येसुन हव्कना पिलान
22
1 पुल्लगा आयवा पिंडिता हारिना पंडुगु दग्गेर्क एव्सि मत्ता. इद पंडुगुन दाटसि होनना पंडुगुगुडा इंतुर.a 2 अस्के पेद्दा पेर्मालोर, दर्मसास्त्रम कराहना गुरुल्क ईर अंटोर उंदगा कलियसि, येसुन बल्हा हव्कना? इंचि पिलानकु कियालय दल्गुतुर. गानि लोकुल्कुंक येसुनपोर्रो मत्ता विस्वासमतुन हूळसि ओर वेरियतुर.यहुदल येसुन दोर्का पीसि हियना आय्डा कींतोर
3 पजा येसुना पन्नेंडु सिस्युल्कुनाल वरोर केरियोत नाटेना यहुदाना लोप्पो पेद्दा देय्यम होळियताb. 4 अस्के ओर पेद्दा पेर्मालोर आनि गुळिता कावेल कियना अदिकारिल्कुंक होंचि कलियतोर. कलियसि येसुन ओर बल्हा पीसि हिया पर्रांतोर इदुना बारेमते, ओरतोनि वळकतोर. 5 यहुदाना पोल्ले केंजसि पेद्दा पेर्मालोर आनि अदिकारिल्क वेल्लेन कूस आतुर. कूस आसि ओर, निमे कियना ई कबळहाटीं नीकु कोत्तां हींतोम, इंचि ओप्कुत्तुर. 6 अदुनहाटीं यहुदल बोरे लोकुल्क हिलवा जेगाते येसुन ओरा कयदे पीसि हियालय एदुर हूळसेक मनुंदुर.
सिस्युल्क पंडुगुना तयारीं कींतुर
7 पजा दाटसि होनना पंडुगु एव्ता. मूसाना नियम परकारम अद पंडुगुना मोदाटा रोजु लोतुक उंदि गोर्रे पोरिना मोक्कु हियमळ मत्ता. 8 अदुनहाटीं येसु, पत्रुन आनि योहानुन, “मिमेट मुन्ने होंचि दाटसि होनना पंडुगुना गाटो तयार कीम्टु अस्के मनोम तिनकोम,” इंचि ओर्कुन लोहतोर. 9 अस्के ओर, “मोमोट पंडुगुना गाटो बगा अट्टुकोम सामि?” इंचि येसुन पूसकीतुर. 10 अस्के येसु ओर्कु इल्हा वेहतोर, “मिमेट येरुसलेम सहरते होळियनेंके, मीकु वरोर मनकल पेद्दा अळकाते एर पीसि होननेंके कलियंतोर. ओर बद लोते अय्ते दांतोरो, अदे लोतागा मिमेटगुडा ओना पज्जो होंटु. 11 अगा होत्तस्के, आ लोता मालाकुंक, ‘गुरु ओना सिस्युल्कुनतोनि कलियसि दाटसि होनना पंडुगुना गाटो तिननाहाटीं हेळमितोर आगाना अर्रा बगा मंता, इंचि नीकुन पूसकीसंतोर,’ इंचि वेहाट. 12 अस्के ओर मीकु मिद्दे पोर्रोटा उंदि पेद्दा अर्रा हुप्संतोर. आ अर्राते अन्नि बेस तयार कीसि इरसि मंतां, अदे अर्राते मिमेट पंडुगुना गाटो तयार कीम्टु,” इंचि वेहतोर.
13 अस्के पत्रु आनि योहान होंचि हूळतुर अय्ते, येसु बल्हा वेहतोर अल्हेन अगा मत्ता. पजा ओर अग्गेने दाटसि होनना पंडुगुना गाटो तयार कीतुर.
