बापतिस्मा हियना योहानुन हव्कंतुर
(मरकुस ६:१४-२९; लूका ९:७-९)
14
1 अद वेलाते गालिल एरियाता राजाल,
हेरोदa इनानोर,
येसुन बारेमते केंजतोर.
2 आनि “ई येसु इत्ते बापतिस्मा हियना योहान आंदुर.
ओर हातोराव्टेटाल तेदतोर दानहाटीं इसंटा अद्बुताल्क कीसंतोर.”
इंचि ओना सेवाकुल्कुंक वेहतोर.
3-4 बारित्ते हेरोद राजाल ओना तम्मुर पिलिपुना मुत्तो हेरोदियान इरकुंचि मत्तोर अस्के,
“नीवा तम्मुना मुत्तोन निमे निहगा इरमळ बेस आयो,”
इंचि योहान हेरोद राजांक वेहचि मत्तोर.
अदुनहाटीं हेरोद राजाल योहानुंक बेडीं वाटसि ओन जेलने वाटतोर.
5 अगाटाले हेरोद राजाल योहानुन हव्कालय कोरसेके मत्तोर,
गानि लोकुल्क योहानुन पेनदा कबुरतोर इंचि नम्मुंदुर,
अदुनहेंके राजाल लोकुल्कुंक वेरियसि योहानुन हव्काकोंदुर.
6 गानि हेरोद राजाना पुटता रोजु मत्तस्के अगा हेरोदियाना मिय्यड लोकुल्कुन मुन्ने एगिरसी राजन कूस कीता.
7 अस्के राजाल कूस आसि,
“निमे बतल तल्कंतिन अद नीकु हींतन” इंचि दान्क पोल्ले हीतोर.
8 अस्के अद दाना तल्लुर वेहता परकारम,
“बापतिस्मा हियना योहानुना तल्ला उंदि गमेलाते वाटसि नाकु हीम,”
इंचि इत्ता.
9 इद केंजसि राजांक बागा दुक्कम वाता.
गानि अगा मत्ता अंटोर हेडमितोरहाटीं आनि हीता पोल्लेहाटीं,
अद तल्कतद दान्कु हीम्टु इंचि आदेस हीतोर.
10 आनि जेलते मत्ता योहानुन हव्कीसि ओना तल्ला तायलय मनकन लोहतोर.
11 अस्के योहानुना तल्ला गमेलाते वाटसि दान्क हीते अद ओसि दाना यावांक हीता.
12 पजा योहानुना सिस्युल्क ओना पीनगुन ओसि गोरी दोसतुर.
आनि होंचि इद पोल्लेतुन येसुंक वेहतुर.
13 इद पोल्ले केंजसि येसु डोंगाते उदिस बदो अलग-सलग जेगाते पेय्सि होत्तोर.
येसु हेय्युं वेय्कुना मंदिक गाटो तासतोर
(मरकुस ६:३०-४४; लूका ९:१०-१७; योहान ६:१-१४)
14 ओर होतद एरपाट आतारित्ते लोकुल्क ओरा नाहकुनाल ताक्सेक ओना पज्जो पेय्स्तुर.
पजा येसु डोंगाताल रेय्तोर अस्के ओन्कु अगा वेल्लेने मंदि दिसतुर.
अय्ते येसुंक ओरपोर्रो दया वासि,
ओरा रोगाल्कुनंता बेस कीतोर.
15 पोड्दु होनना वेलाक सिस्युल्क येसुनगा वासि,
“गुरु,
इद जेगा अय्ते सुनसान मंता,
आनि वेला इंका बागेन आसेक मंता.
पोड्दु अर्रक मुन्नेन ईर दगेर नाहकुने होंचि ओराहाटीं तिनालय बतलन्ना अस्सी तायिर,
ईरकुन लोहा,”
इंचि इत्तुर.
16 अस्के “ओर्क बेके होनना अम्सरम हिल्ले,
मिमेटे ओर्कु बतलन्ना तिनालय हीम्टु,”
इंचि येसु इत्तोर.
17 अस्के सिस्युल्क “महगा अय्ते सिराप हेय्युं हारिं आनि रोंडु जिम्मां मंतां,”
इंचि इत्तुर.
18 पजा येसु “अय्ते अवुन नहगा पीसवटु,”
इंचि इत्तोर.
