येसु ओना सिस्युल्कुन बेसता कबुर वेहालय लोहंतोर
(मरकुस ३:१३-१९; लूका ६:१२-१६)
10
1 येसु ओना पन्नेंड सिस्युल्कुन दग्गेरे केयतोर,
आनि ओर्कु देय्याल्क गेदमना हक्कु हीतोर.
अचोने आयका अन्नि तीरुकुना रोगाल्कु,
बादन बेस कियना हक्कुगुडा हीतोर.
2 आ पन्नेंडु मंदिता पोर्रोलीं इल्हा मंतां:
मोदाला सिमोन (ओन पत्रुगुडा इंतुर),
ओना तम्मुर अंद्रियल,
जब्दीना इव्वुर मर्क याकोब आनि योहान,
3 पिलिप आनि बर्तोलोमि,
तोमाल आनि कर वसुल कियना मत्तयाल,
अल्पुना मर्रि याकोब आनि तद्दी,
4 सिमोन कनानि आनि इस्कारियोत यहुदाल(इरे येसुन पीसितोर.).
5 ई पन्नेंड मंदि सिस्युल्कुंक येसु ई परकारमता आदेस हीसि लोहचितोर:
यहुदिल्क तप्पा इंका वेरे लोकुल्कुने होनमट आनि सामरिया लोकुल्कुना बद्दे नाटेने होळियमट.
6 दानकु बदुलु इस्राएलता तप्सोत्ता आ लोकुल्कुनहेके होंट.
7 मिमेट होनानेंके,
“स्वर्ग राज्येम दगेर्क एव्ता,”
इंचि वेहासेक होंट.
8 रोगाल्कुन बेस कीम्टु,
हातोर्कुंक जीवा अर्हट,
कुस्टरोगम आतोर्कुन बेस कीम्टु,
देय्याल्कुन गेदमिसिम्टु,
मीकु हक्कु पुकट दोर्कुता इंचि मिमेट इंका अल्हेन पुक्कटते हीम्टु.
9 होनानेंके मी नडिक बंगारम,
एंडि,
रागिता कोत्तां इरमट.
10 अल्हेन जोरा ओयमट,
सिराप मिहगा मिमेट केरता कपडीं आनि काल्कुंक हेरपुह्क मन्निंकांटी.
गानि एक्कोता अंगि,
हेरपुह्क ओयमट.
दुड्डुगुडा ओयमट.
बारित्ते कबळ कियनोंक ओना बूति ओन्क दोर्कमड गावाले.
11 मिमेट मोदाला बद नाटे,
बद सहरते दांतिटो,
अद नाटे मुन्ने वरोर बेसता मनकना बारेमते जाडा कीम्टु.
आनि मिमेट अगटाल पेय्सि होननाल ओना लोने मंटु.
12 मिमेट लोते होळियनेंके,
“सांति मन्निकांटी,”
इंचि होळियट.
13 ओक्कला आ लोन बेसतद आते मिमेट हीता सांति अगा मनंता.
गानि ओक्कला आ लोन बेसतद आयाकोंटे मिमेट हीता आ सांति मिहागेन वापस वांता.
14 आनि बोरय्ते मीकुन लोप्पो वाया हिय्युरो आनि मी पोल्लें केंजुरो अस्के ओना लोतालो मरि नाटेनालो पेय्सानेंके मिमेट मी कादा दुब्बा अग्गेन दुल्पीसिa पेय्सट. b
15 नना मीकु निजम वेहंतन,
पेन आकिर न्यायम कियना रोजु आ नाह्कुंक सदोम आनि गमोराc ई पापी सहरकुंकन्ना एक्को कस्टम वायार.d
वायना कस्टाल्कुना बारेमते येसु वेहांतोर
(मरकुस १३:९-१३; लूका २१:१२-१७)
16 केंजट,
तोडेल्लिन लोप्पो गोर्रेन लोहताप नना मीकुन लोहचंतन,
इंचि मिमेट तरासुन लेसीं जगर्ता आनि पावरेम पिट्टे लेह्का सादा-सिंपल मंटु.
17 मनकलोर मीकुन पंचादितोर्क अपाजेप्पांतुर आनि दर्मसास्त्रम कराहना लोह्कुने ओसि मीकुन पोट्टे देब्बां इंका तना परांतुर.
इंचि मिमेट मनकलोरागटालगुडा जगर्ता मंटु.
18 नाहेंका मीकुन ओर राज्यपाल आनि राजूल्कुना मुन्ने ओयानुर अस्के ओरा मुन्ने आनि वेरे जातितोर मुन्ने नावा बारेमते मिमेट गवाइदार्क आकीट.
19-20 वळकानोर मिमेट आयका मी लोप्पो मनना पेन बाबाना आत्मा वळकांता.
अदुनहाटीं मी कयकुंक बस्के अय्ते बेडीं वाटंतुरो अस्के बतल बल्हा वळकुळो इंचि पिकिर कियमट.
वेला पोरेन मिमेट बतल वळकुगोमो अद मीकु पेन वेहंता.
21 दादाल ओना तम्मुन आनि बाबो ओना मर्रिन हव्कालय पीसि हींतोर.
पिलाल्क ओरा तल्लुर-बाबोंक अड्डम तिरियसि ओर्कुन हव्का वेहांतुर.
22 नावा पोर्रोल हेंका मीकुन दुनियातोर बोरे हयसाकोंटा आंतुर.