येसुनद सिस्युल्कुनतोनि आकिर बोजनम
(मत्तयाल 26:20-30; मरकुस 14:17-21; 1 कुरिंति 11:23-25)
14 पजा दाटसि होनना पंडुगुना गाटो तिनना वेला एव्तस्के, येसु ओना प्रेरितुल्कुनतोनि कलियसि गाटो तिनालय उदतोर. 15 उदतस्के येसु ओर्कुन, “नाकु तिप्पल्क वायका मुन्ने मीवातोनि कलियसि इद पंडुगुना गाटो तिनना इंचि नाकु वेल्लेन आसे मत्ता. 16 नना मीकु वेहानद बतल इत्ते, इद पंडुगु बद पोल्लेतुन अय्ते हुप्संता, अद पोल्ले पेनदा राज्येमते पूरा आयनदाका नना इद पंडुगुना गाटो तिनोन.”
17 पजा ओर अंगुर पंडिना पानकमतोनि निंडिस मत्तद उंदि गिलास पीतोर आनि पेनदुक दन्यवाद कीसि अदुन ओना सिस्युल्कुंक हीतोर. हीसि येसु, “इदेट, दीन मिमेट पंचकुंचि उंटु. 18 नना मीकु वेहासेक मंतन, इय्याटाल पेन बदवेरदाका अय्ते दाना राज्येमतुन निल्होनो, अदवेरदाका नना मर्रा अंगुर पंडिना पानकम उन्नोन,” इंचि इत्तोर.
19 पजा येसु उंदि हारितुन पीसि, पेनदुक दन्यवाद कीतोर. आनि आ हारितुन तुकडां कीसि ओना सिस्युल्कुंक पंचि हीसेके, “इद हारि इत्ते, मीवाहाटीं मोक्कु आयना नावा मेंदुलता चिन्ह आंदु. नाकुन मति कियनाहाटीं मिमेट इल्हेन कीसेक मंटु,” इंचि ओर्कु वेहतोर. 20 पजा अंटोरा तिनमळ आतस्के, अंगुर पंडिना पानकमते निंडिस मत्ता गिलासुन पीसि, “इद पानकम इत्ते मीवातोनि पेन कियना पूना करारता चिन्ह आंदु. नना मीवाहाटीं नावा नेत्तुरतुन पोंगागोटंतन, अस्के पेन दाना राज्येमतुन निल्हंतता.c
21 “अयना हिके केंजाट, नाकुन दोकाते पीसि हियानोरगुडा इंदके इग्गे नातोनि गाटो तिनालय उद्दिस मंतोर. 22 पेन मुन्नेन वेहचि मत्ताप मनकना रूपमते पुटतोन नाकु हामुर अय्ते वायारे. गानि नाकुन दोकाते पीसि हियानोंक मात्रम वेल्लेन गोसा आयार,” इंचि वेहतोर. 23 येसु वेहतदुन केंजसि सिस्युल्क, “अल्हा कियानोर मना नड्डुम बोर मंतोर मरि?” इंचि ओरद-ओरे वळककुनालय दल्गुतुर.
सेवकुनलेसीं मनना
24 पजा “मना नड्डुम बोर पेद्दा आंद?” इत्ता पोल्लेहाटीं सिस्युल्कुंक ओर्क-ओर्के पोल्लें आतां.d 25 अस्के येसु ओर्कुन इल्हा इत्तोर. “इद दुनियाता राजालोर लोकुल्कुनपोर्रो जबरदस्तिते राज्येम कींतुर. अल्हा कीसि अयना, मोमोट लोकुल्कुंक बेस सहायम कियानोरम, इंचि वेह्कुंतुर. 26 गानि मिमेट ओरलेसीं आयना आयो. मीवा लोप्पोटाल बोरय्ते पेद्दा आंतन इंतोर, ओर अंटोरकन्ना सिन्नोनलेसीं आयना. आनि बोर मीवा लिडर मंतोर ओर सेवाकुनलेसीं आयना.e 27 असल पेद्दा इत्ते बोर आंद? बोरय्ते गाटो तिनालय उद्दांतोर ओरा? मरि उद्दुतोंकु गाटो वाटांतोर ओरा? गाटो तिनालय उद्दुतोरे पेद्दोड आंद. गानि नना मात्रम मीवा नड्डुम गाटो वाटाना सेवाकुनलेसीं मंतन.”
