यहुदि पेद्दाल्क येसुन पोल्ले पूसकींतुर
20
1 उंदि रोजु येसु लोकुल्कुंक गुळिते कराहचेके आनि बेसता कबुर वेहाचेके मत्तोर. अस्के पेद्दा पेर्मालोर, दर्मसास्त्रम कराहना गुरुल्क आनि यहुदि पेद्दाल्क ईर अंटुर कूळसि येसुनगा वातुर. 2 वासि, “निमे बद अदिकारमते इव कबाह्क कीसेक मंतिन?a इद अदिकारम निक बोर हीतोर? माक वेहा,” इंचि ओर इत्तुर. 3 अस्के येसु, “अल्हा अय्ते नना उंदि पोल्ले मीकुन पूसकींतन, 4 योहान हीता बपतिस्माताb अदिकारम पेनदाहेंदाल वाताना? हिलाकुंटे मनकना हेंदाल वाताना? वेहाट,” इंचि इत्तोर. 5 इत्तस्के ओर वरोंक-वरोर गुसगुसा वळ्कसेके, “मनम पेनदाहेंदाल इनानय्ते, ‘मिमेट बारि योहानुन विस्वास कीयिर?’ इंचि मनाकुन इनानुर. 6 अल्हेने मनकना हेंदाल इनानय्ते, अंटुर लोकुल्क मनापोर्रो बंडां हुक्कानुर, बारित्ते योहानुन पेनदा कबुरतोर इंचि अंटुर नमतुर,” इंचि इनकुत्तुर. 7 अदुनहाटीं ओरु, “माकु तेळियो ओनकु बगाटाल अदिकारम दोर्कतनो,” इंचि इत्तुर. 8 “अल्हा अय्ते ननागुडा बद अदिकारमते कीसंतन, मीक वेहोन,” इंचि येसु इत्तोर.पेनदा मर्रिनगुडा हव्कंतुर
9 अद आता पजा येसु मर्रा उंदि वेसोडि इल्हा वेहालय दल्गतोर. “वरोर मनकल अंगुर्कना बगिचा तयार कीसि, वेरेटोर्कु बटाइते हीतोर. आनि वेल्ले रोजकुनाहाटीं वेरे देसेम पेय्सि होत्तोर. 10 पजा बस्के अय्ते पंडिं कोय्यना वेला एवता, अस्के बटाइ कियानोर इच्चुं पंडिं हियानुर, इंचि अंगुर बगिचाता मालक ओना वरोर जीतागान ओराहेके लोहतोर. गानि बटाइ कियानोर ओन पीसि तंतुर आनि उत्ता कयकुने ओन लोहचितुर. 11 अस्के मालक इंकावरोन जीतागान लोहचितोर. बटाइतोर ओनगुडा पीसि तंतुर आनि ओन कदर हिलाकुंटा कीसि उत्ता कयकुने लोहचितुर. 12 पजा मर्रा इंकावरोन लोहचितोर. ओनगुडा बटाइतोर नोप्पिं आयानाल तंचि बगिचा हब्बेरे दोब्बिस हीतुर. 13 इल्हा आतस्के बगिचा मालक, ‘नना बतल कीकन?’ इंचि विचारम कीतोर. ‘सरे, इंदके नावा पावरमगल्ला मर्रिन लोहंतन, अस्के ओन हूळिसन्ना कदर हिय्युरा?’ इनकुंचि ओना मर्रिन लोहतोर. 14 गानि बटाइतोर मात्रम ओर वायानद हूळसि, ‘ईर अय्ते मालाकुना मर्रि आंदुर, ईन हव्कते ईद बगिचा मनाकु आयार,’ इंचि ओर-ओरे इनकुत्तुर. 15 पजा ओर अगा वातस्के, ओन बगिचाता पलाते ओसि हव्कतुर.
“इंदके अंगुर बगिचाता मालक ओर्कुन बतल कियानुर? 16 ओर वासि आ बटाइतोर्कुन हव्कनुर आनि अद बगिचा वेरेतोर्कुंक बटाइते हिय्यानुर,” इंचि वेहतोर.
