येसुन दोकाते पीसि ओंतुर
18
1 इव पोल्लें वळ्कुमळ आतंका, येसु ओना सिस्युल्कुनतोनि, किद्रोन इनना कुरेटा लोद्दि दाटसि हब्बेटा बाजुंक होत्तुर. अगा जय्तुन मराकुना तोटा मत्ता, आ तोटाते येसु आनि ओना सिस्युल्क होळियतुर. 2 येसु ओना सिस्युल्कुनतोनि अद तोटाते वेल्लेन मल्कां वासि मत्तोर. अदुनहाटीं ओन्क दोका हियना यहुदांकगुडा अद जेगा एरपाट मत्ता. 3 अय्ते यहुदल सिपाइल्कुना गँगुन आनि पेद्दा पेर्मालोर आनि परिसिल्क लोहता गुळितगा कावेल कियानोर्कुन पीसि अगा वातोर. ओरतोनि दिव्टीं, कंदिलीं आनि लडाइ कियना विस्रें मत्तां. 4 ओन्क बतल जर्गनद मंता इत्तदुन एरपाट कीसि, येसु मुन्नेळ्क होत्तोर. होंचि, “मिमेट बोन पह्कसंतिर?” इंचि ओर्कुन पूसकीतोर. 5 अस्के ओर, “नासरेत नाटेना येसुन पहकसंतोम,” इंचि जवाब हीतुर. पजा येसु, “ओन ननाने आंदुन,” इंचि इत्तोर. येसुंक दोका हियना यहुदलगुडा ओरतोनि निलसि मत्तोर. 6 येसु ओर्कुन, “ओन ननाने आंदुन,” इंचि इत्तस्के, ओर पजोळ्क जरगिसि बूमिपोर्रो अरतुर. 7 येसु, “मिमेट बोन पहकसंतिर?” इंचि मर्रा उंदि मल्का पूसकीतोर अय्ते ओर, “नासरेत नाटेना येसुन पहकसंतोम,” इंचि इत्तुर. 8 अस्के येसु, “ओन ननाने आंदुन इंचि वेहतन गदा! ओक्कला मिमेट नाकुन पह्कानय्ते, ईरकुन होना हीम्टु,” इंचि इत्तोर. 9 बारित्ते, “निमे नाकु हीतोरव्टेटाल, नना वरोनिंका तप्सोना हिय्या हिल्लेन,” इंचि ओर इत्ता पोल्ले पुरागा आयगोम इंचि अल्हा इत्तोर. 10 सिमोन पत्रु इनना सिस्युनगा उंदि पेद्दा कसेर मत्ता. ओर अद कसेटे वरोन हीतोर अय्ते, पेद्दा पेर्माना वरोर जीतागाना तिना केव्वु नेमसि अर्ता. आ जीतागान पोर्रोल मल्कोसि. 11 गानि येसु, “नीवा कसेर दाळोतगाa इर्रा. नावा बाबाल नाकु हीता तिप्पलता वाटिते नना उना मन्निआ?” इंचि पत्रुन इत्तोर. 12-13 अस्के अगा वाता सिपाइल्कुना गँग, ओरा दरोगाल आनि गुळितगा कावेल कियानोर येसुन दोर्का पीसि दोह्चि वाटतुर. दोह्चि वाटसि, मोट्टा मोदाला ओन हन्ना इनानोनगा ओतुर. ई हन्नाल कयपा इनानोना मामाल आंदुर. अद वर्सा ई कयपाल पेद्दा पेर्माल मत्तोर. 14 “लोकुल्कुनाहाटीं वरोर मनकल हाते बेसे,”b इंचि यहुदि पेद्दाल्कुना मुन्ने वळ्कीसि मत्तोर, ओर ईरे कयपाल आंदुर.पत्रु येसुना बारेमते आबद्दम वळ्कंतोर
15 येसुन अल्हा पीसि होननेंके सिमोन पत्रु आनि इंका वरोर सिस्युड, येसुन पज्जो होत्तुर. आ सिस्युड पेद्दा पेर्माना एर्कातोर मत्ताहेंका, पेद्दा पेर्माना दाराते येसुनतोनि ओरगुडा होत्तोर. 16 गानि पत्रु पलाते गलमातगेन नित्तिसि मत्तोर. अदुनहाटीं पेद्दा पेर्मांक एर्का मत्ता आ सिस्युड पलाते वासि, गलमातगा देकरेकहाटीं मत्ता मुरतटुन पूस कीसि, पत्रुन लोप्पो केयसि तत्तोर. 17 गलमातगा देकरेकते मत्ता आ मुरतळ, “निमेगुडा आ मनकना सिस्युल्कुनाल वरोन आंदिन गदा!” इंचि पत्रुन पूसकीता. अय्ते पत्रु, “नना आयोन,” इंचि इत्तोर. 18 अद वेलाते वेल्लेन पीनि मत्ता. अदुनहाटीं सिपाइल्क आनि गुळितगा कावेल कियानोर, तडमि मासि, सेका कासेके मत्तुर. अगा पत्रुगुडा ओरतोनि नित्तिसि आरसेक मत्तोर.