28 “मिमेट अय्ते नना तिप्पल्कुने मत्तस्केगुडा नावातोनि मत्तोर आंदिर. 29 अदुनहाटीं नावा बाबाल बल्हा नाकु राज्येम कियना अदिकारम हीतोर, अल्हेन ननागुडा मीकु अदिकारम हींतन. 30 अद अदिकारम बद इत्ते मिमेटगुडा नावा राज्येमते नावातोनि उद्दिसि तिनकिर, उनकिर. इंका राजगद्देन पोर्रो उद्दिसि इस्राएलतोरा पन्नेंड गोत्राल्कुनोरा न्यायम कीकिर,” इंचि इत्तोर.
पत्रु तप्पिच्कुंतोर इंचि येसु वेहांतोर
31 येसु मर्रा सिमोन पत्रुन इल्हा इत्तोर. “सिमोनु, ए सिमोनु हिके केंजा! मीकुन अंटोर्कुन वंजिन हेचाहताप हेचाह्चि मीवा विस्वासमता परिक्सा हूळानाहाटीं पेद्दा देय्यम पेनदुन अदिकारम तल्कता. 32 गानि निमे विस्वासमताल पजोळ्क होनाकोंटा मनना इंचि नना नीवाहाटीं पारतना कीतन. अयना निमे मर्रा विस्वासमते नाहेके तिरियतस्के नीवा दंटातोरा विस्वासमतुनगुडा गट्टिगा कीम,” इंचि वेहतोर.
33 गानि सिमोन पत्रु मात्रम, “सामि! नीवातोनि कलियसि जेलुंक होनालय इंका हायालयगुडा नना तयार मंतन,” इंचि इत्तोर. 34 अस्के येसु पत्रुन, “पत्रु नना वेहानद केंजा! इय्याला नर्कळ्क मोदाटा गोगोड कूसाका मुन्ने निमे, ‘नना येसुन एरपाट किय्योन,’ इंचि मूळ मल्कां इनकिन,” इंचि इत्तोर.
तकलिप अर्रालय तयार मंटु
35 पजा येसु ओना सिस्युल्कुन, “उंदि मल्का नना मीकुन कोत्तना पाकिट, जोरा इंका हेरपुह्क हिलाकोंटेने लोह्चि मत्तन. अस्के मीकु बतलन्ना तक्को होंचि मत्तना?” इंचि पूसकीतोर. अस्के सिस्युल्कु, “हिल्ले, बतले तक्को होना हिल्ले,” इंचि इत्तुर.
36 पजा येसु ओर्कु इल्हा वेहतोर. “मुन्ने लोकुल्कु नाकुन बेस हूळुंदुर गानि इंदके ओर नाकुन हय्सेक हिल्लुर अदुनहाटीं मिहगा बोरागना कोत्तना पाकिट मत्ते, दान पज्जोने पीकुन्निर, इंका जोरागुडा पीकुन्निर. अल्हेने कसेर हिलवोरु ओना कपडिं अम्मिसि उंदि कसेर असकुन्निर. 37 बारित्ते, नना वेहानद केंजाट! दर्मसास्त्रमते, ओन तप्पु कीतोरव्टे कल्पुतुर,f इंचि नावा बारेमते रासि मत्ता. दर्मसास्त्रमते नावा बारेमते बतल अय्ते राससि मंता, अद इंदके नावातोनि निजम आयमळे गावाले,” इंचि वेहतोर. 38 अस्के सिस्युल्क, “इद हुळा सामि, इव रोंडु कसेह्क मंतां,” इंचि इत्तुर. इत्तस्के येसु, “सरे! आंतां,” इंचि इत्तोर.
