येसु एतुन अंगुर पानकम कीतोर
2
1 इद जर्गुता मूडोव रोजुननाड गालिल राज्येमता काना इनना नाटे मरमिं मत्तां, आ मरमिने येसुना यावल इंका मत्ता. 2 मरमिंकु येसुन आनि ओना सिस्युल्कुन इंका केयसि मत्तुर. 3 मरमिने अंगुर पानकम मारतस्के, येसुना यावल, “ओरागटा अंगुर पानकम मारसोत्ता कोको,” इंचि येसुन इत्ता.4 अस्के येसु, “यावा! निमे नाकु बारि वेहचंतिन? नना बतलन्ना कियना वेला इंका वाया हिल्ले,” इंचि इत्तोर. 5 पजा येसुना यावल अगा मत्ता जीतागाह्कुन, “ईर मीकु बतल वेहंतोरो, मिमेट अदे कीम्टु,” इंचि इत्ता. 6 यहुदिल्कुना कय्क-काल्क नोर्रना रिवाज कियनाहाटीं अगा बंडातोनि तयार कीतव हारूं पेरपुल्क मत्तां. आ उंद-उंदि पेरपु नूर (100) लीटर्कुना एर पिय्यनलायक मत्ता.
7 येसु, “आ पेरपुल्कुने एर निहाट,” इंचि आ जीतागाह्कुंक वेहतोर. अस्के ओर आ पेरपुल्क सीगा निंडानाल निहातुर. 8 अस्के येसु, “इंदके उंदि पेरपुनाल इच्चुर एर पीसि, ई कुळपु हियना पेद्दा मनकानगा ओम्टु,” इंचि आ जीतागाह्कुंक वेहतोर, अस्के ओर ओतुर. 9-10 पजा आ पेद्दा मनकल एतुन गिचचो उंचि हूळतोर अय्ते, अद एर पुरागा अंगुर पानकम आसि मत्ता. इद पानकम बोर तत्तोर, बगाटाल वाता इत्तद आ पेद्दा मनकंक तेळिया हिल्ले गानि आ जीतागाह्कुंक मात्रम एर्का मत्ता. पजा आ पेद्दा मनकल मरमिना पेडन केयसि, “अंटोर अय्ते पिव्वर अंगुर पानकम मोट्टा मोदाला हींतुर. आनि लोकुल्क पीरनिंडा उट्टारित्ते, पज्जोटाल सप्पटा पानकम हींतुर. गानि निमे अय्ते पिव्वर अंगुर पानकम इदवेरदाकागुडा मिगलिच्चि इरतिन,” इंचि इत्तोर.
11 इल्हा येसु गालिल राज्येमता काना नाटे इचंत्रम आयना कबळ कीसि, ओना पेद्दातनम हूपिस्तोर. इद ओना मोट्टा मोदाटा चिन्ह आंद. अदुनहाटीं ओना सिस्युल्क ओन नम्मुतुर.
12 पजा येसु, ओना यावल, ओना तम्मुह्क, ओना सिस्युल्क अंटोर कलियसि कपरनाहुम इनना सहर होत्तुर. ओर अंटोर अग्गेन कोन्नि रोजुक आगतुर.
येसु गुळितगा दांतोर
13 यहुदि लोकुल्कुनद दाटसि होनना पंडुगुa दग्गेर्क एवसि मत्ता. दानहाटीं येसु येरुसलेम होत्तोर. 14 अगा होत्तस्के गुळिता लोप्पो, लोकुल्क पेनदुक मोक्कु हियालय कुर्रां, गोर्रें, पावरेम पिट्टें अम्मुसेक दिसतुर. अचोने आयका सरकार कोत्तां पेनदा गुळिते वाटालय कुदरों इंचि, आ कोत्तां बदलांचि यहुदिल्कुना कोत्तां हिय्यानोरगुडा अगा उद्दिस मत्तद येसु हूळतोर. 15 हूळसि, उंदि नोंडे नोटसि पोट्टे तयार कीतोर, आनि गुळिताल अंटोर्कुन गेदुमतोर. गोर्रें, कुर्रन गुळिताल पलाते गेदमिसि, कोत्तां बदलांचानोरा बल्लन बोर्ला वाटसि कोत्तानंता लीकतोर. 16 पजा पावरेल्क अम्मनोर्कुन, “इवुन इगेटाल पलाते ओम्टु, नावा पेन बाबाना लोतुन हाटुमलेह्का कियमट,” इंचि इत्तोर.
17 अगा जर्गतदुन हूळसि, “नीवा लोता बारेमते नावा जीवा बागा तंलाडसंता,”b इंचि दर्मसास्त्रमते दाविद राजाल रास्ता पोल्ले ओना सिस्युल्कुंक मति वाता.
18 येसु अल्हा कीतदुन हूळसि यहुदि पेद्दाल्क ओनगा वासि, “इल्हा कियना अदिकारम नीकु मंता इंचि मोमोट नम्मनाहाटीं निमे माकु बसोंटा चिन्ह हुप्चंतिन?” इंचि पूसकीतुर. 19 अस्के येसु, “इद गुळितुन कुल्हाट, नना मूड रोजकुने मर्रा निल्हांतन,” इंचि जवाब हीतोर.
20 अस्के यहुदि पेद्दाल्क, “इदु गुळितुन दोहालय नल्पै हारुं वर्सां दल्गुतां. अय्ते निमे दीन मूड रोजकुने बल्हा निल्हांतिन?” इंचि पूसकीतुर.
21 गानि येसु मात्रम ओना सतता मेंदुलता गुळिता बारेमते वळ्कतोर. 22 येसु हासि मर्रा जीवाते तेदतस्के ओना सिस्युल्कुंक इद पोल्ले मति वाता. अस्के ओर दर्मसास्त्रमते रासि मत्तादुन आनि येसु वेहता पोल्लेन नम्मुतुर.