नोमकेम रोजुना बारेमते येसु कराहता पोल्लें
(मरकुस २:२३-२८; लूका ६:१-५)
12
1 उंदि नोमकेम रोजुने येसु आनि सिस्युल्क पोलाल्कुनाल होंचेके मत्तुर.
अस्के सिस्युल्कुंक कर्वेस्सि मत्ताहेंके हेनुकु नल्सि तिंचेक मत्तुर.
2 अदुन हूळसि इच्चुर परिसिल्क येसुन,
“हुळा!
नीवा सिस्युल्क नोमकेम रोजुन इंका नोमुर,”
इंचि इत्तुर.
3 अस्के येसु ओर्कुन,
“दाविदुंकु आनि ओना दंटातोर्कुंक कर्वेस्तेंके ओर बतल कीतोर,
अद मिमेट हदवा हिल्लिरा?
4 ओर पेनदा गुळिते होळियतोर,
आनि पेनदुक मोळकुता हारिन अंटोर तित्तुर.
अव हारिं तिनमड इत्ते दर्मसास्त्रमता विरोदमते मत्ता.
अव हारिं सिराप पेर्मालोर्क तप्पा इंका बोरे तिना परुर.
5 अचोने आयका पेर्मालोर्क नोमकेमता रोजु गुळिते कबळ कींतुर इत्ता संगति मूसाना नियमते मंता इद मीकु एर्के मंता.
आनि अल्हा कियमळ तप्पु आयो.
6-8 दर्मसास्त्रम इल्हा इंता.
‘नाकु मोक्कु मन्नि गानि लोकुल्कुनपोर्रो दया गावाले.’
a दीना निजम अर्तम मीकु तेळियसि मत्ते ई तप्पु हिल्वोर्कुन मिमेट तप्पु इंचि ईना कोन्नेर.
नना वेहनद इदे गदा,
गुळिकन्ना पेद्दोड वरोर इग्गे मंतोर.
बारित्ते मनकंक पुटतोन नना,
नोमकेमता रोजुना इंका मालक आंदुन.”
इंचि इत्तोर.
कय वत्सोत्ता मनकन येसु बेस कींतोर
(मरकुस ३:१-६; लूका ६:६-११)
9 येसु अगटाल पेय्सि यहुदिल्कुना दर्मसास्त्रम कराहना लोते होत्तोर.
10 अगा वरोर कय वत्सोत्ता मनकल मत्तोर.
परिसिल्क येसुन बल्हा तप्पुने पियना इंचि ओन,
“नोमकेम रोजुने बोनना बेस कियमळ बेसा,
बेस आयोना?”
इंचि पूसकीतुर.
11 अस्के येसु,
“मिहगा बोनागना उंदि गोर्रे मंता इनकुंटु,
अद गिंटा नोमकेम रोजुने पोक्काते अर्रानय्ते तेंडिरा?
तेंडांतिर!
12 इग्गे अय्ते,
गोर्रेकन्ना मनकना जीवाक बच्चोरो विलवा मंता!
अदुनहेंके नोमकेम रोजुने लोकुल्कुन बेस किया परांतिर इंचि दर्मसास्त्रम वेहंता.”
इंचि इत्तोर.
13 अस्के येसु कय वत्सोत्तोन,
“नीवा कय मुन्नेळक हहा,”
इत्तोर.
ओर कय मुन्नेळक हाहतोर आनि अद कय इंकुंदि कयदालेसीं बेस आता.
14 अदुन हूळसि परिसिल्क,
ईन बल्हा हव्कुकोम,
इंचि पलाते होंचि वळकुकुत्तुर.
येसु, पेन पेर्कुत्ता सेवक आंदुर
15 परिसिल्क वळकानद कन्कुंचि येसु अगटाल पेय्सि होत्तोर.
अस्के वेल्लेटुर लोकुल्क ओना पज्जो होत्तुर.
येसु रोगाल्कु मत्तोर्कुन अंटोर्कुन बेस कीतोर.
16 पजा ओर ओना बारेमते बोर्के बतले वेहमट इंचि अंटोर्क वेहतोर.
17 इत्ते यसयाल इनना पेनदा कबुरतोर इत्तव पोल्लें पूरा आयना इंचि येसु सामि इल्हा कीतोर.
18 यसयाना बविस्यवानि इल्हा मत्ता:
ईर नावा सेवक आंदुर,
ईन नना पेर्कुत्तन.
नना ओन पावरम कींतन आनि
ओना बारेमते कूस मंतन.
नना नावा पवित्र आत्मा ओना पोर्रो इर्रंतन,
ओर नावा न्यायमतुन अंटोरहाटीं वेहांतोर.
19 ओर बोनतोने तेरहानोर आयोर,
जोरते वरगेयानोर आयोर,
हरकुन पीसि लोकुल्कुंक ओना अल्किर केंजा वायो.
