येसु वरोन बिमार मनकन बेस कींतोर
(मरकुस १:४०-४५; लूका ५:१२-१६)
8
1 येसु गुप्पा पोर्रोटाल हिडु रेयतस्के वेल्लेन लोकुल्क ओना पज्जो-पज्जो वासेक मत्तुर.
2 हुळाट!
अस्के वरोर कुस्टरोगमa आता मनकल येसुनगा वासि ओना काल्कुनपोर्रो अर्सि,
“सामि,
निमे इन्कुत्ते नावा बिमारितुन बेस किया परांतिन,”
इत्तोर.
3 पजा येसु कय मुन्नेळक कीसि ओन इट्तोर,
इट्टिसि “निमे बेस आयगोम इंचि नावा मनसु मंता,
बेस आम” इंचि इत्ता इन्मळे आ कुस्टरोगम आसि मत्ता मनकल बेस आतोर.
4 पजा येसु ओन,
“इगे जर्गतद बोर्के वेहमा,
गानि निमे होंचि मीवा पेर्मांकb हुप्सा.
निमे कुस्टरोगमताल बेस आता गवाइ इंचि मूसाल वेहता मोक्कु हीम.
अदुन हूळसि निमे बेस आतिन इंचि लोकुल्कुंक एरपाट आंता,”
इंचि इत्तोर.
दरोगाना गट्टि विस्वासम
(लूका ७:१-१०)
5 येसु कपर्नाहुम सहर होत्तास्के ओनागा वरोर दरोगलc वासि,
6 “सामि,
नावा जीतागाड लकवा बिमारते इरगा तकलिपने लोन मंतोर,”
इंचि सहायमहाटीं विनंति कीतोर.
7 अस्के येसु,
“नना वासि ओन बेस कींतन,”
इंचि दरोगन इत्तोर.
8-9 पजा आ दरोगल,
“सामि,
निमे नावा लोन वायनच्चो पेदातनम नहगा हिल्ले.
ननागुडा वरोर अदिकारिना कयदा हिडु कबळ कींतन आनि नावा कयदे इंका वेल्लेन सिपाइल्क मंतुर.
नना अव्टेटाल वरोन ‘होन’ इत्ते ओर दांतोर,
इंकावरोन ‘वा’ इत्ते ओर वांतोर.
अचोने आय्का नावा जीतागान ‘इद कीम’ इत्ते ओर कींतोर.
दानाहाटीं निमे सिराप उंदे पोल्ले इन,
नावा जीतागाड बेस आंतोर.”
इंचि इत्तोर.
10 इद केंजसि येसुंक इचंत्रम आता आनि अस्केन ओना पज्जो ताकसेक मत्तोर्कुन,
“नना मीकु निजम वेहासेक मंतन,
इस्राएल लोकुल्कुन लोप्पो इच्चो वेल्ले विस्वासम मत्ता मनकल नाकु बग्गेन दोर्का हिल्लोर.
11 इंका नना मीकु वेहंतन,
अन्नि दिक्कुल्कुनाल अन्नि जातिनोर वायनुर आनि अब्राहाम,
इसहाक आनि याकोबd इरतोनि स्वर्ग राज्येमते बोजनमने उद्दानुर.
12 गानि बोरय्ते,
‘मोमोट पेन पेर्कुत्ता इस्राएलतोरम इंचि स्वर्गमते दांतोम’ इंतुरो,
ओर्कुन मात्रम पेन पलाते हीकटते इर्रार.
अगा सिराप अळुळ आनि मोत्कुनमळे मनंता,”
इंचि वेहतोर.
13 पजा येसु आ दरोगन,
“निमे होन,
नीवा विस्वासम बल्हा मंतनो अल्हेन नीकु जर्गंता” इंचि इत्ता इनमड ओना जीतागाड बेस आतोर.
येसु वेल्लेन मंदितुन बेस कींतोर
(मरकुस १:२९-३४; लूका ४:३८-४१)
14 पजा येसु पत्रुना लोन वातस्के ओना पोरळ एळकी वासि मींडसि मत्तद हूळतोर.
15 येसु दाना कयदुन इट्तुरित्तेन दाना एळकी रेय्ता.
अस्के अद तेदसि येसुना सेवा कियालय दल्गुता.
16 पजा पोड्दु होंचि लोकुल्क देय्याल्क पीतोर्कुन वेल्लेन मंदितुन येसुनगा पीसि वातस्के येसु उंदे पोल्लेते देय्याल्कुन गेदमिसीतोर.
आनि बिमार मत्ता अंटोर्कुन बेस कीतोर.
17 अद अल्हा बारी जर्गुता इत्ते एनकटा बस्केनो यसयाल इनना पेनदा कबुरतोर वेहता पोल्ले पुरागा आयना इंचि जर्गुता.
