विज्जा तासानोना वेसुड
(मरकुस ४:१-९; लूका ८:४-८)
13
1 अदे रोजु येसु लोताल पेय्सि सेरवुना ओड्डुनगा होंचि उदुतोर.
2 वेल्लेटुर लोकुल्क ओनगा जमा आताहेंका ओर उंदि डोंगा एक्किस उदतोर.
आनि लोकुल्क बारे ओना मुन्ने सेरवु ओड्डुनपोर्रो नितिस मत्तुर.
3 अस्के ओर वेल्लेने पोल्लें वेसुड वेहासेक कराहतोर.
अव्टेटाल उंदि वेसुड इल्हा मंता:
“केंजट,
वरोर कास्तकारी मनकल विज्जा तासालय पेय्स्तोर.
4 ओर वीतनेंके इच्चुं विज्जां हरदगा अर्तां,
अस्के अवुन पिट्टें वासि पेर्सि तित्तां.
5 इच्चुं विज्जां बंडाना गेर्सेपोर्रो अर्तां.
तोळी एक्को हिलुवादानकु आ विज्जां बिराने मोलियतां.
6 गानि हिह्कु लोप्पोळकु होनवाहेंके पोड्दु पेस्तारित्ते मोल्कां वत्सि हासोत्तां.
7 आनि इंका इच्चुं विज्जां हाह्कुना पोदाने अर्तां.
अव हाह्कुन पोदां इरगा बेर्सि विज्जन बेर्सा हिया हिल्लें.
8 इच्चुं विज्जां बेसता जेगाते अर्तां.
आनि बेस पंटा पेस्ता.
अव उंद-उंदि मोदोल्कु बगा मुप्पै अंताल्कु,
बगा अरवै अंताल्कु,
बगा नूर अंताल्कु इल्हा पंटा पेयस्ता.
9 मिहगटाल बोर्कु केंजालय केव्क मंतां ओर केंजट!”
वेसुडिं वेहचि वळकाना उद्देसम
(मरकुस ४:१०-१२; लूका ८:९,१०)
10 पजा सिस्युल्क ओनागा वासि,
“गुरु,
निमे लोकुल्कुनतोनि वळकानेंके वेसुड वेहासेक बारि वळकांतिन?”
इंचि पूसकीतुर.
11 येसु अस्के ओर्कु इल्हा वेहतोर.
स्वर्ग राज्येम लोप्पोटा मरममतुन एरपाट कियना बुद्दि मीकु मंता,
गानि ओर्कु हिल्ले.
12 केंजट,
स्वर्ग राज्येमता मरममतुन बोरय्ते तेळियागोटकुंतन इंचि इंतोर,
ओन्कु पेन इंका बुद्दि हींता आनि ओन्कु वेल्लेन आंता.
गानि बोरय्ते स्वर्ग राज्येमता मरममतुन तेळियागोटकुनालय हूळोर,
ओनागटाल मात्रम मत्ता बुद्दितुनगुडा पेन वापस एतकुन्नार.
13 ओर हूळुड अय्ते हूळंतुर,
गानि ओर्कु अद दिस अर्रो.
ओर केव्कुने केंजुड अय्ते केंजांतुर,
गानि ओर्कु केंजा वायो,
अद ओर तेल्पिच्कुनुर.
अदुनहाटीं नना वेसुड वेहासेक ओरतोनि वळकांतन.
14 यसयाल इनानोर ओरा बारेमते रासतद पेनदा पोल्ले इंदके इल्हा निजम आता:
मिमेट केंजंतिर निजमे,
गानि बस्केने अर्तम कीकुन्निर.
कळकुने हूळंतिर,
गानि अद मीकु तोसो.
15 ओर कळकुने हूळसि,
केव्कुने केंजसि आनि
मनसुनाल अर्तम कीकुंचि नाहेके तिरियतस्के ओर्कुन नना बेस कीकन.
इल्हा बस्केन जर्गा मन्नि इंचि ओरा मनसु गट्टि पडता,
केव्क बारे मंदोम आसि केंजा वायाकोंटा आतां.
आनि कळकुन बारे मुचकुतुर.
a
इद पोल्ले नावां केंजवोरा बारेमते निजम आता.
