11
1 येसु ओना पन्नेंडु सिस्युल्कुंक आदेस हीतारिते,
ओर अगटाल पेय्सि गालिल एरियाता नाहकुने प्रचार कियालय आनि पेनदा पोल्लें कराहलय होत्तोर.
येसु आनि बापतिस्मा हियना योहान
(लूका ७:१८-३५)
2-3 बापतिस्मा हियना योहान जेलने मत्तस्के येसु किरिस्तुना कबाह्कुना बारेमते ओर केंजतोर.
अस्के ओना सिस्युल्कुन येसुनहेके लोहचितोर आनि ओर होंचि,
“बोरय्ते पिसागोटनोर वायानद मत्ता ओन निमेन ना?
हिलाकोंटे मोमोट इंकावरोन एदुर हूळमळा?”
इंचि पूसकीतुर.
4 सिस्युल्क पूस कीतारित्ते येसु,
“बतल अय्ते मिमेट केंजसेके मंतिरो आनि हूळसेके मंतिरो अवुन योहानुनगा होंचि वेहट.
5 गुड्डोर्क हूळसंतुर,
कुंटोर्क ताकसेक मंतुर,
कुस्टरोगम आतोर बेस आसेके मंतुर,
सेवटोर्कु केंजसेके मंतुर,
हातोर्कुंक जीवा अरसेके मंता आनि गरिबोर्कुंक बारे बेसता कबुर एवसेके मंता.
6 बोराय्ते नावापोर्रो अनमानम किय्योर,
ओन्के आसिर्वादम दोर्कंता,”
इंचि वेहतोर.
7 योहानुना सिस्युल्क अगटाल पेय्सि होनानेंके,
येसु लोकुल्कुनतोनि योहानुना बारेमते,
मिमेट बय्लि जेगाते बतल हूळालय होत्तिर?
वडिक ऊंगना जाडितुना?
8 मिमेट बतल हूळालय होंचि मत्तिर?
मलमल कप्पिड केर्ता मनकन हूळालय होंचि मत्तिरा?
मलमल कपडीं केर्रानोर राजवाडाते मनांतुर.
9 अय्ते मरि मिमेट बतल हूळालय होत्तिर?
पेनदा कबुरतोन हूळालय होत्तिरा?
हो!
नना मीकु वेहासेके मंतन,
मिमेट बोन अय्ते हूळतिर ओर पेनदा कबुरतोनकन्ना बच्चोरो पेद्दा मंतोर.
10 बारित्ते ओना बारेमते इल्हा राससि मंता.
“हुळा,
नना निकन्ना मुन्नेने नावा कबुरतोन लोहंतन,
ओर नीवाहाटीं हर्रि तयार कींतोर.”a
11 हिके केंजट,
नना निजम वेहासेक मंतन,
पुटतोराव्टेटाल इदवेरदाका बापतिस्मा हियना योहानुंकन्ना पेद्दा बोर पुट्टा हिल्लुर.
अय्नागानि स्वर्ग राज्येमते सिन्ना मनकल इंका योहानुंकन्ना पेद्दोडे.
12 बापतिस्मा हियना योहानुना रोजुकुनस्केटाल अय्ते इदवेरदाकागुडा एक्कोते-एक्को लोकुल्क स्वर्गमता राजान पोर्रो विस्वासम कीसेक मंतुर.
गानि बदमास लोकुल्क मात्रम अड्डम तिरियसि आपालय हूळसंतुर.
13 बारित्ते योहानुन दाका मूसाल आनि अंटोर पेनदा कबुरतोर स्वर्ग राज्येमता बारेमते बविस्यवानिं कीसेक मत्तुर.
14 मिमेट गिंटा अव बविस्यवानिन ओपकुनानय्ते,
पेनदा कबुरतोर एलियाल वायनद मंता इंचि इत्तुर,
ओर ईरे योहान आंदुर.
15 बोर्कु केंजालय केव्क मंतां ओर केंजट.
16 नना ई पीळिता लोकुल्कुन बोरा लोप्पो कल्पकन?
