Jesús tsipaeba jiwijawabelia pecuenecataeliwaisicuenia, oveja pewetsinë peliwaisicuenia
10
Jesús orijibia jumaitsi fariseowijawabelia:
—Xaniajanë pacuenia pacatsipaebijitsiatsi. Ponë corral-baupajawalia apojone, juna saya peyenepanajawatsia pejonenexalia, bajaraponë oveja penacobetoxotsinë.
2 Ponë peneta joneya corral-baupayalia, bajaraponë cajena baja oveja pewetsinë.
3 Nexata, corral-pijibaupa pewetsinë tobaupata pija-oveja. Oveja pewetsinë junatapona pewënëta caenë canacujitsia. Oveja pejumeyapëtaexae pewetsinëtsi, pejunatsicanacujitsiatsi pitsapapona. Bajaraxuacujinae oveja pewetsinë matacapona wayafuabelia.
4 Pecapitsapaecujinae, daxita pija-oveja, bajaraponë pewajënaeya namataxainanajetaruca. Nexata, pija-oveja pënaponatsi, tsipaji jumeyapëtanetsi.
5 Itsiata baitsi jane, oveja apopënaponae tsipae apopeyapëtaenë, tsipaji apojumeyapëtae tsipae bajaraponë. Nexata wecuarëcëpecaejitsipa —nayabarajai Jesús fariseowijawabelia.
6 Bajarapacuenia Jesús oveja pewetsinë pecuenecataeliwaisicuenia nacuenewajunupaeba fariseowijawabelia. Itsiata, bajarapamonae apojumeyapëtaetsi xua yabara nacuenecataeya naliwaisipaeba.
Jesús pewetsijawa xaniawaetsia pijajiwi
7 Fariseowi apopejumeyapëtaexae xua yabara naliwaisipaeba, Jesús icatsia jumaitsi bajarapamonaejawabelia:
—Xaniajanë pacuenia pacatsipaebijitsiatsi. Xanë raja baupanë oveja pejonenexa corralënëaberena, tsipaji xanëjawa jiwi jonena, pepanepaenexa Diosojawabetsia.
8 Itsamonae xanë tawajënaeya, tajajiwi pewetsiwi, nawajunupaebabiaba bepexania-ewetsiwi itajara. Itsiata, bajarapamonae saya oveja bepenacobetoxotsiwi, bepeyacajërëbabiabiwi tajajiwi. Itsiata baitsi jane, tajajiwi aponamuxuna-ewetsi tsane bajarapamonae pacuenia itorobatsi.
9 Xanë rabaja cajena baupanë. Pajiwi jonena bajarapabaupajawa, nexata capanepaenatsi Diosojawabetsia tanesiwanajamatabëcuenecopatsixae. Xaniawaetsia oveja pewetsinë, capitsapabiaba corral-wecua, caebajayacunua canacujitsia. Matacaponabiaba oveja wayafuabelia, pexaniapo̱na piabatsitsinexa. Caecaniwiyo canacujitsia, icatsia cajoneyabiaba corral-jawaberena. Bajarapijinia pacuenia, pajiwi ne-itaxutuajamatejema tsane, xanë-ata xaniawaetsia jamatabëcuene-abatsianajë taliwaisita. Ewetsianajënua piayaicuenewecua.
10 »Biji rajane, penacobetoxotsinë bajarapacuenia ba-apo-exanae. Basiwapata saya oveja penacobetoxotsinexa, pebeyejebinexa, pewerebiabinexanua. Bajarapijinia jamatabëcuene-itsi pamonae pata bepexaniacuenia itajara pewetsiwi, tajajiwi taneto-ewetsinexa. Itsiata baitsi jane, xanë patajopaicajë mapanacuayabetsicaje, tajamatabëcueneta jiwi pexainaenexa piaitawajamatabëcuene, pewajënaeyabelia ayaicuenia pecabarëyatsawanapaenexa bajarapapitawajamatabëcuene.
11 »Xanë raja tajajiwi pexaniacuenia ta-ewetsinë. Pacuenia xaniawaetsia oveja pewetsinë yapijiwinacaewetsipa pebeyaxuabinexatsi, pija-oveja pecapanepaenexa, bajarapijinia pacuenia xanë-ata nacaewetsianajë tanebeyaxuabinexa, tajajiwi tacapanepaenexa.
