दर्मम कियना बारेमते येसु कराहता पोल्लें
6
1 उसारते मंटु!
मिमेट लोकुल्कुंक हुप्सनाहाटीं बेसता कबाह्क कियमट.
अल्हा कीते,
स्वर्गमते मनना मीवा पेन बाबान हेंदाल मीकु बतले इनाम दोर्को.
2 अदुनहेंके मिमेट बोनकन्ना दर्मम कियनेंके डप हाटमट.
बारित्ते अल्हा डोंगि लोकुल्क मिटिंगुल्कुना जेगाते,
a हरकुनपीसि माकुन मेचकुनागोम इंचि कींतुर.
नना निजम वेहंतन,
बोरय्ते अल्हा कींतुरो ओर्कु ओरा इनाम दोर्कुता.
3 मिमेट बोनकन्ना दर्मम कियनेंके मीवा तिना कय बतल कींतनो अद रोड्डा कयदुक बिल्कुल तेळिया मन्नि.
4 अल्हा कीते मिमेट कियना दर्मम बोनकु तेळियाकुंटा मनंता,
आनि अद बतल आंदो मीवा पेनबाबांक एर्के मंता.
अदुन हूळसे मीकु इनाम हींतोर.
पारतनाता बारेमते येसु कराहता पोल्लें
(लूका ११:२-४)
5 अल्हेने बस्के अय्ते मिमेट पारतना कींतिरो,
अस्के डोंगि लोकुल्कुनलेसीं कियमट.
डोंगि लोकुल्क हरकुना मूलनपोर्रो,
पंचादिं कियना जेगाने नितिस पारतनां कींतुर,
अल्हा कीते वेल्ले लोकुल्क ओर्कुन हूळंतुर इंचि ओर्कु अन्पिंचंता.
गानि नना मीकु निजम वेहंतन,
ओरा इनाम ओर्कु दोर्कुता.
6 गानि मिमेट पारतना कियना वेलाक लोता लोप्पोटा अर्राते होंचि तल्पु वाटकुंचि बोर्के दिसुवा मीवा पेनबाबांक पारतना कीम्टु.
अस्के मीवा पेन बाबाल मीकु अद पारतनाता जवाब हींतोर.
7 वेरे जातितोरb पारतना कियनेंके उंदे पोल्लेतुन वेल्लेन मल्कां वळकांतुर,
अल्हा कीते पेन ओरद केंजंता इंचि ओर्क अन्पिचंता.
8 गानि मिमेट ओरा लेह्का आयमट.
बारित्ते मीकु बतल गावालेनो अद तल्कका मुन्नेन पेनदुक एरपाट मनंता.
9 अदुनहाटीं मिमेट पारतना कियनेंके इल्हा पारतना कीम्टु:
ए स्वर्गमते मनना मावा पेनबाबा,
नीवा पोर्रोल्तुन अंटोर कदर कियिरकांटी.
10 आनि निमेन मापोर्रो राज्येम कीम,
स्वर्गमते नीवा इच्चा बल्हा पूरा आंतानो अल्हेन ई बूमिपोर्रो इंका आयिकांटी.
11 माकु रोजता तिंडि इय्यालागुडा हीम,
12 माकु विरोदमते कीता तप्पुकुन मोमोट बल्हा माप कीतोमो,
अल्हेन निमेगुडा मोमोट कीता तप्पुकुन माप कीम.
13 अल्हेन सेड्डा कबाह्क कियना आसेनाल कापाडा,
आनि देय्यमतागटाल माकुन पिसागोटा.
c(बस्केळक राजाल निमेन आंदिन,
अदुनहाटीं ताकत आनि महिमा बस्केळक निवदे आंद.
आमेनd!)
14 मिमेट वेरेतोरा तप्पुकुन माप कीते,
स्वर्गमते मनना पेनबाबालगुडा मीकुन माप कींतोर.
15 गानि उंदि वेलाते मिमेट लोकुल्कुना तप्पुकु माप कियाकोंटे स्वर्गमते मनना मीवा पेनबाबालगुडा मीकुन माप किय्योर.
ओक्का पोद्दुना बारेमते येसु कराहता पोल्लें
16 मिमेट बस्के ओक्का पोद्दुe मनंतिटो अस्के मिमेट जिव्वरा मोकोम कीसि मनमट.
डोंगि लोकुल्क अल्हेन कींतुर.
ओर्कु अन्पिंचंता गदा जिव्वरा मोकोम कीसि मत्ते लोकुल्क ओर्कुन हूळसि ईर ओक्का पोद्दु मंतुर इंचि इंतुर.
गानि नना मीकु निजम वेहंतन,
ओर्कु ओरा इनाम दोर्कुता.
17 अदुनहाटीं मिमेट बस्के अय्ते ओक्का पोद्दु मनंतिटो,
अस्के तल्लाक निय होकसि मोकम नोर्राट.