मिमेट अय्ते हाटुमते उदिस,
वरोंक-वरोर केयसि,
17 मोमोट मीहाटीं तूरीला उह्कुतोम,
गानि मिमेट एगरा हिल्लिर.
मोमोट दुक्कमता पाटां पारतोम,
गानि मिमेट अळा हिल्लिर,
इंचि वेहना पिलाल्कुनलेह्का मंतिर.
18 बारित्ते योहान बतल तिनाकुंटा उनाकोंटा वातोर गानि लोकुल्क मात्रम ओन देय्यम पीता इनुंदुर.
19 अल्हेन मनकंक पुटतोन ननागुडा अंटुरालेसीं तिंचेके-उंचेके वातोर गानि लोकुल्क मात्रम,
“हुळाट,
ईर बच्चोर तिंतोर,
बच्चोर उंटोर?
कर वसुल कियानोर आनि पापि लोकुल्क ईना दंटातोर आंदुर,
इत्तुर.
गानि पेनदा बुद्दिता पेदातनम दाना कबळ पोर्रोटाल तेळियंता,”
इंचि वेहतोर.
विस्वासम कियवोरा पिसवर बेस मन्नो
(लूका १०:१३-१५)
20 आयंका येसु बव नाह्कुने एक्को अद्बुताल्क कीतोरो आ नाहकुना लोकुल्क मनसु मार्सकुंचि पेनदाहेके तिरिया हिल्लुर.
दानहाटीं येसु आ नाह्कुन पोर्रो दोसेम दोसतोर.
21 “ए कोरजिना आनि बेतसेदा नाह्कुना लोकुरिटा,
मीकु गोसा तप्पो!
ओक्कला मिहगा बव अद्बुताल्क आतां,
अवे गिंटा सूर आनि सिदोन नाह्कुने आसि मत्ते अगाटा लोकुल्क बिराना बोंतां हुट्सि आनि मेंदुल्क बुडदी होककुंचि दुक्कमते मनसु मार्सकुंचि पेनदाहेके तिरियसि मन्नेर.
22 गानि नना मीकु वेहासेक गदा,
पेन न्यायम कियना रोजुने सूर आनि सिदोनतुरा परिस्तिति मीकन्ना बच्चोरो बेस मनंता.”
23 “ए कपर्नाहुम सहरता लोकुरिटा,
मिमेट स्वर्गमते दांतोम इन्कुंचंतिरा?
मिमेट नरकमते दांतिर.
ओक्कला मिहगा आता अद्बुताल्क सदोम सहरते आसि मत्ते,
अद सहर इदवेरादाका दाका आगवड.
24 गानि मीकु नना वेहासेक गदा,
पेन न्यायम कियना रोजुने सदोम सहरता परिस्तिति मीकन्ना बेस मनंता,”
इत्तोर.
येसुन नम्मुतोर्कु सुकाल्क दोर्कंतां
(लूका १०:२१,२२)
25 आ वेलाते येसु इल्हा वळकुतोर:
“ए नावा बाबा,
बूमि आनि स्वर्गमता सामि.
तेल्वि गल्लोर्क आनि विचारवंतुल्कुंनगटाल इव पोल्लें मक्किचि इरतिन आनि सीदा-सादा लोकुल्कुंक बारे इव पोल्लें हुपिस्तिन,
इंचि नना नीवा स्तुति किसेक मंतन.
26 हो बाबा!
नीकु इदे बेस अन्पिस्ताहाटीं निमे इल्हा कीतिन.”
27 मर्रा येसु लोकुल्कुनतोनि इल्हा वळकुतोर.
“नावा बाबाल नाकु अन्नि अप्पाजेपतोर.
अयना निजम बतल इत्ते,
बाबान तप्पा मर्रिन बोरे एरपाट किय्युर,
आनि मर्रिन तप्पा बाबान बोरे एरपाट किय्युर.
मर्रि ओना इस्टमाताप बाबाना बारेमते बोर्क अय्ते तेळियानाल वेहांतोर ओरे बाबान एरपाट कींतुर.”