यहुदि पेद्दाल्क येसुन हव्कालय उपायम कियमळ
(मरकुस १४:१-२; लूका २२:१-२; योहान ११:४५-५३)
26
1-2 इव अन्नि पोल्लें वेहमळ आतारित्ते येसु सिस्युल्कुन,
“नाडी आयो मन्ने पस्के पंडुगु aमंता इंचि मीकु एरपाटे.
अस्के पुटतोन नाकुन क्रुसुनपोर्रो मोल्लां कोह्कालय,
पगातोरा कयदे पीसि हियमळ जर्गंता,”
इंचि इत्तोर.
3 अस्के अदे वेलाते कयपा इनना पेद्दा पेर्माना मिद्देते,
पेद्दा पेर्मालोर आनि यहुदिरा पेद्दाल्क जमा आतुर.
4 ओर मीटिंगते येसुन सप्पुड दाका पीसि हव्ककोम,
इंचि उपायम कीतुर.
5 गानि “पंडुगुने इल्हा किया मन्नि,
बोरन्ना लोकुल्क लोल्लि कियनुर,”
इंचि विचारम कीतुर.
उंदि मुरतळ येसुनपोर्रो अत्तर निय वळियता
(मरकुस १४:३-११; लूका २२:३-६; योहान १२:१-८)
6 पजा येसु बेतानि इनना नाटे होंचि,
कुस्टरोगम आसि मत्ता सिमोनिना लोन आगतोर.
7 अस्के उंदि मुरतळ वेल्ले दराता अत्तर निय उंदि गुर्गिते पीसि येसुनगा वाता.
पजा ओर गाटो तिनालय उदिस मत्तोर.
अस्के अद मुरतळ आ नियदुन ओना तल्ला पोर्रोटाल वळियता.
8 इदुन हूळसि अगा मत्ता सिस्युल्कुंक होंग वासि इत्तुर गदा,
“ई अत्तर नियदुन वट्टिदे बारि पोचीतिन?
9 इद अत्तर निय वेल्ले दराते अम्मिसि अव कोत्तां गरिब-सरिबतोर्कुंक हिया वायवड गदा!”
इंचि इत्तुर.
10 येसु ओर वळकानदुन एरपाट कीसि,
“दान बारिंक तकलिप कीसेक मंतिर?
अद नावाहाटीं बेसता कबळे कीता.
11 गरिब-सरिबतोर अय्ते बस्केळक मिहगा मनांतुर,
गानि नना बस्केळक मिहगा मनानोन आयोन.
12 नावा हामुर एव्ता इंचि नावा मेंदुल्क अत्तर निय होकताप,
अद इल्हा कीता.b
13 हीके केंजट नना निजम वेहचंतन,
ई दुनियाते,
बगा-बगा पेनदा बेसता कबुर वेहमळ जर्गंता,
अगा-अगा इद कीता कबळतुन मति कियानुर,”
इंचि ओर्कुन इत्तोर.
14 पज्जो बतल आता इत्ते,
पन्नेंडु सिस्युल्कुना लोप्पो वरोर इस्कारियोत नाटेना यहुदाल मत्तोर.
ओर पेद्दा पेर्मालोर्कुनगा होंचि,
15 “नना येसुन मीवा कयदे पीसि हीते,
नाकु मिमेट बतल हींतिर?”
इंचि इत्तोर.
अस्के ओर ओन्कु मुप्पै एंडि कल्दार्क लेक्किस हीतुर.
16 अस्केटाल यहुदाल,
येसुन पीसि हियालय पोंचादोस्सेक मत्तोर.
येसुना आकिरता बोजनम
(मरकुस १४:१२-२६; लूका २२:७-२३; योहान १३:२१-३०)
17 होयवा हारिना पंडगुना मुन्नेटा रोजु,
c सिस्युल्क येसुनगा वासि,
“गुरु,
पस्के पंडुगुना गाटो तिनना तयारि बगा कीकोम इंचि नीवा मनसु मंता?”