16 गानि मीवा कळकु हुळंतां आनि केव्क केंजंतां इंचि मिमेट नसिबतोर.
17 नना निजम वेहचंतन,
इय्याला बव हूळसंतिर,
केंजसंतिर,
इवुन मुन्नेटा पेनदा कबुरतोर आनि सत्तेमंतुल्क इल्हा वेल्लेटोरे,
हूळालय,
केंजालय तन्लाडुंदुर.
गानि ओर्कु हूळालय दोर्का हिल्ले,
केंजालय दोर्का हिल्ले.
विज्जा तासानोना वेसुडता अर्तम
(मरकुस ४:१३-२०; लूका ८:११-१५)
18 मिमेट इंदके विज्जां तासानोना वेसुडता अर्तम एरपाट कीम्टु.
19 स्वर्ग राज्येमता कबुरतुन केंजसि बोर दान अर्तम कीकुनोर,
ओना मनसुने बतल अय्ते वीतिस मत्तनो अदुन देय्यम वासि इग्गिस ओंता.
आ लोकुल्क इत्ते हरदा पोर्रो अर्ता विज्जानसंटोर.
20 बोरय्ते पेनदा कबुरतुन केंजसि कूस आसि बिराना स्विकारम कींतोर,
असंटोर गेर्से बंडाना पोर्रो अर्ता विज्जानसंटोर.
21 ओरा लोप्पो हिह्कु गट्टि पडुवा हेंका,
पेनदा पोल्लेतुन नम्मुतारित्ते कस्टमकु,
तिप्पल्क वाते बिराना पेनदा विस्वासमताल हब्बेर अर्रांतुर.
22 बोर पेनदा कबुरतुन केंजांतोर गानि सम्सारमता रंदि,
अन्नम-दनमता आस्ति,
इसोंटव विचाराल्क मत्ताहेंका पेनदा पोल्ले ओना मनसुने नित्तो.
अस्के अद पोल्ले बतल पाय्दातद आयो.
इसंटोर हाह्कुना पोदाने अर्ता विज्जानसंटोर आंदुर.
23 आनि बोर पेनदा कबुरतुन केंजसि तेळियागोटकुंतोर,
ओर बेसता जेगाते अर्ता विज्जानसंटोर आंदुर.
पलाते पेय्सि बेसता कबाह्क कींतोर.
बल्हा बेसता जेगातगा अर्ता विज्जां उंद-उंदि मोदोल्कु बगा मुप्पै अंताल्कु,
बगा अरवै अंताल्कु,
बगा नूर अंताल्कु इल्हा दाना पंटा पेय्स्ता,
असोंटा बेसता जेगाते अर्तोर,
आ पंटालेह्का ओरां कबाह्क दिसंतां.
हकोलिंbना वेसुड
24 येसु इंकुंदि वेसुड वेहतोर.
बोर मनकल अय्ते ओना पोलमते गोह्कुना बेस विज्जां वीततोर,
आ मनकन लेह्का स्वर्ग राज्येम मंता.
25 गानि अंटोर लोकुल्क मींडतद हूळसि ओना पगातोर वासि गोह्कुने हकोलिं वीतिस होत्तोर.
26 पजा वंजिं मोलिय्सि पोट्टाक वासि मियतां,
अस्के हकोलिं इंका दिसतां.
27 अस्के नेदा मालकुनगा जीतागाह्क वासि,
“मालक,
निमे अय्ते नीवा नेदे बेसता विज्जां वीत्सि मत्तिन गदा?
मरि अगा हकोलिं बेंदाल वातां?”
इंचि पूसकीतुर.
28 अस्के “इदु बोरो पगा मत्तोर कीता कबळ आंद.”
इंचि मालक इत्तोर.
“अय्ते निमे बतल इंतिन मरि,
मोमोट होंचि हकोलितुन पीक्सि पोहकोमा?”
इंचि जीतागाह्क मालकुन पूसकीतुर.
29 अस्के मालक,
“मन्नि,
हकोलितुन पीकनेंके गोह्कुनगिंटा पीकिकिट!