19 आनि अगा मत्ता मंदितुन जाडी पोर्रो उद्दा वेहतोर.
पज्जो अव हेय्युं हारिं आनि रोंडु जिम्मां पीसि पोर्रो हूळतोर आनि पेनदुक दन्यवाद कीसि,
हारिन तुकडां कीतोर.
पजा आ तुकडन सिस्युल्कुंक हीतोर,
आनि सिस्युल्क बारे लोकुल्कुंक हीतुर.
20 अस्के ओर अंटोर पीरनिंडा तित्तुर.
अंटोर तिननेंके मिगुल्ता हारिना तुकडां ओर जमा कीतुर अय्ते पन्नेंड तट्टां पेय्सतां.
21 तित्ता मंदिताल हेय्युं वेय्कु (5000) मांडसे मत्तुर,
इंका मुर्ताह्क,
पिलाल्कुनद अय्ते लेक्के हिल्ले!
येसु एता पोर्रो ताकतोर
22 पजा अस्केन येसु अंटोर लोकुल्कुन सार्ला कियाका मुन्नेन ओना सिस्युल्कुन उंदि डोंगाते उपिच्चि ओनकन्ना मुन्नेन सेरवुना हब्बेटा बाजुंक दाटसि होनालय वेहतोर.
23 लोकुल्कुन अंटुर्कुन सार्ला कीता पज्जो,
येसु वरोरे गुट्टापोर्रो पारतना कियालय होत्तोर.
पोड्दु होनिना गानि ओर वरोरे अगा मत्तोर.
24 अद वेलाते सिस्युल्कुना डोंगा सेरवुना ओड्डुनाल वेल्लेन लक्कु होंचि मत्ता.
अस्के ओर्क एदुर वडि वायालय दल्गुताहेंका एता तडांक डोंगा डव्क-डिव्क आयालय दल्गुता.
25 नर्कटां मूंड-नालूं एगनेंके येसु एता पोर्रोटाल ताकसेक ओरहेके वातोर.
26 ओर एता पोर्रोटाल ताकसेक वायानद हूळसि सिस्युल्क,
“देय्यम वासंता!”
इंचि वेरियसि वरगेयालय दल्गुतुर.
27 अस्के येसु बिराने ओर्कुन,
“ननाने आंदुन,
वेरियमट,
दैर्नेम इर्राट,”
इंचि इत्तोर.
28 पजा पत्रु येसुन,
“सामि,
निमेने गिंटा आयानय्ते नाकुन निहेके एता पोर्रोटाल ताकसेक वायलय वेहा,”
इंचि इत्तोर.
29 “अय्ते हीके वा,”
इंचि येसु इत्तोर.
अस्के पत्रु डोंगाताल रेय्सि एता पोर्रोटाल ताकसेक येसुनहेके होनालय दल्गुतोर.
30 गानि वडी वायनद हूळसि,
वेरियसि मुळगालय दल्गुतोर.
अस्के “गुरु,
नाकुन पिसागोट्टा,”
इंचि मोत्कुत्तोर.
31 अस्के येसु बिराना कय हाह्सि ओन पीतोर,
आनि “अरे तक्को विस्वासमतोना,
निमे ना पोर्रो अनमानम बारी कीतिन?”
इंचि इत्तोर.
32 पजा ओर इव्वुर डोंगा एकतस्के,
वडि वायमळ आगुता.
33 अस्के डोंगाते मत्तोर,
“सामि,
निमे निजमे पेनदा मर्रिन” इंचि ओना काल्कुनपोर्रो अरतुर.
येसु वेल्लेन बिमारतोर्कुन बेस कींतोर
34 पजा ओर अद सेरवु दाटसि गेनेसरेत इनना नाटे वातुर.
35 अगाटा लोकुल्क येसुन एरपाट कीतुर अस्के दगेर पट्कुनाव अन्नि नाहकुंक कबुर लोहतुर आनि बिमारते मत्तोर्कुन अंटुर्कुन पीसि वातुर.
36 पजा “गुरु,
नीवा कप्पिडता अंचुन इच्चुर इट्टा हीम,
अस्के मोमोट बेस आंतोम,”
इंचि बिमारकु मत्तोर विनंति कीतुर.
आनि बचटूर अय्ते ओना अंचुन इटतुरो,
ओर अंटोर पुरागा बेस आतुर.