जय्तुन इनना गुट्टातगा येसु पारतना कियमळ
39 पजा अद लोताल पेय्सि ओना अल्वट परकारम, जय्तुन इनना गुट्टापोर्रो होत्तोर. ओना पज्जो ओना सिस्युल्क इंका होत्तुर. 40 अगा होत्तस्के येसु ओना सिस्युल्कुंक, “देय्यम मीवा परिक्सा एतामन्नि इंचि पारतना कीम्टु,” इंचि वेहतोर. 41 पजा येसु ओरागटाल, इच्चोन लक्कु होंचि टोंगरां ऊनतोर आनि इल्हा पारतना कियालय दल्गतोर: 42 “ए पेनबाबा! ओक्कला नीवा इच्चा मत्ते, नाकु वायाना ई तकलिबुन नावा पोर्रोटाल तप्पिच्चा. अयना नावा इच्चा मत्ताप आयो गानि नीवा इच्चा बल्हा मंता अल्हे जर्गि,” इंचि इत्तोर. 43 अस्के अगा उंदि पेनदा दूता स्वर्गमताल वासि ओन्कु ताकत हियालय दल्गता. 44 येसु वेल्लेन दुक्कमते निंडिसि पेनदुक पारतना कीतोर. ओर अल्हा पारतना कियनेंके ओना सेमटा, नेत्तुरलेसीं आसि बोट्टुक-बोट्टुक बूमिपोर्रो अरसेक मत्ता.g 45 पारतना कियमळ मारतारित्ते, येसु ओना सिस्युल्कुनहेके वातोर. अस्के ओर अंटोर, दुक्कमते तकांचि निद्रा होंचि मत्तद ओर हूळतोर. 46 अस्के येसु ओर्कुन, “मिमेट बारि निद्रा होत्तिर? तेदट! तेदसि देय्यम मीवा परिक्सा एतामन्नि इंचि पारतना कीम्ट,” इंचि इत्तोर.
यहुदल येसुन पीसि हींतोर
47 येसु इव पोल्लें वळकसेकेन मत्तोर. अच्चोटेन अगा उंदि लोकुल्कुना मंदा वाता. अद मंदातुन यहुदल पीसि वातोर(ई यहुदल येसुना पन्नेंड सिस्युल्कुनाल वरोर आंद). तच्चि ओर येसुन बुर्रालय ओना दग्गेर्क होत्तोर. 48 अस्के येसु ओन, “यहुदा, उंदि मुद्दु बुर्सि निमे मनकना रूपमते पुटतोन नाकुन दोकाते पीसि हियालय हूळसंतिना?” इंचि इत्तोर. 49 येसुन पियानदुन हूळसि कळमता सिस्युल्क, “सामि, महगा कसेह्क मंतां, मोमोट ईरकुन नर्क्कोमा?” इंचि पूसकीतुर. 50 अच्चोटेन ओरा लोप्पोटाल वरोर सिस्युड पेर्मालोरा लिडरना वरोर दासुन कसेटे हीतोर अय्ते ओना तिना केव नेमसोत्ता. 51 अस्के येसु, “मन्नि, अल्हा कियमटु,” इत्तोर. इंचि ओना नेमसोत्ता केवदुन इटसि ओन बेस कीतोर. 52 पजा येसु पेद्दा पेर्मालोर्कुन, गुळिता अदिकारिल्कुन आनि यहुदिल्कुना पेद्दाल्कुन, “मिमेट वरोन दोंगन दोर्का पियालय वाताप कसेह्क, गुत्पां पीसि नाकुन पियालय वातिरा? 53 नना अय्ते रोज गुळितगेन मीवातोनि मनुंदुन अस्के नाकुन पिया हिल्लिर. अयना इद मीवा वेला आंदु, हीकटता राज्येम कियना वेला आंदु,” इंचि इत्तोर.
