5
1 वेल्लेटुर लोकुल्कुना मंदातुन हूळसि येसु गुप्पा पोर्रो होंचि उदतोर.
उदतस्के सिस्युल्क इंका ओना दग्गेरे वातुर.
2 अस्के येसु कराहलय दल्गुतोर.
पेन बोर्क आसिर्वादमa हींता?
(लूका ६:२०-२६)
3 बोरय्ते आत्माताल गरिब मंतोरb पेन ओन्के आसिर्वादम हींता,
स्वर्ग राज्येम ओरदे आंद.
4 दुक्कमते मत्तोर्कुंक पेन आसिर्वादम हींता,
अद ओर्क दैर्नेम हींता.
5 सादा सिंपल गुनम मत्तोर्कुंके पेन आसिर्वादम हींता,
अद ई बूमि ओर्के हीसींता.
6 सत्तेमते ताकनाहाटीं कर्वु दूपा इनाका कस्टम कियानोर्कुंके पेन आसिर्वादम हींता,
पेन ओर्के समादानम हींता.
7 दया कियानोर्कुंक पेनदा दया दोर्कंता,
पेन ओर्के आसिर्वादम हींता.
8 बोर ओना मनसु पेनदापोर्रो इर्रांतोर,
पेन ओन्के आसिर्वादम हींता,
उंद रोजु ओरे पेंदुन हूळांतोर.
9 पगातोर्कुन उंदि कियानोर्कुंके पेन आसिर्वादम हींता,
ओर्कुने पेनदा पिलाल्क इंचि इंतुर.
10 पेनदा सत्तेमते ताकनाहाटीं तकलिप,
दुक्कम अर्रानोर्कुंके पेन आसिर्वादम हींता,
अद स्वर्ग राज्येम ओराहाटींगे मंता.
11 मिमेट नावा सिस्युल्क इंचि लोकुल्क मीकुन अपमानम कींतुर,
तकलिप कींतुर,
मीकु विरोदमते बच्चुंगो आबद्दम पोल्लें वेहांतुर अस्के मीकुगुडा पेनदा आसिर्वादम दोर्कंता.
12 मीकन्ना मुन्नेटा पेनदा कबुरतोर्कुनगुडा लोकुल्क इल्हेने तकलिप कीतुर.
अदुनहाटीं मिमेट कुसिते मंटु,
आनंदमते मंटु.
स्वर्गमते मीकु पेद्दा इनाम दोर्कंता.
होव्वोर आनि वेडसि पोर्रोटाल कराहता पोल्लें
(मरकुस ९:५०; लूका १४:३४-३५)
13 मिमेट लोकमताहाटीं होव्वोर आंदिर.
ओक्कला होव्वोर,
होव्वोरलेसीं दल्गाकुंटे दान मर्रा होव्वोर किया वायो आनि अद बता कबळतद आयो.
अद पलाते पोहचियना कबळके ओज्जंता.
लोकुल्क दान जारसेके होंदानुर.
14 गुप्पा पोर्रो मत्ता नार दिसाकुंटा मन्नो.
अल्हेने मिमेट दुनियाताहाटीं वेलगु आंदिर.
15 बोरे आयिर वेडसि निरिचि,
दान गुल्ला हिडु इरंतुरा?
इरुर,
लोता लोप्पो अंटोर्क वेलगु दिसानाल दान एत्तुने दीसोडिपोर्रो इर्रांतुर.
16 अदुनहाटीं मीवा पिसवर लोकुल्कुना मुन्ने इल्हा मनना गदा मीवा वेलगुनसोंटा बेसता कबाह्कुन हूळसि वेरेतोर स्वर्गमता बाबानद कदर कियानुर.
दर्मसास्त्रमता बारेमते येसुना पोल्लें
17 नना मूसाना नियमतुन आनि पेनदा कबुरतोर रासतदुन रद्द कियालय वातन इनकुनमटु.
नना दान रद्द कियालय आयो गानि अव्टे नावा बारेमते रासता पोल्लेन पुरागा कियालय वातन.
18 नना मीकु निजम वेहचेके मंतन बूमि मब्बु नासडेम आयानदाका दर्मसास्त्रमतद उंदि सिन्ना पोल्लेगुडा,
गीतागुडा रद्द आयो.
19 मिमेट अंटोर नियम परकारम ताकना.