इंचि पूसकीतुर.
18 अस्के येसु सिस्युल्कुंक,
“सहरते पलाना मनकनगा होंचि,
नावा आकिर वेला दग्गेरे एव्ता.
नीवा लोन नना नावा सिस्युल्कुनतोनि पस्के पंडुगु कियालय वांतन इंचि मावा गुरु वेहतोर इल्हा ओन्कु वेहट.”
इंचि वेहतोर.
19 अस्के सिस्युल्क येसु वेहतापे होत्तुर आनि अगा पस्के पंडुगुना गाटो तयार कीतुर.
20 पोड्दु होत्तास्के येसु ओना पन्नेंडु सिस्युल्कुनतोनि गाटो तिनालय उदतोर.
21 तिननेंके येसु ओर्कुन,
“हीके केंजट नना निजम वेहचंतन,
मीहगटाल वरोर नाकुन पगातोरा कयदे पीसि हींतोर.”
इंचि इत्तोर.
22 इदुन केंजसि ओर्कु वेल्लेन दुक्कम आता.
दानहेंके वरोन पज्जो वरोर,
“गुरु ओन नना अय्ते आयोन गदा?”
इंचि येसुन पूसकीतुर.
23 अस्के “नावातोनि गिन्नेते कलियसि तिनानोरे नाकुन पीसि हियनुर. d
24 दर्मसास्त्रमते राससि मताप,
मनकंक पुटतोन नना,
इद दुनियाताल पेय्सि दांतन निजमे!
गानि बोर नाकु दोका हींतोर,
ओन्कु बच्चोर गोसा आयार,
ओर मनकल पुट्टाकुंटेने बेस आसि मनवड,”
इंचि इत्तोर.
25 अस्के बोराय्ते येसुन पीसि हियनोर मत्तोर,
ओरे यहुदाल,
“गुरु,
ओन ननाने आंदुना?”
इंचि पूसकीतोर.
“निमे इत्तिन अल्हेने!”
इंचि येसु इत्तोर.
26 गडसेम आतारित्ते ओर तिननेंके,
येसु हारितुन पीसि पेनदुक दन्यवाद कीतोर.
आनि हारितुन तुकडां कीसि ओना सिस्युल्कुंक हीतोर.
पजा “इद तिंटु,
नावा मेंदुल आंद,”
इंचि इत्तोर.
27 इंका ओर अंगुर पंडिना पानकमता गिलास कयदे पीतोर,
आनि पेनदुक दन्यवाद कीतोर.
पजा ओर्कु हीसि,
“मिमेट अंटोर दीन उंटु,.
28 बारित्ते इद नावा नेत्तुर उंदि पूना करार आंदु.
वेल्लेटुर लोकुल्कुना पापाल्क मापि कियालय पोंगसेक मंता.
29 नना मीकु वेहचंतन,
नावा बाबाना राज्येमते मनम अंटुरम उंदगा वासि,
पूना रितुने अंगुर पंडिना पानकम उननदाका,
इय्याटाल नना दीन उन्नोन,”
इंचि येसु इत्तोर.
30 सिस्युल्क मर्रा पेंदुन स्तुति कियना पाटा पारसि,
जय्तुन मराकुना गुट्टतगा होत्तुर.
विस्वासुल्क नाकुन होळसंतुर, इंचि येसु मुन्नेने वेहतोर
(मरकुस १४:२७-३१; लूका २२:३१-३४; योहान १३:३६-३८)
31 अस्के येसु ओर्कुन,
इय्याला नर्कडकु मिमेट अंटोर नाकुन होळसिसि वित्तंतिर,
बारित्ते,
दर्मसास्त्रमते इल्हा राससि मंता:
नना गोर्रें कोहानोन हव्कंतन आनि
मंदतां गोर्रें बेंदव-हेके पायसि वित्तंतां.e
32 गानि नना हासि,
मर्रा तेदता पज्जो,
मीकन्ना मुन्ने गालिल एरियाते दांतन,
इंचि इत्तोर.