20 नावा न्यायम गेल्सनाजेम ओर दुरसोत्ता बोंगुनगुडा उरहोरु,
इंका पिर्रना वेडसितुनगुडा पिरहोर.b
21 दानहाटीं अन्नि देसेल्कुनोर ओना पोर्रोलते आसेते मंदनुर.c
येसु आनि देय्याल्कुना मुक्यल
(मरकुस ३:२०-३०; लूका ११:१४-२३)
22 अस्के लोकुल्क देय्यम पीता वरोन गुड्डि-मूकन येसुनगा तत्तुर.
तत्तारित्ते येसु ओन बेस कीतोर आनि आ मनकल हूळालय-वळकालय दल्गुतोर.
23 अस्के अगाटा लोकुल्क अंटोर इचंत्रम आसि,
“वरोर दाविद राजाना तंतुने पुट्टनोर मत्तोर,
ईर ओरे आयोर गदा?”
इंचि इत्तुर.
24 गानि अगा मत्ता परिसिल्क दीन केंजसि,
“ईर अय्ते बेलजबुल इनना देय्याल्कुना मुक्यना सायता पीसि देय्याल्कुन तेंडसेक मंतोर!”
इंचि इत्तुर.
25 परिसिल्कुना पीटा विचाराल्क एरपाट कीसि,
ओर तप्पु वळकुतुर इंचि हुप्सालय,
येसु ओर्कुन,
“बा राज्येम लोप्पो वरोना पोल्ले-वरोंक अर्राकुंटा आंता,
अद राज्येम पाडासि दांता.
अल्हेने लोते आयि,
नाटे आयि वरोना पोल्ले-वरोंक अर्राकुंटे बतले नित्ता पर्रो.
26 अल्हेने देय्यम दाना देय्याल्कुन तेंडते अवुना लोप्पेन अर्राकुंटा आंता.
अस्के अवुना राज्येम बल्हा नित्तंता?
27 मिमेट इत्ताप नना बेलजबुलना बलमते देय्याल्कुन तेंडंतन.
गानि मी लोकुल्क इंका देय्याल्कुन तेंडतुर,
ओर इंका देय्यमता बलमतेने तेंडांतुरा?
तेंडुर.
दानहाटीं मी लोकुल्के मी तप्पु तेंडांतुर.
28 गानि देय्याल्कुन नना पेनदा आत्माता बलमते तेंडंतन,
इत्ते स्वर्ग राज्येम मिहगा एव्ता,
इदुन एरपाट कीम्टु.
29 इल्हेने बोरन्ना बलवान मनकना लोते दोंगा कियनद मत्ते,
मुन्ने आ बलवान मनकन दोहाचि वाटतेन पूरा सामानतुन दोसकुंचि ओया परांतोर.
30 बोरय्ते नावा दंटाते मन्नोर,
ओर नावा विरोदमतोर आंदुर,
आनि बोरय्ते नाकु सहायम किय्योर,
ओर नाहगटाल पायिचना कबळ कींतोर.”
31 नना मीकु वेहनद बतल इत्ते,
मनकना अन्नि पापाल्कुन,
अल्हे पेनदुक विरोदमते वळकुतवुन,
पेन माप किया परांता.
गानि पेनदा पवित्र आत्माता कबाह्कुन बोर पास्कांतोर,
ओन मात्रम पेन माप किया पर्रो.
32 अल्हेने बोर मनकंक पुटतोन नाकु विरोदमते वळकांतोर,
ओन इंका पेन माप किया पर्रार.
गानि पेनदा पवित्र आत्माकु विरोदमते वळकांतोर,
ओन पेन माप किय्यो.
इद कालमते आयि,
वायना कालमते आयि,
बस्केने माप किय्यो.
मरा आनि पंडि
(लूका ६:४३-४५)
33 पजा येसु परिसिल्कुनतोनि इल्हा वळकालय दल्गुतोर.
“केंजट,
कायातुन हूळसि मिमेट मरातुन एरपाट कीकिर,
मरा बेसतद इत्ते दाना कायां इंका बेसतावे.
अल्हेने मरा कराबतद इत्ते दाना कायां इंका कराबतवे.
34 ए कराब गुनम लोकुरिटा,
मीवा पीटे बव गुनाल्क मंतां,
अवे तोडदाल पेय्संता.
इंचि मिमेट कराबतोर मंचि,
मीकु बेसतां पोल्लें बल्हा वळका वायनुं!
35 बेसता मनकल ओना पीटाल बेसतंगे पोल्लें पेच्हांतोर,
अल्हेने कराब मनकल ओना पीटाल कराब पोल्लें पेच्हांतोर.
36 इंका नना मीकु वेहंतन,
पज्जो-मुन्ने विचारम कियाका मीवा तोडदाल पेय्सता उंद-उंदि वट्टि पोल्लेता लेक्का आकिर न्यायम कियनाd रोजु मीवाहेंदाल एतार.
