येसु येरूसलेमते होळियतोर
(मरकुस ११:१-११; लूका १९:२८-३८; योहान १२:१२-१९)
21
1 येसु आनि सिस्युल्क,
येरूसलेम सहरता दग्गेरे जय्तुन मराकुना गुट्टापोर्रो मनना बैतपागे इनना नाटेना दगेरा एव्तुर.
पजा येसु इव्वुर सिस्युल्कुन नाटे लोहतोर.
2 अस्के ओर्कु इल्हा वेहचि लोहतोर गदा,
“मुन्ने दिसना नाटे होंट,
अगा एवतस्के मीकु उंदि दोहाचि मत्ता गाडदी दिसंता.
दानतोनि दाना पोरीगुडा मनंता.
अवुन लेहकुंचि नहगा पीसि तटु.
3 अवुन तायनेंके बोरन्ना मीकुन ‘इवुन बारिंक ओसंतिर?’
इंचि पूसकीते,
‘सामिंक इवुना अवसरम मंता,’
इंचि वेहट.
अस्के ओर मीकुन अगटाल बिराना लोहचिंतोर.”
4 एनकटा पेनदा कबुरतोर वेहता पोल्लें निजम आयगोम इंचि इल्हा जर्गतां:
5 सियोनुना मिय्यड्क aवेहट गदा,
हूळाट,
मीवा राजाल मीहेके वासंतोर,
ओर सांत बुद्दितोनि आनि
बर्वु कांजना गाडदी पोरिनपोर्रो उदिस वासंतोर.b
6 अस्के सिस्युल्क होत्तुर आनि येसु वेहताप कीतुर.
7 सिस्युल्क गाडदी आनि गाडदी पोरिन येसुनगा पीसि वातुर.
पजा अवुन पोर्रो ओरां कपडीं तारतुर.
तारतारित्ते येसु आ गाडदी पोरिनपोर्रो उदुतोर.
8 आ गर्दिते वेल्ले लोकुल्क येसुनहाटीं ओर केर्ता कपडीं तेंडसि हरदे तारतुर.
इंका बोरो-बोरो अय्ते मराकुना कोम्मां नर्कीसि हरदे तारतुर.
9 अचोने आयका,
दाविद राजाना मर्रिंक होसन्नाc!
पेन बाबाना अदिकार पीसि वायानोंक,
आसिर्वादम दोर्किकांटी!
स्वर्गमता पेन बाबाना स्तुति आयिकांटी!
d
इल्हा इंचेके येसुना पज्जो-मुन्ने ताकसेक होनुंदुर.
10 येसु येरूसलेम सहरते वातस्के पूरा सहर अंता गडबड आता.
आनि लोकुल्क,
“ईर बोर आंदुर?”
इंचि पूस कियुंदुर.
11 अस्के,
“ईर गालिल एरियाता नासरेत नाटेना पेनदा कबुरतोर येसु आंदुर,”
इंचि लोकुल्क वेहुंदुर.
येसु गुळिते दांतोर
(मरकुस ११:१५-१९; लूका १९:४५-४८; योहान २:१३-२२)
12 पजा येसु अगाटा गुळिता दाराते होंचि,
अगा अम्मानोर्कुन,
अस्सानोर्कुन अंटोर्कुन पेच्हाचि गेदुमतोर.
अचोने आयका अगा मत्ता कोत्तां अदला-बदला कियानोरा बल्लन आनि पावरेल्कु अम्मानोरा कुर्सिन मिड्हाचि वाटतोर.
13 पजा येसु ओर्कुन,
“दर्मसास्त्रमते नावा लोतुन,
‘पारतना कियना लोन’ इंचि इंतुर इल्हा राससि मंता,
गानि मिमेट दीन दोंगाल्क मक्कना जेगा कीतिर,”
इंचि इत्तोर.
14 गुळिते येसुनगा गुड्डोर्क,
कुंटोर्क वातुर,
ओर्कुन अंटोर्कुन येसु बेस कीतोर.
15 गुळितगा येसु कीता पेद्दा-पेद्दा इचंत्रम आयना कबाह्क हूळसि आनि “दाविद राजाना मर्रिंक होसन्ना” इंचि पिलाल्कुना मोत्कुन्मडतुन केंजसि अगा मत्ता पेद्दा पेर्मालोर आनि दर्मसास्त्रम कराहना गुरुल्क इरगा होंगुंक वातुर.
16 अस्के ओर येसुन,
“पिलाल्क नीकुन बतल इंचंतुर,
अद निमे केंजतिना?”
इंचि पूसकीतुर.
अस्के येसु,
“हो केंजसंतन.
