Jesús itaxutoxanepanaeya-exana penaexanaejawawerenacujinae pitaxutotsëcënaenëmi
9
Jesús penajetarucaejawata namutua, taeyeta penaexanaejawaweliacujinae bitso pitaxutotsëcënaenë.
2 Nexata Jesús pijajiwi jumaitsitsi:
—Necujarubinë, ¿detsa meta xuajitsia maponëje pena pecototojawawerenacujinaeje, naexana bitso pitaxutotsëcënaenë? ¿Paxa tsaeta pibisiacuene pexanaeneconijamatabëcuene? Itsa jume, ¿pena-ata pexanaeneconijamatabëcuene? Itsa jume, ¿baja tsaeta bajaraponë pijacuata pibisiacuene pexanaeneconijamatabëcuene? —jaitsi Jesús pijajiwi.
3 Jesús nexata jumaitsi pijajiwijawabelia:
—¡Jume raja! Mara ponëje paxa, pena-ata, pibisiacuene pexanaeneconijamatabëcuene, apo-itaxutotsëcënae. Biji rajane, naexana bitso pitaxutotsëcënaenë Dioso penacuene-itajëtsinexa piacuenesaënëcuene daxitajiwijawabelia, pitaxutoxanepanaeya-exanaejawata.
4 Payapëtaneme rabaja mapacueneje. Matacabita xanepana wajanacuenebinexa. Itsa baja merawi, acuenebi wajanacuenebinexa. Bajarapijinia pitsicuene xainajë xanë-ata. Taponaponaematacabi xanepana tatonacuenebinexa Ponë nitorobica, tsipaji tanebeyaxuabicujinae, acuenebi tsane tatonacuenebinexa.
5 Abaxë paepatojebi ponaponaenajë mapanacuataje, daxitajiwi jamatabëcuene-itayotsianajë pexaniajailiwaisita, bajarapamonae peyapëtaenexa pacuenia cuene-itsi Dioso —jai Jesús pijajiwijawabelia.
6 Bajarapacuenia Jesús pejumaitsicujinae, irabelia suabaxuaba. Pionitota tsorobojawayo exana. Xuacujinae, bitso pitaxutotsëcënaenë itaxuto-exaba.
7 Nexata jumaitsi bajaraponëjawabelia:
—¡Ponare baja! ¡Naitaxutoquiaremelia pecueyetsipucayojawabelia, Siloéwënë pucayojawabelia! —jai Jesús. Bajarapamonae pijajumeta, «Siloé», itsa jai, «Pitorobinëtsitsica», pejaijume.
Nexata, bitso pitaxutotsëcënaenë lia baja. Naitaxutoquiatajopalia. Nawiarena jane baja, pitaxutoxanepanaenë.
8 Bajaraxuata, pamonae imoxoyo pe-enaewi, pamonae-ata taeyabiabatsi bajarapapitaxutotsëcënaenëmi yabara, nayanijoba.
—¿Matsa ponë palata amoneya pewajëcabiabecaenëmije? —najai.
9 Nexata itsamonae jumaitsi:
—Jãjã, bajaracowë ponë —jai.
Itsiata, itsamonae jumaitsi:
—Apoponë raja. Bajarasaya itsiata beponë —jai.
Nexata, pitaxutotsëcënaenëmi pijacuata jumaitsi:
—Jãjã, xanë rabaja —jai bajaraponë.
10 Nexata, bajarapamonae jumaitsi bajaraponëjawabelia:
—¿Detsa nexata baja pacuenia taneme? —jai.
11 Nexata, pitaxutotsëcënaenëmi jumaitsi:
—Ponë raja Jesús-wënënë, exana tsorobojawayo. Nitaxuto-exaba. Nexata nejumaitsi: «¡Liamëre Siloé pucayojawabelia! ¡Naitaxutoquiaremelia!», nejai. Nexata baja, lianë. Itsa naitaxutoquiatajë bajarapapucayota, taniji baja xaniawaetsia —jai.
12 Nexata bajarapamonae jumaitsi:
—¿Detsa jota bajaraponë ponapona? —jai.
Nexata, icatsia pitaxutotsëcënaenëmi jumaitsi:
—Apoyapëtaenë itsajota ponapona —jai.
Fariseowi yanijoba bitso pitaxutotsëcënaenëmijawabelia, penaneconitsinëcuenia
13 Bajarapacuenia peyanijobicujinaetsi, bajarapamonae pitaxutotsëcënaenëmi caponaliatsi fariseowijawabelia.
14 Pamatacabi Jesús exana tsorobojawayo, pitaxutoxanepanaeya-exanaenexa bitso pitaxutotsëcënaenëmi, bajarapamatacabi judíowi penacuera-ewetsimatacabi.
15 Nexata jane baja, fariseowi-ata yanijoba pitaxutotsëcënaenëmijawabelia.
—¿Detsa pacuenia nexata itaxutoxanepaname? —jai.
