परिसिल्कुनलेसीं आयमटु
12
1 अच्चोटेन अगा वेय्कुना मंदि जमा आसि, इरगा गर्दि आताहेंका वरोंक वरोर जारसेके मत्तुर. अस्के येसु मोट्टा मोदाला ओना सिस्युल्कुनतोनि इल्हा वळकालय दल्गतोर. “परिसिल्क डोंगिर्क आंदुर, ओरा कबाह्कगुडा पुल्लगा कियना पिंडिaलेहकेन मनंतां, अदुनहाटीं ओरागटाल उसारते मंटु. 2 मक्किस मत्तद पलाते अर्राका मन्नो. आनि मुच्चिसि मत्तद दिस्सका मन्नो. 3 अदुनहाटीं हीकटते वळकता पोल्लें वेलुगुने केंजमळ जर्गंता. आनि लोता लोप्पोटा अर्राते होंचि गुसागूसा वळकुता पोल्लें लोह्कुना पोर्रो एक्कीसि वेहमळ जर्गंता.”सिराप पेनदुके वेरियटु!
4 “इंचि नावा दंटातोरिटा, नना मीकु वेहानद बतल इत्ते, बोरय्ते मेंदुल्तुन हव्कंतुरो ओर्क मिमेट वेरियमट. ओर दानकन्ना एक्को बतल किया परुर. 5 मिमेट बोर्कु वेरियगोमो नना वेहांतन. मीकुन हव्कुतंका नरकमते वाटना हक्कु सिराप पेनदुके मंता, मिमेट दानके वेरियटु अचोने! नना वेहनद इदे.”
6 “हेय्युं कोळका पिट्टें रोंडु कोत्तांक अमुळ दांतांगदा. अयना अव्टेटाल उंदि पिट्टेतुन इंका पेन मति मर्गो. 7 इंका मीवा तल्लाता उंदि-उंदि केल्लुगुडा लेक्किस मंता. अदुनहाटीं वेरियमट! वेल्लेन कोळका पिट्टेंकन्ना मीकु बच्चोनो विल्वा मंता.”
येसुना पोर्रोल एतालय सिग्गु अरमट
8 “नना मीकु वेहांतन, बोर मनकल अय्ते नाकुन अंटोर मुन्ने एरपाट कींतन इंचि ओप्कुंतोरो, आ हरेक मनकन पेनदा दूताना मुन्ने मनकंक पुटतोन ननागुडा, ‘एरपाट कींतन’ इंचि ओप्कुंतन. 9 गानि बोरय्ते नाकुन अंटोर मुन्ने ‘एरपाट किय्योन’ इंचि इंतोरो, ओन नना इंका पेनदा दूताना मुन्ने ‘एरपाट किय्योन’ इंचि इंतन. 10 मनकना रूपमते पुटतोन नाकु विरोदमते वळकाना हरेक मनकन मापी कियमळ जर्गंता. गानि पवित्र आत्माता अपमानम कियानोंक मात्रम मापी हिल्ले.”
11-12 “मीकुन दर्मसास्त्रम कराहना लोह्कुने, राजालोरा मुन्ने इंका अदिकारिल्कुनगा पूसकियालय ओतास्के, अगा मिमेट बतल वळकुगोमो अद, पवित्र आत्मा मीकु अस्केन कराहंता. इंचि बतल वळकुकनो, बतल जवाब हीकानो इंचि रंदि कियमट.”
तेल्वि तक्को सिरमंत मनकल
13 आ मंदिताल बोरो वरोर मनकल येसुन, “गुरु, नावा दादाल नावा बाबाना अस्तिताल नाकु बतले हीसेक हिल्लोर, नावा पालूंक वायना आस्ति नाकु पंचि हीम इंचि निमे ओन्कु वेहा,” इंचि इत्तोर.
14 अस्के येसु ओन, “अरे दादा! मीवा आस्तीं पंचि हियालय नाकुन बोरन्ना ‘पेद्दा मनकल हिलाकोंटे न्यायम कियानोर’ इंचि इरतोरा?” इंचि पूसकीतोर. 15 पजा येसु ओरतोनि, “बेस जेगर्ता मंचि, अन्नि लालचकुनाल मीवद मिमेटे लक्कु मंटु! बारित्ते मनकना पिसवर वेल्लेन आस्ति मत्तेन बेस मनंता इंचि इन्कुन्मटु,” इंचि इत्तोर.