12 Itsiata, ponë ëpematamotsijawanexatsi yabara to-ewetsipa itsanë pija-oveja, itsa totsimaxënajetarucaejitsipatsi pianaepanaenë loboa oveja pexaenexa, bajaraponë xuabatabajirawijitsipa ovejabitsaëtomi. Nexata, lobo itsa yajuwënëwaetabijitsipa, natsanecaejitsipa bajarapabitsaëtomi.
13 Bajaraponë najetabijirawijitsipa, tsipaji saya nacuenebaponaponaejitsipa pematamotsinexatsi. Nexata, aposiwajamatabëcuenebëjai tsipae oveja yabara.
14 »Xanë rabaja tajajiwi pexaniacuenia ta-ewetsinë. Nexata, yapëtaniji caenë canacujitsia. Tajajiwi-ata pijinia neyapëtane.
15 Pacuenia taxa neyapëtane, bajarapijinia pacuenia xanë-ata yapëtaniji taxa. Xanë nacopatsianajë tasiwatëpaenexa tajajiwi yabara.
16 Xanë baja cajena xainajë itsabitsaëto tajajiwi, pamonae abaxë apoyajawajinawanapae mapabitsaëtojawataje. Bajarapamonae itsamatacabi capatsianajë mapabitsaëtojawaberenaje, caebitsaëto ta-exanaenexa. Nexata, daxita bajarapamonae exanawanapaena ta-itorobicuenia. Caebitsaëtoxaneto jane baja tajajiwi netonaexanaena. Xanë, caenënë, bajarapamonae ewetsianajë.
17 »Bajaraxuata, taxa niasiwa, tsipaji tajajiwi yabara nacaewetsianajë tanebeyaxuabinexa. Itsiata baitsi jane, icatsia tatëpaecujinae asaënë tsane.
18 Itsajiwi-ata cajena apocaëjëpaetsi tanebeyaxuabinexa. Biji rajane, xanë tajacuata nacaewetsianajë tanebeyaxuabinexa. Necuenecaëjëpanua tasaënexa tatëpaecujinae. Bajarapacuenia baja cajena, taxa netocopata —jai Jesús fariseowijawabelia.
19 Judíowi bajarapacuenia icatsia itsa jumetane Jesús pejumaitsijawa, aponajamatabëcuenejëpae.
20 Ayaibitsaëto bajarapamonaeyajuwënëwi najumaitsi Jesús yabara:
—Dowathi raja bajaraponë yajawaponaponatsi. Matajemabatsi ra saya. ¿Detsa xuajitsia bajaraponë panamuxuna-ewetame? —najai bajarapamonae.
21 Itsiata, itsamonae jumaitsi:
—Ponë dowathi yajawaponaponatsi, apocaëjëpaetsi tsipae cajena pecuaicuaijainexa mapacueniaje. Apocaëjëpaetsi tsipaenua pitaxutoxanepanaeya-exanaenexa bitso pitaxutotsëcënaenëmi —jai Jesús yabara.
Judíowi nawecua-ataejitsibi Jesús
22 Emarapaejuametonëta fiestab exana, judíowi penajamatabënapitsinexa bajayata pijasalinaiwi templobo pexanebetsijawa Jerusalén tomarata.
23 Bajarapafiestamatacabi-epatojawa, Jesús ponapona bajarapatemplobopijibaupa, Portal de Salomón-jawata.
24 Bajarajota, judíowi pewetsiwi Jesús matatoyorotsia tsimaxënacaetuatatsi. Jumaitsi:
—¿Detsa pamatacabijawabelia panewecua-ajibia-exanaename caejamatabëcuene apopataxainaejawa xamë yabara? ¡Xaniawaetsia panenawajunupaebare xamë pepacuene itsa Cristomë, Dioso athëbëwetsica peca-itorobinëtsica, jiwi necapanepaenexa! —jai judíowi pewetsiwi.
25 Nexata, Jesús jumaitsi bajarapamonaejawabelia:
—Pacanawajunupaebatsi rabaja picani rowialia. Itsiata, apopanejumexaniataemë. Taxa Dioso pesaëta papijinicuenejawanë exanajë, bajaraxuanë rabaja picani necuenewajunupaeba Cristonëcuene.
26 Itsiata, paxamë apopanejumexaniataemë Cristonëcuene, tsipaji baja cajena apopatajajiwiyajuwënëwimë.
27 Pamonae baja tajajiwi nejumeyapëtane, ta-itorobicuenia pexanaenexa. Bajarapamonae tajajiwicuene yapëtaniji. Bajarapamonae-ata nepënapona.