येसुन पत्रु एरपाट किय्योन इंतोर
54 पजा ओर येसुन दोर्का पीसि अगटाल ओन पेर्मालोरा लिडरना लोन ओतुर. येसुन ओयनेंके पत्रुगुडा लक्कु मंचेके ओरा पज्जो-पज्जो होंचेके मत्तोर. 55 पेर्मालोरा लिडरना लोतगा नड्डुम दाराते तडिम माससि ओर अंटोर आ तडिम सुट्टु उद्दिस मत्तुर. पत्रुगुडा ओरतोनि अग्गेन उदतोर. 56 पत्रु तडिमतगा उद्दिस मत्ताहेंके तडिम वेलगु ओनपोर्रो अरसि उंदि दासि पोरिंक ओर दिसतोर. अस्के अद मुरतळ पत्रुनेके हूळसेके, “ई मनकलगुडा येसुनतोने मत्तोर,” इंचि इत्ता. 57 गानि पत्रु, “नना ओन एरपाट किय्योन बाई,” इंचि इत्तोर. 58 जेरसेप आतंका इंका वरोर मनकल पत्रुन हूळसि, “निमेगुडा ओराव्टेटाल वरोन आंदिन गदा,” इंचि इत्तोर. अस्के पत्रु, “हिल्ले दादा, नना आयोन,” इंचि इत्तोर. 59 दगेर-दगेरा उंदि गंटा आता पजा, इंका वरोर मनकल, “ईर गालिल एरियाता मनकनलेसीं वळकसंतोर, अदुनहाटीं निजमे ईर येसुनतोनि मत्तोर,” इंचि इत्तोर. 60 अस्केगुडा पत्रु, “निमे बतल वळ्कसंतिन दादा! नना ओन असले एरपाट किय्योन,” इंचि इत्तोर. अल्हा इत्ता-इनुडे मोदाटा गोगोड कूसता. 61 अस्केन येसु सामि पत्रुनेके तिरियसि हूळतोर. अस्के, इय्याला नर्कळ्क मोदाटा गोगोड कूसाका मुन्ने निमे, नना येसुन एरपाट किय्योन, इंचि मूळ मल्कां इनकिन, इंचि येसु सामि वेहचि मत्ता पोल्ले पत्रुंक मति वाता. 62 पजा ओर पलाते वासि इरगा अळालय दल्गतोर.
येसुन कारेड्डाल्क कींतुर
63 येसुन बोरय्ते पीसि मत्तुरो ओर मनकलोर येसुन कारेड्डाल्क कीसेके इरगा तनालय दल्गतुर. 64 ओना कळकुंक कप्पिड गंडा दोह्चि, “नीकुन इंदके बोर तंतोर, पेनदा आत्माता हेंदाल माकु वेहा!” इंचेके ओन पूस कियुंदुर. 65 अचोने आयका ओना कदर रेहनाहाटीं इंका वेल्लेन पोल्लें इत्तुर.
येसुन पंचादितगा ओंतुर
66 पंगातस्के यहुदि पेद्दाल्क उंदि पंचादि उपिस्तुर, अगा पेद्दा पेर्मालोर, दर्मसास्त्रम कराहना गुरुल्क मत्तुर. अद पंचादिते येसुन पीसि तच्चि ओरा मुन्ने निलाह्तुर. 67 पजा ओर येसुन, “अय्ते माकु वेहा! निमे पेन लोहता पिसागोटनोन किरिस्तुना?” इंचि पूसकीतुर. अस्के येसु ओर्कुन, “नना वेहिनागानि मिमेट नम्मिर. 68 इंका नना सवाल्कु पूसकियनागानि मिमेट जवाबगुडा हिय्यिर. 69 गानि इंदकेटाल, गडसेम मत्तंका मनकना रूपमते पुटतोन नना ताकतवार पेनदा तिना बाजुंक उद्दांतन,”h इंचि इत्तोर. 70 अस्के पंचादिते मत्ता अंटोर लोकुल्क, “अय्ते निमे पेनदा मर्रिना मरि?” इंचि पूसकीतुर. अय्ते येसु, “मिमेट इनानद निजमे,” इंचि इत्तोर. 71 पजा ओर अंटोर, “कुद्दु ओना तोळदाल ओरे वेहतद मनोम केंजतोम. इंका मनाकु बतल गवाइ गावाले?” इंचि इत्तुर.