16 पजा येसु ओर्कु उंदि वेसुड वेहतोर: “वरोर वेल्लेन सिरमंत मनकल मत्तोर. उंदि मल्का बतल आता इत्ते, ओना नेदे इरगा पंटा पेय्स्ता. 17 अस्के ओर मनसुने ओनद ओरे, ‘पंटा अय्ते वेल्लेन पेय्स्ता. गानि दीन इर्रालय मात्रम जेगा हिल्ले, बतल कीकन?’ इन्कुत्तोर. 18 मर्रा विचारम कीसि, ‘सरे! नना नावा पडना जेगातुन कुल्हाचि पेद्दागा कींतन आनि पूरा पंटातुन आनि सामानतुन अव्टे वाटसि इर्रांतन. 19 पजा नना नावा जीवक, नीकु वेल्लेन वर्सांनदाका हालानाल रुसि आता गाटो दोसतन, तिन्नु, उन्नु आनि आनंदमते मन्नु, रंदि कियमा, इंचि वेहांतन,’ इंचि इत्तोर. 20 गािन पेन ओन, ‘अरे तेलिवि तक्को मनका, इय्याला नर्कळके नीवा जीवा होनानय्ते निमे संपादिस्तादंता बोन्क आयार?’ इंचि इत्ता. 21 बच्चोर पेद्दा सिरमंत मनकल अयना ओर पेनदा मुन्ने सिरमंतुड आयोर, बारित्ते ओर ओनाहाटींगें आस्ति जमा कींतोर इंचि. ई वेसोडते ई मनकना गति गुडा अल्हेन आता.”
रंदि किया मन्नि
22 पजा येसु ओना सिस्युल्कुंक इल्हा वेहालय दल्गतोर: “इंचि नना मीकु वेहनद बतल इत्ते, बतल तिंचि पिसकन इंचि मिमेट मीवा जीवाहाटीं रंदि कियमट. अल्हेने बतल केरकन इंचि मेंदुल्ता बारेमतेगुडा रंदि कियमट. 23 बारित्ते तिंडिकन्ना पिसवर मुक्येम आनि कपडींकन्ना मेंदुल मुक्येम. 24 आ काकाह्कुन हुळाट! अव बतल वाटों आनि बतल कोय्यों. अचोने आयका अवुनगा गुम्मिं इंका हिल्लें. अयना पेन अवुन पोस कीसंता. अदुनहाटीं मिमेट अय्ते आ पिट्टेंकन्ना बच्चोनो विलुवा मत्तोर आंदिर. 25 रंदि कीसि ओना आवसुन इंकुंदि गंटा एक्को बेरसागोटतोर मीवा नड्डुम बोरन्ना मंतोरा? हिल्लोर. 26 इसंटा सिन्ना-सिन्ना कबाह्के मिमेट किया परिर. अय्ते इंका मिगुल्ता कबाह्कुना बारेमते मिमेट रंदि बारि कींतिर?”
27 “आ पूतानहेके हुळाट, बल्हा बेरससंतांगों! अवु कबळ कियों आनि कपडीं इंका कुट्टों. अयना सुलेमान राजाल वेल्लेन सिरमंत मंचिगुडा ओना कपडीं आ पूतानाल उंदि पूतातच्चो गुडा सोकु मनाहिल्लें. 28 अय्ते इय्याला मंचि नाडी माडिसि होनना आ जाडिके पेन इच्चोन सिंगारम हींता, अय्ते मीकु तक्को कपडीं हींताना रो, तक्को विस्वासम लोकुरिटा? 29 अदुनहाटीं तिनुड बतल, उनुड बतल इंचेक मिमेट रंदि कियमट इंका अवुन दोर्किच्कुनाहाटीं गाबरगुडा आयमट. 30 दुनियातोर अंटोर लोकुल्क इवुनाहाटींगें वितलाडसेक मनांतुर. गानि इवुनद मीकु अवसरम मंता इंचि मीवा पेन बाबांकु एर्के मंता. 31 अदुनहाटीं मुन्ने मिमेट आ पेन बाबाना राज्येमतुन पह्काटु. अस्के दानतोनि मीकु इव अन्नि इंका दोर्कंतां.”