18 अल्हा कीते ओक्का पोद्दु मत्तद बोर्के दिसो गानि बोर्के दिसुवा मीवा पेन बाबाल मात्रम ओक्का पोद्दुन हूळांतोर.
अदुनहेंके मीकु इनाम हींतोर.
दनमता बारेमते येसु कराहता पोल्लें
(लूका १२:३३-३४; ११:३४-३६; १६:१३)
19 मिमेट ई बूमिपोर्रो दनम जमा कियमट.
बारित्ते,
बूमिपोर्रो जमा कीता दनम सेदेल तिंचि,
सिलुम पीसि नासडेम आंता आनि दोंगाल्क दोसकुंचि ओंतुर.
20 गानि मिमेट मीवाहाटीं स्वर्गमते दनम जमा कीम्टु,
अगा अवुन सेदेल तिनो,
सिलुम पिय्यो आनि दोंगाल्क इंका दोसकुंचि ओयुर.
21 बारित्ते मीवा दनम बगा मत्ते अगेने मीवा मनसु मनंता.
22 मीवा कळु मेंदुलता वेडसि आंदु.
दानहाटीं मीवा कळकु बेस मत्ते,
मीवा मेंदुलंता वेलगु मनंता.
23 मीवा कळुके बेस हिलाकोंटे मीवा मेंदुलंता हीकटे मनंता.
दानहाटीं मिमेट गिंटा पेनदा वेलगुन हूळाकोंटे मीवा पिसवरंता हीकटे मनंता.
24 अल्हेन वरोर मनकल इव्वुर मालकुल्कुनगा सेवा किया पर्रोर.
अल्हा सेवा कीते ओर वरोन बेस पावरम कींतोर आनि इंकावरोन हयसोर.
हिलाकोंटे वरोन पोल्ले बेस केंजंतोर आनि इंकावरोन पोल्ले केंजोर.
इंचि मिमेट पेंदुन आनि दनमतुन उंदे मल्का सेवा किया पर्रिर.
रंदि कियमट
(लूका १२:२२-३२)
25 अदुनहाटीं नना मीकु वेहनद बतल इत्ते जीवा तिंडिकन्ना मुक्केम आनि मेंदुल कपडींकन्ना मुक्केम आंदु.
इंचि पिस्सनाहाटीं तिनकोम बतल,
उनकोम बतल,
इंका मेंदुल्ताहेंका केर्कोम बतल इंचेके रंदि कियमटु.
26 आ पिट्टेनहेके हुळट,
अवु वीतों आनि कोय्यों,
अचोने आयका गुम्मिने जमागुडा किय्यों,
अय्नागानि मीवा स्वर्गमते मनना पेन बाबाल अवुंकु तिंडि हींतोर.
मीकु अय्ते पेनदा मुन्ने पिट्टेंकन्ना बच्चोनो विलवा मंता इदु मीकु एर्के मंता.
27 अय्नागानि रंदि कीसि बोरन्ना उंदि सेंकड तच्चोनना आवसु बेरसागोटतोर मंतोरा?
28 मरि मिमेट केर्रना कपडिनहाटीं रंदि बारी कींतिट?
केडाते पूयाना आ पूतानाहेके हुळट!
अव कबळ इंका किय्यों आनि कपडीं इंका कुट्टों.
29 गानि नना वेहनद बतल इत्ते,
सुलेमान राजांक वेल्लेन सोम्मु मंचिगुडा आ उंदि पुंगरतच्चो सोक आया पराहिल्लोर.
30 अरे तक्को विस्वासम मत्ता लोकुरिटा,
जाडि इय्याला मंता,
नाडी तडमिते वेसि दांतां.
अय्नागानि पेन बाबाल अवुंक इच्चो बेस्ता कपडीं हींतोर,
अय्ते अवुंकन्ना बेस्ता कपडीं मीकु हिय्या परोरा?
31 अदुनहाटीं बतल तिंदकोम,
बतल उंडकोम,
बतल केर्कोम इंचि रंदि किसेक मनमट.
32 बोर लोकुल्क निजम पेंदुन एरपाट कियुरो ओर लोकुल्क इव गावाले इंचि तंलाड्सेके मनांतुर.
गानि मीकु इव अन्नि गावाले इंचि स्वर्गमते मनना मीवा पेनबाबांक एर्के मंता.
33 अदुनहाटीं मिमेट मुन्ने स्वर्ग राज्येमतुन एरपाट कीसि,
पेन वेहता पोल्ले परकारम ताकानय्ते इव अन्निगुडा मीकु दोर्कनुं.
34 बस्केळक बद्दना बद रंदि मनंता.
इंचि नाडीता रंदि इयालेन कियमट.
नाडीता रंदि नाडीताहाटीं होळसीम्टु.