येसु जकय्याना लोन दांतोर
19
1 अल्हा आता पजा, येसु यरिहो नाटेनाल होंचेके मत्तोर. 2 अद नाटेने वरोर जकय्या पोर्रोलतोर कर वसुल कियानोरा पोर्रो अदिकारि मत्तोर. ओर बागा सिरमंत मत्तोर. 3 येसु बोर आंदुर हूळंतन इंचि ओर इनकुत्तोर, गानि अगा वेल्ले गर्दि मत्ताहाटीं हूळा पर्रा हिल्लोर. बारित्ते ओर पोट्टिगा मत्तोर. 4 अदुनहाटीं ओर येसु होनना हर्दुक मुन्ने वित्सि, ओन हूळालय उंदि नेंडि मरा पोर्रो एकतोर. 5 येसु अद मरातगा एवतस्के पोर्रो हूळसि, “जकय्या, बिराना हिळु रेय्या! इय्याला नाकु नीवा लोने आगाना मंता,” इंचि इत्तोर. 6 इत्तारिते जकय्याल बिराना मराताल रेय्सि, कुसिते येसुन ओना लोन ओतोर. 7 येसु जकय्याना लोन होत्तद हूळसि लोकुल्कु, “ईर पापि मनकना लोन हेडमिं इंचि होत्तोर,” इल्हा गुल्गालय दल्गतुर. 8 पजा जकय्याल नित्तिसि सामिन, “सामि, नावा सम्सारमताल सगम गरिबोर्कुंक हींतन, नना बोनना मुळाहचि येततद मत्ते, येततदानकन्ना नालुं अंताल्कु एक्को मलाहचि हींतन,” इंचि इत्तोर. 9-10 अस्के येसु, “तप्सि होत्ता पापि लोकुल्कुन पह्कीसि, ओर्कुन पिस्सागोटालय मनकना रूपमते पुटतोन नना वातन. अदुनहाटीं ईरगुडा अब्राहामुना वंसमते पुटतोरे आंदुर इंचि, इय्याला ईना लोतोरु पापमताल पिस्तुर,” इंचि वेहतोर.पदि बंगारम बंडिना वेसोड
11 लोकुल्कु ओर वेहाना पोल्लें केंजसेके मत्तुर. अगटाल येरुसलेम सहर दग्गेरेने मत्ता. इंदके येसु येरुसलेमते एवतस्के ओर पेनदा राज्येम निलहानुर इंचि इनकुंचेके मत्तुर. अदुनहाटीं येसु ओर्क उंदि वेसोड वेहतोर. 12 “वरोर पेद्दा वंसमतोर मनकल मत्तोर, ओर राजल आसि वायालय लक्कुटा देसेमता पेद्दा राजानगा होत्तोर. 13 होनाका मुन्ने ओना पदि जीतागाह्कुन केयतोर, केयसि मनकंकु उंदि-उंदि बंगारम बंडि ओर्क हीसि, ‘नना मल्सि वायानादाका इव कोत्ताने मिमेट दंदा कीम्टु,’ इंचि इत्तोर.
14 “गानि नाटेना लोकुल्क ओन हय्साकोंदुर, अदुनहाटीं, ‘ओर मा पोर्रो राजेम कियमळ माकु इस्टाम हिल्ले,’ इंचि पेद्दा राजांक वेहालयक बुरतोर्कुन ओना पज्जोने लोहतुर. 15 पजा ओर राजाल आसि मल्सि वातोर. वाता पजा, ‘नना बंगारमता कोत्तां हीसि मत्तन, ओरु दंदा कीसि बच्चोक कोत्तां कमाय कीतुरो,’ इंचि हूळालय ओर्कुन केया वेहातोर. 16 मोदाटा जीतागाल वासि, ‘मालक! निमे हीता बंगारमता कोत्ताते नना इंका पदि बंगारमता कोत्तां कमाय कीतन,’ इंचि वेहातोर. 17 अस्के राजाल, ‘निमे बेसता कबळ कीतिन, निमे बेसता जीतागान, निमे सिन्न कबळगुडा विस्वासमते कीतिन, अदुनहाटीं पदि नाह्कुन ताकसालय निक अदिकार हींतन,’ इंचि इत्तोर. 18 अल्हेने इंका वरोर जीतागालगुडा वासि, ‘मालक! निमे हीता बंगारमता कोत्ताता हेंदाल नना इंका हेय्युं बंगारमता कोत्तां कमाय कीतन,’ इंचि इत्तोर. 19 इत्तस्के राजाल ओनगुडा, ‘निमे हेय्युं नाह्कुन पोर्रो अदिकारिन आकिन,’ इंचि इत्तोर. 20 मर्रा इंका वरोर जीतागाल वासि, ‘मालक! इद हूळा निमे हीता बंगारमता कोत्ता. इदुन नना पेगुने दोहाचि मकिच इरतन. 21 बारित्ते निमे कळ्क मनकन आंदिन, अदुनहाटीं नना वेरियतन. निमे बदय्ते इरा हिल्लिन अदुन तेंडकुंतिन, निमे वीतवावुन कोयंतिन,’ इंचि इत्तोर. 22 अस्के राजाल इत्तोर, ‘अरे सेड्डा जीतागा! नीवा तोळदाल पेय्सता पोल्लेतेने नीवा न्यायम कींतन. नना कळ्क मनकन, नना बदय्ते इरा हिल्लेन अदुन तेंडकुंतन, नना वीतवादुन कोयंतन इंचि निक एरपाटे मत्ता. 23 अय्ते अद कोत्तातुन बेंकते बारि इरा हिल्लिन? नना वातस्के नावा कोत्तातोनि वड्डि इंका वायवळ,’ इंचि इत्तोर. 24 पजा दग्गेरे नित्तिसि मत्तोरतोनि, ‘ओनगाटाल बंगारम कोत्ता एतट आनि बोनगा पदि बंगारमता कोत्तां मंतां ओनकु हीसिम्टु,’ इंचि इत्तोर. 25 अस्के ओर, ‘अय्ते सामि, ओनगा पदि बंगारम कोत्तां मंता गदा!’ इंचि इत्तुर. 26 अस्के मालक, नना मीक वेहंतन, बोरय्ते ओनकु दोर्कतदुन विस्वासमते उपयोग कींतोर ओनकु इंका हियमड जर्गंता, गानि बोरय्ते दोर्कतदुन उपयोग किय्योर ओनागा मत्तदगुडा तेंडकुनमड जर्गंता. 27 गानि बोरय्ते ना पगातोर, ‘ईर राज्येम किया मन्नि,’ इंचि इत्तुरो, ओर्कुन नावा मुन्ने तच्चि हव्कट, इंचि मालक इत्तोर,” इल्हा वेहाचि येसु वेसोडतुन माहतोर.
