रोमि राज्यपाल पिलातुसना मुन्ने येसु
(मरकुस १५:१; लूका २३:१-२; योहान १८:२८-३२)
27
1 पंग आतारित्ते पेद्दा पेर्मालोर आनि यहुदि पेद्दाल्क अंटोर येसुन हव्कना निरनायम कीतुर.
2 पजा ओन दोहाचि पीसि ओतुर आनि राज्यपाल पिलातुसुंक अप्पाजेपतुर.
यहुदाल पासि दोस्सि हांतोर
(प्रेरितुल्कुना कबाह्क १:१८-१९)
3 येसुंक हामुरता सिक्सा दोर्कता इंचि,
येसुन पीसि हीता यहुदांकु तेळियतारित्ते वेल्ले पस्तांचतोर,
आनि ओर पेद्दा पेर्मालोर्कुंक आनि यहुदि पेद्दाल्कुंक आ मुप्पै एंडि कल्दार्क मलाह्चि हीसेके,
4 “नना तप्पु हिल्वा मनकन हव्कालय पीसि हीसि पापम कीतन” इंचि इत्तोर.
अस्के ओर,
“माकु बतल कियना मंता?
निवद निमे हूळकुन” इंचि इत्तुर.
5 अस्के यहुदाल आ एंडि कल्दार्कुन गुळिते विसुरतोर आनि अगटाल पलाते होंचि,
पासि दोसकुत्तोर.
6 पेद्दा पेर्मालोर्क अव कोत्तन जमा कीसि,
“वरोन हव्कालय हीता कोत्तन,
मना नियम परकारम दान पेटीते वाटा वायो,”
इंचि इत्तुर.
7 दानहाटीं ओर अव कोत्तनतोनि,
येरूसलेमते बोरन्ना पलाताल वातोर हायानय्ते ओर्कुन गोरी दोस्सालय आंता,
इंचि वरोर कुम्माना नेलि अस्तुर.
8 इंदके इंका आ नेदुन “नेत्तुर नेलि” इंचि इंतुर.
9 अस्के यिरमिया इनना पेनदा कबुरतोर इत्ता पोल्ले निजम आता,
अद इल्हा मत्ता:
इस्राएल लोकुल्क ओना दरा,
मुप्पै एंडि कल्दार्क कीतुर.
अव ओर तेंडकुत्तुर.
10 पेन नाकु वेहताप,
आ मुप्पै एंडि कल्दार्कुनतोनि,
कुम्माना नेलि अस्तुर.a
पिलातुस येसुन पूसकींतोर
(मरकुस १५:२-१५; लूका २३:३-५; २३:१३-२५; योहान १८:३३-३८)
11 पजा येसुन पिलातुस राज्यपालना मुन्ने निपिस्तारित्ते,
राज्यपाल ओन,
“निमे यहुदिल्कुना राजाना?”
इंचि पूसकीतोर.
अस्के “निमे इंचेकेने गदा,”
इंचि येसु इत्तोर.
12 गानि बस्के अय्ते पेद्दा पेर्मालोर आनि यहुदिल्कुना पेद्दाल्क ओना पोर्रो तप्पु दोसतुर अस्के ओर सपुडदाका मत्तोर.
13 अस्के पिलातुस येसुन,
“ईर नीवा पोर्रो बच्चुंगो तप्पुक दोस्सेक मंतुर,
नीकु केंजा वासेक हिल्लेना?”
इंचि इत्तोर.
14 गानि ओर उंदि पोल्ले इंका वळका हिल्लोर.
अदुनहाटीं पिलातुसुंक वेल्ले इचंत्रम आता.
15 पस्के पंडगुना रोजुने,
लोकुल्क इत्तोन वरोन कैदीन होळसनद राज्यपालना रिवाज मत्ता.
16 अदे वेलाते वरोर पोर्रोल पेय्स्ता कैदी “बरब्बल” इनानोर जेलने मत्तोर.
17 लोकुल्क अगा जमा आतारित्ते पिलातुस ओर्कुन,
“नना बोन होळसकन इंचि मीवा मनसु मंता,
बरब्बन होळसकना हिलाकोंटे किरिस्तु इनना येसुना?”
