गुळि नासडेम आसि आनि दुनिया मुंडगिसि होनना कबुह्कु
(मरकुस १३:१-३७; लूका १७:२६-३६; २१:५-३३)
24
1 येसु गुळिताल पलाते पेय्सि होननेंके,
ओना सिस्युल्क ओन्कु गुळिता बंगलां “बच्चोन बेस मंतां,”
अदुन हुपिस्तुर.
2 गानि येसु ओर्कुन,
“इव सवरगा नितिस मनना बंगलन मिमेट हूळसंतिर गदा?
नना निजम वेहंतन,
इव बंडापोर्रो बंडा आगसि मन्नों.
इव उंदुंदि बंडा हिडु रालसि दांतां,”
इंचि इत्तोर.
3 आयंका येसु जय्तुन मराकुना गुट्टापोर्रो एक्किस उदिस मत्तोर.
अस्के ओना सिस्युल्क ओनागा ओंटिगा होंचि,
“गुरु,
इवन्नि गटनां बस्के जरगंतां?
इंका निमे वायना वेला आनि दुनिया मुंळगना आकिर वेला बस्के आंता?
इवन्नि मोमोट बव गटनना पोर्रोटाल एरपाट कीकोम?”
इंचि येसुन पूसकीतुर.
4 अस्के येसु ओर्कु इल्हा वेहालय दल्गुतोर.
“मिमेट पसांचमटु,
उसारते मंटु.
5 नावा पोर्रोल एतसेके बच्चुरो लोकुल्क इगे वांतुर आनि ‘ननाने किरिस्तुन आंदुन’ इंचि वेल्लेटोर्कुन पसांचंनुर.
6 मिमेट लडाईं आनि लडाईना आबद्दम पोल्लें केंजसि वेरियमट,
अल्हा अय्ते आयानुंगे.
गानि दुनियाता आकिर वेला इंदकेने दग्गेरे वाया हिल्ले.
7 देसेमपोर्रो देसेम,
राज्येम पोर्रो राज्येम लडाईं आयनुं,
वेरे-वेरे जेगाते बूकंपाल्कु आनि कर्वु अर्रानु.
8 गानि इल्हा आयमळ इत्ते एर पूरालय नोप्पिं सुरु आताप आंद.”
9 मिमेट नाकुन नम्मितिर इंचि लोकुल्क मीकुन तकलिप कियनाहाटीं अदिकारिल्कुंक अप्पाजेप्पांतुर,
अस्के ओर मीकुन हव्कंतुर आनि इंका मीकुन बोरे हय्सुर.
10 आ वेलाते बच्चटुरो विस्वासम कियानोर ओरा विस्वासम होळसंतुर.
वरोंक-वरोर पगां आसि वरोंक-वरोर हयसाकोंटा आंतुर.
11 बच्चटुरो डोंगि कबुरतोर “पेनदा कबुरतोर्कुम” इंचेके वांतुर,
लोकुल्कुंक सेड्डा हर्रि हुप्चंतुर.
12 पापाल्क एक्को आसि वेल्ले मंदिता पावरम इंका तक्को आसेक दांता.
13 गानि बोराय्ते आकिरदाका पेनदापोर्रो विस्वासमते मनंतोरो,
ओनके मुक्ति दोर्कार.
14 पूरा दुनियाते पेनदा बेसता कबुर तेळियसि,
इद दुनियाता लोकुल्कुन लोप्पो उंदि गवाइ आसि मनंता.
अस्केने दुनियाता आकिर आयार.
15 दीना अर्तम बतल आंद हद्वानोर एरपाट कीकुंटु.
पजा येसु इल्हा वळकालय दल्गुतोर.
“दानहाटीं दानिएल पोर्रोलता पेनदा कबुरतोर वेहताप,
नासडेम कियना उंदि वस्तु गुळि लोप्पो पवित्र जेगाते नितिस मत्तद मिमेट हूळकिर.
