बापतिस्मा हियना योहान
3
1-2 कोन्नि वर्साना मुन्ने पेनदा पोर्रोलते एते मुळ्हाचि बापतिस्माa हियना योहान अद कालमते यहुदिया एरियाता केडाते,
“मिमेट मनसु मार्सकुंटुb,
बारित्ते स्वर्ग राज्येम दगेर्क एव्ता,”
इंचेके वरगेयसि वेहालय दल्गुतोर.
3 एनकटा कालमते यशयाल इनना पेनदा कबुरतोर,
ई योहानुना बारेमते इल्हा वळकािस मत्तोर:
पेनदाहाटीं हर्रि तयार कीम्टु,
आनि दाना हर्रि सवरगा कीम्टु,
इंचि केडाते केयानद उंदि अल्किर केंजा वाता.c
4 आ योहान लोटापेटा बूराता अंगि केरसि नडिक तोलदा पट्टा हुट्कुंचि मनुंदुर.
ओर गोल्लाबामाd आनि तेने इवे तिंडी तिनुंदुर.
5 येरूसलेम सहर आनि यहुदिया एरियाता अन्नि जेगानाल आनि योर्दन बेरेटा सुट्टु-मट्टुना जेगाता लोकुल्क योहानुना कराहमडतुन केंजालय वायुंदुर.
6 वाता लोकुल्क ओरा पापाल्क ओप्कुंचि योहानुना कयदे योर्दन बेरेडते बापतिस्मा येतकुनुंदुर.
7 ओर बापतिस्मा हियना जेगातगा वेल्लेन मंदि परिसिल्कe,
सदुकिर्कf वायानद हूळसि योहान ओर्कुन,
“ए नय तरासकुनसंटोरिटा,
मी पोर्रो वायना पेनदा होंगुनाल मिमेट तप्सि होना परांतिरा?
8 अय्ते मरि,
निजमे मीवा मनसु मार्सकुत्तिर इंचि मिमेट रुजुव कीसि हुप्सट.
9 नना मीकु वेहनद बतल इत्ते,
पेन अब्राहामुनहाटीं इ बंडानालगुडा पिलाल्कुन पुट्सा परांता.
इंचि मिमेट ‘अब्राहाम मा बाबाल आंदुर,’
इंचि मीवद मिमेटे मनसुल्कुने इनमटु.
10 इंदके मराकुना हिह्कुनगा मर्सु इरसि मंता.
बव मराकुंक अय्ते बेसता पंडि हादोंगों,
अवुन नर्कीसि तडमिते वाटमळ जर्गंता.
11 मिमेट मीवा मनसु मार्सकुत्ताहाटीं नना मीकु एते मुळ्हाचि बापतिस्मा हिसेक मंतन.
गानि नाकन्ना सक्तिमंतुड नावा पज्जोटाल वासंतोर.
ओना हेरपुह्कुन इटाना लायकगुडा नना हिल्लेन.
ओरे मीकु पवित्र आत्माते आनि तडमिते बापतिस्मा हींतोर.
12 ओना कयदे उंदि हेती मंता.
ओर ओना कडातुन बेस साप कीतारित्ते गोह्कुन तूरपाल्क पीसि गुम्मिते दोसंतोर आनि पोट्टुनबारे बस्केन पिर्रुवा तडमिते वाटसि बोडसंतोर,”
इंचि इत्तोर.
योहान येसुंक बापतिस्मा हींतोर
(मरकुस १:९-११; लूका ३:२१-२२; योहान १:२९-३४)
13 अवे तूकुल्कुने येसु गालिल एरियाताल योहानुना कयदे बापतिस्मा एतालय योर्दन बेरेडताहेके वातोर.
14 अस्के योहान,
“नना नीवा कयदाल बापतिस्मा येतकुनगोम,
गानि निमे नहगा वासि बापतिस्मा एतकुन्मळा!”
इंचि येसुन आपालय हूळतोर.
15 अस्के येसु,
“पेनदा इच्चागुडा मनम इल्हेन कियाना इंचि मंता.
अदुनहाटीं ई दंडकम इल्हेने जर्गिकांटी,”
इंचि इत्तोर.
इल्हा योहान येसुंक बापतिस्मा हियालय तयार आतोर.