इंचि पूसकीतोर.
18 येसु तप्पु कियाकोन्ना ओन पीतुर इंचि पिलातुसुंक एरपाटे मत्ता.
19 अचोने आय्का पिलातुस न्यायम कियालय बस्के अय्ते गद्दे पोर्रो उदतोर अस्के ओना मुत्तोना हेंदाल उंदि कबुर वाता,
अद इल्हा मत्ता गदा,
“नाकु उंदि कला वाता,
ओर तप्पु हिलुवा मनकल आंदुर.
ओन निमे बतले किय्मा.
नना ओनाहाटीं इय्याला पोद्दला दुक्कमते मत्तन.”
इंचि राससि मत्ता.
20 आनि हीके पेद्दा पेर्मालोर आनि पेद्दाल्क,
बरब्बन होळसियना आनि येसुन हव्कना इंचि इनालय लोकुल्कुंक एक्किस्तुर.
21 राज्यपाल ओर्कुन,
“नावा मुन्ने बरब्बल आनि येसु इव्वुर मंतुर,
नना मीवाहाटीं ईरा इव्वुरा लोप्पोटाल बोन होळसना इंचि मीवा मनसु मंता?”
इंचि पूसकीतोर.
अस्के ओर,
“बरब्बन” होळसना इंचि इत्तुर.
22 “अय्ते मरि,
‘किरिस्तु’ इनना येसुन बतल कियना?”
इंचि पिलातुस ओर्कुन पूसकीतोर.
अस्के “ओन क्रुसुनपोर्रो मोल्लां कोहकिस हव्का,”
इंचि इत्तुर.
23 “बारि,
ओर बतल तप्पु कीतोर?”
इंचि पिलातुस पूस कीतस्के,
ओर “ओन क्रुसुनपोर्रो मोल्लां कोह्किस हव्का” इंचि जोरसे वरगेयतुर.
24 इच्चो वेल्ले लोकुल्कुना मुन्ने नावद बतले ताका पर्रो.
ओर इंका लोल्लि कींतुर इल्हा पिलातुस इनकुंचि,
ओर इच्चुर एर पीसि लोकुल्कुना मुन्ने कय्क नोर्सि,
“ईना हामुटे नावद कय हिल्ले,
मिमेटे दीना जबाबदारी मंतिर,”
इंचि इत्तोर.
25 अस्के ओर अंटोर वरगेयसि इत्तुर गदा,
ईना हामुटा जबाबदारी मावा पोर्रो आनि मावा पिलालकुना पोर्रोने मन्निकांटी.
26 अस्के पिलातुस,
बरब्बन होळसितोर आनि येसुन बारे पोट्टेते तन्नालय आनि क्रुसुनपोर्रो मोल्लां कोह्किस हव्कालय सिपाइल्कुना कयदे अप्पाजेपतोर.
येसुन क्रुसुनपोर्रो मोल्लां कोह्कांतुर
27 आयंका सिपाइल्क येसुन पीसि पिलातुसना किल्लाते ओतुर.
अगा सिपाइल्कुना पूरा गँग ओना सुट्टु जमा आतुर.
28 ओना कपडीं कुडाहचि,
ओन्कु एर्रा रंगुना कोट केराहतुर.
29 आनि हाह्कुना वेलिता किरिटम कीसि ओना तल्लक दोसतुर,
ओना तिना कयदुक उंदि दुरसोत्ता कट्टे हीतुर आनि सिपाइल्क ओना मुन्ने टोंगरां उहचि,
“यहुदिल्कुना राजांक बस्केने हामुर हिल्ले” इंचि ओन वेल्ले कारेड्डाल्क कीतुर.
30 आयंका ओर ओना पोर्रो उस्कतुर आनि ओनागटा कट्टे इगकुंचि अदे कट्टेते ओना तल्लापोर्रो तल्लापोर्रो तंतुर.