30 कोताक वयनदाका अव रोंडुगुडा कलियसे बेर्सिंकांटी.
पजा कोताक वातस्के कोय्यानोरकुंक नना,
‘मुन्ने हकोलितुन कोय्यट आनि हेरकीं दोहाचि अवुन बोडसि पोहट.
पजा नावा गोह्कुन जमा कीसि गुम्मिते दोस्सटु इंतन,’
इंचि जीतागाह्कुंकु वेहतोर.”
आवाल्कुना पेळेता वेसुड
(मरकुस ४:३०-३२; लूका १३:१८,१९)
31 पज्जो येसु ओर्कु इंकुंदि वेसुड वेहतोर.
“स्वर्ग राज्येम बारेमते उंदि वेसुड वेहंतन केंजट.
बोरो मनकल वरोर ओना तोटाते आवाल्कुना पेळे वीततोर.
32 आवाल्कुना पेळे अन्नि पेळेकुंकन्ना सिन्नागा मनंता,
गानि बेरस्तस्के अद तोटाते मनना अन्नि मराकुंकन्ना पेद्दा मरा आंता.
आनि मब्बुने परियना पिट्टें वासि दाना कोम्मांक गूडां दोहंतां.”
33 येसु पज्जो ओर्कु इंकुंदि वेसुड वेहतोर.
“स्वर्ग राज्येम,
पुल्लटा पिंडितसंटद.
बदो उंदि मुरतळ इच्चोर पुल्लटा पिंडितुन तव्वेड पिंडिते कल्पता.
अय्ते मेल्लगा-मेल्लगा आ पूरा पिंडि अंता पुल्लगाता.”
34 इव अन्नि पोल्लें येसु लोकुल्कुंक वेसुडिनेन वेहतोर.
वेसुड वेहका ओर ओर्कु बतले वेहाकोंदुर.
35 बारित्ते पेन दाना कबुरतोरतोनि मुन्ने वेहचि मत्ता पोल्ले इंदके निजम आता,
अद पोल्ले इल्हा मंता:
नना नावा तोडदे वेसुडिं वेहंतन.
दुनिया पुट्टतगटाल मक्सि मत्तव पोल्लेन नना वळकािस वेहंतन.c
हकोलिना वेसुडता अर्तम
36 पजा येसु लोकुल्कुन होळसिसि लोन होत्तोर.
अस्के सिस्युल्क ओनागा वासि,
“गुरु,
पोलमते वीतता हकोलिता वेसुडतुन माकु तेळियागोट्सि वेहा.”
इत्तुर.
37 अस्के येसु ओर्कु इल्हा वेहतोर.
केंजट,
बेसता विज्जां वीतानोर इत्ते मनकंक पुटतोन नना आंदुन.
38 पोलम इत्ते इ दुनिया आंदु.
आनि बेसता विज्जां इत्ते पेंदुन “मावा राजाल” इंचि नमतोर,
आनि हकोलिं इत्ते देय्याल्कुन पोल्लें केंजानोर आंदुर.
39 आनि हकोलिं वीततद देय्यम आंद.
पंटा कोयना वेला इत्ते दुनिया मुंळगना आकिर वेला.
आनि कोय्यानोर इत्ते पेनदा दूतां आंद.
40 अस्के बल्हा हकोलितुन कोयसि,
जमा कीसि तडमि दोसतुर,
अल्हेने इद दुनिया मुंळगना आकिर वेलाते आयार.
41 बारित्ते अद वेलाते मनकंक पुटतोन नना,
नावा दूतन लोहंतन.
आनि अव नावा राज्येमते मनना पापिर्कुन आनि पापम किया वेहानोर्कुन अंटुर्कुन पेच्हंतां.
42 आनि बस्केने पिर्रकोंटा पोत्तना तडमिते वाटसींतां.
अगा बस्केळक अळमळ,
किटुर-किटुर पल्कु कोर्कमडे मनंता.
43 अस्के सत्तेमंतुल्क बोरय्ते मंतुरो ओर ओरा पेन बाबाना राज्येमते पोड्दुन लेह्का मेर्सेके मनांतुर.
बोर्कु अय्ते केव्क मंतंगों ओर केंजट.