33 अस्के पत्रु,
“अंटोर नीकुन होळसिसि होनना गानि,
नना नीकुन बस्केने होळसि होन्नोन गुरु,”
इंचि येसुन इत्तोर.
34 “नना नीकु निजम वेहचंतन,
इय्याला नर्कडकु गोगोड कुसाका मुन्ने निमे मूंड मल्कां नाकुन एरपाट किय्योन इंतिन,”
इंचि येसु पत्रुन इत्तोर.
35 “नाकु नितोनि हामुर वायना बेसे,
गानि नीकुन एरपाट किय्योन इंचि बस्केने इन्नोन,”
इंचि पत्रु इत्तोर.
ओर अंटोर इंका अल्हे इत्तुर.
गेतसेमनि जेगातगा येसु पारतना कीतोर
(मरकुस १४:३२-४२; लूका २२:३९-४६)
36 येसु आनि सिस्युल्क गेतसेमनि इनना जेगातगा एवतस्के येसु ओर्कुन,
“नना इच्चुर मुन्ने होंचि पारतना कींतन,
अच्चोरदाका मिमेट इगेने उदिस मंटु.”
इंचि इत्तोर.
37 इल्हा इंचि ओर पत्रुन आनि जब्दीना इव्वुर मर्कुन पीसि ओनतोनि ओतोर.
अगा ओर वेल्ले दुक्कमते सिम्मरा आतोर.
38 अस्के ओर्कुन,
“नावा जीवा दांता बारे इत्ताप नाकु वेल्ले दुक्कम आसेक मंता.
मिमेट नातोनि इगेने आगसि तेल्विते मंटु,”
इत्तोर.
39 ओर इच्चुर मुन्ने होंचि बोकबोर्लें अर्सि इल्हा पारतना कियालय दल्गुतोर,
“ए बाबा,
ओक्कला कुदुरते,
नावा इद गोसा तप्पिस होन्नि,
गानि इद नावा विचारम मत्ताप आयो,
नीवा विचारम मत्तापे आयि.”
40 पजा ओना मुव्वुर सिस्युल्कुनगा वासि हूळतस्के ओर मींडसि मत्तुर.
अस्के येसु पत्रुन,
“मिमेट उंदि गंटामेड इंका नातोनि तेल्विते मना पर्रा हिल्लिर?
41 मिमेट देय्यमता पट्टुने अर्रानायो इंचि तेल्विते मंचि,
पारतना कीसेक मंटु.
नना वेहताप कियालय मीवा आत्मा तयारे मंता,
गानि मीवा मेंदुल तयार हिल्ले,”
इंचि इत्तोर.
42 मर्रा उंदि मल्का होंचि इल्हा पारतना कीतोर,
“ए बाबा,
इद हामुरता गोसा नाकु एता पींता इनानय्ते,
नीवा विचारम मताप पुरा आयि,”
इंचि तल्कुतोर.
43 अस्के येसु मर्रा वासि हूळतोर,
ओर पक्का निद्रते मींडसि मत्तुर.
44 ओर्कुन अगेने होळसिसि येसु इंका पारतना कियालय होत्तोर.
अस्के इंका मुन्नेटा लेसीं तल्कतोर.
45 आयंका ओना मुव्वुर सिस्युल्कुनहेके मल्सि वासि इत्तोर,
“इंका आरामते मींडसे मनांतिरा?
हूळाट,
मनकंक पुटतोन नाकुन पापि लोकुरा कयदे पीसि हियना वेला एव्ता.
46 तेदाट,
मनम दाकोम,
नाकुन पीसि हिय्यनोर इगे दग्गेरेने एवतोर.”