16 अस्के यहुदिया एरियाते मत्तोर गुट्टन पोर्रो वितमड गावाले,
17 लोतापोर्रो मत्तोर बतलन्ना तायालय लोता लोप्पो होळिया मन्नि,
18 नेलिने कबळ कीसेक मत्तोर कपडीं तायलासिंक मल्सि पज्जो तिरिया मन्नि.”
19 आ वेलाते पीटे मत्तव आनि सिन्ना पिलाल्क मत्ता तल्लुह्कुंक वेल्लेन तकलिप आंता.
20 पीनि कालम आनि नोमकेम रोजुने वित्तना वेला वायामन्नि,
इंचि मिमेट पारतना कीम्टु.
21 बारित्ते अस्के इल्हा तकलिब वायार गदा,
दुनिया पुटतागटाल इदवेरादाका दाका असोंटा तकलिब बसकेन वाया हिल्ले.
आनि मुन्ने इंका बसकेन वायो.
22 पेन अव रोजकुन तक्को कियाना विचारम कियाकुंटे,
बोरे पिस्सुर.
गानि पेनु पेर्कुत्ता लोकुल्कुनाहाटीं कोन्नि रोजकुन तक्को कींता.
23 अद वेलाते बोरन्ना मीकुन किरिस्तु इगे मंतोर,
अगा मंतोर इनानय्ते,
मिमेट ओरा पोल्लेन नम्मुमट.
24 बारित्ते अस्केळकु बच्चुटुरो डोंगि किरिस्तुल्कु आनि डोंगि कबुरतोर पुट्टानुर,
आनि पेन पेर्कुत्ता लोकुल्कुंक पेद्दा-पेद्दा चिन्हां आनि इचंत्रम आयना कबाह्क कीसि हुप्सानुर,
आनि कुदुरते मीकुन पसांचना कोसिस कियानुर.
25 हुळाट!
नना अय्ते इव पोल्लें मीकु मुन्नेने वेहचीतन.
26 दानहाटीं “किरिस्तु केडाते मंतोर” इंचि मीकु बोरन्ना वेहानय्ते,
मिमेट अगा होनमट.
इंका “किरिस्तु लोप्पोटा अर्राते मंतोर” इंचि मीकु वेहानय्ते मिमेट ओना पोर्रो विस्वासम इर्रमट.
27 बारित्ते बल्हा अय्ते पोड्दु पेसनाहेके मेरस्ते पोड्दु अर्रानगाह्क दिसंता,
अल्हेने मनकंक पुटतोन नना वायनस्के इंका आयार.
28 अल्हेने गद्दल्कु रेय्यानद हूळसि बगानो पीनगु मंता इत्ता संगति अंटोर्क तेळियंता.
इंचि नना वेहासेक मंतन.
29 आ रोजकुने तकलिपकु आतारित्तेने,
पोड्दुंक हीकट मुच्चका वायार,
वेडसि वेलगु हिय्यो,
मब्बुनाल सुक्कां हिडु अरानुंग,
मब्बुने मनना अन्नि सक्तिं अदिलसि बलम हिलाकोंटा आयानुं.a
30 आ वेलाते मनकंक पुटतोन नना वायना चिन्ह मब्बुने दिस्सार,
अस्के दुनियाता अन्नि जातिना लोकुल्क वेल्ले दुक्कम कियानुर.
मनकंक पुटतोन नना पेद्दा महिमा आनि ताकततोनि मब्बुन पोर्रो उदिस वायानेंके अंटोर लोकुल्क हुळानुर.
31 अस्के तूताकोम जोरसे उह्कीसि,
ओर ओना दूतन बूमिपोर्रो लोहानुर.
आ दूतां बूमिपोर्रो नालूं मूलानाल,
मब्बुना ई कोस्साताल आ कोस्सादाका पेन पेर्कुत्ता लोकुल्कुन जमा कींतां.