अंटोर्कन्ना पेद्दा पेर्माल येसुन सवाल्क पूसकींतोर
19 पजा पेद्दा पेर्माल येसुन, ओना सिस्युल्कुना बारेमते आनि ओना कराहमळ बारेमते पूसकीतोर. 20 अस्के येसु, “नना अंटोरा मुन्ने कुल्ला-कुल्ला वळ्कतन, यहुदिल्क अंटोर जमा आयना दर्मसास्त्रम कराहना लोह्कुने आनि गुळिने नना बस्केळ्क कराहतन. आनि नना मक्किचि बतले वळ्का हिल्लेन. 21 अयना इद सवाल नाकुन बारि पूसकीसंतिन? नना वेहतदुन केंजतोर्कुन पूस कीम, ओर्क एरपाटे नना बतल वेहतन,” इंचि जवाब हीतोर. 22 येसु अल्हा इत्तस्के, दग्गेरे नित्तिसि मत्ता वरोर गुळितगा कावेल कियानोर, “पेद्दा पेर्मांक इल्हेन जवाब हींतिना?” इंचि येसुना सेंपापोर्रो तंतोर. 23 अस्के येसु, “नना वळ्कतव्टे बतलन्ना तप्पु मत्ते इगे अंटोर्क वेहाट. गानि नना वळ्कतद निजम आते, नाकुन तनंतिर बारि?” इंचि पूसकीतोर. 24 पजा आ हन्नाल, दोह्चि मननेंकेन येसुन कयपा इनना पेद्दा पेर्मानेके लोह्चीतोर.
पत्रु आबद्दम वळ्कता वळ्कुळे गोगोड कूसंता
25 सिमोन पत्रु तडमितगा सेका कासेके मत्तस्के, अगा मत्तोर इच्चुर लोकुल्क ओन, “निमेगुडा ओना सिस्युल्कुनाल वरोन आंदिन गदा?” इंचि पूस कीतस्के, “नना आयोन,” इंचि पत्रु आबद्दम वळ्कतोर. 26 पत्रु बोना केव्दुन अय्ते नर्कतोरो, ओना जीवातोर वरोर, पेद्दा पेर्मानगा सेवा कीसेक मत्तोर. ओर पत्रुन, “अद रोजु जय्तुन मराकुना तोटाते नीकुन नना, ओनतोनि हूळतन,” इंचि इत्तोर. 27 मर्रागुडा पत्रु, “नना आयोने आयोन,” इंचि आबद्दम वेहतोर. ओर अल्हा इत्ता इन्मळे, गोगोड कूसता.