येसुन पीतुर
(मरकुस १४:४३-५०; लूका २२:४७-५३; योहान १८:३-१२)
47 येसु इव पोल्लें इंचेकेने मत्तोर,
अच्चोटेने पन्नेंडु सिस्युल्कुना लोप्पोटोर वरोर यहुदाल इनानोर अगा वातोर.
ओनातोनि पेद्दा पेर्मालोर आनि यहुदि पेद्दाल्क लोहता,
गुळि कावेल कियानोरा गँग कसेरकु,
गुत्पां,
पीसि वातुर.
48 येसुन पीसि हियना यहुदाल ओर्कु उंदि चिन्ह वेहतोर,
अद बतल इत्ते,
“नना बोनगा होंचि बुर्रांतन.
ओरे येसु आंदुर,
ओन पींटु.”
49 पज्जो यहुदाल येसुनगा बिराना होंचि,
“गुरुजी” इंचि ओन बुर्तोर.
50 “मावा दंटातोनिना,
निमे बद कबळक वातिन दान कीम,”
इंचि येसु ओन इत्तोर.
अस्केने अगा मत्ता मंदि मुन्नेळक वासि येसुन पीतुर.
51 अच्चोटेने येसुनतोनि मत्तोरव्टे वरोनगा कसेर मत्ता,
ओर दान तेंडसि पेद्दा पेर्माना वरोर सेवाकुन हव्कालय कसेरते हीतोर गानि,
अद कसेर सिराप ओना केवदुन नेमाहकुंचि होत्ता.
52 अस्के येसु ओन,
“नीवा कसेर नीवा नडिके मन्नि,
बारि इत्ते कसेर पियानोर कसेरतेन हांतोर.
53 नना नावा बाबान तल्किस मत्ते,
पन्नेंडु गाँगुल्कुंकन्ना बच्चुंगो वेय्कुना पेनदा दूतन नाकुन पीसागोटालय लोहचि मन्नेर.
इद नीकु तेळियोना?
54 इल्हा आते दर्मसास्त्रमते नावा बारेमते रासता पोल्लें बल्हा निजम आयनूं?
अव्टे इल्हा आयमळ गावाले,
इंचि रासतद मंता,”
इंचि येसु इत्तोर.
55 अस्के ओन पियानोर्कुन,
“वरोन दोंगन पीताप मिमेट कसेरकु,
गुत्पां पीसि नाकुन पिय्यालय वातिरा?
नना रोजु गुळितगा उदिस कराहसेक मनुंदुन,
मिमेट नाकुन अस्के बारि पिय्या हिल्लिर?
56 बारित्ते पेनदा कबुरतोर दर्मसास्त्रमते रासता पोल्ले निजम आयानाहाटीं इदंता जर्गसंतां,”
इंचि येसु इत्तोर.
अच्चोटेने सिस्युल्क ओन होळसिसि पटादुडीं वितुतुर.
पेद्दाल्कुना मुन्ने येसुना जवाब
57 लोकुल्क येसुन पीसि कयपा इनना पेद्दा पेर्मानगा ओतुर.
अगा दर्मसास्त्रम कराहना गुरुल्क आनि यहुदि पेद्दाल्क जमा आतुर.
58 पत्रु ओरा पज्जो-पज्जो कयपा पेद्दा पेर्माना दारादाका होत्तोर.
अगा बल्हा-बतल आयार इंचि हूळालय,
दाराते होंचि कावेलतोरतोनि उदतोर.
59 पेद्दा पेर्मालोर आनि यहुदि पंचादिता लोकुल्क येसुंक हामुरता सिक्सा हियानाहाटीं ओना विरोदमते बतलन्ना तप्पु पहकालय दल्गुतुर.
60-61 वेल्लेटोर ओना विरोदमते गवाइ हिय्यनोर वातुर,
गानि ओर्कु उंदि इंका तप्पु दोर्का हिल्ले.
आकिरते इव्वुर वासि,
“पेनदा गुळितुन कूलाहचि दान मूंड रोजकुने मर्रा दोहंतन इंचि इत्तोर,”
इसोंटा गवाइ हीतुर.