आस्ति-पास्तिनपोर्रो विस्वासम इरमट
32 “अरे नावा सिस्युल्कुनिटा, ‘मोमोट वेल्ले मंदि हिल्लोम’ इंचि वेरियमट. बारित्ते मीवा पेन बाबाल ओना राज्येमतुन मीकु हियालय वेल्लेन कुसिते तयार मंतोर. 33 अय्ते मिमेट मिहगा मत्ता आस्तिन अंता अम्मिसि गरिबोर्कुंक दान-दर्मम कीम्ट. आनि बस्केन पडन आयाकोंटा मनना कोत्ताना संचितुन दोर्किच्कुंट. इंका मिमेट मीवा दनमतुन स्वर्गमते जमा कीम्टb, अगा बोर दोंगल इंका वायोर आनि दानकु सेदेलगुडा पिय्यो. 34 बारित्ते मीवा दनम बगा मनांतानो, मीवा मनसुगुडा अग्गेन मनंता.”
बस्केळकु तयार मंटु
35-36 “मरमिना कुळपुने होंचि वायना मालकुन एदुर हूळसेके मनना सेवाकुल्कुनलेसीं कबळ कियालय बस्केळक नडि कट्टु दोहचि तयार मंटु. आनि मीवा वेडसिन इंका बस्केळक एल्गिच्चे इर्राट. अल्हा मत्ते बतल आंता इत्ते, मालक वासि तल्पुन तंता तन्मडे तल्पु तेंडालय अल्कगा मनंता. 37 मालक वातस्के एदुर हूळसेके तेल्विते मत्ता सेवाकुल्कु वेल्लेन आसिर्वादम दोर्कुतोर आंदुर. नना मीकु निजम वेहासेक मंतन, मालक वासि अंटोर सेवाकुल्कुन बेस उद्दा वेहांतोर आनि नडि कट्टु दोहकुंचि ओरे सेवाकुल्कुना सेवा कियालय तयार आंतोर. 38 मालक बस्के वायिना, इत्ते नडजाम नर्का आयि हिलाकोंटे नडजाम नर्का दाटसि होतंका आयि वातस्के, बोर सेवाकुल्क अय्ते तेल्विते मनांतुरो आ सेवाकुल्कु वेल्लेन आसिर्वादम दोर्कुतोर आंदुर. 39 गानि मिमेट उंदि पोल्ले बेस तेळियागोट्कुंटु. अद बतल इत्ते, दोंगल बद वेलाक वांतोर इंचि ओक्कला लोता मालकुंक मुन्नेन तेळियसि मत्ते ओर तेल्वितेन मनांतोर आनि आ दोंगन लोते होळिया हिय्योर. 40 इल्हेने मिमेट इन्कुनुवा वेलाके मनकंक पुटतोन नना वांतन. अदुनहाटीं मिमेटगुडा बेस तयारते मंटु.”
दोका हियोर असोंटा सेवाकुनलेह्का मंटु
41 अस्के पत्रु, “सामि, निमे ई वेसुडिं सिराप मावाहाटींगे वेहचंतिना, हिलाकोंटे अंटोर हाटींगा?” इंचि पूसकीतोर. 42 अस्के सामि इल्हा जवाब हीतोर: “केंजट, मालक मन्नोर अस्के ओनगा कबळ कियानोर्कुंक वेलापोर्रो गाटो-जावा दोसालय, वरोर बेस तेल्वि मत्तोड आनि विस्वासम इर्रानालायक सेवक मालाकुंक गावाले. अय्ते असोंटा सेवक बोर मंतोर? 43 बोर सेवक अय्ते, मालक मल्सि वातस्के वेहता कबळ बरोबर कीसेक मनांतोर, ओरे सेवक बेस आसिर्वादम दोर्कुतोर आंद. 44 नना मीकु वेहना निजम बतल इत्ते, मालक सिराप आ सेवाकुन दिवांजि इंचि आयो गानि ओना पूरा आस्ति-पास्तिन पोर्रो अदिकारि इंचि इर्रांतोर. 45 गानि उंदि वेला आ सेवकुडु, ‘नावा मालक वायालय अय्ते इंका वेल्लेन आल्सेम मंता,’ इंचि कडमता मुरतळ आनि मांड्सा सेवाकुल्कुन तन्नुड-गुद्दुड कियमळ, इरगा तिंचि-उंचि बदमासीं कियमळ सुरु कीतोर इन्कुन! 46 आ सेवकुना मालक इसोंटा वेलाते वायानुर गदा, आ वेलाता बारेमते आ सेवक विचारमगुडा किय्योर. वासि मालक आ सेवाकुंक पेद्दे सिक्सा हींतोर, पज्जो ओन ओर बोर्क अय्ते सिक्सा आयानद मंता असंटा लोकुल्क मनना जेगाते लोहचींतोर.”
