पदि लेय्यना वेसुड
25
1 येसु मर्रा उंदि वेसुड वेहालय सुरु कीतोर.
ओर इत्तोर,
“स्वर्ग राज्येम बारेमते नना उंदि वेसुड वेहंतन केंजट.
पदि लेय्यां कंदिलिं पीसि वरोर मरमिंना पेडांक कलियालय होत्तां.
2 अवनगटाल हेय्युं तेल्वि हिल्वव मत्तां,
हेय्युं बारे तेल्वितव मत्तां.
3 तेल्वि हिल्वा लेय्यां कंदिलिं पीसि अय्ते होत्तां,
गानि अवुनातोनि निय ओया हिल्लें.
4 तेल्विता लेय्यां बारे कंदिलिनतोनि डब्बाने निय इंका पीसि होत्तां.
5 मरमिंना पेडल वायालय आलसेम आताहेंके,
अव निद्र वासि मींडतां.”
6 नड्डुम नर्का,
“मरमिंना पेडल वासेक मंतोर,
ओन्कु कलियालय दट,”
इंचि लोल्लि केंजा वाता.
7 अस्केने अव पदि लेय्यां बिराना तेदसि,
कंदिलिं तयार कीतां.
8 तेल्वि हिल्वा लेय्यां,
तेल्विता लेय्यान इत्तां,
“आन हो,
मीहगटा निय इच्चुर माकु हीम्टु,
मावा कंदिलिं पिर्रालय आतां,”
इंचि इत्तां.
9 गानि तेल्वितां इत्तां,
“अयो देवा!
इद निय बोनकु इंचि बोनकु हालंता,
हो?
इत्ते माकु इंका हालो,
मीकु इंका हालो,
अल्हा आयो गानि,
मिमेट दुकानमते होंचि मीवाहाटीं निय अस्सी तटु,”
इंचि इत्तां.
10 अव निय अस्सालय दुकानमते होत्तां,
अस्के मरमिंन पेडल एवतोर.
तयारते मत्तव लेय्यां मरमिंन पेडनतोनि मरमिंकु होत्तां,
पज्जो तल्पु वाटसितुर.
11 गडसेम मत्तारित्ते,
दुकानमते होत्ताव हेय्युं तेल्वि हिल्वा लेय्यां मरमिंन लोन वासि केयालय दल्गतां,
“दादा-दादा मोमोट वातोम,
तल्पु तेंडाटु!”
12 अस्के मरमिंन पेडल लोप्पोटाल अवुन,
“मिमेट बोर आंदिर?
नना निजम वेहचंतन,
मीकुन बिल्कुल एरपाट किय्योन,”
इंचि इत्तोर.
13 पज्जो येसु सिस्युल्कुन,
“मनकंक पुटतोन ननावायानद गुडा इल्हेने मंता.
अद रोजुन आनि वेलातुन मिमेट बिल्कुल एरपाट कियिर.
दानहाटीं मिमेट उसारते मंटु,”
इंचि इत्तोर.
मुव्वुर सेवकुल्कुना वेसुड
(लूका १९:११-२७)
14 पजा येसु इंकुंदि वेसुड वेहालय सुरुव कीतोर.
ओर इत्तोर,
स्वर्ग राज्येम बारेमते इंकुंदि वेसुड वेहंतन केंजट.
वरोर दंदा कियना मनकल मत्तोर.
ओर पयनेम होनाका मुन्ने ओना जितागाह्कुन केयसि ओनागा मत्ता दनम ओर्कु अपाजेपतोर.
15 ओर वरोंक बंगारमता कल्दार्क निंडिस मत्ता हेय्युं मुल्लें हीतोर.
आनि वरोंक बारे रोंडु मुल्लें हीतोर.
आनि इंका वरोंक बारे उंदि मुल्ले हीतोर.
इल्हा ओरा उसारतनम हूळसि हीतोर.
अस्के ओर पयनेम होत्तोर.
16 बोनकु अय्ते हेय्युं मुल्लें दोर्कतंगो ओर बिराने अव कोत्तन दंदाते दोस्सि,
इंका हेय्युं मुल्लेना कल्दार्क संपलिचतोर.
17 अल्हेने रोंडु मुल्लें दोर्कतोर इंका दंदा कीसि,
रोंडु मुल्लें एक्को संपलिचतोर.