बोरे आयिर पेनदा नियमतुनगुडा पालन कियाकुंटे,
इंका वरोंकगुडा अल्हे वेहानय्ते,
ओर स्वर्ग राज्येमते सिन्नासि मनंतोर.
गानि बोराय्ते नियम परकारम ताकंतोर आनि इंका वरोंक दाना परकारम ताकालय वेहांतोर ओर स्वर्ग राज्येमते बच्चोनो पेद्दा आयानुर.
20 नना मीकु वेहासेक मंतन केंजट.
दर्मसास्त्रम कराहना गुरुल्कc आनि परिसिल्क ईरकन्ना मिमेट एक्को सत्तेमंतुल्क आयवा स्वर्ग राज्येमते नेंगा पर्रिट.
होंगुना बारेमते येसु कराहता पोल्लें
21 मिमेट बोन हव्कमटु,
बोराय्ते हव्कंतोर ओन्कु कोरटताल सिक्सा आंता इंचि मीवा एनकटा पेद्दाल्कुंक पेन वेहतद मिमेट केंजिस मंतिर.
22 गानि नना मीकु वेहंतन गदा,
बोराय्ते ओना दंटातोनपोर्रो होंग आंतोर ओर पेनदा कोरटता सिक्सा लायक आंतोर.
अल्हेने बोराय्ते ओना दंटातोना अपमानम कींतोर,
ओर पेद्दाल्कुना कोरटता सिक्सा लायक आंतोर.
आनि बोरन्ना अरे मूर्का इनानय्ते ओन्कु देय्याल्क मनना अग्नि गुंडमताd सिक्सा आयार.
23 दानहाटीं निमे गिंटा पेन गद्देतगा उपारमe वाटानेंके नीवा दंटातोर नीवा पोर्रो होंग आसि मंतोर इंचि मति वायानय्ते,
24 निमे आ उपारमतुन अगेने होळसिसि मुन्ने दंटातोनगा होन.
दंटातोन समत कीतारित्ते वासि उपारम वाटा.
25 नीवा पोर्रो तप्पु दोसतोर नीकुन कोरटते ओयानेंके,
निमे बिराना हरदेने ओन दोस्ती कीम.
हिलाकोंटे ओर नीकुन ओसि मजिस्टरुंक अपाजेप्पनुर,
मजिस्टर पोलिसुंक अपाजेप्पनुर,
पोलिस ओसि नीकुन जेलने वाटानुर.
26 नना मीकु निजम वेहासेक मंतन,
कोत्तक-कोत्ता दोहन दाका निमे आगटाल पेय्सा पर्रिन.
बोगमतनम आनि सोडसिट्टिताf बारेमते येसु कराहता पोल्लें
27 बोगमतनम कियमटु इंचि एनकटा वेहतद मिमेट केंजिस मंतिट.
28 गानि नना मीकु वेहसेके गदा बोरन्ना आयिर,
बदाना मुरतळता हेके पापी नदरते हूळानय्ते ओर ओना मनसुने दानतोनि बोगमतनम कीतापे.
29 दानहाटीं तिना कळु गिंटा पापम किया वेहानय्ते,
दान तेंडिस पोहचिम बारित्ते पूरा मेंदुल नरकमते होनन दानकन्ना उंदि कळु होत्ते होन्नि.
30 अल्हेन नीवा तिना कय गिंटा नीकुन पापम किया वेहानय्ते दान नर्कीसि पोहचिम.
बारित्ते नीवा पूरा मेंदुल नरकमते होनन दानकन्ना मेंदुलता उंदि कय होत्ते होन्नि.
31 बोरन्ना ओना मुत्तोन होळसियानय्ते दानकु ओर सोडसिट्टि राससि हिय्यिर,
इल्हा मूसाना नियम मीकु वेहासि मंता.g
32 गानि नना मीकु वेहासेक गदा,
बोरन्ना ओना मुत्तोन बोगमतनमता कारनम तप्पा वेरे कारनमते होळसियानय्ते,
अद पेनदा नदरते ओना मुत्ते मनंता.
दानहाटीं होळसिता मुत्तोनतोनि बोरन्ना मरमिं आयानय्ते ओर इव्वुरगुडा बोगमतनम कींतुर.