31 ओन वेल्ले परेसान कीतारित्ते ओर केर्सि मत्ता कोट तेंडसि,
ओनांगे कपडीं केराहतुर आनि ओन क्रुसुनपोर्रो मोल्लां कोहकालय पीसि ओतुर.
32 सिपाइल्क येसुन पीसि सहरता पलाते पेय्सि होनानेंके,
कुरेना सहरतोर वरोर सिमोन इनना मनकल कलियतोर.
ओर ओन वेराहचि येसुना क्रुस कांजा वेहतुर.
33 आयंका ओर गोलगोता इत्ते “तला बोरसेम” इनना जेगातगा एवतारित्ते,
34 ओन्कु अंगुर पंडिना पानकमते कयमुलb कल्पीसि उनालय हीतुर,
येसु दान नाकिस हूळसि नना उन्नोन इत्तोर.
35-37 अस्के ओन क्रुसुनपोर्रो मोल्लां कोहक्तुर.
कोहक्तारित्ते,
“येसु,
यहुदिल्कुना राजाल आंदुर,”
इंचि उंदि ओना तप्पु हुप्सना बोर्ड राससि येसुना तलापोर्रो वेलाड वाटतुर.
पजा सिपाइल्क सिट्टिं वाटसि ओना कपडीं पंचकुत्तुर.
आयंका सिपाइल्क ओना कावेल कीसेके अगेने उदिस मत्तुर.
38 अस्केने इंका इव्वुर दोंगाल्कुनगुडा ओना पक्का पीसि हीके वरोन हेके वरोन क्रुसुनपोर्रो मोल्लां कोहकुतुर.
39-40 आनि हर्रि पीसि होनानोर येसुन हूळसि,
“गुळितुन कूलाहचि मूंड रोजकुंक दोहांतन इनानोन,
इंदके निवद निमेने पिसागोटकुना परसेक हिल्लिन,
निमे गिंटा पेनदा मर्रिन आयानय्ते क्रुसताल हिडु रेय्सि वा,”
इंचि तल्ला ऊपसेक कारेड्डाल्क कीसेके होनुंदुर.
41 अचोने आयका पेद्दा पेर्मालोर,
दर्मसास्त्रम कराहना गुरुल्क आनि यहुदि पेद्दाल्क इंका अल्हे कव्वुंदुर.
42 अव्टेटाल इच्चुर,
“ईर अय्ते इंकावरोन पिसागोटतोर गानि ओनाद ओरे पिसागोटकुना परसेके हिल्लोर.
ईर इस्राएलतुरा राजाल गदा!
ईर निजमे राजाल गिंटा आयानय्ते ओर क्रुसताल हिडु रेय्सि वायिरकांटी,
अस्केने मोमोट ओना पोर्रो बरोसा इरा परकोम,”
इंचि इत्तुर.
43 इंका इच्चुर बारे,
“ओन्क अय्ते पेनदापोर्रो बरोसा मंता.
इंका ओर,
‘नना पेनदा मर्रिन आंदुन,’
इंचि इत्तोर.
अदुनहाटीं इंदके पेनदा मनसु मत्ते ओन पिसागोटकांटीं,”
इंचि इत्तुर.
44 अल्हेने येसुना पक्का पीसि क्रुसुंक वेलाड कोह्किस मत्ता दोंगाल्क इंका येसुन बच्चुंगो तीरुकुने कारेड्डाल्क कीतुर.
येसुना हामुर
(मरकुस १५:३३-४१; लूका २३:४४-४९; योहान १९:२८-३०)
45 पजा पियाटील पन्नेंड गंटानाल मूंड एगनदाका पूरा बूमिअंता हीकट आता.
46 दगेरे-दगेरे मूंड एगानेंके येसु अळसेके जोरसे वरगेयसि,
“एलि,
एलि,
लमा सबकतनि.”
इत्ते,
“देवा-देवा निमे नाकुन बारि होळसितिन?”
इंचि इत्तोर.
47 अस्के अगा नितिस मत्तोर इच्चुर लोकुल्क ओर एलियान केयसंतोर बारे इत्तुर.