यसयाल इल्हा वेहचि मत्तोर:
ओर मना रोगाल्कुन तेंडिस पोहतोर
मना बादन एतकुत्तोर.e
येसुना सिस्युड आयना विचारम
(लूका ९:५७-६०)
18 येसु ओना सुट्टु वेल्लेन मंदि मत्तद हूळसि ओना सिस्युल्कुन मिमेट सेरवुना हब्बेरा होंट,
इंचि आदेस हीतोर.
19 पजा वरोर दर्मसास्त्रम कराहना गुरु ओनागा वासि,
“गुरु,
निमे बगा अय्ते दांतिनो अगा नीवा पज्जो नना वांतन.”
इंचि इत्तोर.
20 अस्के येसु ओन,
“नक्कांकु बारे मनालय सोर्रें मंतां आनि पिट्टेंक बारे मनालय गूडां मंतां,
गानि मनकना रूपमते पुटतोन नाकु मात्रम तला इर्रालयगुडा जेगा हिल्ले,”
इंचि इत्तोर.
21 अस्के येसुना पज्जो वातोराव्टेटाल वरोर,
“सामि,
मुन्ने नाकुन होना हीम,
होंचि नावा बाबाल हातास्के ओन गति कीसि वांतन.”
इंचि येसुन इत्तोर.
22 गानि येसु,
“हिल्ले,
निमे इंदकेन नावा पज्जो वा.
बोरय्ते हातुरो ओर्कुन हातोर गति कियिरf,”
इंचि इत्तोर.
येसु दुमारमतुन आपांतोर
(मरकुस ४:३५-४१; लूका ८:२२-२५)
23 पजा येसु डोंगाते एक्कुतंका ओना सिस्युल्क इंका ओना पज्जोने एक्कुतुर.
24 अस्के अचानक पेद्दा दुमारम वायलय दल्गुता.
आ दुमारम इच्चो पेद्देद मत्ता गदा,
एता तळाने डोंगा मुळंगालय दल्गुता.
गानि येसु मात्रम आ डोंगाते मींडसि मत्तोर.
25 अस्के सिस्युल्क ओनागा होंचि ओन निद्रताल तेहाचि,
“सामि,
माकुन पिसागोट्टा,
मनम मुळ्गिसि होंचंतोम,”
इंचि इत्तुर.
26 येसु ओर्कुन,
“अरे मिमेट बारिंक वेरियंतिट?
मीकु इच्चो इंका विस्वासम हिल्लेना?”
इल्हा इंचि येसु आ वडि आनि तळन सपुडदाका आयालय गद्दरिच्चि वेहतोर.
अस्के वडि,
सेरवु अंता सांत आता.
27 अद हूळसि सिस्युल्कुंक पेद्दा इचंत्रम आता.
अस्के ओर,
“अरे इर बसोंटा मनकल रो,
वडि आनि तळांगुडा ईना पोल्ले केंजंतां!”
इंचि इत्तुर.
येसु इव्वुर मनकलोर्कुन पीता देय्याल्कुन गेदमंतोर
(मरकुस ५:१-२०; लूका ८:२६-३९)
28 पजा ओर सेरवुना हब्बेरा मनना गदरेकरकुना एरियाते एव्तुर.
अस्के इव्वुर देय्याल्क पीता मनकलोर ताप्ळन बोग्ळातg हेंदाल येसुनगा वातुर.
ओर इरगा वेरियनाल मत्तुर इंचि ओर मत्ता हरदाहेके बोरे ताकाकोंदुर.
29 हुळाट!
ओर इव्वुर येसुनगा वातुर आनि वरगेयसि,
“पेनदा मर्रिना,
नीकु मावाहेक्टाल बतल गावाले?
इत्ता वेलाकन्ना मुन्नेन निमे माकु सिक्सा हियालय वातिना?”
इंचि इत्तुर.
30 ओर नितिस मत्तगटाल इच्चोन लक्कु पद्दिना मंदा मेय्सेके मत्ता.
31 आ देय्याल्क येसुन,
“ओक्कला निमे माकुन इराव्टेटाल तेंडानय्ते माकुन आ पद्दिना मंदाते होनाहिम,”
इंचि विनंति कीतां.
32 अस्के ओर आ देय्याल्कुन,
“होंट” इंचि इत्तोर,
इत्तस्के आ देय्याल्क ओराव्टेटाल पेय्सि पद्दिने होत्तां.
पजा आ पद्दिना मंदा ओड्डुन पोर्रोटाल हिडतुक वित्सि एते मुळ्गिसि हासोत्तां.
33 अस्के आ पद्दीं मेहानोर नाटे वित्तुर,
वित्सि अगा जर्गतद आनि आ देय्याल्क पीतोरद बतल आता अन्नि वेहतुर.
34 अस्के पूरा नाटेना लोकुल्क येसुंक कलियालय वातुर आनि बस्के अय्ते ओर येसुन हूळतुरो अस्के ओर येसुन,
“मावा सरदुनाल पेय्सि होन,”
इंचि विनंति कीतुर.
बारित्ते पद्दीं हाताहेंका अद नाटेनोरद वेल्लेन नुकसान आता.