ओट्टु आनि पगाता बारेमते येसु कराहता पोल्लें
33 निमे गिंटा ओट्टु तिनानय्ते,
दान नेमुह्मा,
गानि निमे तित्ता ओट्टुन पूरा कीम इल्हा मूसाना नियमते पेद्दाल्कुंक वेहतद मिमेट केंजतिर.
34 नना मीकु वेहासेक मंतन गदा,
निमे ओट्टु तिनने तिनमा.
पेन स्वर्गमताल राज्येम एलांता,
इंचि निमे दान ओट्टु तिनमा.
35 अल्हेन बूमि,
पेन काल्क इर्रना जेगा आंद,
अदुनहाटीं बूमि तोड इंचि दानदगुडा तिनमा.
आनि येरूसलेम सहर पेद्दा महाराजानद इत्ते पेनदाद आंद,
इंचि दानदगुडा तिनमा.
36 नीवा तल्लातद उंदिंका केल्दुन तेल्लगा हिल्लेना नल्लगा किया पर्रिन,
बारित्ते अन्नि पेनदा कयदेन मंता,
इंचि तल्लतदगुडा ओट्टु तिनमा.
37 दानहाटीं नीवा वळकुमड हो इत्ते हो,
हिलाकोंटे हिल्ले इत्ते हिल्ले इंचि मन्नि.
नीवा पोल्लेतुन निजम कियालय ओट्टु तिनानय्ते अद देय्यमताहेंदाल वाता.
बदला एतुमा
(लूका ६:२९-३०)
38 कळदुक बदला कळु आनि पलदुक बदला पल्लु तेंडाना इंचि मूसाना नियमते वेहता पोल्लेतुन मिमेट केंजतिर गदा.h
39 गानि नना मीकु वेहासेके मंतन गदा,
मिमेट मीवा पगातोरकुंक एदुर तिरियमटु.
बोरन्ना गिंटा नीकुन तिना सेंपापोर्रो तनानय्ते निमे इंकुंदि सेंपागुडा तिरहा.
40 बोरन्ना कोरटते नीकुन दंडुगहाटीं अंगि हीम इत्ते ओन्कु नीवा बनिया इंका हीम.
41 अल्हेन बोरन्ना सिपाइ गिंटा नीकुन उंदि कोसेड लक्कु सामान पीसि वांतिना,
इंचि बलमि कियानय्ते,
निमे आ मनकनतोनि रोंडु कोसकुना लक्कु होन.
42 बोरन्ना नीकुन बतलन्ना तल्कते ओर्कु अद हीम.
बोरन्ना नीकुन उद्देरा तल्कते,
हिल्ले इनमा.
अंटोरपोर्रो पावरम कीम्टु!
(लूका ६:२७-२८; ६:३२-३६)
43 निमे नीवा दंटातोर पोर्रो पावरम कीम आनि पगातोर्कुन बारे हय्स्मा,
इंचि इत्तद मिमेट केंजतिर.i
44 गानि नना मीकु वेहासेके मंतन गदा,
मीवा पगातोर्कुन पावरम कीम्टु.
बोरन्ना गिंटा मीकुन तकलिप कियानय्ते मिमेट ओरा बेसताहाटीं पारतना कीम्टु.
45 बारित्ते,
मीवा पेन बाबाल,
सेड्डोर्क आनि बेसतोर्क इव्वुर्किंका पोड्दुना हेंदाल वेलगु हींतोर.
अल्हेन पापिल्कुंक आनि सत्तेमंतुल्कुंक पिर्रु हींतोर.
मिमेट मीवा पगातोर्कुन पावरम कीते,
मिमेट मीवा स्वर्गमते मनना बाबाना पिलाल्क इंचि दिस अर्रांतिट.
46 अयना मीकुन पावरम कियानोर्कुन पोर्रो मिमेट पावरम कीते मीकु पेनदाहेंदाल बाता लाबम दोर्कार?
कर वसुलj कियानोर इंका अल्हे कींतुर.
47 निमे गिंटा मीवा दंटातोर्कुनतोने बेस मत्ते,
वेरे इंका निमे बतल बेस कीसंतिन?
पेंदुन एरपाट कियवा वेरे जाति लोकुल्कगुडा अल्हे कींतुर.
48 अदुनहाटीं स्वर्गमते मंदना मीवा पेन बाबाल पुरागा सत्तेमते मंतोर इंचि मिमेटगुडा अल्हे मंटु.