गानि आकिरदाका बोरय्ते गट्टि विस्वासमते मनांतुरो ओर्कुने पेन पिसागोट्टार.
23 मीकुन उंदि नाटे तकलिप हियानय्ते मिमेट इंकुंदि नाटे पेय्सि होंट.
नना निजम वेहासेक मंतन,
इस्राएलता अन्नि नाह्कुने तिरिय्मळ आनि पेनदा बेसता कबुर वेहामळ मारवा मुन्नेने मनकंक पुटतोन नना वांतन.
पेनदुक वेरियट, लोकुल्कुंक आयो!
(लूका १२:२-७)
24 गुरुंकन्ना सिस्युड पेद्दोड आयोर,
अल्हेने मालकुंकन्ना जीतागाड पेद्दोड आयोर.
25 सिराप सिस्युड गुरुनलेसीं आनि जीतागाड मालकुनालेसीं आयगोम अचोने सालु.
ओक्कला लोता मालकुन नाकुने बेलजबुलe इनानय्ते,
लोते मनना मीवद अंटोरद बद गति आयार!
26 गानि ओर्कु मिमेट वेरियमट.
मकिस मत्तव अन्नि पोल्लें बय्यर आंता आनि तेळियाकुंटा मत्तव अन्नि वस्तुक पलातुक वांतां.
27 नना मीकु हीकटते वेहतवुन,
मिमेट वेलगुने होंचि वेहट.
नना मी केव्कुने वेहतवुन मिमेट येनागर्रापोर्रो एक्किस वेहट.
28 बोरय्ते मीवा मेंदुल्तुन हव्का परांतुर गानि मी आत्मातुन हव्का परुर,
ओर्कु वेरियमट.
मेंदुल्तुन आनि आत्मातुन इवुन पीसि नरकमते वाटना पेनदुके वेरियट.
29 रोंडु कोडका पिट्टें पदि कोत्तांकु अम्मुड दांतां गदा!
अय्नागानि पेनदा इच्चा हिल्वा अवनाल उंदि इंका बूमिपोर्रो अर्रो.
30 मी तल्लता उंदुंदि केल्दा लेक्का पेन इर्रंता.
31 दानहाटीं वेरियमट,
मिमेट इत्ते पेनदा मुन्ने कोडका पिट्टेंकन्ना बच्चोरो विलवा मत्तोर आंदिर.
32 बोरय्ते लोकुल्कुन मुन्ने नाकुन “गुरु” इंचि ओप्कुंतोर ओन नना इंका स्वर्गमते मनना बाना मुन्ने नावा सिस्युड इंचि ओप्कुंतन.
33 गानि बोरय्ते लोकुल्कुन मुन्ने नाकुन “गुरु” इंचि ओप्कुनोर,
ओन नना इंका नावा स्वर्गमते मनना बाना मुन्ने नावा सिस्युड इंचि ओप्कुनोन.
येसु बारिंक वातोर, अद वेहांतोर
(लूका १२:५१-५३; १४:२६-२७)
34-35 नना इद बूमिपोर्रो सांति तायलय वातन इंचि इन्कुनमटु.
मर्रिनद बाबोनतोनि अर्राकुंटा,
मियाटद तल्लुनतोनि अर्राकुंटा आनि कोळियाटद पोरळतोनि अर्राकुंटा कियालय नना वातन.
इंचि नना सांति हियालय आयो गानि ओर्कुन वेरे-वेरे पापालय वातन.
36 मनकना पगातोर ओना लोतोर्के आयानुर.
37 बोरय्ते तल्लुर-बाबोन पोर्रो नाकन्ना एक्को पावरम कींतोर,
ओर नावा सिस्युड आयन लायक हिल्लोर.
बोर मियाह्क-मर्कुन पोर्रो नाकन्ना एक्को पावरम कींतोर,
ओरगुडा नावा सिस्युड आयन लायक हिल्लोर.
38 आनि बोरय्ते ओना क्रुस पीसिf नावा पज्जो वायोन इंतोर,
ओर इंका नावा सिस्युड आयन लायक हिल्लोर.
39 बोरय्ते ओना जीवातुन पिसागोटालय हूळांतोर,
ओर ओना जीवातुन पोगोटकुंतोर.
आनि बोर ओना जीवातुन नावाहाटीं पोगोटंतोर,
ओन्कु जीवा दोर्कंता.
बोनकु इनाम दोर्कंता?
40 बोरय्ते मीकुन लोप्पो वाया हींतोर,
ओर नाकुन लोप्पो वाया हींतोर.
आनि बोरय्ते नाकुन लोप्पो वाया हींतोर ओर नाकुन लोहता पेंदुन इंका लोप्पो वाया हींतोर.
41 बोरय्ते पेनदा कबुरतोन,
कबुरतोर इंचि ओप्कुंतोर ओन्कु पेनदा कबुरतोंकु दोर्कना इनाम दोर्कंता.
आनि बेसता मनकन बेसतोर इंचि बोर ओप्कुंतोर ओन्कु बेसता मनकंकु दोर्कना इनाम दोर्कंता.
42 बोरन्ना गिंटा ई सीदा-सादा सिस्युल्कुना लोप्पोटाल,
बोनकन्ना नावा सिस्युड इंचि गिलासमेड सल्लाटेर हियानय्ते,
नना मीकु निजम वेहासेक मंतन दीना इनाम मीकु तप्पाकोंटा दोर्कंता.