32 उंदि अंजिर मरातदे पोल्ले पीकुंटु.
अंजिर मराता कोम्मांक इग्गुर बस्के अय्ते वांता अस्के एद्दि कालम एवता इंचि मिमेट एरपाट कींतिर.
33 अल्हेने इव अन्नि गटनां जर्गनद हूळसि,
अद वेला इंका दग्गेरे,
इत्ते बिल्कुल तल्पुनगाहकु वाता इंचि इनकुंटु.
34 नना मीकु निजम वेहासेक मंतन,
ई पीळितोर पिस्सि मनानेंकेन इवन्नि गटनां जर्गंतां.
35 बूमि,
मब्बु नासडेम आसि होनानुंग गानि नावा पोल्लें बस्केने मायसि होन्नों.
36 अद रोजु,
आ गळिया बारेमते बोनके तेळियो,
पेनदा दूतांक इंका तेळियो,
कुद मनकना रूपमते पुटतोन नाकु इंका तेळियो,
सिराप स्वर्गमते मनना बाबांके एरपाट.
37 नोहानस्के बल्हा आतानो,
मनकंक पुटतोन नना वायानस्के इंका अल्हे आयार.
38 कम्मुड वासि नोहाल डोंगाते एक्कना दाका लोकुल्क तिंचेक-उंचेक मरमिंग कीसेक,
कीसि हिसेक मतुर.
39 आनि कम्मुड वासि ओर्कुन तंचि ओयनालजेम ओर्कु तेळिया हिल्ले.
अल्हेन मनकंक पुटतोन नना वायननाड इंका आयार.
40 आ वेलाते नेदे कबळ किसेक इव्वुर मन्कालोर मनानय्ते अव्टेटाल वरोन होळसिसि,
वरोन तेहाकुंचि ओंतोर.
41 जोत्ता नोरसेक मत्ता रोंडु मुर्ताह्कुनाल उंदितुन होळसियानुर,
उंदितुन तेहाकुंचि ओयनुर.
42 बा रोजु मीवा सामि वायानुर अद मीकु एरपाट हिल्ले,
दानहाटीं मिमेट उसारते मंटु.
43 मिमेट इद मति इर्राट गदा,
लोता मनकंकु दोंगल वायना वेला एरपाट मत्ते ओर तेल्विते मनांतोर आनि दोंगन दोंगा किया हिय्योर.
44 अदुनहाटीं मिमेट इंका उसारते मंटु.
मिमेट विचारम इंका किया पर्रीट असोंटा वेलाते मनकंक पुटतोन नना वांतन.
तेल्वि मत्ता सेवक बोर?
(लूका १२:४१-४८)
45 लोता मालक बोन अय्ते ओना जीतागाह्कुन पोर्रो अदिकारम हीसि वेला परकारम गाटो दोस्सालय इरतोर,
ओरे उसार आनि इमानदार सेवक आंदुर.
46 मालक वातस्के ओन्कु वेहता कबाह्कुन कीसेक मनना सेवकुंके आसिर्वादम दोर्कंता.
47 नना मीकु निजम वेहासेक मंतन,
मालक आ सेवाकुन ओना सम्सारमपोर्रो अदिकारि इंचि इर्रांतोर.
48 गानि मालक कबळ पोर्रो इरता सेवक दुस्टुड आयानय्ते ओना मनसुने “नावा मालक वायलय आलसेम मंता” इनकुंचि,
49 ओना दंटाता सेवाकुल्कुन तंचेक-गुदसेक आनि उनानोरतोनि उंचेक-तिंचेक मनांतोर.
50 अस्के आ सेवक एदुर हूळवा रोजु आनि ओन्कु एरपाट हिलवा गळियाते मालक वायानुर.
51 आनि वासि ओन्कु पेद्दा सिक्सा हीसि,
ओन पापी लोकुल्कुने कल्पानुर.
अगा सिराप अळमड आनि पल्कु कोर्कसेक मनांतुर.