62 अस्के पेद्दा पेर्माल तेदसि,
“निमे बतले वळकािना?
ईर नीवा विरोदमते बल्हा गवाइ हीतुर हूळा!”
इंचि येसुन इत्तोर.
63 गानि येसु बतले वळका हिल्लोर.
“जीवाते मनना पेनदा ओट्टु तिंचि नीकुन पूसकीसंतन,
निमे पेनदा मर्रि किरिस्तु आयानय्ते माकु वेहा” इंचि पेद्दा पेर्माल येसुन पूसकीतोर.
64 अस्के येसु “निमे इत्तिन अद निजमे!
गानि नना मीकु वेहचंतन,
इंका मुन्ने मिमेट मनकंक पुटतोन नाकुन पेनदा तिना बाजुंक उदिस मत्तद आनि स्वर्गमता मब्बुनाल वायानेंके हूळकिर.”
इंचि इत्तोर.
65 इल्हा केंजसि,
पेद्दा पेर्माल होंगुने ओना कपडीं हराहकुत्तोर,
आनि “ईर,
पेनदा अपमानम कीतोर.
मनाकु इंका बतल गवाइ गावाले?
ओना पोल्लें मिमेट केंजतिरे गदा!
66 मिमेट बतल इंतिर?”
अस्के यहुदिल्क,
“ईर हामुरता सिक्साकु ओज्जंतोर,”
इंचि इत्तुर.
67 अस्के इच्चुर लोकुल्क येसुना तोड्डि पोर्रो उस्किसी,
ओन तंचि-गुदसि इत्तुर गदा,
68 “ए किरिस्तु,
नीकुन बोर तंतुर,
माकु बविस्यवानि वेहा,”
इंचि इत्तुर.
पत्रु येसुन एरपाट किय्योन इत्तोर
69 हीके पत्रु पेद्दा पेर्माना दारातेने उदिस मत्तोर,
अस्के उंदि दासि ओनागा वासि,
“गालिल एरियाता येसुनतोनि निमे इंका मत्तिन गदा?”
इंचि इत्ता.
70 अस्के पत्रु “निमे बतल इंचांतिनो नाकु तेळिया हिल्ले!”
इंचि ओर अगा मत्तोरा अंटोर मुन्नेन इत्तोर.
71 आयंका ओर दाराताल पेय्सि गलमातागाह्कु होत्तोर.
अस्के इंकुंदि दासि ओन हूळसि,
“ईर इंका नासरेत नाटेना येसुनतोनि मत्तोर,”
इंचि अगा मत्तोर्कुंक वेहता.
72 अस्के पत्रु मर्रा उंदि मल्का,
ओट्टु तिंचि,
“नना ओन बिल्कुल एरपाट किय्योन,”
इंचि इत्तोर.
73 गडसेम मत्तारित्ते,
अगा नितिस मत्तोर इच्चुर लोकुल्क पत्रुनगा वासि,
“निमे निजम ओना दंटातोने!
नीवा वळकुड केंजसि निमे गालिल एरियातोन इंचि तेळियंता,”
इंचि इत्तुर.
74 अस्के पत्रु,
“नना ओट्टु तिंचि वेहचंतन,
नना आबद्दम वळकानय्ते पेन नाकुन तिन्नि,
आ मनकन नना बिल्कुल एरपाट किय्योन,”
इंचि इत्ता इनुडे गोगोड कूसता.
75 “इय्याला नर्कडकु गोगोड कूसाका मुन्ने,
निमे नाकुन मूंड मल्कां,
एरपाट किय्योन इंचि आबद्दम वळकांतिन” इंचि येसु पत्रुंकु मुन्ने वेहचि मत्ता,
पोल्लें पत्रुंकु मति वातां.
मति वासि,
ओर पलाते पेय्सि वेल्ले दुक्कमते ओ-ओ अळतोर.