48 पजा ओराव्टेटाल वरोर मनकल वित्सि होंचि पुल्लटा अंगुर पंडिना पानकमते मुळाहता स्पंजc तत्तोर आनि दुड्डुना कोस्सक ताससि येसुना तोडदगा नाकालय हीतोर.
49 अस्के कळमतोर,
“जेरासेप आगाट,
एलियाल ईन पिसागोटालय वांतोरा वायोरा हूळकोम,”
इंचि इत्तुर.
50 येसु मरुंदाम अळसेके जोरसे वरगेयसि जीवा होळस्तोर.
51 अस्केने गुळिता परदा,
पोर्रोटाल हिडुदाका हर्सि रोंडु तुकडां आता,
बूमि अदुलता,
गुट्टां नेर्रें हीसि पैतां.
52 आनि पेनदा लोकुल्क बोराय्ते हातुर ओराव्टेटाल वेल्ले मंदि जीवार्सि गोरीनाल मर्रा तेदतुर.
53 आनि येसुंक मर्रा जीवा अर्तारित्ते,
ओर अंटोर गोरीनाल पेयसि येरूसलेम इनना पवित्र सहरते ओर वेल्लेटुर लोकुल्कुंक दिसतुर.
54 अगा जर्गुता गटनां आनि बूमि अदुल्तद हूळसि रोमि दरोगल आनि येसुनगा कावेल कीसेक मत्ता सिपाइल्क वेल्ले वेरियतुर.
आनि,
“ईर निजमे पेनदा मर्रि आंदुर” इंचि ओर इत्तुर.
55 येसुना सेवा किसेक गालिल एरियाताल वातव वेल्लेने मुर्ताह्क अगा लक्कुटाल हूळसेके मत्तां.
56 अवुने मरियम मगदलेनि,
याकोब आनि योसेप ईरा यावल मरियम आनि जब्दीना मर्कुना यावल,
इव अन्नि अगा मत्तां.
येसुना गति कियुड
(मरकुस १५:४२-४७; लूका २३:५०-५६; योहान १९:३८-४२)
57 आयंका पोड्दु होनना वेलाक अरिमताइ नाटेनाल वरोर योसेप इनना स्रिमंत मनकल वातोर.
ओर इंका येसुना सिस्युड मत्तोर.
58 योसेप पिलातुसुनगा होत्तोर आनि येसुना पीनगु गावाले इंचि इत्तोर.
अस्के पिलातुस,
“येसुना पीनगु,
योसेपुंक हीम्टु,”
इंचि सिपाइल्कुंक आदेस हीतोर.
59 योसेपु आ पीनगुन पूना कपडिते हुटतोर.
60 आनि बंडातुन तुल्हाता ओना पूना गोरीते येसुना पीनगुन दोसतोर आनि गोरीd बोंगाकु उंदि पेद्दा बंडातुन अड्डम दोसतोर आनि अगटाल पेय्सि होत्तोर.
61 गानि मगदलेनि नाटेना मरियम आनि इंकुंदि मरियम अगा गोरी मुन्ने उदिस मत्तां.
येसुना गोरीक कावेल कियमळ
62 नोमकेमता मुन्नेटा रोजुने पेद्दा पेर्मालोर्क आनि परिसिल्क पिलातुसुंक कलियसि इत्तुर,
63 “महाराज,
आ दोंगा मनकल जीवाते मनानेंके,
‘नना हासि मूंड रोजकुंक मर्रा जीवाते तेदंतन’ इंचि इत्तोर,
अद माकु मते मंता.
64 दानहाटीं मूंड रोजकुनदाका ओना गोरीतगा कडक कावेल इर्रानद आदेस हीम.
बारित्ते ओना सिस्युल्क बस्केनना वासि दोंगातनमते ओना पीनगुन ओयानुर आनि ‘येसु मर्रा जीवाते तेदतोर’ इंचि लोकुल्कुन बोंकिचानुर.
इल्हा गिंटा आयानय्ते मुन्नेटकना इंका वेल्ले बेकार आंता,”
इंचि वेहतुर.