अद पोल्ले केंजसि, “अल्हा बस्केने आयानायो,” इंचि अगा मत्तोर इत्तुर. 17 अस्के ओरेके हूळसि येसु इत्तोर,
“बद बंडाय्ते मिस्त्रिकु पोहचितुर
अदे बंडा मूलाता सेंकु बंडा आता.c
इल्हा पेनदा पोल्लें रासि मंतां, दीना अर्तम बतल आंदुं? 18 बोराय्ते अद बंडापोर्रो अर्रांतुर, ओर तुकडां-तुकडां आयनुर, गानि अद बंडा बोर पोर्रो अय्ते अरांता, ओर पिच्चि-पिच्चि आयनुर,” इंचि येसु इत्तोर.
19 अव पोल्लें केंजसि, दर्मसास्त्रम कराहना गुरुल्क आनि पेद्दा पेर्मालोर्कु, “ईर मनाकुने इव पोल्लें इंचेके मंतोर, ईन बल्हा अयना कीसि इंदके पियमळ गावाले,” इंचि इन्कुत्तुर. गानि लोकुल्कुनाहाटीं वेरियतुर.
यहुदि पेद्दा मनकलोरा उपायल्क
20 अस्के ओर, येसु बदाना तप्पु पोल्ले वळ्कते ओन पीसि रोम सरकारता राज्यपालनगा ओकोम इंचि, ओन पोर्रो नदर इरतुर. इच्चुर्कुन सत्तेमतोरालेसिं मंचि ओना आयडां गुंजालय येसुनगा लोहतुर. 21 ओर आयडां गुंजानोर येसुनगा वासि, “गुरु! निमे सत्तेम वळ्कनोन आनि अल्हेने करहानोन आंदिन, बोने सिन्ना-पेद्दा हूळिन आनि पेनदा हर्रि मत्तद-मत्तापे वेहानोन आंदिन इंचि माक एरपाटे मंता. 22 अय्ते रोम सरकारुंक कर दोहमळ पेनदा नियमते न्यायमेना, आयोना?d माक वेहा,” इंचि पूसकीतुर. 23 येसु ओरा पिलान एरपाट कीतोर. 24 कीसि, “नाक उंदि एंडिता बंडि हीम्टु,” इंचि इत्तोर. ओर हीतस्के, “इद बंडि पोर्रो बोना बोम्मा आनि पोर्रोल रासि मंता,” इंचि पूसकितोर. अस्के “रोम सरकारता कैसर राजानद,” इंचि ओर इत्तुर. 25 इत्तस्के, “बद कैसर राजानद मंता, अद कैसरुंक हीम्टु आनि बद पेनदुक हियानद मंता, अद पेनदुक हीम्टु,” इंचि येसु इत्तोर. 26 इल्हा लोकुल्कुना मुन्ने येसु इत्ता पोल्लेते आयडां गुंजानुर बतले तप्पु पिया पर्राहिल्लुर. गानि ओना पोल्लेते इचंत्रम आसि चुपचाप आतुर.
सदुकिरकुना उपायल्क
27 आता पजा इच्चुर सदुकि इनना गँगुनोर येसुनगा वातुर. (हातोर्क मर्रा जीवा अर्रो इंचि ईर इनुंदुर) 28 वासि, “गुरु, मूसाल मावाहाटीं इल्हा रासतोर गदा, ‘बोरे आयिर, पिलाल्क आयाका मुन्नेने ओर हाते, ओना मुत्तोन ओना तम्मुर तुंगसि, तादना वंसमताहाटीं मरि-मियड कनना,’ इंचि मंता. 29 अय्ते, उंदगा एडुर तादल-तम्मुह्क मत्तुर. ओरगाटाल पेद्दा दादल मर्मिं आतोर, गानि पिलाल्क आयाकेने हासोत्तोर. 30 हातस्के ओना पज्जोटोर तंगेन तुंगतोर, ओरगुडा पिलाल्क आयाकेने हातोर. 31 इंका वरोर ओना पज्जोटोरगुडा दान तुंगसि पिलाल्क आयाकेने हातोर. इल्हा एडुर तादल-तम्मुह्कगुडा दान तुंगसि, पिलाल्क आयाकेने हातुर. 32 ओर अंटुर हाता पजा अद मुर्तळिंका हाता. 33 अय्ते, ओर्क मर्रा जीवा अरतस्के, आ एडुर लोप्पोटाल अद बोना मुत्तो आयार? बारित्ते ओर एडुर इंका दानतोनि मर्मिं आसि मत्तुर,” इंचि इत्तुर.