Nexata bajaraponë jumaitsi:
—Nitaxuto-exaba raja tsorobojawayota. Bajaraxuacujinae, tajacuata naitaxutoquiatajë tane-itorobicuenia. Nexata jane baja, aeconoxae xaniawaetsia taniji —jai pitaxutotsëcënaenëmi.
16 Nexata, itsamonae fariseowiyajuwënëwi najumaitsi:
—Ponë bajarapacuene exana, Dioso apopitorobinëtsi cajena, tsipaji apoyaiyatae penacuera-ewetsimatacabia —najai.
Itsiata, bajarapamonaeyajuwënëwi itsamonae najumaitsi:
—Itsa pibisiacuene pexanaenë tsipae, apocaëjëpae tsipaetsi bajarapitsipinijicuene pexanaenexa —najai itsamonae.
Bajarapacuenia daxita fariseowi aponajamatabëcuenejëpae.
17 Nexata, icatsia fariseowi yanijoba pitaxutotsëcënaenëmijawabelia.
—¿Detsa jane xamë bejamatabë-itsimë ponë caitaxutoxanepanaeya-exana yabara? —jai.
Nexata bajaraponë jumaitsi:
—BajaraPonë cajena Diosojumepaebinë, profetanë —jai.
18 Judíowi pewetsiwi cuene-aeba picani bajaraponë pitaxutotsëcënaecuenemi. Cuene-aebanua itsanë pitaxutoxanepanaeya-exanaejawatsi. Nexata, junata pitaxutotsëcënaenëmi paxa, pena yajawa, pepatsinexa bajarapamonaejawaberena.
19 Pepatsicujinaerena, bajarapamonae jane baja yanijoba pitaxutotsëcënaenëmi paxa, penabejejawabelia. Jumaitsi:
—¿Xaniajai? ¿Maponëje, pepacujiru panexënatobeje, penaexanaejawaweliacujinae bitso itaxutotsëcënaponapona? ¿Detsa pacuenia nexata aeconoxae baja tane? —jai judíowi pewetsiwi.
20 Nexata, pitaxutotsëcënaenëmi paxa, penabeje, jumaitsibeje:
—Mara ponëje pataxënatobeje. Payapëtanijibeje cajena, penaexanaejawaweliacujinaenua bitso pitaxutotsëcënaejawa.
21 Itsiata baitsi jane, aeconoxae apopayapëtaenëbeje pacuenia baja itaxutoxanepana. Apopayapëtaenëbejenua pajiwi-ata itaxutoxanepanaeya-exanatsi. ¡Bajaraponë payanijobare! ¡Penaweretsinë rabaja! Pijacuata pacatsipaebiana —jai paxa, penabeje, judíowi pewetsiwijawabelia.
22 Bajarapacuenia jumecanawiatabeje pecujunawixaebeje, judíowi pewetsiwi tsipaji baja cajena bajarapamonae najamatabëcuenejëpa, pewajënae-itawetsinexa pajiwi jumexaniatane Jesús, Cristonëcuene,b penajoneyaniwa judíowi pijasinagogabonëjawaberena.c
23 Bajarapacuenia peto-exanaeyaniwatsibeje, bajaraxuata bajarapajiwibeje jumaitsibeje: «¡Taxënatojawabelia payanijobare! ¡Penaweretsinë rabaja!», jaibeje.
24 Nexata, judíowi pewetsiwi icatsia junata pitaxutotsëcënaenëmi. Jumaitsi bajaraponëjawabelia:
—¡Panetsipaebare xaniawaetsia Dioso pitabarata! Paxanë baja cajena payapëtaniji Ponë caitaxutoxanepanaeya-exana, pibisiacuene pexanaenëcuene —jai Jesús yabara.
25 Nexata, pitaxutotsëcënaenëmi jumaitsi:
—Pibisiacuene meta pexanaenë. Xanë apoyapëtaenë. Itsiata baitsi jane, caejawa yapëtaniji, bajaraPonë tane-itaxutoxanepanaeya-exanaejawa, xanë ta-itaxutotsëcënaenëjawamiwecua —jai.
26 Nexata, icatsia judíowi pewetsiwi jumaitsi:
—¿Detsa pacuenia cato-exana netaenexa? —jai.
27 Nexata, pitaxutotsëcënaenëmi jumaitsi pewetsiwijawabelia:
—Pacatsipaebatsi rabaja picani xaniawaetsia. Itsiata, apopanejumexaniataemë. ¿Detsa xuajitsia pajitsipame patacatsipaebaponaenexa icatsia? ¿Paxamë-ata tsaja pajitsipame panejumexaniataenexa bajaraPonë, papijajiwimë panenaexanaenexa? —jai bajaraponë.
28 Nexata, judíowi pewetsiwi pebijataejawata, jumaitsi bajaraponëjawabelia:
—Xamë raeta baja cajena bajaraponë pijajiwitonëmë. Paxanë raja saicaya Moisés-pijinë petsipaebiliwaisi pajumecowënëtawanapajë.
29 Paxanë baja cajena payapëtaniji pepacuene Dioso pebarëcuaicuaijaijawatsi Moisés-pijinë. Itsiata baitsi jane, ponë cabarëcuaicuaijai, apopayapëtaenë itsawerena itorobatsi bajaraponë —jai judíowi.