‘ए पेनबाबा,
निमे सिन्ना पिलाल्कुंक आनि पाल उनना पिलाल्कुंक स्तुति कियमळ कराहतिन,’
e इंचि दर्मसास्त्रमते राससि मंता.
अद मिमेट बस्केन हदवा हिल्लिरा?”
इंचि इत्तोर.
17 पजा येसु ओर्कुन अग्गेन होळसि,
सहरता पलाते बेतानि सहर होंचि,
अद नर्का अग्गेन मत्तोर.
कायां हादवा अंजिर मराकु येसु सापनेम हीतोर
18 हक्केरे येसु वापस येरुसलेमतेके होननेंके ओन्क कर्वेस्ता.
19 अस्के हरदा पक्काते उंदि अंजिर मरा दिसता,
अगा अंजिर पंडिं मंतां बारे इंचि आ मरातगा होंचि हूळतोर.
गानि आ मराकु उंदिंका पंडि मनाहिल्ले.
वट्टि आकिंगे मत्तां.
अस्के येसु,
“नीकु बस्केने कायां हादा मन्नि,”
इंचि मरातुन इत्तोर.
आनि अल्हा इत्ता इन्मडे आ मरा वत्सि होत्ता.
20 अल्हा आतद हूळसि सिस्युल्कुंक इचंत्रम आता.
अस्के ओर येसुन,
“गुरु,
अंजिर मरा इच्चोर बिराना बल्हा वत्सि होत्ता?”
इंचि इत्तुर.
21 अस्के येसु सिस्युल्कुन इत्तोर,
“नना निजम वेहंतन,
मीकु गिंटा बतले अनमानम हिलाकोंटा पेनदापोर्रो विस्वासम मनानय्ते,
नना बल्हा अंजिर मरातुन कीतनो अल्हा मिमेट इंका किया परांतिर.
आनि अचोने आयो इद गुट्टातुन,
‘निमे इगेटाल तेदसि समुद्रमते होंचि अर्रा!’
इंचि इनानय्ते,
अद होंचि समुद्रमते अरंता.
22 मिमेट पारतनाते बतल अय्ते विस्वासमते तल्कंतिरो अद मीकु दोर्कार.”
पेद्दाल्क येसुना अदिकार तल्कतुर
(मरकुस ११:२७-३३; लूका २०:१-८)
23 पजा येसु गुळिते होंचि,
पेनदा पोल्लें कराहसेक मत्तोर अस्के अगा पेद्दा पेर्मालोर आनि यहुदि पेद्दाल्क ओनागा वासि,
“निमे ई कबाह्क बद हक्कुते कीसंतिन आनि नीकु ई हक्कु बोर हीतोर?”
इंचि पूसकीतुर.
24 अस्के येसु ओर्कुन,
“नना मीकुन उंदि पोल्ले पूसकींतन,
मिमेट आ पोल्लेता जवाब हियनय्ते,
नना बद हक्कुते ई कबाह्क कीसंतनो अद वेहंतन.
25 इंदके मिमेट वेहट,
योहानुंक बापतिस्मा हियना हक्कु बगटाल दोर्कुता?
पेनदा हेंदाला,
हिलाकोंटे मनकलोर हेंदाला?”
इंचि पूसकीतोर.
दानहाटीं ओर वरोंक-वरोर इल्हा वळकुकुनालय दल्गुतुर.
“ओक्कला मनम पेनदाहेंदाल दोर्कुता इनानय्ते,
ओर इनानुर अल्हा अय्ते योहानुन बारि नम्मिर?
26 आनि मनकलोर्कुन हेंदाल दोर्कुता इनानय्ते,
लोकुल्कुना वेर्रे!
बारित्ते योहान पेनदा कबुरतोर आंदुर इंचि लोकुल्क नम्मुतुर.
27 अदुनहाटीं आ पेद्दाल्क माकु एर्का हिल्ले,”
इंचि इत्तुर.
अस्के येसु,
“अल्हा अय्ते,
नना इव कबाह्क बद हक्कुते कीसंतनो,
अद इंका मीकु वेहोन,”
इंचि इत्तोर.
इव्वुर मर्कुना वेसुड
28 केंजट,
नना उंदि सिन्ना वेसुड वेहंतन,
दान केंजसि मिमेट बतल इनकुंतिरो वेहट.
वरोर मनकंकु इव्वुर मर्क मत्तुर.
उंदि मल्का आ मनकल ओना पेद्दा मर्रिनगा होंचि,
“कोको,
निमे इय्याला अंगुर बगिचाते होंचि कबळ कीम,”
इंचि वेहतोर.
29 अस्के आ पेद्दा मर्रि “नना होनोन” इत्तोर गानि पज्जो ओर विचारम कीसि बगिचाते होत्तोर.