पोलमते मकिच्ता दनमता वेसुड
44 स्वर्ग राज्येम बारेमते इंकुंदि वेसुड वेहंतन केंजट.
उंदि पोलमते दनम मक्किचि मत्ता.
बोरो वरोर मनकल आ मक्किचि मत्ता दनमतुन हूळतोर.
आनि मर्रा अगेने मक्किचि इरगा कूस आसि लोन होत्तोर.
पजा ओर ओना लोन मत्तद-हिलवद अन्नि अम्कुंचि वाता कोत्ताने अद पोलमतुन असकुत्तोर.
बेस मुच्चेमता वेसुड
45 स्वर्ग राज्येम बारेमते इंकुंदि वेसुड वेहासेक केंजट.
वरोर व्यापारि बेसता मुच्च्याल्क पहकसेक मत्तोर.
46 अय्ते ओन्कु उंदि वेल्ले दराता मुच्येम दिसता,
अस्के ओर लोन होंचि ओनगा मत्तद-हिलवद अन्नि अम्कुंचि वाता कोत्ताने अद मुच्येमतुन असकुत्तोर.
ओल्लता वेसुड
47 स्वर्ग राज्येम बारेमते मर्रा उंदि वेसुड वेहासेक केंजट.
उंदि ओल्ला मत्ता.
अद ओल्लातुन बेरेडते इसुरतस्के अन्नि रकाल्कुना मीन्कु अर्तां.
48 ओल्लामेड मीन्कु अर्तस्के,
मीन्कु पिय्यानोर दान ओड्डुंक इग्गुतुर आनि बेसतवुन पेर्सि तोत्तिते वाटतुर,
अल्हेने कराबतवुन बारे पोहचीतुर.
49 इद दुनिया मुंळगना आकिर वेलातेगुडा अल्हेन आयार.
पेनदा दूतां वासि,
सेड्डोर्कुन बेसटोर्कुनाल वेरे कियनुं.
50 आनि सेड्डोर्कुन पिर्वा तडमिते वाटसियनुं.
अगा बस्केळक अळसेके,
किटुर-किटुर पल्कु कोर्कसेक मनांतुर.
इंचि वेहतोर.
51 पजा “इव अन्नि पोल्लें मीकु तेळियतंगा?”
इंचि येसु सिस्युल्कुन पूसकीतोर.
अस्के “हां गुरु,
माकु तेळियतां,”
इंचि ओर इत्तुर.
52 अस्के येसु ओर्कु “बोर मनकल अय्ते ओना कजानाताल पूनद-पळानद सोम्मुन पलाते पेच्हांतोर,
आ मनकन लेह्कने स्वर्ग राज्येमता सिस्युड मत्ता हरेक दर्मसास्त्रम कराहना गुरु मनांतोर,
ओर पडानव आनि पूनाव रोंडु इंका कराह परांतोर.”
इंचि वेहतोर.
येसु वापस ओना नार वांतोर
(मरकुस ६:१-६; लूका ४:१६-३०)
53 पज्जो इव वेसुडिं वेहमळ महासि येसु अगटाल पेस्तोर.
54 ओना नार वासि अगाटा दर्मसास्त्रम कराहना लोते होंचि लोकुल्कुंक पेनदा पोल्लें कराहलय दल्गतोर.
अस्के अव पोल्लें केंजसि अंटोर लोकुल्क इचंत्रम आसि,
“ईन्कु इच्चोर बुद्दि आनि अद्बुताल्क कियना ताकत,
बगटाल दोर्कुता?
55 ईर अय्ते वडलना मर्रे गदा?
ईना तल्लुर अय्ते मरियमे आंद,
इंका याकोब,
योसेप,
सिमोनि,
यहुदाल ईर अय्ते ईना तम्मुह्के आंदुर.
56 अचोने आयका ईना हेलाह्कगुडा मना नड्डुमे मंतां.
अय्ते मरि ईन्कु इवन्नि पोल्लें,
कबाह्क बोर हीतुर?”
इंचि नाटेनोर वळकुकुनुंदुर.
57 दानहाटीं ओर येसुनपोर्रो होंग आतुर.