पेनदुक नच्चना दानम
21
1 पजा येसु इच्चुर लक्कु नदर वाटतोर अस्के सिरमंत लोकुल्कु दान पेटिते पेनदाहाटिं कोत्तां वाटनेंके ओन्कु दिसतुर. 2 अस्के मुंडामोस्ता उंदि गरिब मुरतळगुडा दान पेटिते रेंडु सिन्ने रागि कोत्तां वाटनेंके येसु हूळतोर. 3 अस्के येसु, “नना निजम वेहासेक मंतन, इगे दान पेटिते कोत्तां वाटता अंटोर लोकुल्कुंकन्ना ई मुंडामोस्ता गरिब मुरतळे एक्को दानम कीता. 4 इल्हा नना बारि वेहासेके इत्ते, अंटोर बारे ओर्कु अवसरम हिलुवादान दानम कीतुर. गानि इद मुरतळ मात्रम दान्कु पिसनाहाटीं इरतादानगुडा पेनदुक वाटसीता,” इंचि इत्तोर.गुळि नासडेम आयना बारेमते येसु वळकांतोर
5 अस्के इच्चुर लोकुल्कु, “इद गुळिता बंडां हूळट बच्चोन सोक मंतां! इंका पेनदाहाटीं हीता सामानतोनि तयार कीता आ सिंगारम हूळट बच्चोन बेस मंता!,” इंचेके वळकसेके मत्तुर. 6 अस्के येसु ओर्कुन, “इंदके मिमेट हूळाना इव बंडां, उंदानपोर्रो उंदि हिलाकोंटा कूल्हना वेला वायनद मंता,” इंचि इत्तोर.
7 अस्के सिस्युल्कु, “गुरु, इव पोल्लें बस्के जर्गनुं? इंका इव जर्गनुं इंचेके बतल चिन्ह दिस्संता?” इंचि येसुन पूसकीतुर.
8 अस्के येसु ओर्कु इल्हा वेहतोर. “मीकुन बोरन्ना बोंकिचानुर, जेगर्ता मंटु. वेल्लेटोर लोकुल्कु नावा पोर्रोलते वासि, ‘पेन लोहता पिसागोटना किरिस्तुन ननाने आंदुन, अद वेला एवता,’ इंचि इनानुर. असंटोरा पज्जो होनमट. 9 लडाईं, पोटीना बारेमते केंजसि वेरियमट. ई लडाईं-पोटीं अय्ते तप्पाकोंटा जर्गनुंगें. गानि आकिर वेला मात्रम अच्चोटेने वायो.
10 “इंका जातिना पोर्रो जातिं, राज्येल्कुना पोर्रो राज्येल्क लडाईं आयनुं. 11 बगा-बगानो वेरियनसोंटा बुकंपाल्कु आयनुं, इंका कोन्नि जेगाने बारे इरगा करवु अर्रार, तीराता रोगाल्क पुट्टानुं. मब्बुने वेल्लेन वेरियनसोंटा गटनां जर्गनुं आनि इरगा पेद्दा-पेद्दा चिन्हां दिस अर्रानुं.
12 “गानि इवन्नि जर्गाका मुन्ने, मिमेट नावापोर्रो विस्वासम इरताहाटीं यहुदिल्कु मीकुन दोर्का पियानुर आनि वेल्लेन तकलिप कीसि मीवा न्यायम कियनाहाटीं दर्मसास्त्रम कराहना लोह्कुनगा ओयानुर, ओसि मीकुन जेलने वाटानुर. पजा मीवा इच्चुर पगातोर मीकुन राजुल्कुना मुन्ने आनि राज्यपालना पीसि ओयानुर. 13 दीनहेंदाल मीकु नावा बारेमते गवाइ वेहालय हर्रि दोर्कार. 14 इंचि मीवा न्यायम जर्गनेंके बतल वळककोम इंचेके मुन्नेन चिंता कियमट. 15 वेला वातस्के नना मीकु इसोंटा पोल्लें आनि बुद्दि हींतन गदा, मिमेट वळकनेंके मीवा पगातोर केंजसि वळकाकोंटा आयनुर, इंका मीवा पोल्लेक अड्डमगुडा वळका पर्राकोंटा आयनुर. 16 अयना मीवा तल्लुर-बाबो, तम्मुह्क–दादालोर, जीवातोर-हेळमितोर आनि मीवा दंटातोरे मीकुन पीसि पगातोर्कुंक हियानुर. अचोने आयका मीवाव्टेटाल इच्चुर्कुन हव्कानुरगुडा. 17 मिमेट नाकुन नम्मुताहाटीं अंटोर मीकुन हय्साकोंटा आयनुर. 18 इदंता अय्नागानि मीकुन बोरे नासडेम किया पर्रोर. 19 बोरय्ते आकिरदाका ओप्के पीसि मनांतुर, पेन ओर्कुन पिसागोटंता.
