देय्यमता हेंदाल येसुना परिक्सा
(मरकुस १:१२-१३; लूका ४:१-१३)
4
1 पजा देय्याल्कुना मुक्यनाa हेंदाल येसुना परिक्सा आयना इंचि पेनदा आत्मा ओन केडाते ओता.
2 केडाते येसु नल्पै रोजकु आनि नल्पै नर्कां ओक्का पोद्दु मत्तोर.
अदुनहाटीं येसुंक बागा कर्वेस्ता.
3 अस्के देय्यम येसुनगा वासि,
“ओक्कला निमे पेनदा मर्रिन आते ई बंडां हारिं आयिं इंचि आदेस हीम,”
इंचि इत्ता.
4 अस्के येसु आ देय्यमतुन,
दर्मसास्त्रमते इल्हा राससि मंता,
मनकल सिराप वट्टि हारिं तिंचे पिस्सोर,
गानि पेनदा तोडदाल पेय्सना उंदि-उंदि पोल्लेता हेंदाल पिस्संतोर,
b
इंचि इत्तोर.
5 पजा आ देय्यम येसुन येरूसलेम इनना पवित्र सहरते ओता आनि गुळि पोर्रो कोस्सा कोड्डीतगा निल्हाचि,
6 ओक्कला निमे पेनदा मर्रिन आते हिडु दुनका,
बारित्ते दर्मसास्त्रमते राससि मंता,
नीकुन कापाडलय पेन दाना दूतांक आदेस हींता,
आनि आ दूतां वासि नीवा काल्कुंक देब्बा दल्गा मन्नि इंचि
पोर्रोटद पोर्रेन अंदकुंतां,
c
इंचि देय्यम इत्ता.
7 अद केंजसि येसु,
दर्मसास्त्रमते इल्हागुडा राससि मंता गदा,
निमे नीवा पेनदा परिक्सा एतुमा,
d
इंचि इत्तोर.
8 आयंका आ देय्यम येसुन उंदि पेद्दा एत्तु गुप्पापोर्रो ओसि ओन्कु दुनियाता राज्येमकु आनि अवुना पेदातनाल्क बोत्तिगा हुपिच्चि,
9 “निमे नावा मुन्ने वंगिस,
नावा काल्क मोळकतिन इत्ते अवंता बोत्तिगा निके हींतन,”
इंचि इत्ता.
10 अस्के येसु दान,
ए देय्यमतुना हब्बेरे होन.
बारित्ते,
निमे नीवा पेनदुके मोळकाना,
आनि दानादे सेवा कियाना.
इल्हा दर्मसास्त्रमते राससि मंता,
e
इंचि इत्तोर.
11 अल्हा इत्तरित्ते देय्यम ओन होळसि होत्ता आनि पेनदा दूतां वासि येसुना सेवा कियालय दल्गुतां.
येसु बेसता कबुरf वेहालय सुरु कींतोर
12 योहानुन जेलने वाटतुर इंचि येसुंक तेळिय्ताहेंका ओर गालिल एरियाता नासरेत नाटेने होत्तोर.
13 अगटाल नासरेत नाटेने आगाकोंटा कपर्नाहुम इनना सहर होंचि मनालय दल्गतोर.
आ सहर गालिल सेरवु पका पीसि मनना नप्ताली आनि जबलुन इनना एरियांक दल्गिसि मंता.
14 ओर अगा मत्ताहाटीं यसयाल इनना पेनदा कबुरतोनतोनि पेन वेहता पोल्ले निजम आता.
आ पोल्ले इल्हा मत्ता,
15 जबलुन आनि नप्ताली एरियाता सेरवुना हरदा हेंदाल,
योर्दन बेरेटा हब्बेटा बाजुंक,
वेरे जातितोरा गालिल एरियाते,
16 बोराय्ते लोकुल्क हीकटते
उदिस मत्तुरो
ओर पेद्दा वेलगुन हूळतुर;
आनि बोर पोर्रो अय्ते हामुरता निडा अर्सि मत्तानो
ओर अंटोरपोर्रो वेलगु अर्ता.g
17 अस्केटाल येसु “मनसु मार्सकुंटु,
बारित्ते स्वर्ग राज्येम दगेर्क एव्ता” इंचि वेहालय सुरुव कीतोर.
येसु सिस्युल्कुन पेर्रांतोर
18 येसु गालिल सेरवु ओड्डु पीसि होननेंके वरोर सिमोनुन ओन पत्रुगुडा इनुंदुर आनि ओना तम्मुर अंद्रियन हूळतोर.
ओर इव्वुर ओल्लां वाटसि जिम्मां पीसेक मत्तुर.
19 ओर्कुन हूळसि येसु,
“नावा पज्जो वट,
मिमेट जिम्मां पीताप,
मीकु मनकलोर्कुन पियमळ कराहंतन,”
इंचि इत्तोर.
20 अस्के ओर पज्जो-मुन्ने कियाका ओल्लां होळसि ओना पज्जो होत्तुर.
21 अगटाल इंका मुन्नेड्क होत्तारित्ते येसु इव्वुर तम्मुर-दादान इत्ते जब्दीना मर्क याकोब आनि ओना तम्मुर योहानुन हूळतोर.
ओर ओना बानातोनि डोंगापोर्रो ओल्लां सवरिचेके मत्तुर,
येसु ओर्कुन केयतोर.
22 अस्के ओर,
ओरा बान आनि डोंगातुन होळसिसि ओना पज्जो होत्तुर.
गालिल एरियाते येसु तिरिय्सेक कीता कबाह्क
(लूका ६:१७-१९)
23 यहुदि लोकुल्कुना दर्मसास्त्रम कराहना लोतागाh येसु पेनदा पोल्लें कराहतोर.
स्वर्ग राज्येम बारेमते बेसता कबुर वेहचेके,
लोकुल्कुना अन्नि तीरुकुना रोगाल्कुन बेस कीसेके गालिल एरियाते पूरा तिरियतोर.
24 येसु कियना कबळ पूरा सिरिया देसेमंता तेळियसि होत्ता.
दानहाटीं तीरतीराता रोगाल्कुनोर,
नोप्पिनोर,
देय्याल्क पीतोर,
कुंदेल रोगमतोर आनि लकवा बिमारतोर इसंटा लोकुल्कुन ओनागा तत्तुर.
येसु ओर अंटुर्कुन बेस कीतोर.
25 गालिल एरिया,
दकापलिस एरिया,
येरूसलेम सहर,
यहुदिया एरिया आनि योर्दन बेरेटा हब्बेटाल वाता लोकुल्कुना मंदा येसुना पज्जो होनालय दल्गुतुर.