येसु सतताहाटीं पारतना कींतोर
17
1-4 इव अन्नि पोल्लें वेहमळ आतस्के, येसु पोर्रो स्वर्गमतेके हूळसेके इल्हा पारतना कियालय दल्गतोर. “बाबा, अंटोर लोकुल्कुनपोर्रो निमे नाकु अदिकारम हीतिन. दीनहेंदाल निमे बोर्कुन अय्ते नाकु हीतिनो, ओर्क अंटोर्क नना बस्केळ्क पिसना पिसवर हीकन. निमे वरोने सत्तेम पेनदुन आंदिन, बोरय्ते नीकुन आनि निमे लोहता येसु किरिस्तुन एरपाट कींतुरो ओर्के आ बस्केळ्क पिस्सना पिसवर दोर्कंता. निमे नाकु बव कबाह्क अय्ते कियालय हीतिनो, अवुन पुरागा कीसि, नना बूमिपोर्रो नीकु कदर हीतन. इंदके नावा वेला एव्ता. अदुनहाटीं निमे नाकु कदर हीते, नना नीकु कदर हीकन. 5 बाबा, दुनिया पुट्टका मुन्ने नना नितोनि मननेंके बसोंटा कदर मत्तानो, असोंटा कदरे इंदकेगुडा नि मुन्ने हीम.”येसु ओना सिस्युल्कुनाहाटीं पारतना कींतोर
6 “ई दुनियाताल निमे नाकु हीता लोकुल्कुंक, नना नीवा पोर्रोल्तुन हुपिस्तन. ओर बस्केळ्क निवोर्के आंदुर. ओर्कुन निमे नाकु हीतिन. आनि ओर नीवा पोल्लेपोर्रो ताकतुर. 7 निमे बतल अय्ते नाकु हीतिनो, अव अन्नि निहेंदाले दोर्कतव इंचि इंदके ओर्क तेळियता. 8 बारित्ते बव पोल्लें अय्ते निमे नाकु हीतिनो, अवुन नना ओर्क एविच्तन. ओर अवुन ओप्कुत्तुर. आनि नना निजम निहागटाले वातन, नाकुन निमेन लोहतिन इंचि ओर्क तेळियता. 9 ईराहाटींगे नना पारतना कीसंतन. दुनियाताहाटीं आयो. निमे बोर्कुन अय्ते नाकु हीतिनो, ओर निवोरे इंचि ओराहाटींगे नना पारतना कीसंतन. 10 नहगा मनना अन्नि पोल्लें निवंगें आंदुं, आनि नीवां नावां आंदुं. आनि अवुनहेंदाल नाकु कदर दोर्कता. 11 इंदकेटाल नना इद दुनियाते मनोन. नना निहगा वासंतन. गानि ईर ई दुनियाते मनंतुर. पवित्र बाबा! इंदके मनम उंदि आसि मत्ताप, ईरगुडा उंदि आसि मनालय, निमे नाकु हीता नीवा पोर्रोल्ता ताकतते ईरकुन कापाळा. 12 नना ई दुनियाते ईरतोनि मननेंके, निमे नाकु हीता नीवा पोर्रोल्ता ताकतते ओर्कुन कापाळतन. सिराप, दर्मसास्त्रमते रासता पोल्ले पूरा आयनाहाटीं बोरय्ते नासडेम आयना मत्ता ओन होळसि, वेरे बोरे नासडेम आया हिल्लुर, नना ओर्कुन कापाळतन. 13 नना इंदके निहगा वासंतन. गानि नावा आनंदम ओरा लोप्पो पुरागा आयना इंचि, इव पोल्लें नना इद दुनियाते मनेंकेने वेहंतन. 14 नीवा पोल्ले नना ईरकु वेहतन. आनि नना इद दुनियातोन आयोन. अल्हेन ईरगुडा इद दुनियातोर आयुर. अदुनहाटीं ई दुनियातोर ईरकुन हय्सेक हिल्लुर. 15 निमे ईरकुन इद दुनियाताल ओम इंचि नना पारतना कीसेक हिल्लेन, गानि पेद्दा देय्यमतालa ईरकुन कापाळा इंचि पारतना कीसंतन. 16 नना ई दुनियातोन आयोन, अल्हेन ईरगुडा ई दुनियातोर आयुर. 17 नीवा पोल्ले सत्तेम आंद, नीवा सत्तेमते ओर्कुन पवित्र कीम. 18 बल्हा अय्ते निमे नाकुन ई दुनियाते लोहतिन, अल्हेन नना ईरकुन दुनियाते लोहंतन. 19 नीवा सत्तेमते ओर पवित्र आयगोम इंचि, नावद ननेन उंदि पवित्र मोक्कुनलेह्का आतन.”
अंटोर विस्वासुल्कुनाहाटीं येसु पारतना कींतोर
20 “नना सिराप ईराहाटींगे पारतना कीसेक हिल्लेन, गानि बोरय्ते ईरा वेहना पोल्लेतुन केंजसि ना पोर्रो विस्वासम इर्रंतुर, ओरा हाटींगुडा नना पारतना कीसंतन. 21 बाबा! बल्हा अय्ते निमे नहगा, नना निहगा उंदि आसि मंतोमो, अल्हेन ओरगुडा उंदि आसि मननाहाटीं पारतना कीसंतन. नाकुन निमेन लोहतिन, इंचि दुनियातोर एरपाट कियना इत्ते, ओरगुडा मनांटे उंदि आया पींता. 22-23 निमे ना लोप्पो मंतिन, नना नि लोप्पो मंतन. निमे नाकु हीता कदरतुन नना ओर्क हीतन. मनम इंदके बल्हा उंदि आसि मंतोमो, अल्हेन ओरगुडा उंदि आसि मंदना. अल्हा मत्तेने, नाकुन निमे लोहतिन आनि नाकुन पावरम कीताप ओर्कुनगुडा पावरम कीसंतिन, इंचि दुनियाक एरपाट आया पींता.”
24 “बाबा! बोर्कुन अय्ते निमे नाकु हीतिनो, ओर निमे नाकु हीता कदरतुन हूळानाहाटीं, नना बगा मत्ते अगा ओरगुडा मनना इंचि, नना पारतना कीसंतन. बारित्ते इद दुनिया पुट्टका मुन्नेन निमे नाकुन पावरम कीतिन. 25 बाबा! निमेन सत्तेमंतुन आंदिन. ई दुनिया नीकुन एरपाट किय्यो. गानि नना एरपाट कींतन. आनि नाकुन निमेन लोहतिन इंचि ई सिस्युल्क एरपाट कींतुर. 26 ना पोर्रोटा नीवा पावरम ओरा लोप्पो मननाहाटीं आनि ननागुडा ओरा लोप्पो मनना इंचि, नीवा पोर्रोल्तुन ओर्क एरपाट कीसीतन. इंका मुन्नेगुडा एरपाट कीसि हीसेक मनंतन,” इंचेके येसु पारतना कीतोर.