18 गानि उंदि मुल्ले दोर्कतोर बारे आ मुल्लेतुन ओसि पोक्का तवसि गोरी दोसतोर.
19 वेल्लेन रोजकु आतारित्ते मालक मल्सि वासि,
ओर हीता दनमता हिसाब हूळतोर.
20 अस्के बोनकु हेय्युं मुल्लें दोर्किस मत्तां,
ओर इंका एक्को हेय्युं मुल्लें तच्चि,
“मालक,
निमे नाकु बंगारि कल्दार्कुना हेय्युं मुल्लें हीसि मत्तिन.
हूळा,
अव कोत्तना दंदा कीसि,
इंका एक्को हेय्युं मुल्लें संपालिचतन,”
इंचि इत्तोर.
21 अस्के मालक कूस आसि,
“वा रे वा,
निमे बेस बरोसाता सेवाकुन आंदिन.
इच्चोटा पोल्लेतगा निमे बरोसातोन मंतिन,
दानहेंके नना नीकु वेल्लेटुर पोर्रो अदिकार हींतन.
लोप्पो नीवा मालकुनतोनि कूळसि कुसिते मन,”
इंचि इत्तोर.
22 मर्रा बोनकु अय्ते रोंडु मुल्लें दोर्किस मत्तां,
ओर इंका मालकनगा वासि,
“मालक,
निमे नाकु कल्दार्कुना रोंडु मुल्लें हीसि मत्तिन.
हूळा,
अव कोत्तना दंदा कीतन,
इंका एक्को रोंडु मुल्लें संपालिचतन,”
इत्तोर.
23 आ सेवाकुन इंका मालक कूस आसि,
“वा रे वा,
निमे बेस बरोसाता सेवाकुन आंदिन.
इच्चोटा पोल्लेतगा निमे बरोसातोन मंतिन,
दानहेंके नना नीकु वेल्लेटुर पोर्रो अदिकार हींतन.
निमे लोप्पो होंचि मालकुनतोनि कूळसि कुसिते मन,”
इत्तोर.
24 पज्जो उंदि मुल्ले दोर्कुतोर मालकुना दग्गेरे वासि,
“मालक,
निमे दया-माया हिल्वोन आंदिन,
निमे वीतवगा कोयंतिन,
सल्लुवगा जमा कींतिन इंचि नाकु एरपाट.
25 दानहाटीं नना वेरियसि निमे हीता मुल्लेतुन ओसि गोरी दोसतन.
इदे,
नीवा मुल्ले नीकु वापस हीसंतन” इंचि इत्तोर.
26 अस्के मालक ओन,
“निमे दुस्ट आनि लंडु मनकन आंदिन.
नना वीतवगा कोयानोन,
सल्लुवगा जमा कियानोन इंचि नीकु एरपाटे मत्ता.
27 अय्ते निमे नावा दनमतुन बोर्कन्ना वड्डिक हिय्या मत्तिन.
नना मल्सि वातरित्ते नावा दनम इंका नाकु दोर्कवड,
आनि दाना वड्डि इंका दोर्कवड,”
इत्तोर.
28 अल्हा इंचि मालक ओना जीतागाह्कुन केयसि,
“मिमेट ईनागटा कल्दार्कुना मुल्ले वापस एतट,
आनि पदि मुल्लें मत्तोनगा हीसींटु.
29 बारित्ते बोराय्ते ओन्कु हीता दनमतुन अस्सल कबळते दोसतोर,
ओन्कु नना इंका हींतन.
बच्चोर अय्ते ओन्कु गरज मंता,
दानकन्ना एक्को दोर्कंता.
गानि बोरय्ते ओन्कु हीता दनमतुन बेसता कबळते दोस्सोर,
ओनागा इच्चुर मनना गानि नना वापस एतांतन.
30 अय्ते ई कबळक ओज्जुवोन पलाते हीकटते पोहचीम्ट.
अगा मननोर अळसेके,
वरगेयसेके,
किटुर-किटुर पल्कु कोर्कसेक मनांतुर,”
इंचि मालक वेहतोर.
आकिरता न्यायम
31 मर्रा येसु इल्हा वळकालय दल्गुतोर.
बस्के अय्ते मनकंक पुटतोन नना नावा महिमाते राजानलेह्का अन्नि दूतनतोनि वांतन,
अस्के नावा अदिकारमते राजगद्देपोर्रो उद्दांतन.
32 पजा नावा मुन्ने अन्नि जातिनोर जमा आयनुर.