30 पजा आ मनकल ओना इंका वरोर मर्रिनगा होंचि,
“कोको,
इय्याला निमे अंगुर बगिचाते होंचि कबळ कीम” इंचि वेहतोर.
अस्के आ मर्रि,
“सरे दांतन बाबा!”
इत्तोर,
गानि ओर होनेन हिल्लोर.
31 अय्ते आ इव्वुर मर्कनाल बा मर्रि बाबोना पोल्ले केंजताप?
इंचि येसु ओर्कुन पूसकीतोर.
अस्के ओर,
“पेद्दा मर्रि केंजतोर,”
इंचि इत्तुर.
पजा येसु,
“नना निजम वेहंतन,
बोगामोताह्क आनि कर वसुल कियानोर मीकन्ना मुन्ने पेनदा राज्येमते दांतुर.
32 बारित्ते योहान मीकु सत्तेमता हर्रि हुप्सालय वातोर,
ओन मिमेट नम्मा हिल्लिर.
गानि बोगामोताह्क आनि कर वसुल कियानोर बारे ओन नमतुर,
इद मीकु एर्के.
अय्नागानि मीवा मनसु बदलांचलय आनि योहानुन नम्मालय मिमेट तयार आया हिल्लिर,”
इंचि इत्तोर.
बटाइतोना वेसुड
(मरकुस १२:१-१२; लूका २०:९-१९)
33 पजा येसु इल्हा वळकालय दल्गुतोर.
“इंदके इंकुंदि वेसुड वेहंतन केंजट,
वरोर मनकल मत्तोर.
ओन्कु उंदि नेली मत्ता.
ओर आ नेदे अंगुर बगिचा कीतोर.
आ बगिचा सुट्टु गूरे दोहाचि बगिचाता लोप्पेन अंगुर पंडिना पानकम तेंडालय उंदि पोक्का तवसि गानगु तयार कीतोर.
आनि दाना दग्गेरेने कावेलहाटीं उंदि मंडा वाटतोर.
पज्जो ओर वेरेतोर्क बटाइक हीतोर.
बटाइक हीसि लक्कुटा देसेम पेय्सि होत्तोर.
34 मर्रा अंगुर पंडिं कोयना वेला आतस्के पालुनाहाटीं ओना जीतागाह्कुन बटाइतोरहेके लोहतोर.”
35 पजा जीतागाह्क बगिचातगा वातस्के बटाइतोर ओर्कुन पीसि,
वरोन तंतुर,
वरोन हव्कतुर,
वरोनपोर्रो बारे बंडां हुक्तुर.
36 इद केंजसि बगिचाता मालक इंका एक्को जीतागाह्कुन लोहतोर.
ईरतोनि इंका बटाइतोर अल्हे कीतुर.
37 आकिरते,
“नावा मर्रिना मान ईरानुर,”
इंचि ओना मर्रिन ओरहेके लोहतोर.
38 गानि बटाइतोर,
ओना मर्रि वायानद हूळसि,
“ईर अय्ते नेदा मालकुना वारसदार आंदुर,
मत्तद अंता ईनके आयार.
दट ईन मनम हव्ककोम,
आनि मत्तद पूरा एतकोम,”
39 इंचि ओन पीतुर आनि बगिचाता पलाते ओसि हव्कतुर.
40 अस्के येसु ओर्कुन,
“मिमेट बतल इनकुंतिर,
बगिचाता मालक वायानय्ते आ बटाइतोर्कुन बतल कियानुर?”
इंचि पूसकीतोर.
41 “असोंटा दुस्टुल्कुन तंचि-तंचि हव्कानुर,
आयंका बोराय्ते पंटा पेयस्तारित्ते ओन्कु सेर-सगोम तूस कीसि हींतोर,
अद बगिचा ओन्के बटाइते हिय्यानुर,”
इंचि पेद्दाल्क येसुन इत्तुर.
42 अस्के येसु,
मिमेट दर्मसास्त्रमते हद्विसि मनगोम गदा,
बद बंडाय्ते मिस्त्रिकु पोहचितुर
अदे बंडा मूलाता पुनादि बंडाf आता.
इव पेन कीतव,
हूळालय मनाकु अद्बुताल्क आंदु.g
43 “मिमेट निजम इत्तिर.
केंजट,
दाना अर्तम इल्हा मंता.
पेन मीकु हियना स्वर्ग राज्येमतुन तेंडसि,
मीवा जेगाते दाना पोल्लेपोर्रो तिरियना वेरे जाति लोकुल्कुंक हींता.
44 बोराय्ते इद बंडापोर्रो अर्रांतुर,
ओर तुकडां-तुकडां आयनुर,
गानि अद बंडा बोर पोर्रो अय्ते अरांता,
ओर पिच्चि-पिच्चि आंतुर,”
इंचि येसु इत्तोर.