34 अस्के येसु ओर्कुन, “ई दुनियाता लोकुल्कुने मर्मिं आयमळ आनि मर्मिं कीसि हियमळ जर्गंता. 35 गानि बोरय्ते हामुरताल मर्रा जीवा अरना लायक मंदनुर, ओर वायाना कालमते बस्केने मर्मिं आयुर आनि मर्मिं कीसि हियुर. 36 ओर पेनदा दूतानलेसिं मंचि ओर बस्केने हायुर. ओर्कुन पेन हामुरताल मर्रा जीवाते तेहताहेंका, ओर पेनदा पिलाल्क आयानुर. 37-38 पोत्तना पोदाता बारेमते मूसाल बतल रासतोर मिमेट हदवा हिल्लिरा? अब्राहाम, इसाक, याकोब ईर वेल्लेन मुन्ने हासोत्तुर. अयना मूसाल पेनदुन अब्राहाम, इसाक, याकोब मोळकना पेन इंचि इत्तोर. पेन हातोरद आयो गानि जीवाते मनानोरद आंद इंचि मनाकु एरपाट मंता. अद पेनदे पेनदुन एरपाट कियनोरा अंटोरा जीवां पिसंतां. इल्हा हातोर इंका जीवा अर्रंतुर इंचि मूसाल हुपिस्तोर.” इंचि येसु इत्तोर. 39 येसु वेहता पोल्लेतुन केंजिस, “गुरु! निमे बेस वेहतिन,” इंचि इच्चुर दर्मसास्त्रम कराहना गुरुल्क इत्तुर. 40 दाना पजा बोनके येसुन सवाल कियाना दैर्यनेम आया हिल्ले.
किरिस्तु दाविदुना मर्रि आंदुरा?
41 पजा येसु ओर्कुन, “पेन लोहना पिसागोटना किरिस्तुन दाविद राजाना वंसमतोर इंचि बारि इंतुर? 42-43 दाविद राजाले भजन संहिता पुस्तकमते इल्हा रासतोर.
“सामि पेन बाबाल, नावा सामिनe इत्तोर,
बच्चोरदाका नीवा पगातोर्कुन नीवा काल्कुनगा तायोन,
अच्चोरदाका नावा तिना बाजुंक उदिस मन, इत्तोर.” f
44 इल्हा दाविद राजाले किरिस्तुन, नावा सामि इंचि केयतोर. अस्के ओर दाविद राजाना वंसमतोर बल्हा आया परांतोर? इंचि ओर्कुन पूसकीतोर.
दर्मसास्त्रम कराहना गुरुल्कुनालेसिं किया मनि
45 अंटुर लोकुल्कु ओना पोल्लेतुन केंजसेके मननेंके, येसु ओना सिस्युल्कुन इल्हा इत्तोर, 46 “दर्मसास्त्रम कराहना गुरुल्कुनतोनि उसारते मंटु. ओर, पोर्रोटाल हिळुदाका पोळगु अंगिं केरसि पोंगुड-पोंगुड तिरियमड ओर्क बेस अनपिचंता, हाटुमते तिरियानोर ओर्कुन नमस्कारम कियागोम इंचि इनकुंतुर. यहुदि सास्त्रम कराहना लोह्कुनगा ओर्क उद्दालय मुन्नेटा कुर्सिं गावाले, गाटो तिनानगागुडा पेद्दाल्क उद्दाना कुर्सिनगा उद्दालय हूळंतुर. 47 ईर मुंडामोस्ता मुर्ताह्कुन मुळहांतुर, लोकुल्कुंक हूप्सालय वेल्लेनजेम पारतना कींतुर. गानि ईर्क मात्रम अंटोर्कन्ना एक्को पेन सिक्सा हियार,” इंचि इत्तोर.