëpae tsane. Siwatëpaejitsianua pamonae-ata Dioso pexi, nacayajatsia daxitanacuanëjawa jinawanapa, pecaetuatsinexa caebitsaëto pexanaenexa, caenë pesiwatëpaejamatabëcueneta.
53 Penajumejaitsicujinae, conciliobitsaëto najamatabëcueneweretawanapa Jesús pebeyaxuabijawanexatsi. Nexata, bajarapamatacabijawaweliacujinae jaitapona pacuenia Jesús beyaxuabijitsiatsi.
54 Bajaraxuata, Jesús apoponabiabi baja itsabelia judíowi nacaetuatabiaba. Nexata, Judea nacuawecua pitsapa, peponaenexa Efraín tomarajawabelia, patomara eca imoxoyo petusatonacuata. Bajarajota, pijajiwi yajawaponapona, tsipaji Jesús apojitsipae judíowi peyapëtaejawatsi itsajota ponapona.
55 Itsa baja imoxoyo pewajënae Pascuafiesta, pejonematacabinexa, judíowi pijafiesta, jiwi ayaibitsaëtoxaneto pijatomaraxijawawerena pona Jerusalén tomarabelia. Bajarapamonae pona pexanaenexa pacuenia exanabiaba fiestawajënaeya, penajamatabëcuenexaniawaetsinexa Diosojawabelia.
56 Pepatsicujinae, bajarapamonae jaitarutatsi Jesús. Itsa nacaetuata templobota, nayanijoba. Najumaitsi:
—¿Detsa xamë jamatabë-itsimë? ¿Jesús meta napatsiana mapafiestajawaje? Jume. Apopatsi meta tsane —najai ëpamonae.
57 Nexata, fariseowi, sacerdotewi penamatacaitorobiwi-ata, najumecopata jiwijawabelia petonaitaxutoca-ewetsinexatsi Jesús. Nexata, pajiwi yapëtane itsajota ponapona, petsipaebinexatsi bajarapamonaejawabelia, jamatejema pewaetabinexa, Jesús penaneconitsia-exanaenexatsi.