वरोर कय्क-काल्क वायवा मनकन येसु बेस कींतोर
(मरकुस २:१-१२; लूका ५:१७-२६)
9
1 येसु डोंगाते उदिस सेरवु दाटसि ओना सहर मल्सि वातोर.
2 अस्के इच्चुर लोकुल्क वरोर लकवा बिमारतोन सापाते वाटसि येसुनगा तत्तुर.
ओरा विस्वासमतुन हूळसि येसु लकवा बिमारतोन,
“अरे कोको दैर्नेम इर्रा.
नीवा पापाल्क मापि आसोत्तां,”
इंचि इत्तोर.
3 अस्के अगा मत्ता दर्मसास्त्रम कराहना गुरुल्क,
“ई मनकल पेनदा अपमानम कीसंतोर.”
इंचि ओर-ओरे गुसगुसा इनालय दल्गुतुर.
4 ओरा पीटा विचाराल्क एरपाट कीसि येसु ओर्कुन,
“मी मनसुने मिमेट कराब विचाराल्क बारि कींतिट?
5 तेदिस ताका इनना दानकन्ना नीवा पापाल्क मापि आसोत्ता इनमळे अल्कगा मंता.
6 गानि मनकना रूपमते पुटतोन नाकु बूमिपोर्रोटा पापाल्कुन माप कियना हक्कु मंता इंचि मिमेट एरपाट कियमळ गावाले,”
इंचि इत्तोर आनि आ लकवा बिमारतोनगुडा “तेदसि कटुल पीसि लोन होन,”
इंचि वेहतोर.
7 ओर तेदसि लोन होत्तोर.
8 अगा मत्ता लोकुल्कुंक अद हूळसि इचंत्रम आता.
“इच्चोर पेद्दा हक्कु पेन मनकलोर्कुंक हीता,”
इंचि आ पेनदा स्तुति कीतुर.
येसु मत्तयाल इनना मनकन केयंतोर
(मरकुस २:१३-१७; लूका ५:२७-३२)
9 आयंका येसु अगटाल पेय्सि होनानेंके वरोर मत्तयाल इनना मनकल कर वसुल कियना नाकातगा उदिस मत्तद हूळतोर.
आनि नावा पज्जो वा!
इंचि ओन इत्तोर.
अस्के ओर तेदसि ओना पज्जो होत्तोर.
10 होंचि येसु,
मत्तयाना लोन गाटो तिंचेके मन्नेंके वेल्लेटुर कर वसुल कियानोर आनि पापि लोकुल्क वातुर.
वासि येसु आनि ओना सिस्युल्कुनतोनि गाटो तिनालय उदतुर.
11 अस्के ओर गाटो तिनानद हूळसि परिसिल्क ओना सिस्युल्कुन,
“मी गुरु कर वसुल कियानोरतोनि आनि पापिल्कुनतोनि गाटो बारि तिंतोर?”
इंचि पूसकीतुर.
12-13 ओर वळकानद केंजसि येसु ओर्कुन,
“मिमेट होंट आनि ‘नना कोरनद दया आंदु,
मोक्कु आयो,’
इनना दर्मसास्त्रमते राससि मनना इद पोल्लेता अर्तमतुन तेळियागोटकुंटु.
बल्हा बिमार लोकुल्कुंक डाक्टरना अवसरम मनंता,
अल्हेन पापि लोकुल्कुंक पेनदा दयाता अवसरम मनंता.
सत्तेमंतुल्क बेसता लोकुल्कुनसंटोर आंदुर,
ओर्कु डाक्टरना अवसरम हिल्ले.
अदुनहाटीं नना सत्तेमंतुल्कुन केयालय आयो गानि पापि लोकुल्कुन केयालय वातन,”
इंचि इत्तोर.
ओक्का पोद्दुना बारेमते येसु कराहता पोल्लें
(मरकुस २:१८-२२; लूका ५:३३-३९)
14 उंदि मल्का बापतिस्मा हियना योहानुना सिस्युल्क येसुनहेके वासि,
“गुरु,
परिसिल्क आनि मोमोट बस्केळक ओक्का पोद्दु मनंतोम गानि नीवा सिस्युल्क बारि मन्नुर?”
इंचि पूसकीतुर.
15 अस्के,
“सिस्युल्कुनतोनि नना मनानेंके ओर्कु ओक्का पोद्दु मनना अवसरम हिल्ले,”
इदुन हुप्सालय येसु ओर्कुन,
“मरमिंन पेडल ओरतोनि मनानेंके,
ओना दंटातुर दुक्कम बारि कींतुर?
बस्के अय्ते मरमिंन पेडल ओरागटाल गायप आंतोर अस्के ओर्कु दुक्कमासि ओक्का पोद्दु मनानुर.”
इंचि इत्तोर.
16 पजा येसु ओर्कु रोंडु सिन्ना वेसुडिं वेहतोर.
“इल्हेन पडना काटन कप्पिड हर्ते दानकु पूना काटन कप्पिडता गंडा कुट्टानय्ते अद कप्पिड हर्सि,
इंकिच्चो पेद्दगा आंता.
इंचि दान्कु बोरे पूना काटन कप्पिड गंडा कुट्टोर.
17 अल्हेन पूना अंगुर पानकमतुन पडना बुर्रते बोरे दोस्सुर.
ओक्कला दोसनय्ते आ बुर्रा पय्सि पानकम पोंगिस दांता आनि बुर्रा पाडांता.
