योहान रासता बेसता कबुर
पेनदा पोल्ले मनकना रूपमते वाता
1
1 बतले पुट्टका मुन्ने पोल्लेa मत्ता. आ पोल्ले पेनतोनि मत्ता. आ पोल्ले पेन आंद. 2 आ पोल्ले मुन्नेटाले पेनतोनि कलियसि मत्तोर. 3 दुनियाते मननव अन्निटवुन, पेन ओनाहेंदाले पुटिस्ता. ओर तप्पा बतले तयार आया हिल्ले. 4 ओना लोप्पो जीवा मत्ता. आ जीवे अंटोर लोकुल्कुनाहाटीं वेलगु आता. 5 आ वेलगु हीकटते एल्गंता. आनि हीकट वेल्गुन बस्केन गेल्सा परो.6 पेन वरोर कबुरतोन लोहता, ओन पोर्रोल योहानb. 7 आ वेलगुना बारेमते ओर गवाइ वेहतस्के ओना पोल्ले केंजसि, अंटोर लोकुल्क आ वेलगुनपोर्रो विस्वासम कियना, इंचि ओर वेहालय वातोर. 8 आ वेलगु योहान आयोर. गानि लोकुल्कुंक आ वेलगुना बारेमते गवाइ वेहालय योहान वातोर. 9 हरेक मनकंक निजमाता वेलगु हियानोर, इद दुनियाते वासेक मत्तोर.
10 ओर इद दुनियातेन मत्तोर. ओनाहेंदाले पेन ई दुनियातुन पुटिस्ता. गानि ई दुनिया ओन एरपाट किया हिल्ले. 11 ओर्कुन अग्गेन ओर वातोर, गानि कुद्दु ओना लोकुल्केc ओन ओप्कुना हिल्लुर. 12 गानि बोरय्ते ओन ओप्कुंचि ओना पोर्रोल पोर्रो विस्वासम कीतुरो, ओर्क अंटोर्क पेनदा मर्क-मियाह्क आयना अदिकारम ओर हीतोर. 13 पेनदा मर्क-मियाह्क आयमळd इत्ते मनकना पीटाल, मनकना इच्चा मत्ताप पुटमळ आनि मुय्दोना इच्चा मत्ताप पुटमळ आयो. गानि पेने ओर्कुन दाना संतानम कीकुंता.
14 आ पोल्ले मनकना रूपमते मारियता. अद दया, सत्तेमतोनि पुरागा निंडिस मना नड्डुम जेगा आता. मोमोट कदरतुन हूळतोम. अद कदर बाबाना वरोरे मर्रिना कदरलेंसी मत्ता. 15 ओना बारेमते योहान, “नावा पज्जोटाल बोरय्ते वायनद मत्तोर, ओर ईरे आंदुर. ओर नाकन्ना वेल्लेन मुन्नेटाल मत्तोर इंचि नाकन्ना ओर वेल्लेन पेद्दोड,” इल्हा लोकुल्कुंक लगांचि मोत्कुंचेके गवाइ वेहतोर.
16 ओर अन्नि तीरकुने पुरागा मत्ताहेंका, ओनहेंदाल मनाकु अंटोर्क दयाता आसिर्वादम पोर्रो आसिर्वादम दोर्कता. 17 मूसाल इनानोनहेंदाल पेन मनाकु नियमाल्क हीता. गानि दया आनि सत्तेम मनाकु येसु किरिस्तुनाहेंदाल दोर्कता. 18 पेनदुन बस्केने बोरे हूळा हिल्लुर. गानि पेन बाबाना संकाते मनना ओना वरोरे मर्रि, ओरे मनाकु ओन हूपिस्तोर.