अस्के गोल्लल बल्हा एडूं गोर्रें वेरे कींतोर,
अल्हेने लोकुल्कुन नना वरोनगाटाल वरोन वेरे कींतन.
33 अल्हा कीसि नना गोर्रेन बारे तिना बाजुंक आनि एटीन बारे डेमा बाजुंक कींतन.
34 अस्के राजाल तिना बाजुनोर्कुन इनानुर,
“वटु,
ना बाबाना आसिर्वादम मीकु दोर्कुता,
मीवाहाटीं दुनिया पुटतस्केटाले राज्येम तयार कीसि मंता,
दान एतट.
35 इद राज्येम मीवादे आंदु,
बारित्ते नना कर्वुने मत्तन,
अस्के नाकु मिमेट तिनालय हीतिर,
आनि नाकु दूपातस्के उनालय एर हीतिर.
नना मीकु एरपाट हिलाकुना गानि मीवा लोहकुने मनालय जेगा हीतिर.
36 आनि नाकु केर्रालय कपडीं हिल्वस्के मिमेट नाकु कपडीं हीतिर,
नना बिमारते मत्तस्के मिमेट नावा सेवा कीतिर.
नना जेलने मत्तस्के मिमेट नाकु कलियालय वातिर.”
37 अस्के तिना बाजुंक मत्ता सत्तेमंतुल्क ओन इनानुर,
“राजा,
नीकु कर्वेस्तद हूळसि बस्के तिनालय हीतोम?
आनि नीकु दूपातद हूळसि बस्के एर उनालय हीतोम?
38 निमे एरपाट हिलाकुना गानि बस्के नीकुन लोन ओसि मनालय जेगा हीतोम?
नीकु कपडीं हिलवद हूळसि बस्के कपडीं केर्रालय हीतोम?
39 आनि निमे बिमार मत्तस्के आनि जेलते मत्तस्के बस्के मोमोट नीकु कलियालय वातोम?”
इंचि ओर इनानुर.
40 अस्के राजाल ओर्कुन,
“नना मीकु निजम वेहासेक मंतन,
इगे मत्ता नावा कदर हिलुवा तम्मुह्क-दादालोरा लोप्पोटाल बोनकु वरोंकन्ना बतल कियिना,
नाकु कीतापे,”
इंचि ओर्कुन इनानुर.
41 पज्जो ओना डेमा बाजुंक मत्तोर्कुन,
“सापनेमते मनानोरिटा,
नहागटाल पेय्सि होंट.
देय्याल्कुना मुक्यानाहाटीं आनि अवुना दूतनहाटीं तयार कीता बस्केने पिर्रुवा तडमिते होंचि अर्राट.
42 बारित्ते नना कर्वुने मत्तस्के,
नाकु तिनालय तिंडि हिय्या हिल्लिर.
आनि नाकु दूपातस्के उनालय एर हिय्या हिल्लिर.
43 आनि नना एरपाट हिलवोन लेह्का मत्तस्के नाकु मीवा लोहकुने जेगा हिय्या हिल्लिर.
आनि नाकु कपडीं हिल्वस्के मिमेट केर्रालय कपडीं हिय्या हिल्लिर,
नना बिमार मत्तस्के आनि जेलने मत्तस्के मिमेट नाकु कलियालय इंका वाया हिल्लिर,
दानहाटीं इदे मीवा सिक्सा आंद,”
इंचि राजाल इनानुर.
44 अस्के ओर,
“राजा,
नीकुन मोमोट बस्के कर्वेस्सि मत्तस्के,
दूपातस्के,
एरपाट कियवस्के,
कपडीं हिल्वस्के,
बिमार मत्तस्के आनि जेलने मत्तस्के हूळसि सेवा किया हिल्लोम?”
इंचि इनानुर.
45 अस्के राजाल ओर्कुन,
“नना मीकु निजम वेहासेक मंतन,
इगे मत्ता नावा कदर हिलुवा तम्मुह्क-दादालोरा लोप्पोटाल बोन वरोन इंका बेस हूळाकोंटे,
अस्के नाकुन इंका बेस हूळवापे!”
इंचि इनानुर.
46 पजा “ई सेड्डा लोकुल्कुंक मारवा सिक्सा आंता.
आनि सत्तेमंतुल्कुंक बारे बस्केळक पिस्सना पिसवर दोर्कंता,”
इंचि येसु इत्तोर.