28 Bajarapamonaejawabelia rajutajë matacabi apopewerewerecaejawa. Taxa Diosowecua-ata, aponaxuabi tsane. Pamonae tajajiwi, itsajiwi-ata ta-ewetsicuenewecuac aponeyacajërëtsicapanepae tsane.
29 Taxa, daxitawecua ayaijamatabëcuenenëxae, pamonae nerajuta ta-ewetsinexa, itsajiwi-ata apocaëjëpaetsi tsane bajaraPonë pewetsicuenewecua pepitsinexatsi.
30 Taxa Dioso, paxanëbeje, caenë rabaja panaexanajëbeje —jai Jesús judíowi pewetsiwijawabelia.
31 Bajarapacuenia pejumaitsixae, bajarapamonae icatsia nota ibotonë, Jesús picani pebeyaxuabinexatsi petseconaejawata.
32 Jesús itsa tane bajaraxua, jumaitsi bajarapamonaejawabelia:
—Paxamë baja cajena, panecuenetaneme ayaijawa pexaniacuene taxa Dioso pesaëta ta-exanaponaejawa. ¡Nexata panejumaitsimëre! ¿Detsa pitsicuenejawa bajarapapexaniacueneyajuwënëjawa wemaxënaneconitajë, xua yabara ibotonëta panetseconaejitsiamë? —jai.
33 Nexata judíowi jumecanawiatatsi:
—Bajarapapexaniacuene nexanaejawanë yabara, apopacatseconaejitsiatsi. Biji rajane, xamë cuaicuaijamë Dioso apopejitsipaejumenë, jiwitonëmë-ata beDiosonëmë nenataexae. Bajarapacuenia nejumaitsixae, naneconitame Diosojawabelia. Bajaraxuata pacatseconaejitsiatsi ibotonëta, Dioso patanenajumeliwaisicopatsicuenia Moisés-pijinëta —jai Jesús-jawabelia.
34 Nexata Jesús jumaitsi judíowijawabelia:
—Yapëtanetsi Dioso pejumeliwaisibaxutota pejumaitsijawa mapacueniaje: «Paxamë-ata rabaja padiosowimë»,d pejaijawa.
35 Yapëtanetsinua pacuenia daxita xua Dioso jumaitsi pejumeliwaisibaxutota, pexaniajaijawa.
36 Itsa xanë Dioso nitapeta, tane-itorobinexatsica mapanacuayabetsicaje, pejitsipaecuenia tato-exanaponaponaenexa, ¿detsa xuajitsia paxamë pajumaitsimë: «BajaraPonë Dioso apopejitsipaecuenia, jumaitsi: ‘Xanë raja Dioso pexënatonë’, jai» panejamë?
37 Itsa apo-exanaenë taxa tane-itorobicuenia, nexata apopaxainaemë xua yabara panejumexaniataejitsiamë.
38 Itsiata, taxa tane-itorobicuenia exanaponaponajë. Apopajitsipae-atamë patanejumexaniataenexamë xua pacatsipaebatsi xanë, taxa Dioso yabara-ata, itsiata bepajumexaniataneme Dioso pesaëta ta-exanaejawanë, tsipaji bajaraxuanë pacayapëtaeya-exana xanë, taxa Diosobeje caenë patanaexanaejawabeje —jai Jesús judíowijawabelia.
39 Bajarapacuenia Jesús pejumaitsixae, judíowi icatsia jamatabëwaetabatsi, penaneconitsia-exanaenexatsi. Itsiata, wecuapanepa.
40 Pewecuapanepaecujinae, Jesús cawëa nawialia Jordán-mene itsapanabelia, itsajotalia copiaya Juan-pijinë jiwi bautizabaponapona. Bajarajotalia Jesús ponapona cae-epatoyowajëto.
41 Jiwi ayaibitsaëtoxaneto ponalia Jesús petaenexatsi. Nexata bajarapamonae jumaitsi:
—Juan-pijinë Dioso pesaëta pinijicuene apo-exanaponae-ata, itsiata daxita pacuenia tajëwelia wajunupaeba maponë yabaraje, xaniajai cajena —jai bajarapamonae Jesús yabara.
42 Nexata jane baja, bajarajota jiwi ayaibitsaëtoxaneto jumexaniatane Jesús Dioso athëbëwetsica pitorobinëcuenetsi.