येसुना बारेमते योहानुना गवाइ
19 “निमे बोन आंदिन?” इंचि योहानुन पूसकियालय येरुसलेम सहरते मनना यहुदि पेद्दाल्क, इच्चुर पेर्मालोर्कुन आनि लेवि जातितोर्कुनe, ओनगा लोहतस्के योहानुना गवाइ इल्हा मत्ता. 20 अस्के, “नना किरिस्तुन आयोन,” इंचि योहान पोल्ले मक्साकोंटा कबुल कीतोर. 21 अस्के पेर्मालोर्क आनि लेवि जातितोर, “अय्ते निमे बोन एलियन आंदिना?” इंचि पूस कीतस्के योहान, “हिल्ले! नना एलियानिंका आयोन,” इंचि इत्तोर. अस्के ओर, “हिलाकोंटे निमे पेनदा कबुरतोना?” इंचि इत्तस्के, “नना पेनदा कबुरतोनिंका आयोन,” इंचि योहान इत्तोर. 22 अस्के ओर लोकुल्क ओन मर्रा, “अय्ते मरि निमे बोन आंदिन? माकुन लोहतोर्कुंक मोमोट होंचि बतल वेहकोम? अदुनहाटीं नीवा बारेमते निमे बतल वेहकुंतिन, माकु वेहा,” इंचि पूसकीतुर. 23 अस्के, यशायाह इनना पेनदा कबुरतोर मुन्ने वेहताप, “सामिनाहाटीं सवरटा हर्रि तयार कीम्टु, इंचि केडाते मोत्कुनानोना अल्किरतुन ननाने आंदुन,” इंचि योहान ओर्क वेहतोर.
24-25 योहानुन पूसकियालय वाता परिसि लोकुल्क, “निमे किरिस्तुन आयिन, एलियन आयिन, पेनदा कबुरतोनगुडा आयिन. असोंटस्के निमे लोकुल्कुंक बारि बापतिस्मा हीसंतिन?” इंचि योहानुन पूसकीतुर.
26 अस्के योहान, “नना अय्ते बापतिस्मा एततोनि हींतन. गानि इग्गे मीवा नड्डुम वरोर नित्तिसि मंतोर, ओन मात्रम मिमेट एरपाट किय्यिर. 27 नावा पज्जोटाल वायानोना कादा हेरपुमता नोंडे लेहना विल्वागुडा नाकु हिल्ले,” इंचि योहान जवाब हीतोर.
28 इवन्नि गटनां योर्दन बेरेटा हब्बेरे, पोळदु पेय्सनेंके मनना बेतानि इनना नाटे जर्गतां. अगा योहान बापतिस्मा हियुंदुर.
येसु सामिए पेनदा मर्रि
29 इंकुंदि रोजु योहान, येसु ओनाहेके वायनद हूळसि, “अद हूळाट, दुनियातुन पापमता सिक्साताल तप्सानाहाटीं मोक्कु आयाना पेनदा गोर्रे पोरिनसंटोर! 30 नना दीनकन्ना मुन्ने वेहचि मत्तन गदा, नावा पज्जोटाल वरोर वायाना मंतोर, ओर नाकन्ना पेद्दोड आंदुर. बारित्ते, ओर नाकन्ना वेल्लेन मुन्नेटाल मत्तोर इंचि! अद ईना बारेमतेन आंद. 31 ओर बोर आंदुर कुद्दु नाके तेळियो. गानि इस्राएलता लोकुल्क ओर दिसगोम, इंचि नना एततोनि बापतिस्मा हियालय वातन,” इंचि योहान इत्तोर.
32-33 मर्रा योहान येसुना बारेमते इल्हा गवाइ वेहालय दल्गतोर, “नना कुद्दु ओन एरपाट कियाकोंदुन. गानि एततोनि बापतिस्मा हियालय नाकुन लोहता पेने नाकु वेहचि मत्ता, ‘बोन पोर्रो अय्ते पवित्र आत्मा पावरेम पिट्टे लेह्का आसि रेयनेंके निमे हूळंतिन, ओरे लोकुल्कुंक पवित्र आत्माते बापतिस्मा हियानोर आंदुर,’ इंचि. पवित्र आत्मा पावरेम पिट्टे लेह्का आसि स्वर्गमताल हिळु रेय्सि, ओना पोर्रो वासि उद्तद नना हूळतन. 34 इदंता नना नावा कळ्क निंडा हूळतन. अदुनहाटीं, ‘ईरे पेनदा मर्रि आंदुरf,’ इंचि नना गवाइ हीसंतन,” इंचि योहान वेहतोर.
येसुना मोदाटा सिस्युल्क
35 इंकुंदि रोज योहान ओना सिस्युल्कुनाल इव्वुर सिस्युल्कुनतोनि नित्तिसि मत्तोर. 36 अस्के येसु ओना दग्गेटाल होननद हूळसि, “हूळाट, पेनदा गोर्रे पोरि,” इंचि इत्तोर.