पिलातुस इनना राज्यपालना मुन्ने येसुन निल्हांतुर
28 पजा हक्केरेन येसुन ओर कयपानगटाल रोम सरकारता राज्यपालना राजवाडाते ओतुर. अस्के रिवाज परकारम अपवित्र आयाकोंटा मनालय आनि दाटसि होनना पंडुगुना गाटो तिनगोम, इंचि ओर राजवाडाते नेंगा हिल्लुर. 29 अदुनहाटीं रोम सरकारता राज्यपाल पिलातुस, पलाते ओरगा वासि, “ई मनकन पोर्रो मिमेट बद कसूर ताससंतिर?” इंचि ओर्कुन पूसकीतोर. 30 अस्के ओर, “ईर कसूर कियाकोंटे मंचि मत्ते, मोमोट ईन नीकु अपजेप्पा कोन्नेरम,” इंचि जवाब हीतुर. 31 “अल्हा अय्ते ओन ओसि, मीवा सतता नियम परकारम मिमेटे ओना न्यायम कीम्टु,” इंचि पिलातुस इत्तोर. अस्के यहुदिल्क, “हामुर सिक्सा हियना अदिकारम सिराप, रोम सरकारुंके मंता,” इंचि इत्तुर. 32 अद अल्हा बारि जर्गता इत्ते, येसुंक बसोंटा हामुर वायनद मंता इंचि येसु कुद्दु वेहता पोल्ले पुरागा आयनाहाटीं अल्हा जर्गता.
33 पजा पिलातुस ओना राजवाडाते होंचि येसुन लोप्पो केया वेहतोर. केयसि, “निमे यहुदिल्कुना राजाना?” इंचि येसुन पूसकीतोर. 34 अस्के येसु, “ई पोल्ले नि इच्चटा निमेन इंचंतिना? हिलाकोंटे नावा बारेमते नीकु बोरन्ना वेहतुरा?” इंचि पिलातुसुन पूसकीतोर. 35 अय्ते पिलातुस, “नाकुन निमे यहुदि इन्कुंचंतिना? कुद्दु नीवा लोकुल्क आनि ओरा पेर्मालोर नीकुन नाकु अपजेप्पतुर. निमे बतल कीतिन?” इंचि जवाब हीतोर. 36 अस्के येसु, “नावा राज्येम ई दुनियाक संबंदिस्तद आयो. ओक्कला नावा राज्येम ई दुनियाक संबंदिस्तद आसि मत्ते, नाकुन यहुदि पेद्दाल्कुंक अपजेप्पाकोंटा नावा सेवाकुल्क लडाइ कीसि मन्नेर. गानि इंदके नावा राज्येम ई दुनियाक संबंदिस्तद आयो,” इंचि जवाब हीतोर. 37 अस्के पिलातुस, “अल्हा अय्ते निमे राजाना?” इंचि इत्तोर. अय्ते येसु, “निमेन इंचंतिन नाकुन राजाल इंचि! नना अय्ते सत्तेम बारेमते गवाइ वेहालय पुटतन. इद कारनमहाटींगे नना ई दुनियाते वातन. सत्तेमते ताकाना हरेक मनकल, नावा अल्किरतुन केंजंतोर,” इंचि वेहतोर. 38 अद केंजसि पिलातुस, “सत्तेम इत्ते बतल?” इंचि येसुन पूसकीतोर. अल्हा पूस कीसि, पलाते यहुदिल्कुनगा होत्तोर. होंचि, “नाकु ईना लोप्पो अय्ते बतले कसूर दिस्सेक हिल्ले. 39 गानि दाटसि होनना पंडुगुना रोजु, एडादिक उंदि मल्का, जेलने मत्तोन वरोन होळसना, इंचि मीवा उंदि रिवाज मंता. अय्ते मीवाहाटीं नना ई यहुदिल्कुना राजान होळ्समळ मीकु इस्टमेना?” इंचि ओर्कुन पूसकीतोर. 40 अस्के ओर वरगेयसेके मर्रा, “मन्नि ओन होळ्समा, मावाहाटीं बरब्बान होळसा,” इंचि इत्तुर. (ई बरब्बल इनानोर, पेद्दा दोंगल मत्तोर.)