येसु सामि येरुसलेमते होळियंतोर
28 इव पोल्लें वेहता पजा येसु लोकुल्कुना मुन्ने-मुन्ने येरुसलेमतेके ताकसेके पेय्सतोर. 29 होनेंके जय्तुन मराकुना गुट्टा पक्काते मत्तव बेत्पागे आनि बेतनि नाह्कुना दग्गेरे एवतोर. अस्के ओना सिस्युल्कुनगाटाल इव्वुर्कु इल्हा वेहाचि लोहातोर, 30 “मिमेट मुन्ने दिस्सना नाटे होंट. अद नाटे होळियतारित्तेने, बस्केने बोर दानपोर्रो उदवद उंदि गाळदि पोरि दोहाचि मत्तद मीक दिसंता, दान लेहाकुंचि पीसि वटु. 31 अदुन लेहानेंके, ‘बारि लेहासेक मंतिट?’ इंचि बोरन्ना इत्ते, ‘इद सामिंक अव्सरम मंता’ इंचि वेहाट,” इंचि इत्तोर. 32 अस्के ओर होत्तुर, होतस्के येसु बल्हा वेहातोर अल्हेने ओर्क दिसता. 33 पजा ओर गाळदि पोरिन लेहानेंके, “दाना मालाकुल्क हूळसि, मिमेट दान बारि लेहासेक मंतिट?” इंचि इत्तुर. 34 अस्के ओरु, “सामिंक दीना अव्सरम मंता,” इंचि इत्तुर.
35 पजा गाळदि पोरिन येसुनगा तत्तुर. तच्चि ओरा कपडिं दानपोर्रो वाटतुर आनि येसुन दानपोर्रो उपिस्तुर. 36 येसु उदिस पेय्सतोर अस्के लोकुल्कु ओन कदर हूप्सालय ओरां कपडिं ओर होनना हर्दे तारतुर. 37 अल्हेने पजा ओर जय्तुन मराकुना गुट्टा पोर्राटाल हिळु रेय्यानेंके ओना पज्जो वायानुर अंटुर सिस्युल्कु ओर हूळता इचंत्रमाता कबाह्कुनहाटीं वेल्ले कुसिते जोर-जोरते पेनदुन इल्हा तल्सुकुनालय दल्गतुर.
38 “पेनदा अदिकारम पीसि वायाना राजाल वेल्लेन आसिर्वादम दोर्कतोर.a
पेनदाहेंदाल सांति वायि!
आनि पोर्रोटा पेद्दा पेनदा कदर आयि!”
इंचेके तल्सुकुनालय दल्गतुर.
39 अस्के मंदिताल इच्चुर परिसिल्कु, “गुरु! नीवा सिस्युल्कुन वरगेयमट इंचि गदरिच्चा,” इंचि इत्तुर. 40 पजा येसु ओर्कुन, “नना मीक वेहंतन, ओकाला ईर गिंटा चुपचाप मत्ते, इव बंडां वरगेयालय दल्गंतां,” इंचि इत्तोर.
येरुसलेमतुन हूळसि येसु अळंतोर
41 पजा येसु येरुसलेम सहरता दग्गेरे एवतोर, अस्के येसु अद सहरतुन हूळसि अळतोर. 42 अळसेके, “सांति दोर्कना पोल्लें इय्याला मीक तेळियसि मत्ते बेस आसि मनवळ, गानि इंदके अव पोल्लें मीवा कळकुंक दिस्सों. 43 मीवा पगातुर सुट्टु आसि मीकुन नालुं मूलानाल तकलिप कियानुर, असोंटा वेला वायार. 44 मीवा पेन मीकुन पिसागोटालय मीहगा वाता वेलातुन एरपाट किया हिल्लिर. अदुनहाटीं मीवा पगातुर मीकुन आनि मीवा पिलाल्कुन तोळिते कल्पनुर आनि बंडापोर्रो बंडा मत्ता गूरेतुन कूलाहचि समानम कियानुर,” इंचि इत्तोर.
गुळिते अम्मानोर्कुन येसु गेदमिस हीतोर
45 पजा येसु गुळिते होळियतोर, होळियसि अगा अम्मानोर्कुन गेदमिस हियालय दल्गतोर. 46 येसु ओर्कुन इत्तोर, “दर्मसास्त्रमते पेन इल्हा इत्ता, ‘नावा लोन पारतना कियाना लोन आंद इंचि.b गानि मिमेट दीन दोंगाल्कु मनना जागा कीतिर,’ इंचि रासि मंता,” इंचि इत्तोर.c