37 योहान इत्ता पोल्ले केंजसि ओना इव्वुर सिस्युल्कु येसुना पज्जो होत्तुर. 38 येसु पजोळ्क तिरियसि हूळतोर अस्के ओर इव्वुर ओना पज्जो वायनद हूळसि ओर्कुन, “मिमेट बतल पह्कसंतिर?” इंचि पूसकीतोर. अस्के ओर, “रब्बीg! निमे बगा मनांतिन?” इंचि इत्तुर.
39 अस्के येसु ओर्कुन, “वट हूळकिर,” इत्तोर. अस्के ओर येसुनतोनि होंचि ओर मनना जेगातुन हूळतुर. आनि येसु मनना जेगातगा एवसि ओनतोनि अग्गेन मत्तुर. अस्के नूल्पेळतां नालूं एगसेक मत्ता.
40 योहानुना पोल्ले केंजसि येसुना पज्जो होत्ता इव्वुर सिस्युल्कुनाल वरोन पोर्रोल आंद्रेयल. ई आंद्रेयल, सिमोन पत्रु इनानोना तम्मुर आंदुर. 41 आंद्रेयल अगटाल सवरगा ओना दादल सिमोन पत्रुंक होंचि कलियतोर. कलियसि, “दादा मोमोट मेसय्यांक इत्ते किरिस्तुंक कलियतोम,” इंचि इत्तोर. 42 पजा आंद्रेयल ओना दादल सिमोन पत्रुन येसुनगा पीसि वातोर. येसु सिमोनुन हूळसि, “निमे योहानुना मर्रि सिमोन आंदिन. गानि इंदकेटाल नीकुन केपा इत्ते पत्रु इंचि केयनुर,” इंचि इत्तोर.
43 इंकुंदि रोज येसु गालिल राज्येमते होनना निरनायम एततोर. अस्के पिलिपुन कलियसि, “निमे ना पज्जो वा,” इंचि इत्तोर. 44 पिलिप, आंद्रेयल आनि पत्रु ईर मुव्वुरगुडा बेतसेदा इनना सहरतोरे आंदुर. 45 पजा पिलिप होंचि नतेनलुंक कलियतोर. कलियसि, “बोना बारेमते अय्ते मूसाल नियमाल्कुने रासतोर, ओर माकु दोर्कतोर. ओर नासरेत नाटेना योसेप इनानोना मर्रि येसु आंदुर,” इंचि वेहतोर.
46 अस्के नतेनल, “अल्हाना! नासरेततालगुडा बेसता पोल्लें वाया परंतंगा?” इंचि इत्तोर. अस्के पिलिपु, “अय्ते निमेन वासि हूळा!” इंचि इत्तोर.
47 येसु नतेनलुन ओनहेके वायनद हूळसि ओना बारेमते, “अद हूळाट, निजम इस्राएल मनकल. ओना लोप्पो बतले दोकाते पोल्ले हिल्ले,” इंचि इत्तोर.
48 अद केंजसि नतेनल, “नना बसंटोन, बसंटोन आयोन नीकु बल्हा एर्का?” इंचि येसुन पूसकीतोर. अस्के येसु, “पिलिप नीकुन केयाका मुन्ने, निमे अंजिर मर्रा हिळु मत्तिन. अस्केन नना नीकुन हूळतन,” इंचि इत्तोर.
49 अस्के नतेनल, “रब्बी, निमे पेनदा मर्रिन आंदिन, इस्राएलता राजान आंदिन,” इंचि इत्तोर.
50 अस्के येसु, “नना नीकुन अंजिर मर्रा हिळु मन्नेंकेन हूळतन इंचि वेहताहेंका नाकुन नमसंतिना? इंका मुन्ने इदुंकन्ना पेद्दे-पेद्दे पोल्लें हूळकिन,” इंचि जवाब हीतोर. 51 आनि “हिके केंजट, नना निजम-निजम वेहासेक! स्वर्गम बैय्यरा आयनद हूळकिर, पेनदा दूतां मनकना रूपमते पुटतोना पोर्रो एक्कानदुन-रेय्यानदुन हूळकिर,”h इंचि ओर्क वेहतोर.