वेरेतोर पोर्रो तप्पु दोसना बारेमते येसुना विचाराल्क
(लूका ६:३७-३८; ६:४१-४२)
7
1 मिमेट वेरेतोर पोर्रो तप्पु दोसमट,
अस्के मीवापोर्रो इंका पेन तप्पु दोस्सो.
2 आनि मिमेट बल्हा तप्पु दोसंतिरो,
अल्हेने मीवा पोर्रो इंका पेन तप्पु दोसंता.
मिमेट बद कोल्ताते कहांतिरो,
अदे कोल्ताते पेन मीकुन कहांता.
3 अरे डोंगि मनका,
निमे नीवा कळदे अर्ता सित्कु तेंडका इंकावरोन कळदे अर्ता बुस्सि बारी तेंडा हुळंतिन?
4 नीवा कळदे सित्कु अर्सि मनानेंके निमे इंकावरोन,
“नीवा कळदे अर्ता बुस्सितुन नाकुन तेंडाहीम इंचि बल्हा इंतिन?”
5 मोदगाला नीवा कळदा सित्कुन तेंडतिन इत्ते इंकावरोन कळदा बुस्सि तेंडलय नीकु बेस दिस्सार.
6 पवित्र वस्तुक नय्कुन मुन्ने वाटमट,
आनि पद्दिना मुन्ने मुच्च्याल्क पोच्चुमट.
अल्हा कीते पद्दीं अवुन काल्कुने जारांतां आनि नय्कु बारे मी पोर्रो अर्सि मीकुने कस्कंतां.
मीकु गावाले मत्तद पेनदुक वेहट
(लूका ११:९-१३)
7 पेंदुन तल्कट मीकु हिय्यार,
पह्कट मीकु दोर्कार आनि तल्पुन तनट तल्पु तेंडार.
8 बारित्ते बोराय्ते तल्कंतोर ओन्कु हींता,
बोराय्ते पह्कंतोर ओन्कु दोर्कंता आनि बोराय्ते तल्पुन तनंतोर ओन्कु तल्पु तेंडंता.
9 मिवव्टेटाल बोरन्ना बाबो मंतोरा,
ओना मर्रि हारि तल्कते ओन्क बंडा हिय्यनोर?
10 हिलाकोंटे जिम्मा तल्कुतस्के ओन्क तरास हियना बाबो मंतोरा?
इल्हा बोरे किय्योर.
11 बल्हा अय्ते मिमेट पापी लोकुल्क आसिगुडा मीवा पिलाल्कुंक मात्रम बेसतव हियना इंचि मीकु तेळियंता.
अल्हेने स्वर्गमते मनना मीवा पेन बाबान तल्कानोर्कुंक बचोन बेसतव हियना ओन्कु तेळियंता.
12 अदुनहाटीं लोकुल्क मीवातोनि बल्हा मनना इंचि मीकु अन्पिचंतो,
अल्हेन मिमेट ओरतोनि मंटु.
इदे पोल्ले मूसाना नियम आनि पेनदा कबुरतोर रासतदगुडा वेहंता.
स्वर्गम आनि नरकमकु होनना हर्रि
(लूका १३:२४)
13 नासडेमतेके होनना हर्रि आनि तल्पु नेर्वुंक नेरवु मंता,
आ हरपीसि वेल्ले मंदि दांतुर.
अदुनहाटीं इर्कुटोम मत्ता हरपीसि होळियट.
14 पिसवरताहेके होनना हर्रि आनि तल्पु वेल्ले इर्कुटोम मंता.
आ हर्रि वेल्ले तक्को मंदिक दोर्कंता.
डोंगि कबुरतोरा बारेमते येसु वेहता पोल्लें
(लूका ६:४३-४४; १३:२५-२७)
15 डोंगि कबुरतोरागटाल उसारते मंटु.
ओर मिहगा सादा गोर्रेतालेसीं वांतुर गानि ओरा लोप्पो तोडेल्लिaता गुनम मनंता.
16 ओर कियना कबळ पोर्रोटाले डोंगि कबुरतोर इंचि एरपाट कींतिर.
बल्हाय्ते हाह्कुना जप्पिताल अंगुर पंडिं हादों हिलाकोंटे ईरामुस्टीb मराकुनाल मरका पंडिं हादों,
17 अल्हेन बेसता मराकु बेसता पंडिं हादंतां आनि कराब मराकु कराब पंडिं हादंतां.
18 बेसता मराकु कराब पंडिं हादों आनि कराब मराकु बेसता पंडिं हादों.
19 बव मराकु बेसता पंडिं हादों असोंटव अन्नि मराकुन नर्कीसि तडमिते वाटसिंतुर.
20 इंचि डोंगि कबुरतोर्कुन मिमेट ओरा कबाह्कुन पोर्रोटाल एरपाट कीकिट.
21 नाकुन सामि,
सामि इनानोर अंटोर स्वर्ग राज्येमते होळयुर.
गानि स्वर्गमते मनना नावा पेनु बाबाना मनसु मत्ताप बोराय्ते ताकंतुर ओरे स्वर्ग राज्येमते होळियांतुर.
22 नना न्यायम कियना आकिर रोजुने वेल्लेटुर नहगा वासि,
सामि मोमोट नीवा पोर्रोलते बविस्यवानिc कीतोम,
इंका नीवा पोर्रोलते देय्याल्क-बूताल्कु तेंडतोम आनि नीवा पोर्रोलते बच्चुंगो अद्बुतामाता कबाह्क कीतोम,
इंचेके इनानुर.
23 अस्के ओर्कुन,
ए सेड्डा कबाह्क कियानोरिटा!
नना मीकुन एरपाट किय्योन.
मिमेट इगेटाल पेय्सि होंट इंचि इंतन.
तेल्वि मत्तोर आनि तेल्वि हिल्वा मनकल
(लूका ६:४७-४९)
24 अदुनहाटीं नावा पोल्लें केंजिस अदे परकारम ताकाना हरेक मनकल,
बंडा पायवापोर्रो लोन दोहकुता तेल्विता मनकनालेसीं मंतोर.
25 पिर्रु वाता,
कम्मुड वाता आनि वडि-दुमारम वासि लोतुक दल्गिना गानि अद कूला हिल्ले.
बारित्ते अद लोता पायवा बंडातोनि दोहाचि मंता.
26 गानि नावा पोल्लें केंजसि,
आ परकारम ताकवोर,
उस्केते लोन दोहकुता तेल्वि हिल्वासंटोर आंदुर.
27 पिर्रु वाता,
कम्मुड वाता आनि वडि-दुमारम वासि लोतुक दल्गता अस्के अद लोन पूरा कूल्सि पाड आता,
इंचि येसु इत्तोर.