37 मी पोल्लेना पोर्रोटाले मिमेट निर्दोसुल्कुना लेक्काते वांतिर,
इंका मिमेट वळकाता पोल्लेना पोर्रोटाले सिक्सा जर्गंता.”
इंचि इत्तोर.
यहुदि लोकुल्क येसुना परिक्सा हूळंतुर
(मरकुस ८:११, १२; लूका ११:२९-३२)
38 अस्के इच्चुर परिसिल्क आनि दर्मसास्त्रम कराहना गुरुल्क येसुनगा वासि,
“गुरु,
निमे पेनदाहेंदाल वातन इंतिन,
अय्ते नीवा कयदाल उंदि चिन्ह माकु हूळाना मंता,”
इंचि इत्तुर.
39 अस्के येसु,
“सेड्डोर्क,
पेनदा पोल्ले केंजवोरु,
नाकुन चिन्ह हुप्सा इंतुर.
गानि योनाल इनना पेनदा कबुरतोना चिन्ह ओर्कु नना हुप्संतन.
दान होळसिसि इंकुंदि चिन्ह ओर्कु हुप्सोन.
40 इत्ते योनाल बल्हा नर्का-पिय्यल मूंड रोजकु पेद्दा जिम्माता पीट लोप्पो मत्तोर,
अल्हेने मनकंक पुटतोन नना नर्का-पिय्यल मूड रोजकु बूमिता पीटा लोप्पो मनांतन.
41 केंजट,
योनाना कबुर केंजसि निनवे सहरतोर अय्ते ओरा मनसु मार्सकुंचि पेनदाहेके तिरियतुर.
हूळाट,
योनांकन्ना पेद्दोड मी मुन्ने नितिस मंतोर.
अदुनहेंके आकिर न्यायमता रोजुने निनवे सहरतोर नितिस इद कालमता मी लोकुल्कुनपोर्रो तप्पु दोसनुर.”
42 अल्हेने सिबा देसेमता रानि सुलेमान राजाना तेल्विता पोल्लें केंजालय वेरे देसेमताल अगा वासि मत्ता.
हूळाट,
सुलेमानुंकन्ना पेद्दोड वरोर मी मुन्ने नितिस मंतोर.
अदुनहाटीं मिमेट नावा बुद्दिता पोल्लें केंजवाहेंके,
आकिर न्यायमता रोजु आ रानि इंका नितिस इद कालमता मी लोकुल्कुनपोर्रो तप्पु दोसार.
43 (इद कालमता लोकुल्कुना जीवाते पेनदा पोल्लेक जेगा हिलाकोंटे बल्हा गोसा आयार.
इदुन तेळियागोट्सि वेहालय येसु इद उदाहरन हीतोर.)
उंदि देय्यम बस्के मनकानाल पेय्सि दांता,
अस्के अद आराम कियालय एर हिल्वा एरियाते मनालय जेगा पहकंता,
गानि दान्कु जेगा दोर्को.
44 अस्के अद देय्यम,
“बोनगटाल नना पेय्सि वातन मर्रा ओनागेने मल्सि दांतन,”
इल्हा इन्कुंता.
मर्रा अगा होंचि हूळतस्के मुन्नेटा लोन रिकम आताप,
मंचिगा ऊसताप इल्हा दानकु बेस दिसंता.
45 अस्के अद मर्रा तिरियसी होंचि दानकन्ना वेल्ले सेड्डातव एडूं देय्याल्कुन सायता कीसि पीसि वांता.
अस्के अव मनकना लोप्पो नेंगसी जेगा पींतां.
अस्के ओन्कु मुन्नेटा गोसाकन्ना,
इंदकेटा गोसा वेल्ले कराबतद आंता.
अल्हेने इद कालमता लोकुल्कुना जीवाते पेनदा पोल्लेक जेगा हिलाकोंटे इल्हेने गोसा आयार,
इंचि इत्तोर.
येसुना निजम जीवातोर बोर?
(मरकुस ३:३१-३५; लूका ८:१९-२१)
46 जमा आता मंदितोनि येसु वळकासेके मन्नेंके ओना यावल,
ओना तम्मुह्क वासि,
ओनतोनि वळकानद मंता इंचि लोता पलाते नितिस मत्तुर.
47 अस्के बोरो,
“गुरु,
मी यावल,
आनि तम्मुह्क नितोनि वळकानद मंता इंचि पलाते नितिस मंतुर,”
इंचि येसुंक वेहतोर.
48 दीन केंजसि येसु,
“बद ना यावल,
बोर ना तम्मुह्क?”
इंचि पूसकीतोर.
49 पजा ओना सिस्युल्कुनहेके कय हुपिच्चि,
“हूळाट,
ईरे ना यावल आनि तम्मुह्क!
50 बोर नावा स्वर्गमता बाबाल वेहताप ताकंतोर,
ओरे नावा तम्मुह्क,
हेलाह्कु आनि यावन लेह्का दग्गेटोर आंदुर,”
इंचि येसु इत्तोर.