येरुसलेम नासडेम आयमळ
20 “हुळाट! सिपाइल्क येरुसलेम सुट्टु आतद मिमेट बस्के अय्ते हुळांतिर, अस्के सहर नासडेम आयना वेला एव्ता इंचि मिमेट इन्कुंटु. 21 अस्के यहुदिया एरियाते मनना लोकुल्कु अंटोर गुट्टनपोर्रो वित्तगोम, सहरते मननोर अंटोर सहरता पलाते पेय्सि होनगोम आनि नाटे मनना लोकुल्कु सहरते होळिया मन्नि. 22 बारित्ते पेनदा पिलान परकारम अव सिक्सा हियना रोजुक आंदु. दर्मसास्त्रमते राससि मत्ता अन्नि पोल्लें पूरा आयना वेला आंदु. 23 अव रोजकुने नेला तपसि मत्तव आनि मर्तल्लुह्कुंकa वेल्लेन गोसा आयार. बारित्ते इद देसेमपोर्रो वेल्लेन तिप्पल्क वायनुं आनि पेन दाना होंगु इद दुनियाता लोकुल्कुनपोर्रो हुप्सार. 24 इच्चुर मनकलोर कसेह्कुने कोह्ककुंचि हायानुर, इंक्किच्चुर मनकलोर्कुन बारे वेरे देसेमतोर्कुंक दोर्का पीसि हियनुर. पजा यहुदि आयवोर लोकुरा कालम मारनदाका, ओरु येरुसलेमतोर लोकुल्कुन ओरा कादा हिळु जारसि इर्रानुर.
वेरियाकोंटा दैरनेमते मनना
25 “पोळदु, वेळसि आनि सुक्काने चिन्हां दिस अर्रानु. इंका ई बूमिपोर्रो समुद्रमता पेद्दा तडां वायनुं, अस्के दाना तडाना सप्पुड केंजसि देसे-देसेल्कुना लोकुल्कु इरगा वेरियानुर. 26 मब्बुने मनानव अन्नि मेसलंतां. आनि इद दुनियाते वायना पीळान बारेमते विचारम कीसि लोकुल्कु वेरियानुर आनि ओरा जीवा पेय्सोत्ताप आयार. 27 अस्के मनकना रूपमते पुटतोन नाकुन पेद्दा ताकतते, जगा-जगा मेरस्सेके मब्बुनाल वायनेंके अंटोर लोकुल्कु हूळानुर. 28 इल्हा जर्गमळ सुरुव आतस्के मिमेट अंटोर मीवा तल्ला तेह्चि पोर्रोळ्क हूळट. बारित्ते पेन मीकुन होळसियना वेला दग्गेर्क एवसेकेन मंता.”
येसुना पोल्ले बस्केळक मनंता
29 पजा येसु उंदि सात्रम वेहालय दल्गतोर: “अद अंजिर मरातुन आनि केडाते मत्तव अन्नि मराकुन हुळट. 30 अवुना आकीं रालतद हूळसि, एद्दि कालम दग्गेर्के एव्ता इंचि मीकु बिराना तेळियसि दांता.b 31 अल्हेने नना मीकु वेहना पोल्लें जर्गानदुन हूळसि, पेनदा राज्येम दगेर्क एव्ता इंचि एरपाट कीकुंटु.”
32 नना मीकु निजम वेहांतन, इद पीळिता लोकुल्कु नासडेम आसि होनाका मुन्नेन इव अन्नि पोल्लें जर्गंनूं.c 33 बूमि, मब्बु नासडेम आसि होनानुं, गानि नावा पोल्ले मात्रम बस्केळ्क मनंता.
उसारते मंटु
34 “अदुनहाटी मिमेट पार्टिं किय्युड, कल उन्नुड इंका इद दुनियाता रंदिनेन मीवा मनसु मनना आयो. गानि नना मर्रा वायना रोजुd अचानक अर्राना कोम्मालेह्का मीवापोर्रो वासि अर्राकोंटा मीवद मिमेट जर्गता मंटु. 35 बारित्ते अद रोजु इद बूमिपोर्रो मनना अंटोर लोकुल्कुनपोर्रो अल्हेन अर्रानद मंता. 36 अदुनहाटीं वेल्लेन उसारते मंचि, बव अय्ते गटनां जर्गनद मंता, अव अन्नि गटनानाल पिस्सनाहाटीं ताकत दोर्कगोम इंचि बस्केळक पारतना कीसेक मंटु. अल्हा मत्तिरित्ते, बस्के अय्ते मनकना रूपमते पुटतोन नना वांतन, अस्के नावा मुन्ने वेरियाकोंटा नित्ता परकिट.”