47 “बा सेवक अय्ते, ओना मालाकुंक बतल गावालेनो तेळियसिगुडा, मालक वेहताप केंजाकोंटा, कियाकोंटा मनांतोर, आ सेवक मात्रम वेल्लेन देब्बा तिंतोर. 48 गानि तेळियका बदो कबळ कीसि देब्बाना पाल आता सेवाकुंक मात्रम तक्को देब्बां आंतां. पेन बोर्कु अय्ते बेसता कबळ कियनाहाटीं वेल्लेन गुनम हीता ओराहेकटाल वेल्लेन लेक्का तल्कंता. आनि बोन्क अय्ते एक्को अप्पाजेप्ता, ओनहेकटाल अप्पाजेप्ता दानकन्ना एक्कोने तल्कंता.”
येसुना पोल्ले पीसि ताकानोर्क तकलिप वांता
49 “नना ई बूमिते लोकुल्कुनपोर्रो तडमितसोंटा न्यायम कियालय वातन. अद इंदकेन अंटुकुंचि मत्ते बच्चोनो बेस आयवड इंचि इन्कुत्तन. 50 गानि नाकु उंदि कस्टाल्कुना बापतिस्माc एतानद मंता, अद एतनदाका नाकु तिप्पल्क तप्पों. 51 नना बूमिपोर्रो अंटोर्कुंक सांति हियालय वातन इंचि मिमेट इन्कुंचंतिरा? हिल्ले. नना अदुनहाटीं वाया हिल्लेन. गानि मीकुन वेरे-वेरे कियालय वातन इंचि नना मीकु वेहासेक मंतन. 52 इंदकेटाल बदन्ना उंदि लोते हेय्युर मत्ते, ओरद ओर्के अर्राका इव्वुर उंदि पक्काक आनि मुव्वुर इंकुंदि पक्काक आसि वेरे आंतुर. 53 बाबोनद मर्रिंकु-मर्रिनद बाबोंक, तल्लुनद मिय्याळकु-मिय्याटद तल्लुंक, पोराटद कोडियळकु-कोडियटद पोरळकु, इल्हा वरोनद वरोंक अर्राकोंटा आंता.”
वेलातुन एरपाट कियमळ
54 पजा ओर अगा मंदिकु इल्हा वेहालय दल्गतोर. “पोडदु अर्रनहेके मब्बु आते दान हूळसि मिमेट बिराना, ‘अद हूळाट, पिर्रु वासेक मंता,’ इंचि वेह्कुंतिर. आनि अल्हेन आंता गुडा! 55 इंका होव्वोर वळि वायनद हूळसि, ‘इंदके गर्मी अर्रंता’ इंचि इंतिर आनि अल्हे आंता. 56 अरे डोंगि लोकुरिटा, मिमेट बूमि आनि मब्बुन हूळसि गिल्हा-गिल्हा आयानद मंता इंचि एरपाट किया परांतिर. गानि इंदके बतल जर्गसंता इदुन मिमेट बारि एरपाट किया परसाहिल्लिर?”
पगातोनतोनि बेस कलियसि मनना
57 “असल बेस न्यायम बद आंद, अद मीवद मिमेटे बारि निर्नायम किया परसाहिल्लिर? 58 निमे नीवा पगातोनतोनि कलियसि कोरटते पेद्दा सायाबुनगा होननेंके हरदेन ओनतोनि मंचि-पोल्ले आसि बेस संबंदम कल्पुकुन. अल्हा कियाकोंटे नीकुन नीवा पगातोर कोरटते पेद्दा सायाबुंक अप्पाजेपानुर. आ पेद्दा सायाब नीकुन पोलिसुल्कुंक अप्पाजेप्पानुर आनि पोलिसुल्क ओसि नीकुन जेलने वाटानुर. 59 नना मीकु निजम वेहांतन, उंदि सिन्ने कोत्ता हिलाकोंटा पूरा बाकि दोहनदाका निमे जेलनाल पेय्सिन,” इंचि वेहतोर.