30 Nexata, pitaxutotsëcënaenëmi jumaitsi judíowi pewetsijawabelia:
—Ayaicuenia jamatabëcuenenabenajacajë bajaraxua yabara. «BajaraPonë nitaxutoxanepanaeya-exanae-ata, itsiata, paxamë apopayapëtaemë itsawerena itorobatsi», panejamë —jai bajaraponë—.
31 Daxitatsi, yapëtanetsi baja cajena mapacueneje. Dioso baja cajena aponamuxuna-ewetsi pibisiacuene pexanaewi, bajaraPonëjawabelia wajëtsi-ata. Itsiata, pamonae Dioso pejitsipaecuenia yaiyataeya pejinawanapaewi, bajarapamonae baja cajena banamuxuna-eweta, itsa wajëtatsi.
32 mapanacua pexanaejawaweliacujinaeje, caeto-ata apowënëliwaisitaetsi itsajiwi-ata pecaëjëpaejiwitsi pitaxutoxanepanaeya-exanaenexa, penaexanaejawaweliacujinae bitso pitaxutotsëcënaenë.
33 Peneta, bajaraPonë itsa apopatsi tsipae Dioso pitorobixaetsi, nexata apocuenecaëjëpaetsi tsipae pexanaenexa Dioso pesaëta pinijicuene pexanaejawa, pacuenia neto-exana —jai pitaxutotsëcënaenëmi.
34 Nexata, judíowi pewetsiwi jumaitsi bajaraponëjawabelia:
—Xamë cajena nenaexanaejawaweliacujinae, pibisiacuene yajawanaexaname.d ¿Itsiata, caranata pibisiacuene nexanaenë jamatabëpanemuxujiobame? —jai pitaxutotsëcënaenëmijawabelia.
Bajarapacuenia judíowi pewetsiwi pejumaitsicujinaetsi, torotajarabaxuabatsi, pijasinagogabowecua, pecapitsapaenexa.
Pamonae aposiwanajamatabëcuenecopabi Dioso pexënatojawabelia, tsiteca bepitaxutotsëcënawanapaewi
35 Jesús wënëliwaisitane pitaxutoxanepanaeya-exanaenë judíowi petorobajarabijawatsi, pijasinagogabowecua pecapitsapaenexa. Nexata, itsa caxitajaraba pitaxutoxanepanaeya-exanaenë, Jesús jumaitsi bajaraponëjawabelia:
—¿Siwanajamatabëcuenecopatame tsabaja Dioso pexënatojawabelia? —nayabarajai Jesús.
36 Nexata bajaraponë jumaitsi:
—¿Detsa ponë Dioso pexënato, tasiwanajamatabëcuenecopatsinexa bajaraponëjawabelia? —jai.
37 Jesús nexata pijacuata nayabarajumaitsi:
—Ponë baja taneme. Ponë cabarëcuaicuaijai, bajaraPonë rabaja Dioso pexënato —nayabarajai Jesús.
38 Nexata, bajaraponë yaiyataeya pematabacabëta nuca Jesús pitabarata. Jumaitsi:
—Tajatuxanenë, casiwanajamatabëcuenecopatatsi baja cajena —jai.
39 Nexata, Jesús jumaitsi bajaraponëjawabelia:
—Xanë patajë mapanacuayabetsicaje tayapëtaeya-exanaenexa jiwi pijaneconi pexainaejawa. Nexata, pamonae pexaniajailiwaisi tatsipaebijawata natoyapëtaena bepitaxutotsëcënaejamatabëcuene pexainaejawa, bajarapamonae jamatabëcuene-itayotsianajë, xaniawaetsia penayajiwitaenexa. Pamonae pijinia jamatabëcuenenawëxaniabiaya natotane bepitaxutoxanepanaejamatabëcuene pexainaewi, yapëtaeya-exanaenajë bepitaxutotsëcënaejamatabëcuene pexainaejawa —jai Jesús.
40 Nexata, itsamonae fariseowi, bajarajota penanubenaewi, jumetane bajarapacuenia Jesús pejumaitsijawa. Nexata, bajarapamonae jumaitsi Jesús-jawabelia:
—¿Paxanë-ata tsabaja bepitaxutotsëcënaejamatabëcuene pataxainaewi tsawanapae? —jai.
41 Jesús nexata jumaitsi bajarapamonaejawabelia:
—Jãjã, bitso bepane-itaxutotsëcënaejamatabëcuene panexainaewi. Itsa pepacuene pane-itaxutotsëcënaejamatabëcuenewi tsipae Dioso pijacuene yabara, nexata apopananeconitsimë tsipae Diosojawabelia. Itsiata, paxamë pajumaitsimë tsabiabi paneyapëtaewicuenia: «Waxaitsi rabaja Dioso peliwaisi bepaneyapëtaewi», pajamë tsabiabi. Nexata, pibisiacuene itsa pa-exanabiabame, bitso pananeconitame Diosojawabelia —jai Jesús fariseowijawabelia.