इंचि पूना अंगुर पानकम पूना बुर्रतेन दोसंतुर.
अस्के रोंडु इंका बेस मनंतां.”
इंचि वेहतोर.
यायिर इनानोना मिय्यड आनि कप्पिड होनना मुरतळ
(मरकुस ५:२१-४३; लूका ८:४०-५६)
18 इव पोल्लें येसु ओरतोनि वळकासेके मन्नेंकेन,
वरोर दर्मसास्त्रम कराहना लोता अदिकारि अगा वासि,
“नावा मिय्यड इंदकेने हाता गुरु,
गानि निमे वासि दान इटतिन इत्ते दान्कु मर्रा जीवा अर्रंता,”
इंचि येसुना काल्कुनपोर्रो अरसि विनंति कीतोर.
19 अस्के येसु आनि ओना सिस्युल्क आ अदिकारीनतोनि पेय्स्तुर.
20-21 ओर होनानेंके पन्नेंडु वर्सनाल कप्पिड आयना मुरतळ कलियता.
अस्के अद,
“नना सिराप येसुना कप्पिडतुन इट्टिना गानि बेस आंतन,”
इंचि दान मनसुने इन्कुत्ता.
आनि पज्जोटाल वासि ओना कप्पिडता अंचुन इटता.
22 इटतारित्ते येसु पज्जो मल्सि हूळसि,
“दैर्नेम इर्रा बाई,
नीवा विस्वासमे नीकुन बेस कीता,”
इंचि इत्तोर.
अस्केने अद बेस आता.
23 पजा ओर दर्मसास्त्रम कराहना लोता अदिकारिन लोन होत्तास्के,
हामुरता डोलकु-बाजें आनि लोकुल्क जमा आसि अळानद-मोत्तुकुननद हूळतोर.
24 अस्के येसु ओर्कुन “पलाते होंट पेगिड हाया हिल्ले,
अद अय्ते मींडसि मंता.”
इंचि इत्तोर.
अस्के लोकुल्क येसुन कव्तुर.
25 अगा मत्ता लोकुल्क पलाते पेय्स्तारित्ते,
येसु पेगिड मत्ता अर्राते होळियसि दाना कयदुन पीतोर अस्के अद तेदसि उदुता.
26 आनि अद पोल्ले पूरा एरिया अंता तेळियसि होत्ता.
येसु इव्वुर गुड्डिर्कुन आनि वरोन मूकन बेस कींतोर
27 येसु अगटाल पेय्सि होनानेंके,
इव्वुर गुड्डोर्क ओना पज्जो-पज्जो होंचि वरगेयसि,
“ए दाविद राजाना मर्रि aनिमे मावा पोर्रो दया कीम.”
इंचि इत्तुर.
28 येसु लोता लोप्पो होळियतस्के ओर गुड्डिर ओनागा वातुर.
अस्के येसु ओर्कुन,
“नना बेस कींतन इंचि मीकु विस्वासम मंताना?”
इत्तस्के,
“हो सामि,”
इंचि ओर इत्तुर.
29 “अल्हा अय्ते मीवा विस्वासम मत्तापे आयि,”
इंचि येसु ओरा कळकुन इटतोर.
30 अस्केन ओरा कळकु दिसालय दल्गुतां.
पज्जो येसु ओर्कु,
“इद पोल्ले बोर्के तेळिया मन्नि.”
इंचि गट्टिगा वेहतोर.
31 गानि ओर अगटाल होंचि,
ओना बारेमते पूरा एरिया अंता तेळियागोटतुर.
32 ओर इव्वुर अगटाल पेय्सि होनानेंके,
लोकुल्क वरोर देय्यम पीता मूकन येसुनहेके तत्तुर.
33 येसु देय्यमतुन पेच्हतोर,
अस्के मुन्ने वळकुवा मूकल वळकालय दल्गुतोर.
आनि लोकुल्क इचंत्रम आसि,
“इस्राएल देसेमते इल्हा आतद बस्केने हूळा हिल्लोम,”
इंचि इत्तुर.
34 गानि परिसिल्क,
“ईर देय्याल्कुना मुक्यना बलमतेने देय्याल्क तेंडांतोर,”
इंचि इत्तुर.
केदनायवा लोकुल्कुन हूळसि येसुंक पापम अन्पिस्ता
35 पजा येसु अगाटा दर्मसास्त्रम कराहना लोतगा पेनदा पोल्लें कराहतोर.
स्वर्ग राज्येम बारेमते बेसता कबुर वेहचेके,
लोकुल्कुना अन्नि तीरुकुना रोगाल्कुन,
बादन बेस कीसेके अन्नि नाह्कुने आनि सहरकुने तिरियतोर.
36 तिरियनेंके येसुन नदर लोकुल्कुनपोर्रो होत्ता.
कोहानोर हिल्वा गोर्रें बल्हा तकांचि आनि बोरे हय्सुवाहेंका तकांचि सिल्लर-सिल्लर आसि मनांतंगो अल्हा आ लोकुल्कुना गति आता,
इंचि ओर्कुन हूळसि येसुंक पापम अन्पिस्ता.
37 अस्के ओर ओना सिस्युल्कुन “पेनदा पंटा इरगा पंडुता,
गानि कबळ कियानोर तक्को मंतुर.
38 अदुनहाटीं ई पंटा कोय्यालय कबाटोर्कुन लोहा इंचि पेंदुन तल्कटु,”
इंचि वेहतोर.